Category: کھیل

انٹرنیشنل کرکٹ کونسل (آئی سی سی) نے ٹی ٹوئنٹی ورلڈ کپ کی کوریج کے لیے بنگلا دیشی صحافیوں کو ایکریڈیشن دینے سے انکار کر دیا ہے، جس پر بنگلا دیش میں صحافتی حلقوں میں شدید تشویش اور غم و غصہ پایا جا رہا ہے۔

بنگلا دیشی میڈیا رپورٹس کے مطابق سری لنکا اور بھارت میں ہونے والے ورلڈ کپ میچز کے لیے بنگلا دیش کے کسی بھی صحافی کو ایکریڈیشن جاری نہیں کی گئی۔ رپورٹس میں یہ بھی انکشاف کیا گیا ہے کہ متعدد صحافیوں کی ایکریڈیشن پہلے منظور کی گئی تھی، تاہم بعد ازاں اچانک منسوخ کر دی گئی۔ایک بنگلا دیشی صحافی نے میڈیا سے گفتگو کرتے ہوئے بتایا کہ انہیں 20 تاریخ کو ایکریڈیشن کی منظوری سے متعلق تصدیقی ای میل موصول ہوئی تھی، مگر کچھ ہی عرصے بعد ایک اور ای میل کے ذریعے ایکریڈیشن مسترد کیے جانے کی اطلاع دے دی گئی، جس پر صحافتی برادری میں شدید حیرت پائی جاتی ہے۔بنگلا دیش کے ایک سینئر صحافی کا کہنا ہے کہ آئی سی سی کی روایت رہی ہے کہ اگر کسی ملک کی ٹیم کسی ایونٹ میں شریک نہ بھی ہو، تب بھی ایسوسی ایٹ ممبرز کے صحافیوں کو کوریج کے لیے ایکریڈیشن دی جاتی ہے، مگر اس بار اس اصول کی خلاف ورزی کی گئی ہے۔

بنگلا دیش کے اسپورٹس صحافیوں کی مختلف تنظیموں نے اس معاملے پر شدید ردعمل دیتے ہوئے جلد آئندہ کے لائحہ عمل کے اعلان کا فیصلہ کیا ہے۔ صحافتی تنظیموں کا کہنا ہے کہ آئی سی سی کی جانب سے اب تک ایکریڈیشن نہ دینے کی کوئی باضابطہ وضاحت سامنے نہیں آئی، جو اس تنازع کو مزید سنگین بنا رہی ہے۔

دوسری جانب بنگلا دیش کرکٹ بورڈ کی میڈیا کمیٹی کے چیئرمین امزاد حسین نے بنگلا دیشی صحافیوں کو ایکریڈیشن نہ ملنے کی تصدیق کرتے ہوئے بتایا کہ 130 سے 150 بنگلا دیشی صحافیوں نے ٹی ٹوئنٹی ورلڈ کپ کی کوریج کے لیے ایکریڈیشن کے لیے درخواستیں جمع کرائی تھیں۔امزاد حسین کے مطابق ان کی معلومات کے مطابق بنگلا دیش کے تمام صحافیوں کی درخواستیں مسترد کر دی گئی ہیں۔

واضح رہے کہ آئی سی سی کی جانب سے تاحال بنگلا دیشی صحافیوں کو ایکریڈیشن نہ دینے کے حوالے سے کوئی سرکاری مؤقف یا وضاحت جاری نہیں کی گئی، جس کے باعث شکوک و شبہات اور تحفظات میں اضافہ ہو رہا ہے۔تاہم دوسری جانب ذرائع کا کہنا ہے کہ آئی سی سی میڈیا ڈیپارٹمنٹ نے صحافیوں کی نمائندہ تنظیم سے کوریج کے خواہشمند صحافیوں کی فہرست طلب کر لی ہے۔ ذرائع کے مطابق بنگلا دیشی صحافیوں کی ایکریڈیشن کا عمل دوبارہ شروع کیے جانے کا امکان ہے۔ذرائع نے یہ بھی بتایا کہ بنگلا دیشی صحافیوں نے ابتدا میں بھارت میں ہونے والے تمام میچز کی کوریج کے لیے درخواست دی تھی، جبکہ اب امکان ہے کہ سری لنکا میں منعقد ہونے والے میچز کے لیے بنگلا دیشی صحافیوں کو ایکریڈیشن جاری کر دی جائے گی۔

