بالی ووڈ کی متنازعہ اداکارہ اور بگ باس کے سیزن 14 کی کنٹینسٹ راکھی ساونت نے سلمان خان کو بھائی بنا لیا-
باغی ٹی وی :دنیا بھر مین دیکھا جانے والا بھارت کا مقبول ترین متنازع شو ’ بگ باس 14‘ حال ہی میں اختتام پذیر ہوا جس میں دیگر کھلاڑیوں کے ہمراہ راکھی ساونت بھی شامل تھیں۔
راکھی ساونت نے فائنل میں پہنچنے سے قبل آفر قبول کرتے ہوئے 14 لاکھ روپے لیکر شو چھوڑ دیا تھا جس کی وجہ انہوں نے والدہ کی کیمو تھراپی بتائی تھی۔
تاہم اب اداکارہ نے شو کے میزبان سلمان خان کے ساتھ نیا رشتہ بناکر سب کو حیران کر دیا ہے۔
راکھی ساونت نے انسٹا گرام پر ایک پوسٹ شیئر کی جس میں وہ سلمان خان کے ساتھ مسکراتے ہوئے تصویر بنوا رہی ہیں اور انہوں نے سلمان خان کا دیا ہوا بریسلٹ بھی پہن رکھا ہے تصویر کے ساتھ کیپشن میں انہوں نے سلمان خان کو اپنا بھائی قرار دیتے ہوئے کہا کہ بادشاہوں کے بادشاہ اور کوئی نہیں بلکہ سلمان خان ہی ہیں۔
راکھی نے سلمان خان کو دعائیں دیتے ہوئے کہا کہ خدا اُن کو نہ صرف بہت ساری خوشیاں عطا کرے بلکہ اُن کی تمام مرادیں بھی پوری کرے۔
واضح رہے کہ سیزن 14 کے فائنل میں پہنچنے والوں میں 5 امیدواروں میں راکھی ساونت بھی شامل تھیں لیکن وہ 14 لاکھ روپے کی پیشکش قبول کرکے گرینڈ فنالے چھوڑ گئی تھیں اور اب انہوں نے بتایا ہے کہ یہ انہوں نے اپنی ماں کے علاج کے لئے کیا ہے-
بھارتی اخبار ٹائمز آف انڈیا کی رپورٹ کے مطابق راکھی ساونت کا کہنا ہے کہ مجھے شو میں اپنے سفر پر فخر ہے اور مجھے اس بات کا کوئی افسوس نہیں کہ میں آخر تک نہیں رکی اور 14 لاکھ روپے لے کر باہر آگئی۔لوگ مجھے کہہ رہے ہیں کہ مجھے وہیں رکنا چاہیے تھا، کہ میں شو جیت سکتی تھی یا دوسرے نمبر پر آجاتی لیکن میں چانس نہیں لینا چاہتی تھی۔
انہوں نے کہا کہ میری والدہ کی سرجری ہونے کا امکان ہے مجھے پیسوں کی اشد ضرورت ہے اور میرا بینک بیلنس صفر ہے میں کیش لے کر چلی گئی کیونکہ دوسرے یا تیسرے رنر اپ کو کچھ نہیں ملتا اور میں کوئی خطرہ مول لینا نہیں چاہتی تھی۔
راکھی ساونت کا کہنا تھا کہ انہیں والدہ کے علاج، کیموتھراپی کے لیے رقم کی ضرورت تھی میرے لیے اپنی ماں سے بڑھ کرکچھ بھی نہیں ٹرافی بھی نہیں میرے لیے مداحوں کی محبت اور سلمان خان کی طرف سے دیا گیا بریسلیٹ ٹرافی کی طرح ہے۔