پنجابی فلم انڈسٹری کی معروف اداکارہ ثوبیہ ادریس (دیدار) اور ان کے شوہر کے خلاف مبینہ فراڈ کے سنگین الزامات پر مقدمہ درج کر لیا گیا ہے۔
فیڈرل انویسٹی گیشن ایجنسی (ایف آئی اے) نے لاہور میں کارروائی کرتے ہوئے دیدار کے شوہر جہاں زیب کو حراست میں لے لیا ہے جو مبینہ طور پر شہریوں سے بھاری رقوم وصول کر کے انہیں بیرون ملک بھیجنے کا جھانسہ دیتے رہے، حکام کا کہنا ہے کہ ملزم کے خلاف متعدد شکایات موصول ہو چکی تھیں۔
پولیس حکام کے مطابق تفتیش کے دوران ملزم نے مزاحمت کی جبکہ چھاپے کے وقت اس کے گارڈز نے بھی کارروائی میں رکاوٹ ڈالنے کی کوشش کی، تاہم سیکیورٹی اہلکاروں نے صورتحال پر قابو پا کر ملزم کو گرفتار کر لیا۔
اسحاق ڈار کا آذربائیجانی ہم منصب سے رابطہ
ایف آئی اے ذرائع کا دعویٰ ہے کہ اداکارہ دیدار بھی مبینہ طور پر اس نیٹ ورک میں شامل تھیں اور لاہور کے علاوہ اسلام آباد کے سیکٹر G-11 میں دفاتر کے ذریعے سرگرم عمل تھیں، ملزمہ کی گرفتاری کے لیے چھاپے مارے جا رہے ہیں اور وہ تاحال مفرور ہیں۔
دیدار پاکستان کی شوبز انڈسٹری میں بطور کامیڈین، اداکارہ اور ڈانسر ایک نمایاں مقام رکھتی ہیں، حالیہ الزامات کے بعد وہ منظر عام سے غائب ہیں، ابتدائی تحقیقات کے مطابق ملزمان نے مبینہ طور پر اس اسکیم کے ذریعے تقریباً 25 کروڑ روپے بٹورے۔
ایران کے سکیورٹی چیف علی لاریجانی کو مار دیا، اسرائیلی دعویٰ
ایف آئی اے کا کہنا ہے کہ مزید تحقیقات جاری ہیں اور شواہد کی روشنی میں دائرہ کار کو وسیع کیا جا رہا ہے، دوسری جانب متاثرہ شہریوں کی جانب سے اعلیٰ حکام کو درخواستیں بھی دی گئی ہیں جن میں معاملے کی شفاف تحقیقات اور سخت قانونی کارروائی کا مطالبہ کیا گیا ہے۔
