Category: سرگودھا

سرگودھا (باغی ٹی وی،نامہ نگارملک شاہنوازجالپ)سرگودھا میں ڈویثرنل بلدیاتی کنونشن سے خطاب کرتے ہوئے گورنر پنجاب سردار سلیم حیدر نے کہا کہ عوام نوشتہ دیوار پڑھ لیں، اگلا وزیر اعظم بلاول بھٹو ہوگا۔ انہوں نے واضح کیا کہ ہم حکومت کے ساتھ محبت میں نہیں بلکہ مجبوری میں ہیں، جبکہ ائیر کنڈیشنر کمروں میں بننے والی پالیسیوں سے عوام مایوس اور پریشان ہیں۔ سردار سلیم حیدر نے پیپلز پارٹی کو غریب اور کمزور کی آواز قرار دیتے ہوئے کہا کہ پریشان عوام کے پاس پارٹی کے علاوہ کوئی متبادل نہیں۔

گورنر پنجاب نے مزید کہا کہ پیپلز پارٹی نے ہمیشہ ذاتی مفادات کی بجائے ملکی مفادات کو ترجیح دی ہے اور عوامی مسائل کے حل میں پیش پیش رہی ہے۔

پیپلز پارٹی کے مرکزی سیکرٹری اطلاعات ندیم افضل چن نے خطاب میں پنجاب حکومت کو شدید تنقید کا نشانہ بناتے ہوئے کہا کہ صوبے میں سی سی ڈی کے ذریعے چھوٹے ڈاکوؤں کو مروایا جا رہا ہے، جبکہ بڑے ڈاکو بنک لوٹنے میں مصروف ہیں اور انہیں تحفظ دیا جا رہا ہے۔ انہوں نے کسانوں اور کاشتکاروں کی حالت زار پر بھی روشنی ڈالی اور کہا کہ کینو یا آلو کی فصلیں سب تباہ ہو رہی ہیں، جس سے کسان و کاشتکار شدید پریشان ہیں۔

سابق وزیر مملکت تسنیم احمد قریشی نے کنونشن سے خطاب میں بتایا کہ 31 جنوری کو لاہور میں صوبے بھر کے بلدیاتی نمائندوں اور عہدیداران کے لیے صوبائی کنونشن منعقد کیا جائے گا۔ ڈویثرنل بلدیاتی کنونشن میں سرگودھا ڈویژن کے پارٹی عہدیداروں اور جیالوں نے بڑی تعداد میں شرکت کی۔

سرگودھا (باغی ٹی وی،نامہ نگار ملک شاہنواز جالپ)سرگودھا پریس کلب کی ایگزیکٹو باڈی کا اہم اجلاس ہفتہ کے روز صدر عبدالحنان چوہدری کی صدارت میں منعقد ہوا، جس میں کلب کی تاریخ کی بڑی ممبر سازی سمیت متعدد اہم فیصلے کیے گئے۔ اجلاس کا آغاز تلاوتِ قرآنِ پاک اور نعتِ رسولِ مقبول ﷺ سے ہوا، بعد ازاں جنرل سیکرٹری نے شرکاء کو خوش آمدید کہا۔

اجلاس میں گزشتہ کارروائی کی توثیق کی گئی جبکہ خزانچی جاوید گجر نے کلب کے آمدن و اخراجات پر مشتمل تفصیلی رپورٹ پیش کی۔ اس موقع پر حال ہی میں منعقد ہونے والے سپورٹس گالا کی مالی تفصیلات بھی ایگزیکٹو باڈی کے سامنے رکھی گئیں، جنہیں تسلی بخش قرار دیا گیا۔

ایگزیکٹو باڈی نے سالانہ کارکردگی کا جائزہ لیتے ہوئے متفقہ طور پر انتخابات 2026–27 کے شیڈول، انتخابی ٹائم لائن اور طریقۂ کار کی منظوری دی، جبکہ الیکشن بورڈ کی تقرری کی بھی اصولی منظوری دے دی گئی۔ اجلاس کو بتایا گیا کہ الیکشن شیڈول اور فہرستِ ووٹران 31 جنوری کو آویزاں کی جائے گی۔

