Category: پشاور

خیبر پختونخوا کے ضلع ڈیرہ اسماعیل خان (ڈی آئی خان) میں پولیس وین پر دہشت گردوں کی فائرنگ کے نتیجے میں اے ایس آئی سمیت دو پولیس اہلکار شہید ہوگئے۔

کاؤنٹر ٹیررازم ڈیپارٹمنٹ (سی ٹی ڈی) حکام کے مطابق واقعہ درابن کے علاقے شاہ عالم موڑ پر پیش آیا، جہاں نامعلوم مسلح افراد نے پولیس وین کو نشانہ بنا کر اندھا دھند فائرنگ کردی۔سی ٹی ڈی کے مطابق حملے میں ایک اے ایس آئی سمیت دو اہلکار موقع پر ہی شہید ہوگئے، جبکہ پولیس نے فوری جوابی کارروائی کرتے ہوئے دہشت گردوں کا تعاقب کیا، تاہم حملہ آور فرار ہونے میں کامیاب ہوگئے۔

حکام کا کہنا ہے کہ پولیس کی نفری دہشت گردوں کی موجودگی کی اطلاع پر کارروائی کے لیے جا رہی تھی کہ راستے میں گھات لگائے مسلح افراد نے حملہ کردیا۔واقعے کے بعد علاقے میں سیکیورٹی فورسز اور پولیس کی اضافی نفری تعینات کردی گئی ہے، جبکہ فرار ہونے والے حملہ آوروں کی گرفتاری کے لیے سرچ آپریشن شروع کردیا گیا ہے۔ دوسری جانب شہید اہلکاروں کی لاشیں ضروری کارروائی کے بعد اسپتال منتقل کردی گئیں، جہاں سے انہیں مکمل سرکاری اعزاز کے ساتھ سپردِ خاک کیا جائے گا۔

اسلام آباد: پاکستان کے شمالی علاقہ جات میں واقع دنیا کی بارہویں بلند ترین چوٹی براڈ پیک (8,047 میٹر) پر برفانی تودہ گرنے کے نتیجے میں معروف نیپالی کوہ پیما نمس دائی اور پاکستانی کوہ پیما سہیل سخی سمیت تقریباً 10 کوہ پیما لاپتا ہونے کا خدشہ ظاہر کیا گیا ہے، جبکہ کئی گھنٹوں سے تمام کوہ پیماؤں سے رابطہ منقطع ہے۔

الپائن کلب آف پاکستان نے واقعے کی تصدیق کرتے ہوئے بتایا کہ جمعرات کی دوپہر براڈ پیک پر کوہ پیماؤں کے ایک گروپ پر اچانک برفانی تودہ آ گرا، جس کے بعد سے متاثرہ ٹیم کے ارکان سے کوئی رابطہ نہیں ہو سکا۔
الپائن کلب کے مطابق متاثرہ ٹیم میں نیپال کے پانچ کوہ پیما شامل ہیں جن کی قیادت دنیا کے معروف کوہ پیما نمس دائی کر رہے تھے۔ ٹیم میں ہنزہ سے تعلق رکھنے والے پاکستانی کوہ پیما سہیل سخی، عمانی کوہ پیما نذیرہ، امریکی کوہ پیما میلوری گیس، چینی کوہ پیما مسٹر وانگ اور ایک دیگر غیر ملکی کوہ پیما بھی شامل ہیں۔

الپائن کلب آف پاکستان کے صدر میجر جنرل عرفان ارشد نے بتایا کہ سرچ اینڈ ریسکیو آپریشن کے لیے اعلیٰ حکومتی حکام اور متعلقہ اداروں سے مسلسل رابطہ کیا جا رہا ہے، جبکہ موسم اور آپریشنل حالات کو مدنظر رکھتے ہوئے ہیلی کاپٹر سمیت تمام دستیاب امدادی وسائل کو جلد از جلد متحرک کرنے کی کوششیں جاری ہیں۔

دوسری جانب براڈ پیک بیس کیمپ پر موجود ذرائع نے بھی فوری ہیلی کاپٹر ریسکیو آپریشن شروع کرنے کی اپیل کی ہے تاکہ لاپتا کوہ پیماؤں تک بروقت رسائی ممکن بنائی جا سکے۔الپائن کلب آف پاکستان نے اپنے بیان میں کہا ہے کہ وہ صورتحال پر مسلسل نظر رکھے ہوئے ہے اور تمام متعلقہ اداروں کے ساتھ رابطے میں ہے۔ کلب نے لاپتا کوہ پیماؤں کی بحفاظت بازیابی کے لیے دعا کی اپیل کرتے ہوئے کہا کہ واقعے سے متعلق مزید معلومات موصول ہوتے ہی جاری کی جائیں گی۔

