Category: رحیم یارخان

رحیم یار خان (باغی ٹی وی) صادق آباد کے علاقے ماہی چوک کے قریب واقع شیخانی پولیس چوکی پر کچے کے درجنوں ڈاکوؤں نے رات کی تاریکی میں راکٹ لانچرز اور جدید اسلحے سے حملہ کر دیا، جس کے نتیجے میں ایلیٹ فورس کے 5 اہلکار شہید جبکہ 2 زخمی ہو گئے۔ فائرنگ کے تبادلے میں ایک ڈاکو بھی ہلاک ہو گیا۔ شہید اہلکاروں کی شناخت محمد عرفان، محمد سلیم، خلیل احمد، غضنفر عباس اور نخیل حسین کے نام سے ہوئی ہے۔

پولیس ترجمان کے مطابق شہید ہونے والے 3 اہلکاروں کا تعلق بہاول نگر جبکہ 2 کا تعلق رحیم یار خان سے ہے۔ یہ تمام اہلکار گزشتہ 6 ماہ سے کچے کے علاقے میں ڈیوٹی سرانجام دے رہے تھے۔ شہدا کی تدفین مکمل سرکاری اعزاز کے ساتھ کی جائے گی۔

واقعے کی اطلاع ملنے پر ڈی پی او عرفان علی سموں پولیس نفری کے ہمراہ موقع پر پہنچے اور جوابی کارروائی کی قیادت کی۔ پولیس کے مطابق ڈاکوؤں کا تعاقب جاری ہے اور علاقے میں سرچ آپریشن مزید تیز کر دیا گیا ہے۔

آئی جی پنجاب ڈاکٹر عثمان انور نے واقعے کا فوری نوٹس لیتے ہوئے آر پی او بہاولپور سے تفصیلی رپورٹ طلب کر لی ہے۔ انہوں نے ڈی پی او رحیم یار خان کو فائرنگ میں ملوث تمام ڈاکوؤں کی فوری گرفتاری کا حکم دیتے ہوئے کہا کہ پنجاب پولیس اپنے شہدا کے خون کو رائیگاں نہیں جانے دے گی۔

آئی جی پنجاب کا کہنا تھا کہ بزدلانہ حملے سے پولیس کا مورال پست نہیں ہوگا، بلکہ ان قربانیوں سے ہمارے عزم کو مزید تقویت ملتی ہے۔ انہوں نے شہید اہلکاروں کو خراج عقیدت پیش کرتے ہوئے کہا کہ ریاست دشمن عناصر کو کیفر کردار تک پہنچایا جائے گا اور کچے کے ڈاکوؤں کے خلاف آپریشن بھرپور طاقت کے ساتھ جاری رہے گا۔

پولیس ترجمان کے مطابق حملہ انتہائی منظم طریقے سے کیا گیا اور ڈاکو راکٹ لانچر اور خودکار ہتھیاروں سے لیس تھے۔ تاہم پولیس جوانوں نے بہادری سے مقابلہ کرتے ہوئے ایک ڈاکو کو مار گرایا اور دیگر کی تلاش جاری ہے۔

علاقے میں صورتحال تاحال کشیدہ ہے جبکہ پولیس کی بھاری نفری موقع پر موجود ہے۔ مقامی افراد نے بھی شہید اہلکاروں کو خراج عقیدت پیش کرتے ہوئے حکومتی سطح پر سخت کارروائی کا مطالبہ کیا ہے۔

صادق آباد(باغی ٹی وی رپورٹ)صحت کے نام پر فراڈ، نجی ہسپتال میں جعلی اپینڈکس آپریشنز ،ہسپتال سیل

رحیم یار خان کی تحصیل صادق آباد میں ایک نجی اسپتال کے ڈاکٹروں نے انسانیت کی تمام حدود پار کرتے ہوئے سادہ لوح دیہاتیوں کو ہوس زر کا نشانہ بنا ڈالا۔ سی ای او ہیلتھ کے مطابق، اس درندہ صفت عمل کا انکشاف چک 212 پی کے دیہاتیوں کے ساتھ کیا جانے والا غیر ضروری آپریشنز ہے۔ محض پندرہ دنوں کے قلیل عرصے میں اسپتال کے بدنام زمانہ ڈاکٹروں نے 24 افراد کے اپینڈکس کے آپریشن کیے، جن میں سے کئی مریض صرف ڈی ہائیڈریشن کا شکار تھے۔