اجلاس کے دوران کلب کی رکنیت میں توسیع کا تاریخی فیصلہ کرتے ہوئے 40 مستقل ممبران، 40 ایسوسی ایٹ ممبران اور 10 اعزازی ممبران بنانے کی منظوری دی گئی۔ مزید فیصلہ کیا گیا کہ انتخابات ڈائریکٹوریٹ آف انفارمیشن ڈیپارٹمنٹ اور سینئر صحافیوں کی نگرانی میں کرائے جائیں گے۔

صدر سرگودھا پریس کلب عبدالحنان چوہدری نے اختتامی کلمات میں کہا کہ انتخابات مکمل شفافیت کے ساتھ منعقد کیے جائیں گے، جن کی نگرانی کے لیے تاجر، وکلاء، ڈاکٹرز اور سول سوسائٹی کے نمائندوں کو بطور مبصر مدعو کیا جائے گا۔ انہوں نے بتایا کہ الیکشن کے لیے ضابطۂ اخلاق بھی مرتب کیا جائے گا، جس پر تمام امیدواران اور ووٹروں کو عملدرآمد کرنا ہوگا۔

اجلاس میں دیگر تنظیمی امور بھی زیر بحث آئے۔ اختتام پر دعائے خیر کی گئی اور شرکاء کے اعزاز میں ظہرانے کا اہتمام کیا گیا۔

سرگودھا (باغی ٹی وی نامہ نگار ملک شاہنواز جالپ) سرگودھا پریس کلب کا ایک اہم اجلاس صدر عبدالحنان چوہدری کی زیرِ صدارت منعقد ہوا، جس میں کلب کے اندرونی معاملات اور مستقبل کے منصوبوں پر کئی اہم فیصلے کیے گئے۔

اجلاس کا آغاز تلاوتِ قرآن اور نعت سے ہوا جس کے بعد سابقہ کارروائی اور مالیاتی رپورٹ کی متفقہ طور پر منظوری دی گئی۔ اجلاس میں کرایہ داروں کو واجب الادا کرائے ادا کرنے کے لیے 15 دن کی مہلت دی گئی اور بصورتِ دیگر دکانیں سیل کرنے کا فیصلہ کیا گیا۔

کلب کی مینٹیننس کے لیے طارق قریشی، رانا محمد عارف اور جاوید گجر پر مشتمل ایک کمیٹی بنائی گئی جو کلب کے مین گیٹ، چھت اور دیگر فوری مسائل کو حل کرے گی۔ نظم و ضبط برقرار رکھنے کے لیے بھی ایک کمیٹی تشکیل دی گئی جس میں شیخ محمد رضوان، شاہین فاروقی اور شہزاد شیرازی شامل ہیں، یہ کمیٹی 10 دن میں ضابطہ اخلاق تیار کرے گی۔

اجلاس میں نئی ممبرشپ کے لیے موصول ہونے والی 53 درخواستوں کا بھی جائزہ لیا گیا۔ نئی ممبرشپ درخواستیں جمع کرانے کی آخری تاریخ 20 ستمبر مقرر کی گئی ہے اور آئین و ضوابط کے مطابق ہی ممبرشپ دی جائے گی۔

اجلاس میں مبینہ طور پر پنجاب حکومت کی 25 لاکھ روپے کی گرانٹ رکوانے کے معاملے میں صدر پریس کلب عبدالحنان چوہدری نے موصولہ درخواست کو مسترد کر دیا۔ ایگزیکٹو باڈی نے فنڈ ریزنگ، بہبود فنڈ، سپورٹس گالا اور تربیتی پروگراموں کے انعقاد کی بھی منظوری دی۔

