Tag: تازہ ترین

اسلام آباد: پاکستان ٹیلی کمیونیکیشن اتھارٹی( پی ٹی اے) نے ملک بھر میں 58 لاکھ سے زیادہ غیر فعال سموں کو بلاک کردیا۔

باغی ٹی وی: پی ٹی اے کی جانب سے جاری بیان میں کہا گیا ہے کہ مالی سال 2023-24 کے دوران غیر قانونی سموں کے خلاف کریک ڈاؤن کیا گیا، اس دوران ملک بھر میں 58 لاکھ سے زیادہ غیر فعال سموں کو بلاک کردیا گیا ہے غیر قانونی سموں کے خلاف ملک کے مختلف شہروں میں 40 چھاپے مارے گئے، یہ چھاپے قصور، کھاریاں، سیالکوٹ، لاہور، پشاور،پنوعاقل، کشمور، سکھر ،شیخوپورہ، شرقپور شریف، راولپنڈی، ملتان،ساہیوال،حسن ابدال میں مارے گئے۔

پی ٹی اے کے مطابق ان چھاپوں میں 7500 سمز اور 152 بائیو میٹرک ویری فکیشن سسٹم ڈیوائسز قبضے میں لی گئیں، پی ٹی اے نے کارروائیوں کے دوران 47 مشتبہ افراد کو گرفتار بھی کیا،دہشت گردی میں استعمال ہونے کے خدشے کے پیش نظر غیر فعال سمیں بلاک کی گئیں۔

اسلام آباد: نائب وزیراعظم اسحاق ڈار نے قاہرہ میں ایرانی وزیر خارجہ سید عباس عراقچی سے ملاقات کی-

باغی ٹی وی : نائب وزیراعظم اسحاق ڈار اور ایرانی وزیر خارجہ کی ملاقات ڈی ایٹ سمٹ کی سائیڈ لائنز پر ہوئی ،پاک ایران وزرائے خارجہ نے دو طرفہ تعلقات میں مثبت پیشرفت پر اطمینان کا اظہار کیا-

ترجمان دفتر خارجہ کے مطابق پاک ایران وزرائے خارجہ کا اعلی سطح کے تبادلوں میں اضافے پر بھی طمینان کا اظہار کیا جبکہ پاک ایران وزرائے خارجہ نے تجارت، اقتصادی تعاون اور عوامی رابطوں کو فروغ دینے پر اتفاق کیا-

ترجمان دفتر خارجہ کے مطابق نائب وزیراعظم اسحاق ڈار اور ایرانی وزیر خارجہ نے مشرق وسطی کی صورتحال پر بھی تبادلہ خیال کیا نائب وزیراعظم اسحاق ڈار نے فلسطین کے مسئلے پر پاکستان کے اصولی موقف کا ارادہ کرتے ہوئے فلسطینی عوام سے اظہار یکجہتی کیا-

اسلام آباد: وفاقی وزیرعبدالعلیم خان کی ہدایت پر سپیشل اکنامک زونز کا سروے مکمل،مزید اقدامات کا فیصلہ کیا گیا ہے-

باغی ٹی وی: وفاقی وزیر سرمایہ کاری بورڈ نے ہدایت کی کہ بورڈ آف انویسٹمنٹ سپیشل اکنامک زونز کیلئےمحکمانہ امور کی تکمیل یقینی بنائے، چین سے صنعتوں کی منتقلی کیلئے خصوصی اقدامات کئےجائیں گے، کراچی کے صنعتی زون کو پورٹ قاسم سے منسلک کریں ،خصوصی سہولیات فراہم کی جائیں-

عبدالعلیم خان نے سپیشل اکنامک زونز میں ” ون ونڈو” سمیت تمام سہولیات اور ممکنہ سیکورٹی کی فراہمی کی ہدایت کی،کہا کہ خصوصی صنعتی مراکز میں 150 کے لگ بھگ اصلاحات متعارف کرا رہے ہیں، اکنامک زونز میں ماحول دوست” گرین پاکستان انویسٹمنٹ” کی طرز پر کام ہو گا-

