Category: پشاور

پاک فوج کی بروقت مدد کے باوجود باجوڑ کا جار پل صوبائی حکومت کی توجہ سے محروم ہے

اگست 2025ء میں آنے والے تباہ کن سیلاب کے باعث باجوڑ کی سب سے بڑی سڑک اور جارپل بھی تباہ ہو گئے تھے،عوامی مشکلات کو دیکھتے ہوئے پاک فوج کے انجینئرزنے فوری طور پر عارضی پل تعمیر کیا تھا،اسی عارضی پل کے ذریعے عوام کی آمدو رفت جاری رہی،پاک فوج کی فوری اور بروقت مدد اور صوبائی حکومت کی نااہلی کے بارے میں عوام کا کہنا ہے کہ ہم پاک فوج کے مشکور ہیں کیونکہ اس پل کے تباہ ہونے سے ہم بہت تکلیف میں تھے،پاک فوج نے ہماری مشکلات کو دیکھتے ہوئے عارضی طور پر پل قائم کیا، اس عارضی پل کے بعد صوبے کی جانب سے اس پر کوئی کام نہیں کیا گیا ، میں پاک فوج کا مشکور ہوں جس نے سیلاب کے فوراً بعد یہ عارضی پل بنایا،حکومت سے مطالبہ ہے کہ جو فنڈز مہیا کئے گئے ہیں اس پر جلد از جلد کام شروع کیا جائے،کچھ روز قبل ہمارے ایم پی اے بڑے دعوے کر رہے تھے کہ اس کی منظوری ہو چکی ہے ،صوبائی حکومت کہتی ہے کہ کام آج کل شروع کردینگے لیکن کوئی نہیں آیا اور پل خراب پڑا ہے،صوبائی حکومت کی جانب سے ابھی تک رابطہ پل پر کوئی کام نہیں ہوا اور نہ ہی کسی صوبائی وزیر کو اس کا خیال آیا ہے، نہ ہی اب تک مشینیں آئی ہیں اور نہ ہی کام شروع ہوسکا ہے، پاک فوج نے فوری طور پر لوہے کا پل بنایا، اللہ اسکا بھلا کرے.

ٹیکس آفس پشاور نے ضلع صوابی کے علاقے انبار میں بڑی کارروائی کرتے ہوئے لاکھوں کلوگرام غیر قانونی طور پر ذخیرہ شدہ تمباکو برآمد کر لیا۔ کارروائی کے دوران ایک جی ایل ٹی (Green Leaf Threshing) یونٹ مکمل طور پر فعال حالت میں پایا گیا، جہاں بھاری مقدار میں تمباکو موجود تھا جسے تحویل میں لے لیا گیا۔

ایف بی آر ذرائع کے مطابق کارروائی کے دوران مجموعی طور پر 5 لاکھ 14 ہزار 596 کلوگرام ہینڈ اسٹیمڈ لیمینا، 35 ہزار 280 کلوگرام تمباکو اسٹیم اور 74 ہزار 800 کلوگرام گرین لیف برآمد کیا گیا۔ ذرائع کا کہنا ہے کہ برآمد شدہ تمباکو کی مقدار غیر معمولی طور پر زیادہ ہے جو بڑے پیمانے پر غیر قانونی تمباکو مینوفیکچرنگ اور ذخیرہ اندوزی کی نشاندہی کرتی ہے۔حکام کے مطابق برآمد ہونے والا تمباکو ایک نجی ٹوبیکو کمپنی کے نام پر موجود تھا، جبکہ یونٹ کے مالک کی شناخت ربنواز کے نام سے ہوئی ہے۔ ابتدائی تحقیقات میں یہ بات سامنے آئی ہے کہ مذکورہ یونٹ میں تمباکو کی پروسیسنگ اور ذخیرہ فیڈرل ایکسائز ایکٹ 2005 کی کھلی خلاف ورزی کے تحت کی جا رہی تھی۔

