چیئرمین رویت ہلال کمیٹی مولانا عبدالخبیر آزاد نے اعلان کیا کہ ملک بھر میں چاند نظر نہیں آیا ، لہذا پہلا روزہ اتوار 2 مارچ کو ہوگا۔
باغی ٹی وی کے مطابق رمضان المبارک کا چاند دیکھنے کے لئے مرکزی رویت ہلال کمیٹی کا اجلاس پشاور میں ہوا ۔ اجلاس کی صدارت چیئرمین رویت ہلال کمیٹی مولانا عبدالخبیر آزاد نے کی ۔ کراچی، لاہور، کوئٹہ اور اسلام آباد میں زونل کمیٹیوں کے اجلاس بھی ہوئے ۔چیئرمین رویت ہلال کمیٹی مولانا عبدالخبیر آزاد نے پریس کانفرنس کرتے ہوئے کہا کہ آج پاکستان کے بیشتر مقامات پر مطلع ابرآلود تھا، آج ماہ رمضان کا چاند نظر نہیں آیا۔انہوں نے کہا کہ خیبرپختونخوا سمیت پورے ملک سے کوئی شہادت موصول نہیں ہوئی، رمضان مبارک 2 مارچ کو پورے پاکستان میں ہوگا۔
قبل ازیں لاہور میں رمضان کا چاند دیکھنے کے لئے ایوان اوقاف میں زونل ہلال کمیٹی اجلاس ختم ہوگیا، مطلع ابر آلود ہونے کی وجہ سے چاند نظر نہیں آیا۔ڈی جی اوقاف کاکہنا تھا کہ رمضان المبارک کا چاند نظر آنے کی کوئی شہادت موصول نہیں ہوئی، مرکزی رویت ہلال کمیٹی کو چاند نظر نہ آنے سے آگاہ کردیا ہے، رمضان المبارک چاند سے متعلق حتمی اعلان مرکزی رویت ہلال کمیٹی کرے گی۔
پنجاب:
لاہورمیں رمضان المبارک کاچاند دیکھنےکیلئےصوبائی زونل رویت ہلال کمیٹی کااجلاس جاری ہے،اجلاس کی صدارت ڈی جی مذہبی امور خالد محمود کر رہے ہیں،محکمہ اوقاف اورصوبائی زونل رویت ہلال کمیٹی کےممبران چانددیکھنےکیلئےموجود ہیں۔محکمہ موسمیات کے مطابق آسمان پر بادلوں کے باعث چاند نظر آنے کےامکانات کم ہیں،چاند نظر آنے یا نہ آنے کا حتمی فیصلہ مرکزی رویت ہلال کمیٹی کرے گی۔
خیبر پختونخوا:
پشاورمیں رمضان المبارک کا چاند دیکھنے کے لیے عید گاہ میں انتظامات مکمل کرلئے گئے ہیں، ٹیلی سکوپ اور ایچ ٹی ایس سسٹم فعال ہیں،محکمہ موسمیات اور سپارکو کی ٹیمیں بھی موجود ہیں۔
سندھ:
محکمہ موسمیات کراچی میں رمضان المبارک کا چاند دیکھنے کے لئے زونل کمیٹی کا اجلاس شروع ہوگیا ہے،اجلاس کی صدارت علامہ حافظ محمد سلفی کررہے ہیں۔اجلاس میں زونل کمیٹی کے ممبران، ڈائریکٹر نیشنل سونامی سینٹر امیر حیدر لغاری اور محکمہ موسمیات سے دیگر شریک ہیں۔فوکل پرسن محکمہ موسمیات کراچی انجم نذیر ضیغم کے مطابق آج رمضان المبارک کا چاند نظر آنے کے امکانات کم ہیں،وسطی اور بالائی سندھ، جنوبی پنجاب، جنوبی خیبرپختونخوا، وسطی اور شمال مشرقی بلوچستان میں مطلع صاف ہے،کراچی سمیت ساحلی پٹی پر مطلع جزوی ابر آلود ہے،یکم رمضان المبارک 2 مارچ کو ہونے کا قوی امکان ہے۔
بلوچستان:
رمضان المبارک کا چاند دیکھنے کے لئے زونل کمیٹی کا اجلاس جاری ہے، اجلاس کی صدارت مولانا انوار الحق حقانی کررہے ہیں،محکمہ موسمیات کا کہنا ہے کوئٹہ سمیت بلوچستان کے مختلف علاقوں میں مطلع صاف ہے، جبکہ بلوچستان کے کچھ علاقوں میں مطلع جزوی طور پر آبر آلو ہے۔آج کوئٹہ میں رمضان المبارک کا چاند نظر آنے کے امکانات کم ہیں ،کوئٹہ میں چاند نظر آنے کا وقت 6 بج کر 59 سے لے کر 7 بجکر 7 منٹ تک ہے۔
اسلام آباد:
وفاقی دارالحکومت میں زونل رویت ہلال کمیٹی کے ارکان وزارت مذہبی امور کی چھت پر موجود ہیں،کمیٹی کے شرکاء میں علامہ سجاد حسین نقوی، مفتی عبدالسلام جلالی اور مفتی محمد اقبال نعیمی شامل ہیں۔کمیٹی ارکان علامہ ہارون الرشید بالاکوٹی، پیر محمد ممتاز احمد ضیاء نظامی بھی چاند دیکھنے کے لیے موجود ہیں،محکمہ موسمیات، سپارکو، وزارت سائنس و ٹیکنالوجی اور دیگر متعلقہ اداروں کے حکام بھی موجود ہیں۔
سپارکو:
ترجمان سپارکو کے مطابق نئے چاند کی پیدائش آج صبح5 بج کر 45 منٹ پر ہوئی،آج غروب افتاب کے وقت چاند کی عمر 12 گھنٹے ہوگی،28فروری کو غروب آفتاب کے وقت چاند کی عمر 12 گھنٹے اور بلندی 5 ڈگری ہو گی۔چاند کی کم بلندی اور فاصلے کی وجہ سے ہلال کا نظر آنا مشکل ہے،آج چاند اور سورج کا زاویائی فاصلہ 7 ڈگری، ہلال انسانی آنکھ سے نظر نہیں آئے گا۔
