Category: کھیل

قومی کرکٹر صہیب مقصود کے ساتھ ملتان کے ایک کار شو روم کے مالک نے کروڑوں روپے کا فراڈ کر دیا۔

صہیب مقصود نے سوشل میڈیا ویب سائٹ ایکس پر اپنے ساتھ ہونے والے فراڈ کی تفصیلات شیئر کرتے ہوئے وزیراعلیٰ مریم نواز، وفاقی وزیر داخلہ و چیئرمین پی سی بی محسن نقوی اور حکومت پنجاب سے مدد کی اپیل کر دی،صہیب مقصود نے ویڈیو میں بتایا کہ میں نے اپنے ایک جاننے والے شو روم کے مالک کی مدد سے اپنی گاڑی فروخت کی، اس نے میری گاڑی فروخت کرنے کے لیے ایک مقامی آدمی سے بات کی چونکہ میں اس وقت امریکا جا رہا تھا تو اس نے مجھے بتایا، ’جو شخص گاڑی خریدنا چاہتا ہے وہ ایڈوانس میں 60 لاکھ روپے دے رہا ہے تو آپ گاڑی کے کاغذات ابھی اپنے پاس ہی رکھیں جب آپ امریکا سے واپس آئیں گے تو بقیہ رقم ادا کرکے آپ سے گاڑی کے کاغذات لے لیں گے،جب میں امریکا سے واپس آیا اور شو روم کے مالک سے بقیہ پیسے مانگے تو وہ مسلسل مجھے ٹالتا رہا جب وہ مسلسل 8 ماہ تک ٹال مٹول کرتا رہا تو میں نے اپنی گاڑی کو ٹریک کیا تو مجھے پتہ چلا کہ میری گاڑی لاہور میں موجود ہے پھر میں لاہور میں اس شخص کے پاس گیا جس کے پاس میری گاڑی موجود تھی۔ میں نے اس شخص کو کہا کہ یہ میری گاڑی ہے تو اس نے جواب دیا ’یہ گاڑی میں نے خریدی ہے‘ تو میں نے اسے گاڑی کے کاغذات دکھانے کو کہا تو اس نے مجھ سے بدتمیزی کی اور یہ تو سب کو معلوم ہے کہ اگر بغیر کاغذات کے گاڑی خریدی جا رہی ہے تو اس کا واضح مطلب ہے کہ وہ گاڑی چوری کی ہے۔‘‘

صہیب مقصود نے بتایا کہ میں ملتان واپس آ کر مقامی آدمی کے پاس گیا اور کہا کہ یا تو مجھے میری گاڑی دو یا پھر میرے پیسے دو تو اس نے ایک نیا گیم کیا اس نے کہا جو 60 لاکھ آپ نے وصول کیے تھے وہ لے کر آئیں ہم لاہور جا کر آپ کی گاڑی لے آتے ہیں،جب میں پیسے لے کر مقامی آدمی کے ساتھ لاہور گیا تو جس شخص کے پاس میری گاڑی تھی اس نے اپنے سیاسی اثر و رسوخ کی وجہ سے انتہائی ہٹ دھرمی کا مظاہرہ کیا اور کہا کہ اس گاڑی کو کوئی ہاتھ بھی نہیں لگا سکتا، اگر کسی کا چاچا یا ماما سیاستدان ہے تو اس کا مطلب یہ ہے وہ ایک عام آدمی سے اس کی محنت کی کمائی سے بنائی ہوئی چیزیں چھین کر لے جا سکتا ہے، جب اس معاملے پر میں نے قانون کا سہارا لیا تو بھی مجھ پر ہی دباؤ ڈالا گیا اور مجھے ایک دوسری گاڑی دی گئی جس کے کاغذات جعلی نکلے تو میں نے وہ گاڑی واپس کردی

راولپنڈی ٹیسٹ میں پاکستانی ٹیم ناقص بیٹنگ کی بدولت جنوبی افریقا کو صرف 68 رنز کا ہدف دے سکی جسے افریقی ٹیم نے 2 وکٹوں کے نقصان پر پورا کرلیا۔

پنڈی ٹیسٹ میں آج کھیل کے چوتھے دن کے آغاز سے ہی قومی ٹیم مشکلات میں گھری رہی اور پہلے سیشن میں ہی ایک کے بعد ایک وکٹ گرنا شروع ہوگئی،آج کھیل کے آغاز میں سب سے پہلے پاکستان کے بابراعظم 50 رنز پر کر آوٹ ہوئے جس کے بعد تھوڑی ہی دیر میں دیگر بیٹرز بھی پویلین لوٹ گئے اور محمد رضوان 18 رنز بنا سکے،اس کے بعد سلمان علی آغا نے 28 اور ساجد خان نے 13 رنز بنائے جب کہ نعمان علی اور شاہین آفریدی صفر رنز پر آؤٹ ہوئے، آصف آفریدی صفر کے ساتھ ناٹ آؤٹ رہے۔