ٹیکس حکام کا کہنا ہے کہ قانون کی خلاف ورزی ثابت ہونے پر گودام اور تمام مشینری کو سیل کر دیا گیا ہے، جبکہ ابتدائی شواہد کے مطابق اس غیر قانونی سرگرمی کے ذریعے اربوں روپے کی ٹیکس چوری کی جا رہی تھی۔ حکام نے واضح کیا ہے کہ غیر قانونی تمباکو مینوفیکچرنگ، ذخیرہ اندوزی اور ٹیکس چوری کے خلاف زیرو ٹالرنس پالیسی کے تحت کارروائیاں مزید تیز کی جائیں گی۔

ذرائع کے مطابق یہ کارروائی خصوصی عدالت سے حاصل کردہ سرچ وارنٹ کی بنیاد پر عمل میں لائی گئی، جبکہ کیس میں مزید قانونی کارروائی اور تفصیلی تحقیقات کا باقاعدہ آغاز کر دیا گیا ہے۔ ایف بی آر حکام نے عندیہ دیا ہے کہ اس نیٹ ورک سے جڑے دیگر افراد اور اداروں کے خلاف بھی جلد کارروائیاں متوقع ہیں۔

لکی مروت میں پولیس کی دہشتگردوں کے ساتھ جھڑپ میں سیمنٹ فیکٹری کی بس پر دھماکا کرنے والا ایک دہشت گرد مارا گیا، جھڑپ کے دوران ایک پولیس اہلکار بھی شدید زخمی ہوا۔

آج لکی مروت میں سیمنٹ فیکٹری کی بس کو بم دھماکے کا نشانہ بنایا گیا، واقعے میں ایک شخص جاں بحق اور متعدد افراد زخمی ہوئے تھے۔پولیس کے مطابق لکی مروت میں دہشت گردوں کے ساتھ جھڑپ ہوئی، فائرنگ کے تبادلے میں بس پر دھماکا کرنے والا دہشتگرد مارا گیا، جھڑپ میں ایک پولیس اہلکار بھی شدید زخمی ہوا۔پولیس کا کہنا ہے کہ علاقے میں سرچ آپریشن جاری ہے، ریجنل پولیس آفیسر سجاد خان اور ڈسٹرکٹ پولیس آفیسر نذیر خان بھی موقع پر موجود ہیں، پولیس کی مدد کیلئے پولیس امن کمیٹی کے سیکڑوں جوان بھی موقع پر پہنچ گئے۔

لکی مروت اور بنوں میں فائرنگ کے واقعات میں 4 پولیس اہلکار شہید ہوگئے۔

لکی مروت پولیس کے ترجمان کے مطابق سرائے نورنگ شہر میں نامعلوم موٹر سائیکل سوار دہشتگردوں نے فائرنگ کی جس سے ڈیوٹی پر مامور 3 ٹریفک پولیس اہلکار شہید ہوگئے، فائرنگ کے واقعے میں انچارج ٹریفک پولیس نورنگ جلال خان، کانسٹیبل عزیز اللہ اور کانسٹیبل عبداللہ شہید ہوئے،ترجمان کے مطابق نامعلوم موٹرسائیکل سوار دہشتگرد فائرنگ کے بعد فرار ہوگئے، شہید پولیس اہلکاروں کی لاشیں تحصیل ہیڈ کوارٹر اسپتال سرائے نورنگ منتقل کردی گئی ہے۔

دوسری جانب بنوں پولیس کا کہنا ہے کہ منڈان میں نامعلوم افراد کی فائرنگ سے پولیس اہلکار شہید ہوگیا، کانسٹیبل رشید خان گھر سے ڈیوٹی پر تھانا منڈان جا رہا تھا کہ مسلح افراد کی فائرنگ سے شہید ہوگیا۔

