Category: کھیل

نئی دہلی: بھارتی کرکٹ ٹیم کے معروف فاسٹ بولر بھونیشور کمار نہ صرف اپنی شاندار باؤلنگ بلکہ اپنی دلچسپ محبت کی کہانی کے باعث بھی خبروں میں آ گئے ہیں۔ حال ہی میں آئی پی ایل میں 200 وکٹوں کا تاریخی سنگ میل عبور کرنے والے بھونیشور کمار کی ذاتی زندگی کا ایک دلچسپ واقعہ سوشل میڈیا پر توجہ حاصل کر رہا ہے۔

رپورٹس کے مطابق، شادی سے قبل ان کی اہلیہ نوپور ناگرنے انہیں ایک ایسا سوال پوچھا جس نے خود اسٹار کرکٹر کو بھی حیران کر دیا۔ نوپور نے بھونیشور سے پوچھا: “کرکٹ تو ٹھیک ہے، لیکن آپ مستقبل میں جاب کیا کریں گے؟” اس غیر متوقع سوال پر بھونیشور کمار کچھ لمحوں کے لیے ہکا بکا رہ گئے۔بھونیشور کمار نے ایک انٹرویو میں بتایا کہ اس وقت وہ رنجی ٹرافی کھیل رہے تھے اور ہندوستان کے لیے کھیلنے کا خواب رکھتے تھے۔ انہوں نے بڑی مشکل سے نوپور کو قائل کیا کہ کرکٹ ہی ان کا پیشہ اور مستقبل ہے۔ دلچسپ بات یہ ہے کہ نوپور اس وقت ایک سافٹ ویئر انجینئر کے طور پر کام کر رہی تھیں، اس لیے وہ ایک مستحکم کیریئر کے بارے میں سنجیدہ تھیں۔

یہ محبت کی کہانی بچپن سے شروع ہوئی۔ دونوں ایک ہی محلے میں پلے بڑھے اور کم عمری میں ہی ایک دوسرے کو جاننے لگے۔ وقت کے ساتھ یہ دوستی محبت میں بدل گئی۔ نوپور نے انکشاف کیا کہ بھونیشور نے انہیں تین بار پرپوز کیا پہلے میسج، پھر فون کال، اور آخر میں آمنے سامنے،کچھ عرصے تک یہ رشتہ گھر والوں سے پوشیدہ رکھا گیا، تاہم بعد میں دونوں خاندانوں نے اس رشتے کو قبول کر لیا۔ بالآخر 23 نومبر 2017 کو میرٹھ میں دونوں شادی کے بندھن میں بندھ گئے۔

سری لنکا کرکٹ میں بڑی انتظامی تبدیلی، صدر شمی سلوا نے اپنے عہدے سے استعفیٰ دے دیا ہے۔

سری لنکا کرکٹ کی جانب سے جاری کردہ اعلامیے کے مطابق صدر شمی سلوا کے ساتھ ادارے کی ایگزیکٹو کمیٹی نے بھی اجتماعی طور پر استعفیٰ دے دیا ہے۔ اعلامیے میں بتایا گیا ہے کہ شمی سلوا اور ایگزیکٹو کمیٹی کے اراکین نے اپنے استعفوں سے متعلق باقاعدہ طور پر سری لنکا کے وزیرِ کھیل سنیل کمارا گاماگے کو آگاہ کر دیا ہے۔
ذرائع کے مطابق اس فیصلے کے بعد سری لنکا کرکٹ کے انتظامی ڈھانچے میں فوری تبدیلی کا امکان ہے اور ادارے کی ذمہ داریاں عارضی طور پر ایک عبوری انتظامیہ کے سپرد کی جائیں گی جو روزمرہ امور اور کرکٹ معاملات کو سنبھالے گی۔

دوسری جانب سری لنکن میڈیا رپورٹس میں دعویٰ کیا گیا ہے کہ شمی سلوا اور ایگزیکٹو کمیٹی کے مستعفی ہونے کے بعد بینکر ایرن وکرامارتنے کو سری لنکا کرکٹ کی قیادت سنبھالنے کے لیے مضبوط امیدوار کے طور پر دیکھا جا رہا ہے۔ تاہم اس حوالے سے حتمی فیصلہ حکومتی اور کرکٹ حکام کی مشاورت کے بعد کیا جائے گا۔

