آزاد جموں و کشمیر کے صدر بیرسٹر سلطان محمود چوہدری انتقال کرگئے۔
خاندانی ذرائع نے صدر بیرسٹر سلطان محمود کے انتقال کی تصدیق کردی ہے بیرسٹر سلطان محمود کی نماز جنازہ ان کے آبائی ضلع میرپور میں ادا کی جائےگی۔
واضح رہے کہ بیرسٹر سلطان محمود کچھ عرصہ سے علالت کے باعث سیاسی سرگرمیوں سے دور ہو گئے تھے، جس کے بعد اسپیکر اسمبلی چوہدری لطیف اکبر نے قائم مقام صدر کی حیثیت سے ذمہ داریاں سنبھالی ہوئی تھیں۔
بیرسٹر سلطان محمود کو 2021 کے عام انتخابات کے بعد صدر ریاست بنایا گیا تھا،بیرسٹر سلطان محمود نے حال ہی میں اپنے گروپ سمیت پاکستان پیپلز پارٹی میں شمولیت اختیار کی تھی اس سے قبل وہ پی ٹی آئی فارورڈ بلاک کا حصہ تھے۔
ان کا تعلق ایک سیاسی گھرانے سے تھا، ان کے والد چوہدری نور حسین بھی کشمیر کی سیاست کا ایک نمایاں نام رہے، جنہوں نے آل جموں و کشمیر مسلم کانفرنس سے علیحدگی اختیار کر کے ’آزاد مسلم کانفرنس‘ کے نام سے اپنی جماعت بنائی اور اسی پلیٹ فارم سے سیاسی سرگرمیاں جاری رکھیں۔
بیرسٹر سلطان محمود نے برطانیہ سے بار ایٹ لا کی ڈگری حاصل کی اور 1980 کی دہائی میں وطن واپسی کے بعد عملی سیاست میں قدم رکھا۔ واپسی پر انہوں نے اپنے والد کی قائم کردہ جماعت آزاد مسلم کانفرنس کی قیادت سنبھالی۔
1985 میں وہ پہلی بار قانون ساز اسمبلی کے رکن منتخب ہوئے۔ اس کے بعد انہوں نے 8 مرتبہ انتخابات میں کامیابی حاصل کی، اور اس سیاسی سفر کے دوران ایک مرتبہ وزیراعظم اور ایک مرتبہ اپوزیشن لیڈر اور پھر صدر ریاست کے عہدے پر فائز ہوئے-
