Category: سیالکوٹ

سیالکوٹ (باغی ٹی وی،سٹی رپورٹرمدثررتو) ڈپٹی کمشنر محمد ذوالقرنین نے اعلان کیا ہے کہ وزیر اعلی پنجاب مریم نواز شریف کے ویژن کے تحت "ستھرا پنجاب” پروگرام کے تحت ضلع سیالکوٹ کے دیہات میں صفائی مہم کا آغاز کر دیا گیا ہے۔

اس مہم کے تحت 6 دیہی یونین کونسلز سے 783 میٹرک ٹن کوڑا جمع کر کے لینڈ فل سائٹس پر ڈمپ کر دیا گیا ہے، جس کے نتیجے میں ان علاقوں کو زیرو ویسٹ بنا دیا گیا ہے۔ باقی یونین کونسلز میں بھی زیرو ویسٹ مہم بتدریج جاری ہے۔

ڈپٹی کمشنر نے یہ بات تحصیل پسرور کے دیہات مالی پور میں ہیوی مشینری کے استعمال سے روٹیاں کی لفٹنگ کا جائزہ لیتے ہوئے کہی۔ اس موقع پر ڈپٹی ڈائریکٹر لوکل گورنمنٹ عمر امجد بیگ بھی موجود تھے۔

محمد ذوالقرنین نے مزید کہا کہ وزیر اعلی پنجاب کی ہدایت پر لوکل گورنمنٹ ڈیپارٹمنٹ ہر یونین کونسل میں سینٹری ورکرز اور تین لوڈر رکشوں کی مدد سے ڈور ٹو ڈور ویسٹ کلیکشن کا عمل جاری رکھے گا۔

کوڑا کلیکشن کے بعد عارضی کوڑا کلیکشن پوائنٹس پر جمع کیا جائے گا، جہاں سے ضلع کونسل ہیوی مشینری جیسے ایکسی ویٹرز اور ٹریکٹر ٹرالیوں کی مدد سے اسے لینڈ فل سائٹس پر ڈمپ کیا جائے گا۔ اس مہم کا مقصد یہ ہے کہ زیرو ویسٹ حاصل کرنے کے بعد دوبارہ بلک ویسٹ جمع نہ ہو، اور حفظان صحت کے اصولوں کے مطابق صفائی کو یقینی بنایا جا سکے۔

سیالکوٹ (باغی ٹی وی،بیوروچیف شاہدریاض): ڈی ایس پی لائسنسنگ سیالکوٹ رانا بابر شعیب نے خوشخبری دیتے ہوئے بتایا ہے کہ موٹر سائیکل کا لائسنس حاصل کرنا اب مزید آسان ہو گیا ہے۔ اب کوئی بھی شہری، چاہے وہ کسی بھی ضلع سے تعلق رکھتا ہو، اپنی شناختی کارڈ کے ساتھ ٹریفک دفتر آ کر فوری طور پر موٹر سائیکل کا لائسنس حاصل کر سکتا ہے۔

ایڈیشنل آئی جی ٹریفک پنجاب مرزا فاران بیگ کی ہدایت پر یہ فیصلہ کیا گیا ہے۔ موٹر سائیکل لائسنس حاصل کرنے کے عمل کو آسان بنانے کے لیے لرنر پیریڈ کو بھی ختم کر دیا گیا ہے۔ اب شہریوں کو لائسنس حاصل کرنے کے لیے لمبا انتظار نہیں کرنا پڑے گا۔

ڈی ایس پی رانا بابر شعیب نے مزید بتایا کہ ٹریفک دفتر میں ہر وقت عملہ موجود ہے جو شہریوں کو بغیر کسی دشواری کے لائسنس جاری کر رہا ہے۔ انہوں نے عوام سے اپیل کی کہ اس سنہری موقع سے فائدہ اٹھائیں اور فوری طور پر ٹریفک آفس کا رخ کریں۔

ٹریفک پولیس سیالکوٹ کا عملہ عوامی خدمت کے لیے دن رات کام کرنے کا عزم رکھتا ہے اور ہر ممکن سہولت فراہم کرنے کے لیے تیار ہے۔