انہوں نے کہا کہ غیر ملکی سرمایہ کاروں کا ”پرائد آف پاکستان ” کے نام سے گروپ بنایا جائے گا،وفاقی وزیرنے بورڈ آف انویسٹمنٹ کو بیرون ملک رابطوں کیلئے ایک ہفتے کا ٹاسک دے دیا، جبکہ سپیشل اکنامک زونز کے اجلاس میں ” آسان کاروبار ایکٹ 2024” سمیت مختلف امور پر غور کیا گیا-

اسلام آباد:سن 1971 کی جنگ میں جرات و بہادری کا مظاہرہ کرتے ہوئے جام شہادت نوش کرنے والے لانس نائیک محمد محفوظ شہید نشان حیدر کو وزیراعظم نے ان کے 53 ویں یوم شہادت پر خراج عقیدت پیش کیا ہے۔

باغی ٹی وی:وزیراعظم میاں محمد شہباز شریف نے کہا کہ 1971 میں واہگہ بارڈر پر مثالی جوانمردی کا مظاہرہ کرتے ہوئے لانس نائیک محمد محفوظ شہید نشان حیدر دشمن کو پسپا کرتے رہے، لانس نائیک محمد محفوظ شہید نے دشمن کے طاقت اور عددی برتری کے نشے کو خاک میں ملا دیا۔

انہوں نے کہا کہ لانس نائیک محمد محفوظ شہید فرض شناسی اور حب الوطنی کی وہ سیسہ پلائی دیوار ثابت ہوئے جس نے وطن عزیز کو دشمنوں کے ناپاک عزائم سے محفوظ رکھا، لانس نائیک محمد محفوظ شہید کا وطن سے عہد وفا اور ملک کے دفاع کی خاطر اپنی جان تک قربان کر دینے کا جذبہ نسل نو کیلئے مشعل راہ ہے ،مجھ سمیت پوری قوم کو پاک فوج کے شہدااور ان کے اہل خانہ پر فخر ہے، پاکستانی قوم افواج پاکستان کی دفاع وطن کیلئے قربانیاں کبھی فراموش نہیں کرے گی-

اسلام آباد: وفاقی وزیرخزانہ محمد اورنگزیب کا کہنا ہے کہ معاشی میدان میں اہم کامیابیوں کا سلسلہ جاری ہے، معاشی استحکام کے ساتھ شرح نمو میں اضافہ ترجیح ہے۔

باغی ٹی وی: میڈیا سے گفتگو کرتے ہوئے انہوں نے کہا کہ معاشی میدان میں اہم کامیابیوں کا سلسلہ جاری ہے ،نومبر میں کرنٹ اکاؤنٹ سرپلس 10سال بعد اس لیول پر آیا ،ترسیلات زر میں 35فیصد اضافہ ہوا ہے،یقین ہے ترسیلات زر35ارب ڈالر سے بڑھ جائیں گی،برآمدی شعبے میں بھی مثبت رجحان ہے،ٹھوس اقدامات سےمعیشت استحکام کی طرف گامزن ہے –

انہوں نے کہا کہ مہنگائی 6سال کی کم ترین سطح پرہے،نومبر میں 4.9فیصد پر آگئی،مہنگائی کا اثر براہ راست عام آدمی پر پڑتاہے،کوشش کریں گے مہنگائی میں کمی کا فائدہ عام آدمی کو پہنچائیں، اسٹیٹ بینک نے مسلسل پانچویں بار شرح سود میں کمی کی ، شر ح سود کا 13 فیصد پر آنا معیشت کیلئے اہمیت کا حامل ہے ،کاروباری برادری کے اعتماد میں بھی نمایاں اضافہ ہوا ہے۔