Category: سیالکوٹ

سیالکوٹ (باغی ٹی وی، بیوروچیف شاہد ریاض)سیالکوٹ میں مقامی مارکی میں ایک اہم اور جدید تجارتی ویبینار کا انعقاد کیا گیا، جس میں سیالکوٹ کے 70 سے زائد سپورٹس گڈز اور ویئر ایکسپورٹرز نے شرکت کی، جبکہ دنیا کے 13 مختلف ممالک میں موجود امپورٹرز نے آن لائن شرکت کے ذریعے ویبینار میں حصہ لیا۔

یہ ویبینار البرکتہ بینک کے زیر اہتمام منعقد کیا گیا، جس میں بینک کے صدر محمد عاطف حنیف، چیئرمین سپورٹس ایسوسی ایشن خواجہ مسعود اختر، سیالکوٹ چیمبر آف کامرس اینڈ انڈسٹری کے سینئر عہدیداران ناصر بٹ و دیگر کاروباری شخصیات شریک ہوئیں۔

اس موقع پر صدر البرکتہ بینک محمد عاطف حنیف نے بتایا کہ اس سے قبل بھی سیالکوٹ کے ایکسپورٹرز اور جنوبی افریقہ، مصر، ترکیہ سمیت دیگر ممالک کے امپورٹرز کے ساتھ کامیاب ویبینارز کا انعقاد کیا جا چکا ہے۔ انہوں نے کہا کہ بین الاقوامی تجارت کو فروغ دینے کے لیے ایک جامع ٹریڈ فنانس پورٹل تشکیل دیا گیا ہے، جس میں تمام ایکسپورٹرز اور امپورٹرز کی مکمل تفصیلات شامل کی گئی ہیں تاکہ تجارتی روابط شفاف اور مؤثر انداز میں استوار کیے جا سکیں۔

چیئرمین سپورٹس ایسوسی ایشن خواجہ مسعود اختر نے ویبینار کو سیالکوٹ کی صنعت کے لیے ایک مثبت پیش رفت قرار دیا۔ انہوں نے کہا کہ اس پلیٹ فارم کے ذریعے مقامی ایکسپورٹرز کے لیے بین الاقوامی تجارت کے نئے دروازے کھلیں گے۔ ان کا کہنا تھا کہ جنوبی امریکہ، یورپ اور دیگر عالمی مارکیٹس میں سیالکوٹ کی مصنوعات کی بڑی مانگ ہے، اور اس قسم کے اقدامات مقامی صنعت کو عالمی تجارتی نظام سے جوڑنے میں مددگار ہوں گے۔

کاروباری حلقوں نے البرکتہ بینک کی اس کوشش کو سراہتے ہوئے توقع ظاہر کی کہ آئندہ بھی اس طرز کے ویبینارز کے تسلسل سے سیالکوٹ کی برآمدات کو فروغ ملے گا اور عالمی سطح پر پاکستان کا مثبت تشخص مزید مضبوط ہوگا۔

ڈسکہ (باغی ٹی وی، نامہ نگار ملک عمران) ایڈیشنل ڈپٹی کمشنر ریونیو محمد اقبال سنگھیڑا نے ڈسکہ کا دورہ کرتے ہوئے بارش کے بعد شہر کی مختلف شاہراہوں کا معائنہ کیا اور نکاسی آب کے انتظامات پر اطمینان کا اظہار کیا۔ انہوں نے میونسپل کمیٹی کے عملے کی کارکردگی کو سراہتے ہوئے کہا کہ کم وقت میں پانی کی مؤثر نکاسی قابل تعریف ہے۔

اس موقع پر سٹی صدر مسلم لیگ (ن) و چیئرمین مرکزی انجمن تاجران ڈسکہ محمد افضل منشاء، سی او میونسپل کمیٹی الفت شہزاد، سینئر وائس چیئرمین ڈسکہ پریس کلب رجسٹرڈ امین رضا مغل، جنرل سیکرٹری سید رضوان مہدی، تحصیل صدر مسلم لیگ ن یوتھ ونگ سجاد احمد گجر ایڈووکیٹ اور دیگر شخصیات بھی موجود تھیں۔