ٹی ٹوئنٹی ورلڈ کپ میں پاکستان کی شرکت کے معاملے پر چیئرمین پاکستان کرکٹ بورڈ( پی سی بی) کی وزیر اعظم سے ملاقات میں تمام آپشنز کھلے رکھنے پر اتفاق کیا گیا۔

ملاقات میں محسن نقوی نے وزیراعظم کو آئی سی سی کی صورتحال سے آگاہ کیا جبکہ وزیر اعظم شہباز شریف نے محسن نقوی کو معاملہ حل کرنے کی ہدایت کی۔بعد ازاں چیئرمین پی سی بی محسن نقوی نے کہا ہے کہ ٹی ٹوئنٹی ورلڈ کپ میں پاکستان کی شمولیت کا فیصلہ جمعے یا پیر تک ہوگا۔سماجی رابطے کے پلیٹ فارم ایکس پر اپنے بیان میں محسن نقوی نے کہا کہ وزیر اعظم کو ملاقات میں آئی سی سی معاملات پر بریفنگ دی، وزیر اعظم نے تمام آپشنز کو مدنظر رکھ کر معاملہ سلجھانے کی ہدایت دی۔

قبل ازیں میڈیا رپورٹس کے مطابق پاکستان نے آئی سی سی ٹی ٹوئنٹی ورلڈ کپ میں شرکت کا فیصلہ کر لیا ہے، تاہم بنگلا دیش کو ٹورنامنٹ سے باہر کیے جانے کے معاملے پر آئی سی سی کے خلاف بھرپور احتجاج کا اعلان بھی کیا گیا ہے۔ ذرائع کے مطابق یہ اہم فیصلہ وزیر اعظم شہباز شریف اور وزیر داخلہ و چیئرمین پاکستان کرکٹ بورڈ (پی سی بی) محسن نقوی کے درمیان ملاقات میں کیا گیا۔ذرائع کا کہنا ہے کہ پاکستان نے نہ صرف ورلڈ کپ میں شرکت کا فیصلہ کیا بلکہ بنگلا دیش کے مؤقف کی مکمل حمایت کرتے ہوئے اس کا کیس عالمی سطح پر مؤثر انداز میں پیش کرنے کا بھی عزم کیا ہے۔ پاکستان کی جانب سے آئی سی سی کو باضابطہ خط کے ذریعے احتجاج ریکارڈ کرانے کا فیصلہ کیا گیا ہے، جس میں بنگلا دیش کو ورلڈ کپ سے باہر کرنے کے اقدام کو غیر منصفانہ اور دوہرے معیار کا مظہر قرار دیا جائے گا۔

ذرائع کے مطابق ٹی ٹوئنٹی ورلڈ کپ میں پاکستان کی شرکت یا عدم شرکت کے معاملے پر چیئرمین پی سی بی محسن نقوی نے وزیر اعظم شہباز شریف سے تفصیلی ملاقات کی۔ اس موقع پر وزیر داخلہ اور چیئرمین پی سی بی محسن نقوی وزیر اعظم ہاؤس پہنچے، جہاں اہم مشاورت کی گئی۔ملاقات کے دوران محسن نقوی نے وزیر اعظم کو آئی سی سی کے دوہرے معیار سے متعلق تفصیلی بریفنگ دی۔ انہوں نے مؤقف اختیار کیا کہ آئی سی سی بھارت کے لیے ایک قانون جبکہ دیگر ممالک کے لیے دوسرا قانون لاگو کرتا ہے۔ محسن نقوی نے یاد دلایا کہ بھارت نے چیمپئنز ٹرافی میں پاکستان آنے سے انکار کیا تھا، جس پر اسے متبادل وینیو فراہم کر دیا گیا، جبکہ اسی اصول کے تحت بنگلا دیش کو سہولت دینے کے بجائے ورلڈ کپ سے ہی باہر کر دیا گیا۔ذرائع کے مطابق محسن نقوی نے بتایا کہ بنگلا دیش نے آئی سی سی کو بھارت میں سکیورٹی خدشات کے باعث وہاں جانے سے آگاہ کیا تھا، مگر اس کے باوجود آئی سی سی نے بنگلا دیش کو متبادل وینیو دینے کے بجائے ٹورنامنٹ سے خارج کر دیا، جو کھلا امتیازی سلوک ہے۔

