Tag: بریکنگ

کولمبو:معاشی و سیاسی بحران میں گھرے سری لنکا نے روس سے خام تیل حاصل کیا ہے۔اطلاعات کے مطابق اے ایف پی کے مطابق سری لنکا کو اپنی آزادی سے لے کر اب تک کے بدترین بحران کا سامنا ہے۔ ملک میں پیٹرولیم مصنوعات سمیت دیگر ضروری اشیا کی کمی ہے۔ حکومتی آئل ریفائنری سیلون پیٹرولیم کارپوریشن مارچ میں فارن ایکسچینج بحران کے باعث بند ہو گئی تھی اور حکومت خام تیل درآمد نہیں کر سکی تھی۔

سری لنکا کے انرجی منسٹر کنچانا وجیسیکیرا نے کہا کہ روسی تیل ایک مہینے سے کولمبو کی پورٹ پر تھا، لیکن ملک کے پاس ادائیگی کے لیے ساڑھے سات کروڑ ڈالر نہیں تھے۔

سری لنکا روس پر امریکی پابندیوں کے باوجود ماسکو سے براہ راست خام تیل، کوئلے، ڈیزل اور پٹرول کے حصول کے لیے مذاکرات کر رہا ہے۔ یورپی یونین کے لیڈران تیل سمیت روس پر دیگر پابندیاں لگانے کے لیے پیر کو ملاقات کر رہے ہیں۔

یاد رہے کہ پاکستان میں بھی پٹرولیم مصنوعات کی قیمتوں میں اضافہ کیا گیاہے جبکہ سابق وزیراعظم عمران خان با ربار کہہ رہے ہیں کہ میں روسی صدر سے بات کرچکا تھا کہ پاکستان کو پٹرول سستے داموں ملے لیکن امریکہ کے کہنے پر حکومت ختم کردی گئی

یاد رہےکہ کل رات پاکستان میں پٹرول، ڈیزل،مٹی کے تیل کی قیمت میں 30 روپے فی لٹر اضافہ کردیا گیامفتاح اسماعیل نے پریس کانفرنس کرتے ہوئے کہا کہ ایک لٹر پٹرول 179.86روپے، ڈیزل 174.15 روپے، لائٹ ڈیزل 148.31 روپے جبکہ مٹی کا تیل 155.56 روپےفی لٹر ہوگا۔

وزیر خزانہ نے کہا کہ جب تک پٹرول کی قیمت نہیں بڑھائیں گے آئی ایم ایف قرض نہیں دے گا، عمران خان فارمولے پر جاؤں تو ڈیزل 305 روپے کا ہوگا، حکومت نے غریب لوگوں کی پروٹیکشن کا فیصلہ کیا ہے۔مفتاح اسماعیل نے کہا کہ سابق حکومت میں فروری تک پٹرول اور ڈیزل کی قیمت میں اضافہ ہوا، سابق حکومت نے پٹرول کی قیمت کو فکسڈ رکھا۔

وزیر خزانہ نے کہا کہ پٹرولیم مصنوعات کے لیے عوام پر کچھ نہ کچھ بوجھ ڈالنا ناگزیر ہوگیا، پٹرول پر سبسڈی کا امیر اور غریب دونوں فائدہ اٹھا رہے ہیں۔مفتاح اسماعیل نے کہا کہ 15 دن میں 55 ارب روپے کا نقصان برداشت کر چکے ہیں، سابق حکومت کی پالیسیوں کے باعث آج مہنگائی کا سامنا ہے،عمران خان کی حکومت معاشی بارودی سرنگیں بچھا کر گئی ہے۔

وزیر خزانہ نے کہا کہ پہلے دن سےکہہ رہا تھا کہ عوام پر کچھ نہ کچھ بوجھ ڈالنا ناگزیر ہے، سول حکومت چلانے کا خرچہ 42 ارب اور سبسڈی سوا سو ارب روپے ہے، 15دن میں 55ارب روپے کا نقصان برداشت کرچکے ہیں۔بعد ازاں وزارت خزانہ نے پٹرولیم مصنوعات کی نئی قیمتوں کا نوٹیفکیشن بھی جاری کردیا۔

ماسکو:روس اور یوکرین کے درمیان جنگ میں ابھی تک شدت بڑھتی ہی جارہی ہے اور روسی افواج بڑی حکمت عملی سے آگےبڑھ رہی ہیں ، دوسری طرف یہ بھی روس نے یوکرین کے اہم تزویراتی مشرقی علاقے لیمان پر قبضے کا دعویٰ کیا ہے۔

