بھارتی گلوکار عدنان سمیع کے بیٹے اذان سمیع نے بھارت کے بجائے پاکستان میں رہنے اور یہاں کام کرنے کے حوالے سے کہا ہے کہ پاکستان ان کا گھر ہے لہذا انہوں نے بھارت کے بجائے یہاں رہنے کو ترجیح دی ہے۔
اذان سمیع نے حال ہی میں ایک انٹرویو میں اپنے کیریئر اور اپنے والد عدنان سمیع کے حوالے سے گفتگو کی۔ اذان سمیع نے اپنے والد کے بھارت میں رہنے کے فیصلے پر کہا کہ بھارت میں رہنے کا فیصلہ ان کے والد تھا اورمیں ان کے فیصلے کی عزت کرتا ہوں۔
اذان سمیع نے کہا میرے والد کی طرح میرے پاس بھی اختیار تھا کہ میں جہاں رہنا چاہوں رہ سکتا ہوں تو میں نے اپنے ملک پاکستان میں رہنے کو ترجیح دی ہے۔ پاکستان میرا گھر ہے اور میری والدہ محب وطن خاتون ہیں۔ اس کے علاوہ پاکستان فلم انڈسٹری کو بھی میں اپنا مانتا ہوں اس لیے میں نے پاکستان میں رہنے اور یہاں کام کرنا پسند کیا ہے.
اذان سمیع کا کہنا تھا کہ عدنان سمیع ان کے والد ہیں اور ان سے سیکھنے کی کوشش کرتا ہوں لیکن میری زندگی میں ایک بات بہت واضح ہے کہ میں ایک پاکستانی ہوں اور پاکستان میں رہنا اور کام کرنا چاہتا ہوں۔
اذان سمیع نے ان کے والد پر سوشل میڈیا پر بننے والی مزاحیہ پوسٹوں پر کہا کہ انہیں یہ پوسٹیں دیکھ کر بالکل بھی برا نہیں لگتا بلکہ کچھ پوسٹس تو اتنی مزاحیہ ہوتی ہیں کہ مجھے انہیں دیکھ کر بہت ہنسی آتی ہے۔ یہ بات تو واضح ہے کہ پاکستانیوں کی حس مزاح کو کوئی ہرا نہیں سکتا تاہم بس ایک چیز بری لگتی ہے کہ لوگ یہ مزاحیہ پوسٹس بناتے ہوئے انسان کا ماضی کا کام بھول جاتے ہیں۔
واضح رہے کہ اذان سمیع خان کا شمار پاکستان کے نامور موسیقاروں میں ہوتا ہے انہوں نے حال ہی میں ریلیز ہونے والی فلموں’’پرے ہٹ لو‘‘ اور ’’سپر اسٹار‘‘ کی موسیقی ترتیب دی ہے جس کو شائقین نے بہت پسند کیا ہے۔ مزید کہ فلم ’’سپراسٹار‘‘ کا اسکرین پلے بھی اذان سمیع نے لکھا ہے۔