چیئرمین پی سی بی نے وزیر اعظم کو یہ بھی آگاہ کیا کہ اگر پاکستان ورلڈ کپ میں شرکت نہیں کرتا تو اسے شمولیت کے عوض ملنے والی خطیر رقم سے محروم ہونا پڑے گا، جو مالی طور پر پاکستان کرکٹ کے لیے نقصان دہ ثابت ہو سکتا ہے۔ محسن نقوی کا کہنا تھا کہ اگر بھارت کے ساتھ میچ نہ کھیلے جائیں تو اس کا زیادہ نقصان بھارت کو ہوگا، تاہم فیصلے میں قومی مفاد کو اولین ترجیح دی جائے گی۔

واضح رہے کہ آئی سی سی ورلڈ کپ سے بنگلا دیش کی بے دخلی کے بعد پاکستان کرکٹ بورڈ نے احتجاج کے لیے مختلف آپشنز پر غور شروع کر دیا تھا، جس کے تحت سفارتی، انتظامی اور کرکٹ فورمز پر آواز بلند کرنے کا فیصلہ کیا گیا ہے۔ پاکستان کا مؤقف ہے کہ کھیل کو سیاست سے بالاتر رکھا جانا چاہیے اور تمام ممالک کے ساتھ یکساں سلوک ہونا چاہیے۔

پاکستان نے ٹی 20 ورلڈ کپ کیلئے ٹیم کا اعلان کردیا، سلمان علی آغا کپتان ہوں گے، بابر اعظم اور شاہین شاہ آفریدی بھی ٹیم کا حصہ ہیں، محمد رضوان کو ورلڈ کپ اسکواڈ کا حصہ نہیں بنایا گیا۔

لاہور میں ہیڈ کوچ مائیک ہیسن، عاقب جاوید اور کپتان سلمان آغا نے پریس کانفرنس کی، جس میں ٹی 20 ورلڈ کپ کیلئے ٹیم کا اعلان کیا گیا۔رپورٹ کے مطابق ورلڈ کپ ٹیم کیلئے سلمان آغا کپتان ہوں گے، بابر اعظم بھی ٹیم میں شامل ہیں، دیگر کھلاڑیوں میں صاحبزادہ فرحان، شاداب خان، شاہین آفریدی، عثمان طارق، فہیم اشرف، خواجہ نافع، سلمان مرزا، ابرار احمد، فخر زمان، محمد نواز، عثمان خان، صائم ایوب اور نسیم شاہ شامل ہیں۔عاقب جاوید نے بتایا کہ کنڈیشنز دیکھ کر کمبی نیشن بناتے ہیں، ٹی 20 کرکٹ ون ڈے سے بالکل مختلف ہے، چیلنجنگ کنڈیشنز میں بابر اعظم کا ہونا ضروری ہے، ٹیم میں ایسا کھلاڑی ہونا چاہیے جو ہر کنڈیشن میں کھیل سکے۔

قومی کرکٹر ، آل راؤنڈر شاہد آفریدی نے انٹرنیشنل کرکٹ کونسل (آئی سی سی) کے حالیہ فیصلوں پر شدید مایوسی اور تشویش کا اظہار کرتے ہوئے ادارے پر عدم تسلسل اور دوہرے معیار اپنانے کا الزام عائد کیا ہے۔