وفاقی وزیر داخلہ محسن نقوی نے پی ایس ایل 11 فائنل میں شائقین کی شرکت سے متعلق اہم بیان دیا ہے

وفاقی وزیر داخلہ محسن نقوی نے سماجی رابطے کی ویب سائٹ ایکس (ٹوئٹر) پر اپنے بیان میں کہا ہے کہ انہوں نے وزیراعظم شہباز شریف سے کرکٹ شائقین کو اسٹیڈیم میں آنے کی اجازت دینے کی درخواست کی تھی۔ انہوں نے بتایا کہ وزیراعظم بھی شائقین کو اجازت دینے کے خواہاں تھے، تاہم ملک میں جاری کفایت شعاری مہم اور ایندھن کے کم استعمال کی پالیسی کے باعث اس معاملے پر احتیاط کی جا رہی تھی۔محسن نقوی کے مطابق فرنچائز مالکان کی درخواست پر وزیراعظم نے پی ایس ایل 11 کے فائنل میں شائقین کو اسٹیڈیم آنے کی خصوصی اجازت دے دی، جس پر انہوں نے وزیراعظم کا شکریہ ادا کیا اور شائقین کے لیے اس سہولت کو خوش آئند قرار دیا۔

پاکستان کرکٹ بورڈ نے قومی ٹیم کے آل راؤنڈر محمد نواز کا نشہ آور شے کا ٹیسٹ مثبت آنے پر معاملے کی تحقیقات کا فیصلہ کیا ہے۔

کرکٹ ویب سائٹ کرک انفو کی رپورٹ کے مطابق محمد نواز کا نشہ آور شےکا ٹیسٹ ٹی ٹوئنٹی ورلڈکپ کے دوران مثبت آیا تھا، آئی سی سی نے اس حوالے سے پی سی بی کو آگاہ کر دیا ہے، آئی سی سی کی جانب سے معلومات فراہم کرنے کے بعد پی سی بی نے معاملے کی تحقیقات کا آغاز کر دیا ہے، ٹیسٹ میں محمد نواز پر ریکریئیشنل ڈرگ (نشہ آور شے) استعمال کرنا ثابت ہوا، پی سی بی محمد نواز کے خلاف تحقیقات سے متعلق آج آئی سی سی کو آگاہ کرے گا،محمد نواز ان دنوں پاکستان سپر لیگ میں ملتان سلطانز کی نمائندگی کر رہے ہیں۔

والی بال کی عالمی گورننگ باڈی نے انڈیا والی بال فیڈریشن کی منظوری منسوخ کر دی ہے،

بھارتی میڈیا رپورٹس کے مطابق والی بال فیڈریشن آف انڈیا کے خلاف یہ سخت فیصلہ قانونی اور انتظامی ضابطوں کی سنگین خلاف ورزیوں کے باعث کیا گیا۔ ذرائع کا کہنا ہے کہ فیڈریشن کے معاملات میں شفافیت کی کمی، داخلی تنازعات اور ناقص گورننس اس اقدام کی بنیادی وجوہات ہیں۔رپورٹس میں مزید بتایا گیا ہے کہ یہ فیصلہ ایک ایسے وقت میں سامنے آیا جب دو سینئر قومی کھلاڑیوں نے نیشنل ٹریننگ کیمپ کو احتجاجاً چھوڑ دیا۔ کھلاڑیوں نے الزام عائد کیا کہ کیمپ میں فراہم کی جانے والی سہولیات غیر معیاری اور غیر سائنسی تھیں، جبکہ ٹیم سلیکشن کے عمل میں بھی مبینہ طور پر سیاست اور اقربا پروری کا عمل دخل تھا۔

میڈیا کے مطابق عالمی ادارے نے موجودہ اسٹیئرنگ کمیٹی کو ہدایت دی ہے کہ وہ ملک میں والی بال کے فروغ اور کھلاڑیوں کی فلاح و بہبود کے لیے فوری اقدامات کرے۔ ساتھ ہی اسٹیئرنگ کمیٹی کو عبوری طور پر اپنے فرائض جاری رکھنے کی اجازت بھی دی گئی ہے تاکہ کھیل کا نظام مکمل طور پر معطل نہ ہو۔