شہزادہ ہیری اور ان کی اہلیہ میگھن مارکل کی نئی نیٹ فلکس دستاویزی فلم کا ٹریلر جاری کردیا گیا۔

باغی ٹی وی : برطانیہ کے شاہ چارلس سوم کے بیٹے شہزادہ ہیری اور ان کی اہلیہ میگھن کی شادی شدہ زندگی اور چند برسوں سے ان کی جانب سے کیے جانے والے بعض اہم فیصلوں کے حوالے سے ایک ڈاکومینٹری (دستاویزی) سیریز تیار کی گئی ہے جس میں اس جوڑے کی محبت بھری داستان کے نشیب و فراز کی کہانی کا ان کے اپنے نقطہ نظر کے مطابق احاطہ کیا گیا ہے۔

دستاویزی فلم کا ٹائٹل’ہیری اینڈ میگھن‘ ہے جس میں دونوں کے متعدد انٹرویوز کو شامل کرکے برطانوی شاہی محل کے اندرونی معاملات سے نقاب کشائی کی گئی ہے۔

ٹریلر میں شہزادہ ہیری کو یہ کہتے ہوئے دیکھا جاسکتا ہے کہ’’برطانوی شاہی خاندان کے افراد باقاعدگی سے ایک دوسرے کے خلاف خبریں لیک کرتے ہیں اور یہ ایک ’گندا کھیل‘ ہے۔

شہزادہ ہیری نے ٹریلر میں بتایا کہ پورا سچ کوئی نہیں جانتا اور ہم پورا سچ جانتے ہیں۔

فلمی شائقین یہ توقع کررہے ہیں کہ شاہی خاندان پر مبنی یہ دستاویزی فلم ’دی کراؤن‘ سیزیز کی طرح لوگوں کو متاثر کرے گی-

سیریز کی پہلی تین اقساط جمعرات تک دستیاب ہوں گی جبکہ والیوم ون کی کُل چھ اقساط ہیں۔

قبل ازیں انسٹاگرام پرجائنٹ اسٹریمر نیٹ فلیکس کی جانب سے شئیر کئے ڈاکومینٹری کے پرومو میں اس جوڑے کے بطور ڈیوک اور ڈچز آف سسیکس سے لے کر شاہی فرائض چھوڑ کر امریکا منتقلی سمیت دیگر چند رومانی اور دلکش تصاویر شامل ہیں جبکہ ان کے دورہ افریقہ اور میگھن مارکل کے بچے کی پیدائش سے قبل کی بھی تصاویر شامل ہیں۔ پچاس سیکنڈ کے اس ٹریلر میں شاہی جوڑے کو رائل فیملی میں درپیش صورتحال کا بھی احاطہ کیا گیا ہے-

پرومو میں جب شاہی جوڑے سے سوال کیا گیا کہ وہ کیوں یہ ڈاکومینٹری بنانا چاہتے ہیں تو شہزادہ ہیری نے جواب دیتے ہوئے کہا کہ بند دروازوں کے پیچھے کیا ہوتا ہے کوئی نہیں دیکھ سکتا، لہٰذا مجھے اپنے خاندان کو تحفظ دینے کے لیے سب کچھ کرنا پڑا ہے۔

جبکہ میگھن مارکل نے کہا جب معاملات اس طرح داؤ پر لگ جائیں تو کیا یہ بہتر نہیں کہ لوگ ہماری کہانی کو زیادہ توجہ سے سنیں؟