محرم الحرام 1448 کا چاند دیکھنے کے لیے مرکزی رویت ہلال کمیٹی کا اجلاس آج ہوگا۔
وزارت مذہبی امور کے مطابق چیئرمین رویت ہلال کمیٹی مولانا عبدالخبیر آزاد کی زیر صدارت اجلاس آج شام بادشاہی مسجد لاہور میں ہوگا اس کے علاوہ سعودی عرب میں بھی آج شام کو اجلاس ہوگاجب کہ یکم محرم الحرام کو غلافِ کعبہ بھی تبدیل کیا جاتا ہے جبکہ ماضی میں غلافِ کعبہ ماہ ذوالحج میں تبدیل کیا جاتا تھا۔
دوسری جانب پاکستان اسپیس اینڈ اپر ایٹموسفیئر ریسرچ کمیشن (اسپارکو) اور محکمہ موسمیات نے محرم الحرام 1448 ہجری کے چاند کی رویت کے حوالے سے اہم پیش گوئیاں جاری کر دی ہیں دونوں اداروں کے مطابق 15 جون کو محرم الحرام کا چاند نظر آنے کے امکانات انتہائی کم ہیں، جس کے باعث یکم محرم الحرام 1448 ہجری بدھ 17 جون کو ہونے کی توقع ہے۔
اسپارکو کی جانب سے جاری اعلامیے میں بتایا گیا ہے کہ نئے چاند کی پیدائش 15 جون کو صبح 7 بج کر 54 منٹ پر متوقع ہے ماہرین کے مطابق اسی روز غروب آفتاب کے وقت چاند کی عمر تقریباً 11 گھنٹے 50 منٹ ہوگی، جو رویت کے لیے مطلوبہ معیار سے کم سمجھی جا رہی ہے ساحلی علاقوں میں غروب آفتاب اور غروبِ قمر کے درمیان تقریباً 40 منٹ کا وقفہ متوقع ہے، تاہم چاند کی کم عمر اور دیگر فلکیاتی عوامل کے باعث اس کی رویت کے امکانات بہت محدود ہیں۔
جبکہ محکمہ موسمیات نے بھی اسی مؤقف کی تائید کرتے ہوئے کہا ہے کہ 15 جون، جو 29 ذوالحج کے مساوی ہوگی، ملک بھر میں چاند نظر آنے کے امکانات نہ ہونے کے برابر ہیں اس روز پاکستان کے بیشتر علاقوں میں موسم صاف یا جزوی طور پر ابر آلود رہنے کی توقع ہے، تاہم فلکیاتی صورتحال چاند کی رویت کے حق میں نہیں ہے۔
اعداد و شمار کے مطابق پنجاب میں چاند رات 7 بج کر 59 منٹ پر غروب ہوگا، سندھ میں رات 8 بج کر 5 منٹ، آزاد کشمیر میں رات 8 بج کر 7 منٹ، گلگت بلتستان میں رات 8 بج کر 12 منٹ، خیبر پختونخوا میں رات 8 بج کر 23 منٹ جبکہ بلوچستان میں رات 8 بج کر 34 منٹ پر غروب ہونے کی توقع ہے۔
رویت ہلال ریسرچ کونسل نے بھی اپنی پیش گوئی میں کہا ہے کہ 15 جون کو چاند نظر آنے کے امکانات انتہائی کم ہیں، جس کے باعث نئے اسلامی سال کا آغاز 17 جون سے ہونے کا امکان زیادہ ہے-