واضح رہے کہ قراقرم کے پہاڑی سلسلے میں کے ٹو کے قریب واقع براڈ پیک سطح سمندر سے 8,047 میٹر بلند دنیا کی بارہویں بلند ترین چوٹی ہے، جو اپنی دشوار گزار چڑھائی اور سخت موسمی حالات کے باعث دنیا بھر کے کوہ پیماؤں کے لیے ایک بڑا چیلنج سمجھی جاتی ہے۔

ڈی آئی خان پولیس لائنز کے مال خانے میں دھماکہ، بم ڈسپوزل سکواڈ کے انچارج عنایت اللہ عرف "ٹائیگر” زخمی ہو گئے

ڈیرہ اسماعیل خان پولیس لائنز میں بم ڈسپوزل سکواڈ یونٹ کے انچارج عنایت اللہ عرف "ٹائیگر” کے کمرے کے قریب واقع مال خانے میں زور دار دھماکہ ہوا۔ ابتدائی اطلاعات کے مطابق دھماکے کے بعد مال خانے میں موجود ہینڈ گرنیڈ بھی یکے بعد دیگرے پھٹ گئے، جس سے دھماکوں کی شدت میں اضافہ ہوگیا۔دھماکے کے باعث بم ڈسپوزل سکواڈ کے انچارج کے کمرے کی دیواریں اور چھت منہدم ہوگئیں، جس کے نتیجے میں عنایت اللہ عرف "ٹائیگر” زخمی ہوگئے۔ انہیں فوری طور پر طبی امداد کے لیے ہسپتال منتقل کر دیا گیا۔
پولیس کے مطابق دھماکے کی نوعیت اور وجوہات جاننے کے لیے تحقیقات شروع کر دی گئی ہیں۔

باجوڑ: ضلع باجوڑ کی تحصیل وڑہ ماموند میں واقع گورنمنٹ پرائمری سکول لوئی خرکی کو نامعلوم دہشت گردوں نے گزشتہ رات دھماکہ خیز مواد سے اڑا دیا، جس کے نتیجے میں سکول کی عمارت کو شدید نقصان پہنچا۔

ابتدائی اطلاعات کے مطابق دھماکے کے وقت سکول میں کوئی موجود نہیں تھا، جس کے باعث کسی قسم کا جانی نقصان نہیں ہوا۔ تاہم دھماکے سے سکول کی عمارت کا بڑا حصہ تباہ ہوگیا اور تعلیمی سرگرمیاں متاثر ہونے کا خدشہ پیدا ہوگیا ہے۔واقعے کی اطلاع ملتے ہی مقامی انتظامیہ اور قانون نافذ کرنے والے ادارے موقع پر پہنچ گئے اور علاقے کو گھیرے میں لے کر شواہد اکٹھے کرنا شروع کر دیے۔ حکام کے مطابق واقعے کی تحقیقات جاری ہیں اور ذمہ دار عناصر کی تلاش کے لیے کارروائی شروع کر دی گئی ہے۔

مقامی افراد نے تعلیمی ادارے کو نشانہ بنانے کے واقعے کی شدید مذمت کرتے ہوئے مطالبہ کیا ہے کہ ملوث عناصر کو فوری گرفتار کرکے قانون کے کٹہرے میں لایا جائے اور سکول کی عمارت کی جلد از جلد تعمیر نو یقینی بنائی جائے تاکہ بچوں کی تعلیم متاثر نہ ہو۔

پشاور: پاکستان تحریک انصاف (پی ٹی آئی) خیبر پختونخوا کی پارلیمانی پارٹی کا اجلاس اندرونی اختلافات کے باعث ہنگامہ آرائی کی نذر ہوگیا، جہاں بانی پی ٹی آئی کی رہائی کے لیے آئندہ لائحہ عمل پر مشاورت کے دوران ناراض ارکان اور قیادت کے درمیان تلخ جملوں کا تبادلہ ہوا۔

ذرائع کے مطابق وزیراعلیٰ خیبر پختونخوا سہیل آفریدی کی تقریر کے بعد ناراض دھڑے کے ارکان نے سخت مؤقف اختیار کیا، جس سے اجلاس کا ماحول کشیدہ ہوگیا۔ ارکان کی جانب سے کیے گئے سخت ریمارکس پر وزیراعلیٰ نے بھی برہمی کا اظہار کیا۔ذرائع کا کہنا ہے کہ وزیراعلیٰ نے ناراض ارکان کو ان کے تحفظات دور کرنے کی یقین دہانی کرائی، تاہم اس کے باوجود متعدد ارکان اجلاس کا بائیکاٹ کرتے ہوئے واک آؤٹ کر گئے۔