سیالکوٹ (باغی ٹی وی،بیوروچیف شاہدریاض): کمشنر سوشل سکیورٹی محمد علی نے سیالکوٹ کا تفصیلی دورہ کیا اور سوشل سکیورٹی ہسپتال سیالکوٹ کو 50 سے بڑھا کر 100 بیڈ کا جدید ہسپتال بنانے کا اعلان کیا ہے۔

اپنے دورے کے دوران، کمشنر نے نئے آئی سی یو وارڈ اور اپ گریڈڈ نرسری وارڈ کا افتتاح کیا۔ نرسری وارڈ میں 6 نئے انکیوبیٹرز بھی نصب کیے گئے ہیں۔ انہوں نے ہسپتال کی مختلف سہولیات کا معائنہ کیا اور صفائی ستھرائی کے معیار کا جائزہ لیا۔ ڈاکٹروں اور سٹاف کی حاضری اور ریکارڈ کو بھی چیک کیا گیا۔

کمشنر نے مقامی فیکٹریوں کا دورہ بھی کیا اور مزدور رہنماؤں سے ملاقاتیں کیں۔ مزدوروں نے ہسپتالوں اور ڈسپنسریوں میں مسائل کے بارے میں آگاہ کیا۔ کمشنر نے فوری طور پر ایک مقامی فیکٹری میں قائم سوشل سکیورٹی ڈسپنسری میں لیڈی ڈاکٹر کی تعیناتی کے احکامات جاری کیے۔

کمشنر نے سیالکوٹ ڈائریکٹوریٹ کو کنٹری بیوشن ٹارگٹس کی سو فیصد ریکوری یقینی بنانے کے احکامات جاری کیے۔ انہوں نے کہا کہ نادہندہ یونٹس سے ریکوری اور ماہانہ کنٹری بیوشن ٹارگٹس کو سمجھوتہ نہیں کیا جائے گا۔

سیالکوٹ (رپورٹ باغی ٹی وی بیورو چیف شاہد ریاض سے) آج 11 ستمبر کو بانی پاکستان حضرت قائداعظم محمد علی جناح رحمتہ اللہ علیہ کا یوم وفات منایا جا رہا ہے۔ اس موقع پر مختلف دعائیہ تقاریب کا انعقاد کیا گیا جہاں قائداعظم کے درجات کی بلندی، ان کی مغفرت اور جنت الفردوس میں اعلی مقام کے لیے دعا کی گئی۔

مقامی شہریوں اور مختلف تنظیموں نے قائداعظم کے عظیم کارناموں اور ان کی پاکستان کے لیے دی گئی خدمات کو خراج عقیدت پیش کیا۔ دعا کے دوران اللہ رب العزت سے پاکستان کی تاقیامت قائم دائم رہنے کی دعا کی گئی اور اس بات کا عہد کیا گیا کہ موجودہ پاکستان کو قائداعظم محمد علی جناح رحمتہ اللہ علیہ کے اصولوں اور نظریات پر قائم رکھا جائے گا۔

شرکاء نے کہا کہ ہمیں نئے یا پرانے پاکستان کی نہیں، بلکہ الحمدللہ موجودہ پاکستان کی ترقی اور خوشحالی کی خواہش ہے، جو کہ بانی پاکستان کی قربانیوں اور وژن کا عکاس ہے۔

اجلاس میں ملک کی سلامتی، استحکام اور فلاح و بہبود کے لیے خصوصی دعائیں کی گئیں۔

سیالکوٹ (باغی ٹی وی بیوروچیف شاہد ریاض) ڈپٹی کمشنر محمد ذوالقرنین اور ڈسٹرکٹ پولیس آفیسر رانا عمر فاروق کی زیر صدارت ضلع امن کمیٹی کا اجلاس منعقد ہوا۔ اجلاس میں عید میلادالنبی ﷺ کے جلوسوں اور محافل کی سیکیورٹی، انتظامی امور اور ٹریفک کی مینجمنٹ کا تفصیل سے جائزہ لیا گیا۔