ایڈیشنل ڈپٹی کمشنر ریونیو نے کہا کہ شہر میں بارش کے فوری بعد شاہراہوں سے پانی کی نکاسی شہریوں کے لیے سہولت کا باعث ہے اور انتظامیہ آئندہ بھی ایسے اقدامات کو ترجیح دے گی تاکہ شہری مشکلات سے محفوظ رہیں۔

ڈسکہ (باغی ٹی وی، نامہ نگار ملک عمران)پریس کلب ڈسکہ ® کا پہلا باقاعدہ اجلاس منشاء پلازہ، دفتر پریس کلب نسبت روڈ پر منعقد ہوا۔ اجلاس کی صدارت چیئرمین محمد افضل منشاء نے کی جبکہ سرپرستی شہباز علی محسن نے کی۔ اجلاس میں پریس کلب کے تمام عہدیداران نے بھرپور شرکت کی۔

اجلاس کا آغاز تلاوتِ کلام پاک سے ہوا جو جنرل سیکرٹری سید رضوان مہدی نے کی، جبکہ نعت رسول مقبول ﷺ کا شرف سرپرست شہباز علی محسن نے حاصل کیا۔ اجلاس کا بنیادی ایجنڈا پریس کلب ® کے جنرل اجلاس کے انعقاد سے متعلق تھا۔

اجلاس میں اتفاقِ رائے سے یہ فیصلہ کیا گیا کہ جنرل اجلاس کے انعقاد سے قبل پریس کلب ® کے لیے باقاعدہ جگہ حاصل کی جائے گی۔ اس سلسلے میں موقع پر ہی چیئرمین محمد افضل منشاء نے ایڈیشنل ڈپٹی کمشنر ریونیو (اے ڈی سی آر) محمد اقبال سنگھیڑا سے رابطہ کیا اور دو روز کے اندر ملاقات کا وقت طے کیا۔

اجلاس کے اختتام پر دعا خیر کی گئی اور پریس کلب کی باضابطہ سرگرمیوں کے آغاز کو خوش آئند قرار دیا گیا۔ عہدیداران نے امید ظاہر کی کہ پریس کلب ® صحافی برادری کے حقوق اور پیشہ ورانہ ترقی کے لیے ایک مؤثر پلیٹ فارم ثابت ہوگا۔

سیالکوٹ (باغی ٹی وی، رپورٹ: شاہد ریاض)چھ ماہ میں 4831 نوجوان بیرونِ ملک روانہ، 60 فیصد تعلیم یافتہ، مقامی روزگار پر سوالیہ نشان، جنوری تا مارچ 2025 کے دوران، سرکاری اعداد و شمار کے مطابق 172,144 پاکستانی نوجوان بیرونِ ملک روزگار کی تلاش میں روانہ ہوئے

تفصیل کے مطابق رواں سال کے پہلے چھ ماہ میں ضلع سیالکوٹ سے 4831 نوجوان بہتر مستقبل اور روزگار کی تلاش میں بیرونِ ملک روانہ ہو گئے، جن میں سے 60 فیصد تعلیم یافتہ اور ہنرمند نوجوان شامل ہیں۔ معاشی بحران، مہنگائی اور مقامی سطح پر روزگار کے محدود مواقع نے نوجوانوں کو اپنا وطن چھوڑنے پر مجبور کر دیا۔

سرکاری اعداد و شمار کے مطابق ان نوجوانوں نے زیادہ تر سعودی عرب، قطر، بحرین، عمان، ملائیشیا اور دبئی جیسے مشرق وسطیٰ کے ممالک کا رخ کیا، جہاں وہ تعمیرات، خدمات، صنعتی اور ٹیکنیکل شعبوں میں ملازمتیں حاصل کر رہے ہیں۔ رپورٹ میں انکشاف کیا گیا ہے کہ ضلع سیالکوٹ کی پانچوں تحصیلوں — سیالکوٹ، ڈسکہ، پسرور، سمبڑیال اور ان کے گردونواح — سے تعلق رکھنے والے یہ نوجوان نہ صرف ہنر مند تھے بلکہ کئی اعلیٰ تعلیم یافتہ بھی تھے، جنہیں وطن میں ان کے معیار کے مطابق روزگار دستیاب نہ ہو سکا۔