رکن صوبائی اسمبلی فضل الہٰی نے بتایا کہ اجلاس میں تمام ارکان نے شرکت کی، تاہم ناراض اراکین نے مطالبہ کیا کہ جس طرح سینیٹ انتخابات کے موقع پر حلف لیا گیا تھا، اسی طرح بانی پی ٹی آئی کی رہائی کی تحریک کے لیے بھی تمام ارکان سے باقاعدہ حلف لیا جائے۔فضل الہٰی کا کہنا تھا کہ بانی پی ٹی آئی کی رہائی صرف بیانات اور تقاریر سے ممکن نہیں بلکہ اس کے لیے عملی اقدامات کی ضرورت ہے۔ انہوں نے کہا کہ جب ناراض ارکان نے یہ مطالبات پیش کیے تو قیادت نے اسے ناپسند کیا، جس کے باعث اجلاس میں تلخی پیدا ہوئی۔

بنوں کے علاقوں ممباتی برکزئی اور خنی کلہ میں پولیس اور سیکیورٹی فورسز نے مشترکہ سرچ اینڈ کومبنگ آپریشن کے دوران دہشت گردی کا ایک بڑا منصوبہ ناکام بنا دیا۔ کارروائی کے دوران بم ڈسپوزل یونٹ نے مختلف مقامات پر نصب 6 دیسی ساختہ بم (IEDs) بروقت ناکارہ بنا دیے۔

پولیس کے مطابق دہشت گردوں نے یہ بم آمدورفت کے اہم راستوں اور پلوں کے قریب نصب کیے تھے تاکہ سیکیورٹی فورسز اور عام شہریوں کو نشانہ بنایا جا سکے۔ بروقت کارروائی کے باعث کسی بھی قسم کا جانی یا مالی نقصان نہیں ہوا۔حکام کا کہنا ہے کہ ناکارہ بنائے گئے تمام بموں میں مجموعی طور پر تقریباً 120 کلو گرام بارودی مواد موجود تھا، جو انتہائی خطرناک نوعیت کا تھا اور بڑے پیمانے پر تباہی پھیلانے کی صلاحیت رکھتا تھا۔

پولیس اور سیکیورٹی فورسز نے آپریشن کے دوران علاقے کی مکمل تلاشی لی جبکہ مشتبہ افراد کی تلاش بھی جاری ہے۔ حکام کے مطابق علاقے میں امن و امان کی صورتحال برقرار رکھنے اور دہشت گردوں کے عزائم ناکام بنانے کے لیے سرچ اینڈ کومبنگ آپریشنز کا سلسلہ آئندہ بھی جاری رکھا جائے گا۔سیکیورٹی ذرائع نے اس کامیاب کارروائی کو دہشت گردی کے خلاف جاری اقدامات میں اہم پیش رفت قرار دیتے ہوئے کہا ہے کہ عوام کے جان و مال کے تحفظ کے لیے ہر ممکن اقدامات کیے جا رہے ہیں اور تخریب کاری کی کسی بھی کوشش کو بروقت ناکام بنایا جائے گا۔

مردان: خیبرپختونخوا کے ضلع مردان میں افسوسناک حادثے کے نتیجے میں گھر کی چھت گرنے سے دو کمسن بچے جاں بحق جبکہ ماں اور ایک بیٹی شدید زخمی ہوگئیں۔

ریسکیو ذرائع کے مطابق یہ واقعہ مردان کے علاقے رستم کالوڈھیری میں پیش آیا، جہاں اچانک مکان کی چھت منہدم ہوگئی۔ حادثے کے باعث ملبے تلے دب کر 2 سالہ حسین اور ایک سالہ زنیرہ جاں بحق ہوگئے۔اطلاع ملتے ہی ریسکیو 1122 کی ٹیمیں موقع پر پہنچ گئیں اور فوری طور پر امدادی کارروائیاں شروع کیں۔ امدادی اہلکاروں نے ملبے تلے دبی ہوئی ماں اور ایک بیٹی کو شدید زخمی حالت میں نکال کر ابتدائی طبی امداد کے بعد قریبی اسپتال منتقل کردیا، جہاں انہیں علاج معالجہ فراہم کیا جا رہا ہے۔ریسکیو حکام کے مطابق متاثرہ مکان سے ملبہ ہٹانے اور علاقے کا مکمل جائزہ لینے کا عمل جاری ہے .