وزیراعلی خیبرپختونخوا سہیل آفریدی نے لکی مروت میں فائرنگ کے واقعہ کی مذمت کی ہے، انہوں نے دہشتگردوں کی فائرنگ سے شہید ٹریفک پولیس اہلکاروں کے لواحقین سے اظہار تعزیت کیا،سہیل آفریدی نے کہا واقعہ افسوسناک ہے، شہید پولیس اہلکاروں کی قربانیاں رائیگاں نہیں جائیں گی، بزدلانہ حملوں سے ملک دشمن عناصر اپنے مذموم عزائم میں کامیاب نہیں ہوں گے، دہشت گردی کے خلاف جنگ میں پولیس اہلکار فرنٹ لائن پر قربانیاں دے رہے ہیں، ملوث عناصر کو قانون کے کٹہرے میں لا کر کیفرِ کردار تک پہنچایا جائے گا،صوبائی حکومت پولیس فورس کے شانہ بشانہ کھڑی ہے، شہداء کے لواحقین کو ہرممکن معاونت فراہم کی جائے گی۔

خیبر پختونخوا میں سال 2025 کے دوران دہشت گردی کے واقعات میں تشویشناک حد تک اضافہ دیکھنے میں آیا ہے۔ کاؤنٹر ٹیررازم ڈیپارٹمنٹ (CTD) کی جاری کردہ سالانہ رپورٹ کے مطابق صوبے کو مسلسل اور بدلتے ہوئے سکیورٹی خطرات کا سامنا رہا، خصوصاً قبائلی اضلاع اور جنوبی علاقوں میں حالات زیادہ سنگین رہے۔

سی ٹی ڈی رپورٹ کے مطابق سال 2025 میں صوبے بھر میں 1,762 دہشت گردی کے واقعات پیش آئے۔ ان واقعات میں مجموعی طور پر 707 افراد جان بحق ہوئے، جن میں 159 پولیس اہلکار شامل ہیں، جبکہ 272 افراد زخمی ہوئے۔
دہشت گردوں کے خلاف کارروائیوں کے دوران سکیورٹی فورسز نے 395 شدت پسندوں کو ہلاک کیا۔ اسی عرصے میں 9 خودکش حملے بھی ریکارڈ کیے گئے، جو ایک خطرناک رجحان کی نشاندہی کرتے ہیں۔

رپورٹ کے مطابق بنوں میں دہشتگردی کے 430 واقعات،شمالی وزیرستان میں 213 واقعات،ڈی آئی خان میں 137 واقعات،جنوبی وزیرستان میں111 واقعات پیش آئے،یہ اعداد و شمار واضح کرتے ہیں کہ جنوبی اور قبائلی اضلاع بدستور دہشت گردوں کا مرکزی ہدف رہے۔سال 2025 میں دہشت گردوں نے مختلف طریقوں سے حملے کیے،فائرنگ کے واقعات 628 (14 اضلاع میں)پیش آئے،آئی ای ڈی دھماکے 179 ہوئے،ہینڈ گرنیڈ حملے 71 کئے گئے، راکٹ ،میزائل حملے کئے گئے، 80 ڈرون حملے کئے گئے،یہ تنوع اس بات کی عکاسی کرتا ہے کہ دہشت گرد گروہ نت نئے طریقے اپنا رہے ہیں۔

رپورٹ میں دیگر سنگین جرائم کا بھی انکشاف کیا گیا، جن میں 88 اغوا کے واقعات ،149 بھتہ خوری کے کیسز، 117ٹارگٹ کلنگ،151سہولت کاری (Facilitation) کے کیسز،26 دہشت گردی کی مالی معاونت کے کیسز شامل ہیں،سی ٹی ڈی کی رپورٹ کے مطابق 2025 میں خیبر پختونخوا کو ایک مسلسل، منظم اور بدلتے ہوئے دہشت گردی کے خطرے کا سامنا رہا۔ حملوں کی نوعیت، جغرافیائی پھیلاؤ اور جرائم کی اقسام اس بات کی نشاندہی کرتی ہیں کہ سکیورٹی اداروں کو نہ صرف آپریشنل سطح پر بلکہ انٹیلی جنس اور مالیاتی نگرانی کے شعبوں میں بھی مزید مؤثر حکمت عملی اپنانا ہوگی۔رپورٹ اس امر پر زور دیتی ہے کہ صوبے میں امن کے قیام کے لیے سکیورٹی اداروں، سول انتظامیہ اور عوام کے درمیان مضبوط تعاون ناگزیر ہے۔