اعداد و شمار یہ بھی بتاتے ہیں کہ ان میں سے 83 نوجوان یورپ اور امریکہ گئے، جن میں سے کچھ نے وہاں مستقل سکونت اختیار کر لی ہے جب کہ کچھ نوجوان تعلیم یا اعلیٰ پیشہ ورانہ تربیت کی غرض سے ان ممالک میں موجود ہیں۔

معاشی ماہرین کے مطابق یہ مسلسل "برین ڈرین” پاکستان کے مستقبل کے لیے خطرے کی گھنٹی ہے۔ ایک طرف حکومت نوجوانوں کو روزگار دینے کے دعوے کرتی ہے، دوسری جانب پڑھے لکھے افراد کی بڑی تعداد ملک چھوڑ رہی ہے۔ ماہرین کا کہنا ہے کہ اگر تعلیم یافتہ طبقے کی ہجرت کا یہ سلسلہ جاری رہا تو ملک میں نہ صرف افرادی قوت کا خلا پیدا ہو گا بلکہ مقامی ترقیاتی ڈھانچے پر بھی گہرے منفی اثرات مرتب ہوں گے۔

مقامی سطح پر روزگار کے مواقع بڑھانے، انڈسٹریل زونز کے قیام اور کاروبار دوست پالیسیوں کے نفاذ کا مطالبہ زور پکڑ رہا ہے تاکہ نوجوانوں کو ہجرت پر مجبور ہونے سے روکا جا سکے۔ بصورت دیگر، پاکستان کے ترقی کے خواب صرف ہنر مندوں کے ایکسپورٹ تک محدود ہو کر رہ جائیں گے۔

یاد رہے سیالکوٹ کے علاوہ پاکستان میں رواں سال کے پہلے تین ماہ یعنی جنوری تا مارچ 2025 کے دوران، سرکاری اعداد و شمار کے مطابق 172,144 پاکستانی نوجوان بیرونِ ملک روزگار کی تلاش میں روانہ ہوئے۔ ان میں سے 99,139 عام مزدور، 38,274 ڈرائیورز، 1,859 مستری، 2,130 الیکٹریشنز، 3,474 ٹیکنیشنز، 1,058 ویلڈرز، 849 ڈاکٹرز، 1,479 انجینئرز، 390 نرسز اور 436 اساتذہ شامل تھے۔ ان اعداد و شمار سے یہ بات واضح ہوتی ہے کہ نہ صرف ہنر مند بلکہ تعلیم یافتہ اور پیشہ ور افراد بھی مقامی مواقع کی کمی کے باعث بیرونِ ملک جانے پر مجبور ہیں۔ اگر چھ ماہ کے اعداد شمار مل جاتے تو یہ تعداد کئی لاکھ تک پہنچ چکی ہوتی، ماہرین کے مطابق یہ رجحان پاکستان میں بڑھتے ہوئے معاشی دباؤ اور غیر یقینی مستقبل کی عکاسی کرتا ہے، جو ملک کی ترقی کیلئے ایک سنجیدہ خطرے کی صورت اختیار کر چکا ہے۔

سیالکوٹ (باغی ٹی وی، بیورو چیف شاہد ریاض)سیالکوٹ کی بزنس کمیونٹی نے وفاقی بجٹ 2025-26 کو مکمل طور پر مسترد کرتے ہوئے 11 جولائی کو بھرپور احتجاج کا اعلان کر دیا ہے۔ سیالکوٹ چیمبر آف کامرس اینڈ انڈسٹری کے صدر اکرام الحق نے میڈیا سے گفتگو کرتے ہوئے کہا کہ یہ بجٹ کاروباری طبقے کے خلاف ایک کھلی جنگ ہے، جس کے ذریعے معیشت کا گلا گھونٹنے کی سازش کی گئی ہے۔