صدر عبدالحنان چوہدری اور جنرل سیکرٹری شیخ محمد رضوان نے اپنے خطاب میں کہا کہ کلب ایک جمہوری ادارہ ہے اور اراکین کو ٹیم ورک کے ساتھ کام کرنا چاہیے تاکہ صحافی کالونی کی تکمیل اور ممبران کی فلاح و بہبود کے منصوبے پورے کیے جا سکیں۔ اجلاس میں مجلسِ عاملہ کے اراکین نے صدر اور سیکرٹری کی قیادت پر مکمل اعتماد کا اظہار کیا۔ اجلاس کے اختتام پر ممبران کے لیے عشائیے کا اہتمام کیا گیا۔

سرگودھا(نامہ نگار ملک شاہنواز جالپ) سرگودھا یونیورسٹی میں نیشنل کمیشن فار ہیومن ڈویلپمنٹ کے تعاون سے عالمی یوم خواندگی کے موقع پر ایک پروقار تقریب اور آگاہی واک کا اہتمام کیا گیا۔

تقریب میں پروفیسر ڈاکٹر رفعت النساء، مہر عمر دراز جھاوری، علی عابد نقوی، محمد یار اللہ، ندیم عباس خان اور آصف علی تارڑ سمیت فیکلٹی ممبران، فیلڈ آفیسرز اور بڑی تعداد میں طلبہ و طالبات نے شرکت کی۔

مقررین نے تقریب سے خطاب کرتے ہوئے کہا کہ تعلیم ہر فرد کا بنیادی حق ہے اور ناخواندگی کے خاتمے کے بغیر ترقی کا خواب کبھی پورا نہیں ہو سکتا۔ انہوں نے زور دیا کہ خواندگی میں اضافہ ہی روشن مستقبل، شعور اور قومی خوشحالی کی ضمانت ہے۔

تقریب کے بعد نکالی گئی واک میں شرکاء نے بینرز اور پلے کارڈز اٹھا رکھے تھے جن پر خواندگی کی اہمیت کو اجاگر کرنے والے نعرے درج تھے۔ اس واک کا مقصد عوام میں تعلیم کی اہمیت کے بارے میں شعور بیدار کرنا تھا۔

سرگودھا (باغی ٹی وی، نامہ نگار ملک شاہنواز جالپ سے)سرگودھا پریس کلب کی مجلسِ عاملہ کا ایک اہم اجلاس صدر کلب عبدالحنان چوہدری کی زیر صدارت کامن روم میں منعقد ہوا جس میں جنرل سیکرٹری شیخ محمد رضوان سمیت دیگر عہدیداران و ممبران نے شرکت کی۔ اجلاس کا آغاز تلاوت قرآن پاک اور نعت رسول مقبول ﷺ سے ہوا، جس کے بعد صدر نے کلب کی مجموعی صورتحال اور مستقبل کے لائحہ عمل پر روشنی ڈالی۔

اجلاس میں کئی اہم فیصلے کیے گئے، جن میں سب سے نمایاں اعلان صحافی کالونی کے قیام سے متعلق تھا۔ صدر اور جنرل سیکرٹری نے بتایا کہ حکومتی منظوری کا عمل آخری مراحل میں ہے اور جلد باضابطہ اعلان کر دیا جائے گا، جس سے مستحق صحافیوں کو اپنی رہائش کی سہولت میسر آئے گی۔ ندیم خان، شہزاد شیرازی، سیف خان اور شیخ رضوان کی خدمات کو خصوصی خراج تحسین پیش کیا گیا۔

اجلاس میں گزشتہ برس کی روکی گئی 25 لاکھ روپے کی گرانٹ پر بھی توجہ دی گئی اور اس حوالے سے انکوائری کمیٹی تشکیل دی گئی، جس میں رانا عارف، رانا افضل، اور تصور ملیانہ شامل ہیں۔ کمیٹی کو 30 دن کے اندر رپورٹ جمع کرانے کی ہدایت دی گئی ہے۔

رکنیت کے معاملے پر بھی اہم فیصلہ کیا گیا، جس کے تحت چوہدری عبدالوہاب کی ممبرشپ بحالی کی توثیق روک دی گئی۔ وضاحت کی گئی کہ مثبت صحافتی رویہ اور ادارہ جاتی وابستگی نہ ہونے کے باعث ان کی بحالی ممکن نہیں، جبکہ عدالتی فیصلہ بھی اس راہ میں رکاوٹ ہے۔

