بلوچستان کے شہر مستونگ کی کرسچن کالونی میں گزشتہ رات نامعلوم افراد کی فائرنگ سے شدید زخمی ہونے والے سابق ایم پی اے کے بڑے بھائی زخموں کی تاب نہ لاتے ہوئے چل بسے۔
ولسن مسیح کو مستونگ کے شہید نواب غوث بخش رئیسانی میموریل اسپتال میں ابتدائی طبی امداد کے بعد تشویش ناک حالت میں کوئٹہ منتقل کیا گیا تھا۔ تاہم وہ زخموں کی تاب نہ لاتے ہوئے آج بروز منگل 9 اگست کو چل بسے۔ ان کی میت مستونگ منتقل کردی گئی ہے۔
مقتول نیشنل پارٹی کے سابق ممبر بلوچستان اسمبلی شہید ہینڈری بلوچ کے بڑھے بھائی تھے۔ قبل ازیں پولیس کا کہنا تھا کہ کرسچن کالونی میں فائرنگ سے 3 بچے بھی زخمی ہوئے۔
ادھرکوئٹہ میں نامعلوم افراد کی فائرنگ سے 2 افراد جاں بحق جبکہ 4 افراد زخمی ہو گئے۔تفصیلات کے مطابق یہ واقعہ پشتون آباد چوک کے قریب پیش آیا جس کے باعث 2 افراد جاں بحق جبکہ 4 افراد زخمی ہو گئے۔
ہسپتال ذرائع کا کہنا ہے کہ فائرنگ سے جاں بحق افراد کی شناخت محمد اور نجیب اللہ کے نام سے ہوئی ہے جبکہ فائرنگ سے زخمی 2 افراد کے نام حیدر علی اور عبدالرحمن ہیں۔ہسپتال ذرائع کا مزید کہنا ہے کہ فائرنگ سے زخمی 2 افراد کی شناخت تاحال نہیں ہوئی ہے۔