ڈپٹی کمشنر اور ڈی پی او نے یقین دلایا کہ عید میلادالنبی ﷺ کے جلوسوں اور محافل کو فول پروف سیکیورٹی فراہم کی جائے گی۔ انہوں نے کہا کہ چاروں تحصیلوں میں مرکزی جلوسوں کے روٹس پر سیکیورٹی کے خصوصی انتظامات کیے جائیں گے، اور ٹریفک کی مینجمنٹ کے لیے اسپیشل ٹریفک پلان بھی تشکیل دیئے جائیں گے جن پر عملدرآمد کو یقینی بنایا جائے گا۔

ڈپٹی کمشنر اور ڈی پی او نے ضلع سیالکوٹ میں قیام امن کے لیے ضلعی امن کمیٹی کی خدمات کو سراہا اور کہا کہ تمام ممبران کا احساس ذمہ داری اور باہمی احترام قابل تحسین ہے۔ انہوں نے اس بات پر زور دیا کہ عید میلادالنبی ﷺ کی تقریب کو تمام مکاتب فکر اپنے اپنے عقیدت کے مطابق مناتے ہیں، اور اس مبارک دن کو مناتے ہوئے باہمی احترام، برداشت، اخوت اور بھائی چارے کا مظاہرہ کرنا ہوگا۔

انہوں نے مزید کہا کہ چاروں تحصیلوں میں اسسٹنٹ کمشنر اور ایس ڈی پی او امن کمیٹی کے ممبران سے میٹنگ کریں گے اور ایک متفقہ لائحہ عمل مرتب کریں گے۔

اجلاس میں ایڈیشنل ڈپٹی کمشنر جنرل سید اسد رضا کاظمی، کوآرڈینیٹر ضلع امن کمیٹی حافظ اصغر علی چیمہ، مفتی کفایت اللہ شاکر، ماسٹر فیض، اعجاز حسین نقوی، حافظ احمد مصدق قاسمی، مولانا ایوب ثاقب خان، اقبال حسن زیدی، ظفر عباس، احسان اللہ دیال، پیر غلام حسین سلطانی، سید نسیم ثقلین، سید علی نجم گیلانی، حافظ محمد آصف شیخ، صاحبزادہ محمد اعظم صابر، حافظ عبدالغفار، سید نسیم عباس نقوی، پیرمحل ظہور واصف، حافظ نیاز احمد الازہری، صاحبزادہ طیںب عقیل، ملک ذاکراعوان، اشفاق نذر گھمن، ڈی ایس پی ٹریفک بابر حسین، سول ڈیفنس آفیسر عبداللہ شاکر، ایم او ریگولیشن سید اسد حسین اور ایکسین ضلع کونسل محمد ریاض نے بھی شرکت کی۔

اجلاس کے اختتام پر ملک و قوم کی سلامتی اور استحکام کے لیے خصوصی دعا کی گئی۔

سیالکوٹ (باغی ٹی وی بیوروچیف شاہد ریاض) جماعت اسلامی نے اپنے ورکرز کنونشن کے دوران ممبر سازی کیمپ کا افتتاح کر دیا ہے۔ صوبہ وسطی پنجاب کے صدر جاوید قصوری نے اس موقع پر خطاب کرتے ہوئے کہا کہ ممبر سازی کا آغاز ہو چکا ہے اور عوام کو اس میں بھرپور شرکت کرنی چاہیے۔

جاوید قصوری نے مزید کہا کہ آئی پی پیز کے معاملے پر حکومت سے رابطے کیے گئے ہیں، لیکن ابھی تک کوئی عملی پیش رفت نہیں ہوئی۔ انہوں نے شہریوں سے اپیل کی کہ وہ ممبر سازی میں شامل ہوں اور حکومت کے ساتھ مذاکرات کے لیے وقت کی قید کو مدنظر رکھیں۔