میڈیا رپورٹس کے مطابق روسی وزارت دفاع نے دعویٰ کیا ہے کہ لیمان روس اور علیحدگی پسند فورسز کے مکمل کنٹرول میں آچکا ہے، علیحدگی پسندوں اور روسی مسلح افواج کے مشترکہ آپریشن میں لیمان کا قبضہ حاصل کیا گیا۔

لیمان پر قبضے کی لڑائی کے دوران کتنا جانی و مالی نقصان ہوا ہے اس حوالے سے فی الحال تفصیلات سامنے نہیں آئیں۔دوسری جانب امریکی صدر جو بائیڈن کا کہنا ہے کہ روسی صدر ولادیمیر پیوٹن یوکرین کی شناخت اور کلچر کو مٹانے کے ایجنڈے پر کام کررہے ہیں۔

یو ایس نیول اکیڈمی میں گریجویشن تقریب سے خطاب کے دوران ان کا کہنا تھا کہ روسی افواج یوکرین میں اسپتالوں، اسکولوں، نرسریز اور عجائب گھروں کو بلاتفریق نشانہ بنارہی ہیں، جس کا مقصد اس کے علاوہ کچھ نہیں کہ یوکرین کی علیحدہ شناخت کو مٹادیا جائے۔

یاد رہے کہ روس اور یوکرین کی جنگ کو شروع ہوئے اس وقت 3 ماہ سے زائد عرصہ گزر چکا ہے۔جنگ کے دوران یوکرین اور روس کے سیکڑوں فوجی ہلاک ہوچکے ہیں جبکہ یوکرین میں شہریوں کی ہلاکتوں کی اطلاعات ہیں۔یوکرین پر اُمید تھا کہ اس جنگ میں نیٹو اور امریکا اس کی مدد کریں گے مگر انہوں یوکرین کو روس کے مقابلے کیلئے تنہا چھوڑ دیا۔

ماسکو:جیسے جیسے امریکہ اور روس کے درمیان حالات کشیدہ ہورہے ہیں امریکہ کی طرف سے سخت پابندیوں کی دھمکیاں بھی بڑھ رہی ہیں امريکا کی جانب سے شمالی کوريا کے خلاف نئی پابندياں، 2 روسی بینک بھی شامل،اطلاعات کے مطابق امریکہ نے شمالی کوريا کے حالیہ میزائل تجربات کے ردعمل میں اس کے خلاف نئی پابندياں عائد کرنے کا اعلان کیا ہے۔

ان دھمکیوں کے اثرات سامنے آنے شروع ہوگئے ہیں اور یہ بھی کہا جارہا ہےکہ امریکہ اس وقت روس اور شمالی کوریا کے خلاف سخت اقدامات کرنا چاہتا ہے، یہ وجہ ہےکہ تازہ امريکی پابندیوں کی زد میں دو روسی بينک، ايک شمالی کوریائی کمپنی اور ايک شخص آيا ہے جس پر الزام ہے کہ اس نے شمالی کوريا کے ہتھياروں کے پروگرام ميں معاونت فراہم کی ہے۔

امریکی ذرائع ابلاغ کی طرف سے کہاگیا ہے کہ اس حوالے سے امریکی محکمہ خزانہ کی پابنديوں کے زمرے ميں آنے والے روسی بينکوں کے نام بينک اسپٹنک اور فار ايسٹرن بينک ہيں روس کے بینکوں کے ساتھ ساتھ شمالی کوريائی کمپنی کا نام ايئر کاريو ٹريڈنگ کارپوريشن ہے۔یہ بھی کہا جارہا ہےکہ شمالی کوریا کے خلاف امریکہ نے جونگ یونگ نام نامی جس شمالی کوریائی باشندے پر پابندياں عائد کی ہيں اس پر الزام ہے کہ اس نے بيلسٹک ميزائل کی تياری سے منسلک کمپنيوں کے ساتھ تعاون کيا ہے۔

واضح رہے کہ امریکی پابندیوں کی یہ نئی پيش رفت اقوام متحدہ کی شمالی کوریا پر مزيد پابنديوں کے حوالے سے پیش کی گئی قرارداد پر رائے شماری کے ايک دن بعد سامنے آئی ہے۔
اقوام متحدہ کی سلامتی کونسل میں جمعرات کو شمالی کوریا کے خلاف پیش کی گئی امریکی قرارداد کو روس اور چين نے ويٹو کر ديا تھا جس پر امریکہ کی سفیر لنڈا تھامس گرین فیلڈ نے شدید برہمی کا اظہار کیا تھا۔