شمالی وزیرستان کے علاقے میرعلی میں دہشتگردی کا سنگین واقعہ پیش آیا، جہاں گاؤں حسوخیل میں قائم الفاتح پبلک ہائی اسکول کو ڈرون حملے کا نشانہ بنایا گیا۔ پولیس کے مطابق حملے کے نتیجے میں اسکول کے تین عملے کے افراد زخمی ہو گئے، جن میں اسکول کے پرنسپل بھی شامل ہیں۔

پولیس کا کہنا ہے کہ دہشتگردوں نے اسکول کی عمارت کو نشانہ بناتے ہوئے ڈرون کے ذریعے دھماکہ خیز مواد گرایا، جس سے اسکول کی عمارت کو جزوی نقصان پہنچا اور خوف و ہراس پھیل گیا۔واقعے کے فوراً بعد زخمی افراد کو طبی امداد فراہم کرنے کے لیے ریسکیو 1122 کی ٹیم جائے وقوعہ پر پہنچی، مگر اسی دوران حملہ آوروں نے ایک بار پھر ڈرون کا استعمال کرتے ہوئے ریسکیو اہلکاروں کو نشانہ بنایا۔ دوسرے حملے کے نتیجے میں متعدد ریسکیو اہلکار بھی زخمی ہو گئے، جنہیں فوری طور پر قریبی ہسپتال منتقل کیا گیا۔پولیس حکام کا کہنا ہے کہ تعلیمی اداروں اور ریسکیو عملے کو نشانہ بنانا دہشتگردوں کی بزدلانہ کارروائی ہے، جس کا مقصد علاقے میں خوف پھیلانا ہے۔ حکام کے مطابق واقعے میں ملوث عناصر کو جلد قانون کے کٹہرے میں لایا جائے گا اور علاقے میں سکیورٹی مزید سخت کر دی گئی ہے۔

وادی تیراہ میں عسکریت پسندوں نے جرگہ ممبر کو اغواء کر لیا
جرگہ کے دیگر ممبران کا عسکریت پسندوں کے خلاف مقامی مزاحمت شروع کرنے کا فیصلہ
ذرائع کے مطابق وادی تیراہ میں 24 رکنی جرگہ کے ایک ممبر ملک اسلام غنی کو اغواء کرنے کے بعد جرگہ کے دیگر ممبران نےعسکریت پسندوں کے خلاف مقامی مزاحمت شروع کرنے پر مشاورت شروع کردی اور اس حوالے سےجرگہ طلب کرنے کا فیصلہ کیا ہے ،جرگہ کے ایک ممبر نے بات کرتے ہوئے کہا کہ انہوں نے دہشت گردوں کو واضح پیغام بھیجا ہے کہ اگر جرگہ ممبر کو کسی بھی قسم کا نقصان پہنچایا گیا تو پھر اہل علاقہ ان کے خلاف اسلحہ اٹھاکر نہ صرف بدلہ لیں گے بلکہ علاقہ سے دہشت گردوں کا صفایا کرنے اور نکالنے کیلئے سکیورٹی فورسز اور پولیس کا بھی ساتھ دینگے۔

سنٹرل کرم :سکیورٹی فورسز کی کارروائی ، کالعدم تنظیم کے انتہائی مطلوب سمیت 11 دہشتگرد ہلاک؛
ذرائع کے مطابق سکیورٹی فورسز نے سنٹرل کرم کے علاقہ مارغن میں انٹیلی جنس بیسڈ آپریشن کرکے کالعدم ٹی ٹی پی کاظم گروپ کے 11 دہشت گردوں کو ہلاک کردیا،مصدقہ اطلاعات کے مطابق، مقابلے کے دوران ایک ہائی ویلیو ٹارگٹ مارے جانے کی بھی اطلاعات ہیں۔