قصوری نے خبردار کیا کہ اگر حکومت نے 15 دن کے اندر کوئی اقدامات نہ کیے تو ملک گیر ہڑتال کی کال دی جا سکتی ہے۔ ان کا کہنا تھا کہ ہر قصبے اور شہر میں ہڑتال کی جائے گی اور شٹر ڈاؤن ہوگا۔ انہوں نے لوگوں سے مطالبہ کیا کہ وہ ہڑتال کی کال پر جماعت اسلامی کا ساتھ دیں اور مظاہروں میں شرکت کریں۔

سیالکوٹ(باغی ٹی وی، سٹی رپورٹر مدثر رتو کی رپورٹ) پریس کلب کھروٹہ سیداں میں نئی باڈی کا انتخاب کیا گیا

تفصیل کے مطابق سیالکوٹ کے پریس کلب کھروٹہ سیداں کا اجلاس سرپرست اعلی سید عارف حسین شاہ کی زیر صدارت منعقد ہوا۔ اجلاس میں کثیر تعداد میں صحافیوں نے شرکت کی۔ تلاوت قرآن پاک اور نعت رسول مقبول سے اجلاس کا آغاز ہوا۔

اجلاس میں تمام صحافیوں کی مشاورت سے پریس کلب کے عہدیداروں کا انتخاب کیا گیا۔ جن میں سے اہم عہدے داروں کے نام حسب ذیل ہیں:

چیئرمین: شیخ بلال حسین
سینیئر وائس چیئرمین: مہر مصطفی
وائس چیئرمین: سید وحید شاہ
جنرل سیکرٹری: مدثر رتو
چیئرمین مجلس عاملہ کمیٹی: رانا جاوید اقبال
چیئرمین مصالحتی کمیٹی: عتیق بیگ
سیکرٹری اطلاعت نشریات: محمد بلال
لیگل ایڈوائزر: سید آصف اقبال ایڈوکیٹ ہائی کورٹ
آفس سیکرٹری: سید محمد علی
سرپرست اعلی سید عارف حسین شاہ نے نئے منتخب ہونے والے عہدیداروں کو مبارکباد دی اور بتایا کہ عنقریب ان کی تقریب خلف برداری شایان شان طریقے سے منعقد کی جائے گی۔

سیالکوٹ(باغی ٹی وی ،بیوروچیف شاہدریاض) صوبائی وزیر بلدیات، میاں ذیشان رفیق نے ڈسکہ کے سول ہسپتال میں 6 جدید ڈائیلسز مشینوں کا افتتاح کیا ہے جس سے ہسپتال میں ڈائیلسز کی سہولیات میں نمایاں اضافہ ہو گیا ہے۔ اس موقع پر ڈپٹی کمشنر اور رکن صوبائی اسمبلی بھی موجود تھے۔

وزیر موصوف نے کہا کہ وزیر اعلیٰ پنجاب کی ہدایت پر صوبے کے ہر کونے میں صحت کی سہولیات کو بہتر بنایا جا رہا ہے۔ موبائل ہسپتال اور کلینک آن ویل جیسے منصوبے اس کا واضح ثبوت ہیں۔ انہوں نے کہا کہ صوبے کے تمام بنیادی اور دیہی صحت مراکز کو جدید ترین سہولیات سے لیس کیا جا رہا ہے تاکہ عوام کو اپنے گھر کے قریب ہی بہترین طبی سہولیات میسر آ سکیں۔

ڈسکہ کے سول ہسپتال میں موجود ٹراما سنٹر کو بھی دیگر طبی شعبہ جات کے لیے استعمال کرنے کا فیصلہ کیا گیا ہے جس سے ہسپتال کی اہمیت میں مزید اضافہ ہو گا۔

وزیر بلدیات نے کہا کہ ان نئی مشینوں کے ذریعے روزانہ 24 افراد کو ڈائیلسز کی سہولیات فراہم کی جا سکے گی۔ انہوں نے مزید کہا کہ سال کے آخر تک ہسپتال میں ڈائیلسز مشینوں کی تعداد میں مزید اضافہ کیا جائے گا تاکہ ڈسکہ کے عوام کو علاج کے لیے شہر سے باہر جانے کی ضرورت نہ پڑے۔