اس موقع پر سینیئر نائب صدر شہباز وسیم لودھی، نائب صدر عمر خالد، محمد خلیل (صدر چیمبر آف سمال ٹریڈرز اینڈ سمال انڈسٹری)، محمد اعجاز غوری (چیئرمین میڈیا کمیٹی)، لالہ ظفر (چیئرمین پولیس کمیٹی)، شیخ خالد اور مقامی صحافی بھی موجود تھے۔

اکرام الحق کا کہنا تھا کہ پورے ملک کی بزنس کمیونٹی سراپا احتجاج ہے، لیکن حکومت مسلسل ان کی آواز کو نظر انداز کر رہی ہے۔ انہوں نے کہا کہ وزیر خزانہ آخر کس کو خوش کرنا چاہتے ہیں؟ مقامی صنعت کو تباہ کر کے کیا حاصل ہوگا؟ ٹیکسز کا ایسا بوجھ ڈالا جا رہا ہے جو ناقابل برداشت ہے۔ ہم فیصلہ کر چکے ہیں کہ اس بار ٹیکس ریٹرن جمع نہیں کرائیں گے۔ اگر حکومت نے ہوش کے ناخن نہ لیے تو ہم سڑکوں پر آنے پر مجبور ہوں گے۔

صدر سیالکوٹ چیمبر نے مزید کہا کہ ایف بی آر کے رویے اور پالیسیوں سے بزنس کمیونٹی سخت نالاں ہے، متعدد بار شکایات کے باوجود مسائل حل نہیں کیے گئے۔ ان کا کہنا تھا کہ ہم آئی ایم ایف کے ایجنڈے کو کامیاب نہیں ہونے دیں گے۔ 11 جولائی کو سیالکوٹ میں بھی ملک گیر احتجاج میں بھرپور شرکت کی جائے گی تاکہ حکومت کو باور کروایا جا سکے کہ یہ بجٹ ناقابل قبول ہے۔

سیالکوٹ (باغی ٹی وی، بیوروچیف شاہد ریاض) ڈسٹرکٹ پولیس آفیسر (DPO) سیالکوٹ فیصل شہزاد نے پولیس اہلکاروں اور ان کے خاندانوں کے لیے ایک اہم اقدام اٹھاتے ہوئے ہمدرد لیب ڈائیگنوسٹک سینٹر کے ساتھ یادداشتِ تفاہم (MOU) پر دستخط کر دیے ہیں۔

اس معاہدے کے تحت پولیس شہداء کی فیملیز کو لیبارٹری ٹیسٹس پر 60 فیصد رعایت دی جائے گی، جبکہ حاضر سروس اور ریٹائرڈ پولیس ملازمین کو 50 فیصد تک رعایت حاصل ہو گی۔ یہ اقدام پولیس فورس کی فلاح و بہبود کے لیے جاری کوششوں کا تسلسل ہے۔

ڈی پی او فیصل شہزاد کے مطابق ان اقدامات کا مقصد پولیس ملازمین کے میڈیکل اور تعلیمی مسائل کو ترجیحی بنیادوں پر حل کرنا ہے۔ انہوں نے کہا کہ انسپکٹر جنرل آف پولیس کے احکامات کی روشنی میں پہلے تعلیمی اداروں کے ساتھ معاہدے کیے گئے تھے، اور اب طبی سہولیات کے دائرہ کار کو بھی وسعت دی جا رہی ہے۔

پولیس افسران و جوانوں نے اس اقدام کو خوش آئند قرار دیا ہے اور کہا ہے کہ اس سے نہ صرف اہلکاروں کا مورال بلند ہو گا بلکہ ان کے اہل خانہ کو بھی بہتر سہولیات میسر آئیں گی۔ فیصل شہزاد نے یقین دہانی کروائی کہ پولیس کے فلاحی منصوبے اسی جذبے کے ساتھ جاری رہیں گے۔

