Baaghi TV

Tag: ٌاتازہ ترین

  • ایشیا کپ : پاک-بھارت ٹاکرا کل دبئی کے میدان میں ہوگا

    ایشیا کپ : پاک-بھارت ٹاکرا کل دبئی کے میدان میں ہوگا

    پاکستان اور بھارت کی ٹیمیں اتوار (14 ستمبر) کو دبئی انٹرنیشنل اسٹیڈیم میں ایشیا کپ کے مقابلے میں آمنے سامنے ہوں گی۔

    شارجہ کرکٹ اسٹیڈیم میں سہ ملکی ٹی 20 سیریز جیتنے کے بعد پاکستان ٹیم نے ایشیا کپ کا آغاز 12 ستمبر کو عمان کے خلاف شاندار 93 رنز کی فتح کے ساتھ کیا،ایشیا کپ کے ایک روزہ فارمیٹ میں سال 2000 اور 2012 کی فاتح پاکستان ٹیم کی نظریں اس بار ٹی 20 فارمیٹ پر جمی ہوئی ہیں۔

    متحدہ عرب امارات میں جاری ایشیا کپ 2025 میں 8 ٹیموں کو 2 گروپوں میں تقسیم کیا گیا ہے، گروپ اے میں پاکستان، بھارت، عمان اور متحدہ عرب امارات شامل ہیں جبکہ گروپ بی میں افغانستان، بنگلہ دیش، ہانگ کانگ اور سری لنکا شامل ہیں،پاکستان اپنا آخری گروپ میچ 17 ستمبر کو دبئی میں متحدہ عرب امارات کے خلاف کھیلے گا۔

    وزیراعظم نے سیلاب زدہ علاقوں میں بجلی بلوں کی وصولی سے روک دیا

    ٹورنامنٹ کے فارمیٹ کے مطابق، ہر گروپ کی ٹاپ 2 ٹیمیں سپر 4 مرحلے کے لیے کوالیفائی کریں گی، جہاں تمام ٹیمیں ایک دوسرے کے خلاف راؤنڈ رابن فارمیٹ کے تحت مدمقابل آئیں گی، سپر فور کے اختتام پر 2 سرفہرست ٹیمیں 28 ستمبر کو دبئی کرکٹ اسٹیڈیم میں شیڈول فائنل کے لیے کوالیفائی کریں گی۔

    دبئی کی ایونٹس سیکیورٹی کمیٹی نے شائقین پر زور دیا ہے کہ وہ اس موقع پر کھیل کے جذبے کو برقرار رکھیں اور اسٹیڈیم کے قواعد و ضوابط پر سختی سے عمل کریں تاکہ دبئی کی پہچان عالمی معیار کے کھیلوں کے انعقاد کی مرکز کے طور پر قائم رہے-

    لوئر دیر:یرغمال بنائے گئے شہریوں کو بچانے کے لیے آپریشن، 10 دہشتگرد ہلاک، 7 جوان شہید

    دبئی پولیس کے اسسٹنٹ کمانڈر انچیف برائے آپریشنز اور ایونٹس سیکیورٹی کمیٹی کے چیئرمین میجر جنرل سیف مہیر المزروعی نے کہا ہے کہ ایشیا کپ کے تمام میچز کے لیے خصوصی پولیس یونٹس مکمل طور پر تیار ہیں۔ ان کا کہنا تھا کہ سیکیورٹی میں خلل ڈالنے والی کسی بھی کارروائی سے سختی سے نمٹا جائے گا اور تماشائیوں اور سہولیات کے تحفظ کے لیے قانونی اقدامات کیے جائیں گے۔

    انہوں نے وفاقی قانون برائے اسپورٹس فیسلٹیز اینڈ ایونٹس کا حوالہ دیتے ہوئے خبردار کیا کہ قوانین کی خلاف ورزی کرنے والوں کو سخت سزاؤں کا سامنا کرنا پڑے گا، پچ پر بغیر اجازت داخل ہونے یا آتش گیر اور ممنوعہ سامان ساتھ لانے پر ایک سے 3 ماہ قید اور 5 ہزار سے 30 ہزار درہم تک جرمانہ ہو سکتا ہےاسی طرح تشدد، اشیا پھینکنے یا نسل پرستانہ اور توہین آمیز زبان استعمال کرنے والے افراد کو بھی قید اور 10 ہزار سے 30 ہزار درہم تک جرمانے کی سزا دی جاسکتی ہے۔

    سپریم کورٹ کی ریٹائرڈ ججز کی سیکیورٹی سے متعلق مراسلے پر وضاحت جاری

    ایونٹس سیکیورٹی کمیٹی نے شائقین کو ہدایت کی ہے کہ وہ میچ سے کم از کم 3 گھنٹے قبل اسٹیڈیم پہنچیں، ہر ٹکٹ پر صرف ایک بار داخلہ ملے گا، درست اور اصلی ٹکٹ ساتھ رکھیں اور ممنوعہ اشیا لانے سے گریز کریں کمیٹی نے یہ بھی واضح کیا کہ غلط پارکنگ یا سڑکوں کو بلاک کرنے جیسے اقدامات برداشت نہیں کیے جائیں گے۔