جنوبی افریقا کی جانب سے سیمن ہارمر نے 6 وکٹیں حاصل کیں جب کہ کیشو مہراج نے 2 اور کگیسو ربادا نے ایک وکٹ اپنے نام کی،دوسری اننگز میں جنوبی افریقا نے 68 رنز کا ہدف 2 وکٹوں کے نقصان پر پورا کیا،جنوبی افریقا کی جانب سے دوسرے اننگز میں ایڈم مرکرم 42 رنز جب کہ ٹرسٹن اسٹبز صفر رنز بناکر آؤٹ ہوئے، ریان ریکلٹن 25 رنز بناکر ناٹ آؤٹ رہےپاکستان اور جنوبی افریقا کے درمیان 2 ٹیسٹ پر مشتمل سیریز 1-1 سے برابر ہوگئی۔

یاد رہے کہ پاکستان نے پہلی اننگز میں 333 بنائے تھے جس کے جواب میں مہمان ٹیم نے 404 رنز بنائے تھے۔

پی سی بی نے پی ایس ایل فرنچائز ملتان سلطانز کا کنٹریکٹ معطل کردیا،

ملتان سلطانز کے مالک علی ترین نے متعدد بار پی سی بی کوڈ آف کنڈکٹ کی خلاف ورزی کی، پی ایس ایل کی ساکھ کو نقصان پہچانے کی کوشش کی، علی ترین سوشل میڈیا اور مین سٹریم میڈیا پر بورڈ کیخلاف بھی بیان بازی کرتے رہے، ملتان سلطانز کے مالک علی ترین کی جانب سے بار بار پی سی بی اور پی ایس ایل انتظامیہ کے خلاف میڈیا انٹرویوز دینے سے لیگ کی ساکھ متاثر ہوئی، جو معاہدے کی سنگین خلاف ورزی کے زمرے میں آتی ہے

پی سی بی نے فرنچائز کو معاہدہ منسوخی کا نوٹس بھی ارسال کر دیا ہے، جس میں واضح کیا گیا ہے کہ مسلسل خلاف ورزیوں کے باعث یہ قدم اٹھایا گیا۔ بورڈ کا مؤقف ہے کہ کسی بھی فرنچائز کو لیگ کے اصول و ضوابط سے بالاتر ہونے کی اجازت نہیں دی جا سکتی،جبکہ دوسری جانب ملتان سلطانز کے ذرائع کا کہنا ہے کہ قانونی ٹیم پی سی بی کی طرف سے جاری کردہ نوٹس کا جائزہ لے رہی ہے، جس کے بعد باقاعدہ بیان جاری کیا جائے گا ،ذرائع کے مطابق معطلی کے بعد مستقبل میں فرنچائز کی شرکت سے متعلق حتمی فیصلہ پی ایس ایل گورننگ کونسل کے آئندہ اجلاس میں کیا جائے گا۔

اسلام آباد: پاکستان فٹبال کے میدان میں ایک نئی پیشرفت سامنے آئی ہے، جہاں پاکستان فٹبال فیڈریشن (PFF) اور سعودی فٹبال فیڈریشن (SAFF) کے درمیان تعاون کے معاہدے (MoU) پر دستخط ہو گئے۔ یہ معاہدہ دونوں ممالک کے درمیان فٹبال کے شعبے میں تعلقات کو مضبوط بنانے اور کھیل کی ترقی کے لیے سنگِ میل ثابت ہوگا۔

معاہدے پر دستخط کی تقریب میں پاکستان فٹبال فیڈریشن کے صدر محسن گیلانی اور سعودی فٹبال فیڈریشن کے سربراہ یاسر المصحال نے شرکت کی۔ دونوں رہنماؤں نے فٹبال کے فروغ کے لیے مشترکہ عزم کا اظہار کیا اور امید ظاہر کی کہ یہ شراکت نہ صرف کھلاڑیوں بلکہ کوچز اور دیگر ٹیکنیکل ماہرین کے لیے بھی نئے مواقع پیدا کرے گی۔معاہدے کے تحت کوچ ڈیولپمنٹ، ویمن فٹبال، اور یوتھ فٹبال کے فروغ پر خصوصی توجہ دی جائے گی۔ دونوں ممالک فٹبال کے مختلف شعبوں میں تجربات کا تبادلہ کریں گے، جبکہ فٹبالرز کے لیے تربیتی ایکسچینج پروگرام بھی منعقد کیے جائیں گے تاکہ کھلاڑی بین الاقوامی معیار کے مطابق اپنی صلاحیتوں کو نکھار سکیں۔

ذرائع کے مطابق پاکستان اور سعودی عرب جلد ہی مشترکہ تربیتی کیمپوں کے انعقاد کا آغاز کریں گے، جن میں نوجوان فٹبالرز اور خواتین کھلاڑیوں کو خصوصی تربیت فراہم کی جائے گی۔ اس اقدام کا مقصد فٹبال کو گراس روٹ سطح سے فروغ دینا اور نئی ٹیلنٹ کو بین الاقوامی معیار پر لانا ہے۔صدر پی ایف ایف محسن گیلانی نے اس موقع پر کہا کہ “یہ معاہدہ پاکستان میں فٹبال کے نئے دور کا آغاز ہے۔ سعودی عرب کے ساتھ تعاون سے ہمارے کوچز، کھلاڑیوں اور آفیشلز کو عالمی معیار کے مواقع میسر آئیں گے۔”سعودی فٹبال فیڈریشن کے سربراہ یاسر المصحال نے بھی اس شراکت کو اہم قرار دیتے ہوئے کہا کہ “پاکستان میں فٹبال کا بے پناہ ٹیلنٹ موجود ہے، ہم اس صلاحیت کو عالمی سطح پر اجاگر کرنے میں مدد کریں گے۔”