سیالکوٹ (باغی ٹی وی، بیوروچیف شاہد ریاض) ڈی سی آفس سیالکوٹ میں کمشنر گوجرانوالہ نوید حیدر شیرازی اور ڈائریکٹر جنرل پی ڈی ایم اے عرفان علی کاٹھیا کی زیر صدارت ایک ہنگامی اجلاس منعقد ہوا جس میں مون سون بارشوں، ندی نالوں میں ممکنہ طغیانی، اربن فلڈنگ اور دیگر خطرات کا تفصیلی جائزہ لیا گیا۔

ڈپٹی کمشنر سیالکوٹ صبا اصغر علی نے اجلاس کو شہری و دریائی سیلاب سے بچاؤ کے انتظامات پر بریفنگ دی اور بتایا کہ نالہ بھمبر، نالہ ایک اور اپر چناب کی بروقت صفائی، مشینری، عملے اور ہنگامی پلان کے ذریعے صورتحال سے نمٹنے کی تیاری مکمل ہے۔ انہوں نے کہا کہ متاثرہ علاقوں میں ریلیف کیمپس کی نشاندہی ہو چکی ہے اور وہاں صاف پانی اور کھانے کا انتظام بھی کیا جائے گا۔

اجلاس سے خطاب کرتے ہوئے کمشنر نوید حیدر شیرازی نے خبردار کیا کہ گوجرانوالہ، گجرات اور لاہور ڈویژن میں معمول سے 40 سے 60 فیصد زیادہ بارشیں متوقع ہیں، جبکہ وقفے وقفے سے شدید بارشیں اور کلاوڈ برسٹ کے خدشات بھی موجود ہیں۔ انہوں نے تمام محکموں کو الرٹ رہنے اور افسران کی چھٹیاں منسوخ کرنے کی ہدایت کی۔ خطرناک عمارتوں کو فوری خالی کروانے کا حکم دیا گیا تاکہ کسی انسانی المیے سے بچا جا سکے۔

کمشنر نے گیپکو کو ہدایت کی کہ بجلی کے پولز کا تحفظ یقینی بنائیں، خاص طور پر کمزور یا جھکے ہوئے پولز کی فوری مرمت کی جائے۔ تمام اسسٹنٹ کمشنرز کو حکم دیا گیا ہے کہ وہ نالوں کی ڈی سلٹنگ کا سرٹیفکیٹ فوری جمع کروائیں۔

ڈی جی پی ڈی ایم اے عرفان علی کاٹھیا نے کہا کہ آئندہ 72 گھنٹوں میں ہیڈ مرالہ اپ سٹریم پر بھی بارشوں کا ایک مضبوط نظام متوقع ہے، جس کے پیش نظر تمام انتظامات مکمل ہونے چاہئیں۔ انہوں نے وزیر اعلیٰ پنجاب کی ہدایات کا حوالہ دیتے ہوئے کہا کہ ممکنہ متاثرہ علاقوں سے نہ صرف شہریوں بلکہ ان کے مویشیوں کا بھی بروقت انخلاء یقینی بنایا جائے، اور ونڈا، چارا، ویکسین سمیت تمام سہولیات کی دستیابی برقرار رکھی جائے۔

ڈی جی پی ڈی ایم اے نے سیالکوٹ انتظامیہ کی جانب سے نالوں کی بروقت صفائی پر اطمینان کا اظہار کرتے ہوئے مزید 100 ٹینٹس فراہم کرنے کی ہدایت بھی جاری کی۔

اجلاس میں ضلعی انتظامیہ نے اعادہ کیا کہ کسی بھی ممکنہ سیلابی صورتحال کے پیش نظر عملہ، مشینری، اور دیگر وسائل ہمہ وقت تیار ہیں، اور متاثرہ آبادی کے فوری انخلاء کو ہر صورت ممکن بنایا جائے گا۔