بریکنگ:وفاقی حکومت نے سیلاب سے متاثرہ پولیو ورکرز کے لئے 25 کروڑ روپے امداد دینے کا فیصلہ کیا ہے۔اطلاعات کے مطابق کوآرڈینیٹر پولیو شہزاد بیگ کے ہمراہ پریس کانفرنس کرتے ہوئے وفاقی وزیرصحت عبدالقادر پٹیل نے بتایا کہ سیلاب کے دوران پولیو ورکرز کو کافی نقصان اٹھانا پڑا، لیکن ان ورکرز نے نقصانات کے باوجود امدادی سرگرمیاں جاری رکھیں۔
وفاقی وزیر صحت نے بتایا کہ پاکستان پولیو پروگرام نے نقصانات کا ایک جامع جائزہ لیا، سیلاب کی تباہی سے 33 ملین افراد اور ملک کا ایک تہائی حصہ پانی کی ذدمیں تھا، جب کہ تقریباً 12500 پولیو ہیلتھ ورکرز سیلاب سے متاثر ہوئے، اور ان پولیو ورکرز کی اکثریت سندھ اور بلوچستان میں ہے۔
عبدالقادر پٹیل نے کہا کہ ہماری پہلی ترجیح پولیو ورکرز ہیں، کیوں کہ پاکستان کیلئے ان کی بے شمار خدمات ہیں، حکومت ملک بھر کے پولیو ورکرز میں تقریباً 250 ملین (25 کروڑ) روپے کے چیک تقسیم کرے گی۔
وفاقی وزیر نے مزید بتایا کہ ٹھٹھہ میں سیلاب سے متاثرہ فرنٹ لائن ورکرز میں چیک تقسیم کیے جاچکے ہیں، ان ورکرز کے گھر یا تو سیلاب میں بہہ گئے تھے یا جزوی طور پر نقصان پہنچا۔
کوآرڈینیٹر پولیو شہزاد بیگ کا کہنا تھا کہ سیلاب سے متاثر ہونے والے ورکرز کی شناخت کرنا، اور ان کی فہرست مرتب کرنا بہت مشکل کام تھا، ہمارا 350,000 سے زیادہ فرنٹ لائن عملہ ہے، تمام صوبوں میں ایک وسیع پیمانے پر سروے کیا گیا ہے۔