ایشیا کپ کی ٹرافی کے حوالے سے بھارتی کرکٹ بورڈ (بی سی سی آئی) اور ایشین کرکٹ کونسل (اے سی سی) کے درمیان نیا تنازعہ شدت اختیار کر گیا ہے۔ ذرائع کے مطابق بھارتی کرکٹ بورڈ نے ایشین کرکٹ کونسل کے صدر محسن نقوی کو باضابطہ طور پر ایک خط لکھا ہے جس میں ایشیا کپ کی ٹرافی کی حوالگی کا مطالبہ کیا گیا ہے۔

ذرائع کے مطابق ایشین کرکٹ کونسل نے بی سی سی آئی کے خط کا جواب دیتے ہوئے دوٹوک مؤقف اختیار کیا ہے کہ "اگر بھارتی بورڈ کو ٹرافی چاہیے تو اس کے لیے ایک باقاعدہ تقریب منعقد کی جائے گی، اور ٹرافی اسی تقریب میں دی جائے گی۔”اے سی سی نے اپنے جواب میں مزید کہا کہ ٹرافی کی حوالگی کے لیے تقریب نومبر کے پہلے ہفتے میں دبئی میں منعقد کی جائے گی، جس میں بھارتی ٹیم یا نمائندے شرکت کر کے ٹرافی وصول کر سکتے ہیں۔

باخبر ذرائع کے مطابق ایشین کرکٹ کونسل نے بھارتی بورڈ کو تحریری طور پر آگاہ کر دیا ہے کہ تقریب کی تاریخ اور مقام طے کر لیے گئے ہیں، اور اب فیصلہ بھارتی بورڈ کے ہاتھ میں ہے کہ وہ شرکت کرے یا نہیں۔

یاد رہے کہ ایشیا کپ 2025 کے فائنل کے موقع پر بھارتی ٹیم نے ٹورنامنٹ جیتنے کے باوجود غیر معمولی رویہ اختیار کیا تھا۔ بھارتی کپتان اور کھلاڑیوں نے ایشین کرکٹ کونسل کے سربراہ محسن نقوی سے ٹرافی لینے سے انکار کر دیا تھا، جس کے باعث تقریب ادھوری رہ گئی تھی۔بی سی سی آئی نے اس وقت اے سی سی کو تحریری طور پر مطلع کیا تھا کہ وہ ٹرافی موصول نہیں کرے گا، جس کے بعد انتظامیہ نے ٹرافی میدان سے واپس منگوا لی تھی۔ذرائع کے مطابق اس واقعے کے پیچھے بھارتی حکومت اور مودی سرکار کے دباؤ کا بھی کردار بتایا جا رہا ہے، جس کے تحت بی سی سی آئی نے سیاسی بنیادوں پر یہ فیصلہ کیا۔ تاہم محسن نقوی نے بھارتی ہٹ دھرمی تسلیم کرنے سے انکار کرتے ہوئے تقریب جاری رکھی، رنر اپ ٹیم کو انعامات دیے اور بغیر ٹرافی دیے تقریب اختتام پذیر ہوئی۔

اے سی سی کے حالیہ فیصلے کے بعد اب یہ واضح ہو گیا ہے کہ ایشیا کپ کی ٹرافی بھارتی ٹیم کو صرف اسی صورت میں دی جائے گی جب وہ دبئی میں منعقدہ باضابطہ تقریب میں شرکت کرے گی۔

پاکستان کرکٹ بورڈ کی جانب سے سابق کپتان مصباح الحق کو اہم ذمہ داری دیے جانے کا امکان ہے۔

ذرائع کے مطابق پی سی بی نےچند دن قبل ڈائریکٹرکرکٹ آپریشنز انٹرنیشنل کے لیے اشتہار دیا تھا اور اب بورڈ کی جانب سے مصباح الحق کی اس عہدے پر تقرری کا امکان ہے۔نجی ٹی وی کے مطابق ذرائع کا بتانا ہے کہ اشتہار میں اہلیت کیلئے پہلی مرتبہ سابق ٹیسٹ کرکٹر یا ون ڈے انٹرنیشنل کرکٹرکی شرط رکھی گئی ہے،واضح رہے کہ پی سی بی نے ایشیا کپ میں پاک بھارت تنازع میں صورتحال سے صحیح طریقے سے نہ نمٹنے پر ڈائریکٹرکرکٹ آپریشنز انٹرنیشنل عثمان واہلہ کو معطل کیا تھا تاہم بعد میں انہیں بحال کردیا گیا تھا۔