یہ بھی یاد رہے کہ شمالی کوریائی عالمی پابندیوں کو خاطر میں نہ لاتے ہوئے رواں برس کے آغاز سے اب تک 16 مختلف میزائل اور جاسوس سیٹلائٹ تجربات کر چکا ہے۔ ان میزائلوں میں امریکہ تک مار کرنے والے بلیسٹک میزائل بھی شامل ہیں جن کی وجہ سے امریکہ پر خوف کے سائے ہیں اور امریکہ نے انہیں خطرات کے پیش نظر اب روس اور شمالی کوریا پر پابندیاں عائد کرنے کا فیصلہ کیاہے

تہران :ایران نے یونانی آئل ٹینکر قبضے میں لے لیے، یونان کا بحری قزاقی کا الزام،اطلاعات کے مطابق ایران نے یونانی پرچم بردار دو جہازوں کو پکڑا ہے جبکہ یونان نے ایران پر بحری قزاقی کا الزام عائد کیا ہے۔ چند روز قبل ہی یونان نے کہا تھا کہ وہ بحیرہ روم میں ایک روسی ٹینکر سے قبضے میں لیا گیا ایرانی تیل امریکا بھیجے گا جبکہ ایران نے کہا تھا کہ وہ اس واقعے میں ملوث ہونے پر یونان کے خلاف کارروائی کرے گا۔

ایرانی پاسداران انقلاب نے اپنی سرکاری ویب سائٹ پر ایک بیان میں تصدیق کی ہے کہ اس کی افواج نے خلیج فارس میں دو آئل ٹینکرز کو خلاف ورزیوں کا مرتکب ہونے پر قبضے میں لیا ہے جس کے ردعمل میں یونان نے ایران پر بحری قزاقی کا الزام عائد کرتے ہوئے بطور احتجاج ایرانی سفیر کو طلب کرکے احتجاج کیا۔

یونانی وزارت خارجہ نے اپنے پہلے بیان میں کہا تھا کہ ایک ایرانی ہیلی کاپٹر اس کے بحری جہاز ڈیلٹا پوزیڈون پر اترا تھا جس کے بعد مسلح افراد نے جہاز کے عملے کو یرغمال بنا لیا۔ یہ واقعہ ایرانی ساحل کے قریب تقریباً 22 ناٹیکل میل کے فاصلے پر بین الاقوامی حدود میں پیش آیا۔

یونانی وزارت خارجہ کے بیان میں مزید کہا گیا ہے کہ ایران کے ساحل کے قریب ہی دوسرے یونانی پرچم بردار بحری جہاز پر بھی ایسا ہی واقعہ پیش آیا جس پر سات یونانی شہری سوار تھے۔ یونانی حکام نے بحری جہاز کے پکڑے جانے کے وقت اس پر سوار افراد اور عملے کی شہریت کے حوالے سے کوئی تفصیل نہیں بتائی۔

ایک یونانی اہلکار نے خبر رساں ادارے اے پی کو بتایا کہ دوسرے جہاز کا نام پروڈنٹ واریئر ہے۔ اس یونانی جہاز کی مالک کمپنی پولمبروس شپنگ نے اپنے بیان میں کہا کہ وہ صورتحال کو مؤثر طریقے سے حل کرنے کے لیے ایرانی حکام کے ساتھ تعاون کر رہی ہے۔

ادھر ایک امریکی دفاعی اہلکار نے خبر رساں ادارے اے پی کو بتایا ہے کہ دونوں بحری جہاز ایرانی سمندری حدود میں چلے گئے تھے اور دونوں جہازوں نے اپنی ٹریکنگ ڈیوائسز (راستے کی معلومات فراہم کرنے والے آلات) کو بند کر دیا تھا۔ ان میں سے کسی بھی جہاز نے کسی کو کوئی اطلاع بھی نہیں دی تھی۔

دوسری جانب یونانی وزارت خارجہ نے خبردار کیا ہے کہ اس واقعے سے دو طرفہ تعلقات متاثر ہونے کے ساتھ ساتھ ایران کے یورپی یونین سے تعلقات پر بھی منفی اثرات مرتب ہوں گے۔