پاکستان کی انڈر 19 کرکٹ ٹیم کو برطانوی شہر پورٹسماؤتھ میں غلطی سے پناہ کے متلاشی افراد کا گروپ سمجھ لیا گیا،یہ واقعہ منگل کی شام میریئٹ ہوٹل کے باہر پیش آیا جہاں پاکستانی ٹیم قیام پذیر تھی-
رپورٹس کے مطابق تقریباً 40 غیر ملکی افراد کی ایک ٹیم میریئٹ ہوٹل پہنچی تو وہاں موجود بعض افراد نے اسے پناہ گزینوں کی آمد سمجھتے ہوئے احتجاج شروع کر دیا،صورتحال اس وقت کشیدہ ہوگئی جب مظاہرین ہوٹل کے باہر جمع ہوگئے،سوشل میڈیا پر یہ افواہ پھیل گئی تھی کہ غیر ملکی افراد ایک کوچ کے ذریعے و ہاں پہنچے ہیں، جس کے بعد پولیس کو شام ساڑھے 6 بجے سے کچھ دیر پہلے طلب کیا گیا،پولیس نے موقع پر پہنچ کر معلوم کیا کہ جن افراد کے بارے میں احتجا ج کیا جا رہا ہے وہ دراصل پاکستان کی انڈر 19 کرکٹ ٹیم کے کھلاڑی ہیں۔
ریفارم پارٹی کے کونسلر جارج میڈوک نے معاملہ سلجھانے کے لیے ہوٹل سے رابطہ کیا اور پاکستان انڈر 19 ٹیم کے کوچ سے بات کی بعد ازاں انہوں نے مظاہرین کو بتایا کہ یہ افراد پناہ گزین نہیں بلکہ کرکٹ ٹیم کے ارکان ہیں جس پر مظاہرین چند ہی منٹ میں منتشر ہوگئے ،انگلینڈ اینڈ ویلز کرکٹ بورڈ نے واقعے کے بعد پاکستان کرکٹ حکام سے رابطہ کیا ہے اور ٹیم کی سیکیورٹی انتظامات کا جائزہ لیا جا رہا ہے۔
جارج میڈگوک نے گارڈین سے گفتگو میں کہا کہ میں نے ٹیم کے کوچ سے بات کی، وہ اس معاملے کو سمجھ رہے تھے۔ میں مظاہرین کے پاس گیا اور کہا کہ آپ لوگوں کو غلط فہمی ہوئی ہے، یہ کرکٹ ٹیم ہے۔ وہ چند منٹ میں وہاں سے چلے گئے، یہ انتہائی بدقسمت واقعہ تھا۔
واقعے کی ابتدا اس وقت ہوئی جب بس سے اترنے والے افراد کی ایک تصویر آن لائن شیئر کی گئی تصویر دیکھ کر لوگوں نے بغیر تصدیق کے یہ خیال قائم کرلیا کہ وہاں پناہ کے متلاشی افراد پہنچے ہیں،میڈگوک نے بتایاکہ کسی شخص نے سوشل میڈیا پر دیکھا کہ غیر ملکی نظر آنے والے کچھ لوگ کوچ سے اتر رہے ہیں اور ان کی تصویر آن لائن ڈال دی، جس کے بعد یہ معاملہ شروع ہوا، یہ محض قیاس آرائی تھی، اس کی حقیقت یا کسی ثبوت پر بنیاد نہیں تھی۔
ہیمپشائر پولیس کے مطابق اہلکاروں نے مظاہرین سے بات کرکے انہیں بتایا کہ ان کا خدشہ غلط فہمی پر مبنی ہے، پولیس نے کسی جرم کی نشاندہی نہیں کی اور مظاہرین رات 9 بجے سے کچھ دیر پہلے وہاں سے چلے گئےپورٹس ماؤتھ نارتھ کی رکن پارلیمنٹ امانڈا مارٹن نے واقعے پر تشویش کا اظہار کرتے ہوئے کہا کہ غلط معلومات کی وجہ سے نوجوان کرکٹرز کو نشانہ بنایا جانا قابل قبول نہیں۔
پاکستان انڈر 19 ٹیم نے 2 سے 5 ستمبر تک انگلینڈ انڈر 19 کے خلاف چار روزہ میچ کھیلا جس میں اسے 10 رنز سے شکست ہوئی جبکہ 9 ستمبر کے یوتھ ون ڈے میں پاکستان نے 177 رنز سے کامیابی حاصل کی۔