نئی رکنیت سازی جلد آئینی تقاضوں کے مطابق شروع کی جائے گی اور اس بات کو یقینی بنایا جائے گا کہ کوئی بھی مستحق کارکن صحافی محروم نہ رہے۔ اجلاس میں کلب کی تزئین و آرائش، سالانہ ڈنر، سپورٹس و میوزیکل ایونٹس، اور یوم آزادی کی تقریبات کے انعقاد کا بھی فیصلہ کیا گیا۔

سوشل میڈیا پر کلب عہدیداران کی تضحیک و توہین پر تشویش کا اظہار کرتے ہوئے سخت تادیبی کارروائی کا اعلان کیا گیا۔ اجلاس میں اتفاق رائے سے فیصلہ کیا گیا کہ اس عمل پر مکمل پابندی ہو گی اور خلاف ورزی کرنے والوں کے خلاف سخت ایکشن لیا جائے گا۔

اراکین نے صدر عبدالحنان چوہدری اور جنرل سیکرٹری شیخ محمد رضوان کی قیادت پر مکمل اعتماد کا اظہار کرتے ہوئے کہا کہ ان کی قیادت میں پریس کلب ترقی کی نئی راہوں پر گامزن ہوگا۔ اجلاس کے اختتام پر شرکاء کے اعزاز میں پرتکلف ظہرانہ بھی دیا گیا۔

سرگودھا(باغی ٹی وی،نامہ نگارملک شاہنواز جالپ) سرکاری اسکول میں کرپشن کا نیا انداز، سی ای او ایجوکیشن بے اختیار، صوبائی وزیر کے احکامات پر عملدرآمد نہ ہوا

سرگودھا کے گورنمنٹ ایم سی گرلز ہائی اسکول میں کرپشن کا ایک بڑا سکینڈل سامنے آ گیا ہے جہاں سابقہ ہیڈ مسٹریس اور ایس ایس ٹیچر بشریٰ پروین کی ملی بھگت سے قومی خزانے کو لاکھوں روپے کا نقصان پہنچایا گیا۔ ذرائع کے مطابق بشریٰ پروین بغیر میڈیکل چھٹی یا سرکاری اجازت کے طویل عرصے تک غیر حاضر رہی اور تنخواہیں وصول کرتی رہیں، جس سے شفافیت شدید متاثر ہوئی۔ اسکول شہر کے مرکزی علاقے اور تعلیمی اداروں کے اعلیٰ حکام کے دفاتر کے قریب ہونے کے باوجود متعلقہ حکام کی جانب سے کارروائی میں غفلت برتی جا رہی ہے۔

نئی تعینات ہیڈ مسٹریس مہناز گیلانی نے انکشافات کے بعد تحریری طور پر انکوائری کی سفارش کی، جس کے باوجود ڈی ای او اور سی ای او ایجوکیشن کلثوم منشاء کی طرف سے سرد مہری دکھائی دے رہی ہے۔ صوبائی وزیر تعلیم رانا سکندر حیات کے حالیہ دورے میں بھی اسکول کی صورتحال پر فوری کارروائی کے احکامات دیے گئے تھے مگر عملدرآمد نہ ہونے سے شکوک و شبہات بڑھ گئے ہیں۔

علاقہ مکینوں، والدین اور سول سوسائٹی نے بدعنوانی پر سخت تنقید کرتے ہوئے مطالبہ کیا ہے کہ اساتذہ اور افسران کے خلاف فوری اور شفاف کارروائی کی جائے اور سی ای او و ڈی ای او ایجوکیشن کے کردار کی بھی مکمل تحقیقات کی جائیں۔ شہریوں کا کہنا ہے کہ تعلیمی نظام کی بقاء کے لیے کرپشن کے خلاف سخت اقدامات ناگزیر ہیں اور حکومت پنجاب سمیت اینٹی کرپشن اداروں کو فوری نوٹس لینا چاہیے تاکہ تعلیمی ادارے کرپٹ عناصر سے پاک ہو سکیں۔