لاہور میں سال نو کے موقع پر پولیس کی فول پروف سکیورٹی انتظامات اور شہریوں کے تعاون کی بدولت نیو ایئر نائٹ پر پرامن ماحول قائم رہا۔ کسی بھی افسوس ناک واقعہ کا سامنا نہیں ہوا اور شہر بھر میں پولیس نے اپنی بہترین حکمت عملی سے امن قائم رکھا۔ پولیس حکام کے مطابق اس دوران مختلف غیر قانونی سرگرمیوں میں ملوث 377 افراد کو گرفتار کر کے جیل بھیج دیا گیا۔
ڈی آئی جی آپریشنز فیصل کامران نے بتایا کہ پولیس نے پیشگی کارروائیوں کے دوران ہوائی فائرنگ کرنے والے 58 ملزمان کو گرفتار کر کے حوالات میں ڈال دیا۔ ان کارروائیوں میں ملزمان سے 7 رائفلز اور 47 پسٹلز برآمد کیے گئے، جو کہ پولیس کی موثر حکمت عملی کا نتیجہ تھا۔ڈی آئی جی آپریشنز نے مزید بتایا کہ شہر بھر میں پولیس کی طرف سے کی جانے والی ناکہ بندی کے دوران 107 ملزمان سے اسلحہ برآمد کیا گیا۔ ان ملزمان سے 12 رائفلز، 4 بندوقیں، 90 پسٹلز اور سینکڑوں گولیاں قبضے میں لی گئیں۔ فیصل کامران کا کہنا تھا کہ اسلحہ کی اس برآمدگی سے شہر کی امن و امان کی صورتحال مزید مستحکم ہوئی۔پولیس نے منشیات کے خلاف بھی سخت کارروائیاں کیں اور مجموعی طور پر 27 کلو چرس برآمد کی۔ اس کے علاوہ 1 کلو گرام ہیروئن، 4 کلو 220 گرام آئس، اور 1181 لیٹر شراب بھی برآمد کی گئی۔ فیصل کامران نے بتایا کہ پولیس کی اس کامیاب کارروائی کے دوران 383 لیٹر کچی شراب کی ترسیل بھی ناکام بنائی گئی، جس کے نتیجے میں 17 ملزمان گرفتار ہوئے۔
نیوز ایئر نائٹ کے دوران پولیس نے ون ویلنگ اور آتشبازی کرنے والے افراد کے خلاف بھی سخت کارروائی کی۔ ناکوں اور گشت کے دوران 63 ملزمان کو گرفتار کیا گیا جو پابندی کے باوجود ون ویلنگ کر رہے تھے۔ اس کے علاوہ آتشبازی کرنے والے 27 افراد کو بھی گرفتار کیا گیا، جن کے خلاف قانونی کارروائی عمل میں لائی گئی۔نیو ایئر نائٹ پر خواتین سے چھیڑ چھاڑ اور ہلڑ بازی کرنے والوں کے خلاف بھی پولیس نے سخت ایکشن لیا۔ اس دوران 16 افراد کو قانون کی گرفت میں لایا گیا۔ فیصل کامران نے کہا کہ پولیس کی جانب سے کیے گئے سکیورٹی اقدامات کے باعث شہریوں کو محفوظ ماحول فراہم کیا گیا۔
پولیس کی بہترین حکمت عملی اور سکیورٹی انتظامات کے نتیجے میں نیو ایئر نائٹ پر حادثات میں 88 فیصد کمی آئی۔ ڈی آئی جی آپریشنز نے کہا کہ صرف تین افراد معمولی زخمی ہوئے، جن میں سے دو افراد کو طبی امداد فراہم کر دی گئی، جبکہ ایک شخص ابھی ہسپتال میں زیر علاج ہے اور اس کی حالت خطرے سے باہر ہے۔فیصل کامران نے پولیس کی فیلڈ ٹیم کی محنت اور بہترین حکمت عملی کی تعریف کی اور کہا کہ گزشتہ سال کی نسبت حادثات میں اتنی بڑی کمی پولیس کی شاباش کی مستحق ہے۔ لاہور پولیس کے سکیورٹی انتظامات کی بدولت نیو ایئر نائٹ پر امن و امان کی فضا قائم رکھی گئی، جس پر شہریوں نے بھی پولیس کے اقدامات کی ستائش کی۔
نیو ایئر نائٹ پر لاہور پولیس کی طرف سے کئے گئے بہترین سکیورٹی انتظامات اور شہریوں کے تعاون سے لاہور میں سال نو کا آغاز محفوظ رہا۔ پولیس کی اس کامیاب حکمت عملی کے باعث شہر بھر میں امن قائم رہا اور کسی بھی بڑے حادثے یا افسوس ناک واقعے کی اطلاع نہیں ملی۔
پاکستان میں دہشت گردی اور ٹارگٹ کلنگ میں بھارت کا گھناؤناکرداربےنقاب