یہ دل دہلا دینے والا واقعہ اس وقت سامنے آیا جب 29 مئی کو فیس بک پر ایک ویڈیو وائرل ہوئی، جس میں ایک مقامی رپورٹر نے صادق آباد ٹلو بنگلہ چک 212 پی میں اپینڈکس کی "پراسرار” بیماری کے پھیلنے کی اطلاع دی۔ رپورٹر کے مطابق ایک ہی خاندان کے 40 سے زائد بچے اس مرض میں مبتلا ہوئے، جن میں سے 25 کے آپریشن ہو چکے تھے جبکہ 15 ابھی تک ہسپتال میں داخل تھے۔ یہ رپورٹر کی کال اور اس کے بعد سی ای او ہیلتھ کی تحقیقات نے ہسپتال کے بھیانک جرم کا پردہ چاک کیا۔

سی ای او ہیلتھ نے فوری کارروائی کرتے ہوئے اس نجی ہسپتال کو سیل کر دیا ہے اور اس گھناؤنے جرم کی مکمل رپورٹ ہیلتھ کیئر کمیشن کو ارسال کر دی گئی ہے۔ محکمہ صحت کی ٹیم نے چک 212 پہنچ کر متاثرہ افراد کے الٹراساؤنڈ کیے ہیں تاکہ اس فراڈ کی گہرائی کا اندازہ لگایا جا سکے۔

محکمہ صحت پنجاب کے سیکرٹری صحت نے اس انسانیت سوز واقعے کا سخت نوٹس لیتے ہوئے ہسپتال کو سیل کرنے کے احکامات جاری کیے۔ یہ محض ایک اسپتال کو سیل کرنا نہیں بلکہ اس مافیا کو بے نقاب کرنا ہے جو صحت کی آڑ میں غریب اور مجبور لوگوں کی زندگیوں سے کھیل رہا ہے۔ یہ ایک ایسا جرم ہے جو انسانیت کے چہرے پر سیاہ دھبہ ہے اور اس کے ذمہ داروں کو عبرتناک سزا ملنی چاہیے۔

وزیراعظم پاکستان، وزیراعلیٰ پنجاب، ڈی سی رحیم یار خان اور محکمہ صحت کے اعلیٰ حکام سے فوری نوٹس لینے اور اس انسانیت دشمن فعل کے مرتکب افراد کو انصاف کے کٹہرے میں لانے کا پرزور مطالبہ کیا جاتا ہے۔ اس خاندان کو فوری طبی امداد اور قانونی چارہ جوئی میں مدد فراہم کی جائے۔ عوام الناس سے بھی گزارش ہے کہ اس ظلم کے خلاف آواز اٹھائیں اور اس مافیا کو بے نقاب کرنے میں مدد کریں۔

رحیم یار خان(باغی ٹی وی رپورٹ) موٹر وے ایم-5 پر افسوسناک حادثہ، بس ڈرائیور کی غفلت سے 4 افراد جاں بحق، 14 زخمی

رحیم یار خان کے قریب موٹر وے ایم-5 پر کشمور کے مقام پر ایک المناک ٹریفک حادثے میں 4 افراد جاں بحق اور 14 زخمی ہو گئے۔ حادثہ ایک مسافر بس اور مزدا گاڑی کے درمیان شدید تصادم کے نتیجے میں پیش آیا، جس کی بنیادی وجہ ڈرائیور کو نیند آنا اور غفلت برتنا قرار دی جا رہی ہے۔

ریسکیو 1122 کے مطابق حادثے کے فوراً بعد امدادی ٹیمیں موقع پر پہنچ گئیں اور زخمیوں کو طبی امداد فراہم کی گئی۔ ترجمان کے مطابق 3 افراد کو جائے وقوعہ پر ابتدائی طبی امداد دی گئی، جبکہ 11 شدید زخمیوں کو قریبی اسپتال منتقل کیا گیا، جہاں ان کا علاج جاری ہے۔

پولیس اور موٹروے حکام نے جائے حادثہ پر پہنچ کر شواہد اکٹھے کیے اور ٹریفک کو متبادل راستوں پر منتقل کیا۔ ابتدائی تحقیقات سے یہ بات سامنے آئی ہے کہ بس ڈرائیور غفلت کا مظاہرہ کرتے ہوئے نیند کی حالت میں گاڑی چلا رہا تھا، جس کے باعث یہ سانحہ رونما ہوا۔

جاں بحق افراد کی شناخت کا عمل مکمل کر لیا گیا ہے اور ان کے لواحقین کو اطلاع دے دی گئی ہے۔ حادثے سے متعلق مزید تفتیش جاری ہے۔