شاہد آفریدی نے اپنے بیان میں کہا کہ وہ بطور سابق بین الاقوامی کرکٹر، جنہوں نے بنگلہ دیش میں بھی کرکٹ کھیلی اور متعدد آئی سی سی ایونٹس کا حصہ رہے، آئی سی سی کے رویے سے سخت دل برداشتہ ہیں۔ ان کے مطابق آئی سی سی نے 2025 میں پاکستان کا دورہ نہ کرنے کے لیے بھارت کے سکیورٹی خدشات کو قبول کیا، تاہم جب معاملہ بنگلہ دیش سے متعلق آیا تو وہی اصول اور حساسیت دکھائی نہیں دی۔شاہد آفریدی کا کہنا تھا کہ عالمی کرکٹ کی حکمرانی کی بنیاد تسلسل، انصاف اور برابری پر ہونی چاہیے۔ اگر ایک ملک کے سکیورٹی خدشات کو تسلیم کیا جا سکتا ہے تو دوسرے ملک کے معاملات میں بھی اسی معیار کو اپنایا جانا چاہیے۔ انہوں نے زور دیا کہ مختلف ممالک کے لیے مختلف اصول طے کرنا عالمی کرکٹ کے لیے نقصان دہ ہے۔

انہوں نے مزید کہا کہ بنگلہ دیش کے کھلاڑی اور وہاں کے کروڑوں شائقین کرکٹ عزت اور برابری کے مستحق ہیں، نہ کہ مبہم فیصلوں اور دوہرے معیار کے۔ شاہد آفریدی کے مطابق ایسے فیصلے نہ صرف کھیل کی روح کے منافی ہیں بلکہ کرکٹ کے فروغ میں بھی رکاوٹ بنتے ہیں۔شاہد آفریدی نے آئی سی سی کو واضح پیغام دیتے ہوئے کہا کہ عالمی کرکٹ کے منتظم ادارے کو پل بنانے چاہئیں، دیواریں نہیں۔ ان کا کہنا تھا کہ آئی سی سی کی ذمہ داری ہے کہ وہ تمام رکن ممالک کے ساتھ یکساں سلوک کرے تاکہ کرکٹ واقعی ایک عالمی اور منصفانہ کھیل کے طور پر آگے بڑھ سکے۔

بنگلادیش کرکٹ بورڈ (بی سی بی) نے ٹی 20 ورلڈ کپ 2026 میں بنگلادیشی ٹیم کی جگہ اسکاٹ لینڈ کو شامل کرنے کے انٹرنیشنل کرکٹ کونسل (آئی سی سی) کے فیصلے کو باضابطہ طور پر قبول کر لیا ہے۔ ذرائع کے مطابق بی سی بی نے اس معاملے کو مزید طول نہ دینے اور تنازع کو ختم کرنے کا فیصلہ کیا ہے۔

ذرائع کا کہنا ہے کہ آئی سی سی کے اعلان کے فوراً بعد بنگلادیش کرکٹ بورڈ کا ایک ہنگامی اجلاس منعقد ہوا، جس میں عالمی ایونٹ سے دستبرداری، آئی سی سی کے فیصلے کے مضمرات، اور مستقبل کی حکمتِ عملی پر تفصیلی غور کیا گیا۔ اجلاس میں اس بات پر اتفاق کیا گیا کہ موجودہ حالات میں آئی سی سی کے فیصلے کو چیلنج کرنے کے بجائے تنظیمی اور ٹیم کی بہتری پر توجہ دی جائے۔

واضح رہے کہ آئی سی سی نے آج باضابطہ اعلان کرتے ہوئے کہا کہ ٹی 20 ورلڈ کپ 2026 میں بنگلادیش کی جگہ اسکاٹ لینڈ کو شامل کیا جا رہا ہے۔ آئی سی سی نے بنگلادیش کرکٹ بورڈ کی جانب سے سیکیورٹی وجوہات کی بنیاد پر بھارت میں میچز کھیلنے سے انکار کے موقف کو تسلیم نہیں کیا۔

ادھر اسکاٹ لینڈ کرکٹ بورڈ نے آئی سی سی کے فیصلے کا خیرمقدم کرتے ہوئے اسے اپنی ٹیم کے لیے تاریخی موقع قرار دیا ہے۔ اسکاٹ لینڈ کی شمولیت سے ٹورنامنٹ میں نئی ٹیموں کو خود کو منوانے کا ایک اور موقع ملے گا۔بی سی بی ذرائع کے مطابق بنگلادیش آئندہ برسوں میں آئی سی سی ایونٹس میں شرکت کے لیے سیکیورٹی، سفارتی اور انتظامی معاملات پر پہلے سے بہتر تیاری کرے گا تاکہ مستقبل میں ایسی صورتحال سے بچا جا سکے۔