    انتظامیہ کے مطابق ممنوعہ اشیا میں آتش بازی کا سامان، آتش گیر مواد، لیزر، چھتریاں، بڑی کیمرے لینز، سیلفی اسٹکس، نوکیلی اشیا، زہریلے مواد، پالتو جانور، جھنڈے، بینرز، ریموٹ کنٹرول ڈیوائسز، سائیکلیں، اسکوٹرز، اسکیٹ بورڈز اور شیشے کی بنی اشیا شامل ہیں،میجر جنرل المزروعی نے کہا کہ یہ تمام پابندیاں تماشائیوں، کھلاڑیوں، آفیشلز اور دیگر شرکا کی حفاظت کے لیے عائد کی گئی ہیں تاکہ ایونٹ خوشگوار اور محفوظ ماحول میں مکمل ہوسکے۔

    سپریم کورٹ کے جج کے اسکواڈ کی گاڑی جلانے کے کیس کا فیصلہ جاری

    17 رکنی پاکستانی اسکواڈ:

    سلمان علی آغا (کپتان)، ابرار احمد، فہیم اشرف، فخر زمان، حارث رؤف، حسن علی، حسن نواز، حسین طلعت، خوشدل شاہ، محمد حارث (وکٹ کیپر)، محمد نواز، محمد وسیم جونیئر، صاحبزادہ فرحان، صائم ایوب، سلمان مرزا، شاہین شاہ آفریدی اور سفیان مقیم۔

  • وزیراعظم نے سیلاب زدہ علاقوں میں بجلی بلوں کی وصولی سے روک دیا

    وزیراعظم نے سیلاب زدہ علاقوں میں بجلی بلوں کی وصولی سے روک دیا

    وزیراعظم پاکستان شہباز شریف نے سیلاب زدہ علاقوں میں بجلی بلوں کی وصولی سے روک دیا۔

    وزیراعظم کی زیرِ صدارت متاثرہ علاقوں میں بجلی کے بِلوں کے حوالے سے اہم اجلاس ہوا، جس میں اعلیٰ حکام نے شرکت کی،وزیراعظم نے بجلی کی تقسیم کار کمپنیوں کو سیلاب زدہ علاقوں میں صارفین سے اگست 2025 کے بجلی کے بلوں کی وصولی سے فوری طور پر روک دیا۔

    وزیراعظم نے کہاکہ آئی ایم ایف کے ساتھ معاملات طے پانے کے بعد متاثرہ علاقوں کے لیے بجلی کے بلوں کے حوالے سے تفصیلی پیکج کا حتمی اعلان کیا جائے گاانہوں نے ہدایت کی کہ جن سیلاب متاثرہ صارفین سے اگست 2025 کا بجلی کا بل وصول کیا جا چکا ہے وہ آئندہ ماہ ایڈجسٹ کردیا جائے گا،سیلاب نے پورے پاکستان میں لاکھوں لوگوں کو متاثر کیا ہے، مشکل کے اس وقت میں عوام کے دکھوں پر مرہم رکھنے کی ہر ممکن کوشش کر رہے ہیں۔

    سپریم کورٹ کی ریٹائرڈ ججز کی سیکیورٹی سے متعلق مراسلے پر وضاحت جاری

    انہوں نے کہاکہ متاثرین کے ریسکیو و بحالی کے لیے وفاقی و صوبائی ادارے اپنی تمام تر کوششیں کررہے ہیں اور جب تک سیلاب متاثرین اپنے گھروں میں واپس نہیں چلے جاتے ہم چین سے نہیں بیٹھیں گے۔

    سپریم کورٹ کے جج کے اسکواڈ کی گاڑی جلانے کے کیس کا فیصلہ جاری

  • لوئر دیر:یرغمال بنائے گئے شہریوں کو بچانے کے لیے آپریشن، 10 دہشتگرد ہلاک، 7 جوان شہید

    لوئر دیر:یرغمال بنائے گئے شہریوں کو بچانے کے لیے آپریشن، 10 دہشتگرد ہلاک، 7 جوان شہید

    سیکیورٹی فورسز نے خیبرپختونخوا کے علاقے لوئر دیر میں یرغمال بنائے گئے شہریوں کی جانیں بچانے کے لیے آپریشن کیا ہے، اس دوران بھارتی حمایت یافتہ 10 دہشتگرد ہلاک کردیے گئے، جبکہ فائرنگ کے تبادلے میں 7 جوان بھی شہید ہوگئے۔

    پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے خفیہ اطلاعات کی بنیاد پر لوئر دیر کے علاقے لال قلعہ میں آپریشن کیا، اور اس دوران فائرنگ کا تبادلہ ہوگیاکارروائی کے دوران فورسز نے خوارج کے ٹھکانے کو مؤثر طریقے سے نشانہ بنایا اور 10 دہشتگردوں کو ہلاک کردیا۔ اس دوران شدید فائرنگ کے تبادلے میں 7 جوان بھی شہید ہوگئے۔

    شہید ہونے والوں میں نائیک عبدالجلیل، نائیک گل جان، لانس نائیک عظمت اللہ، سپاہی عبدالمالک، سپاہی محمد امجد، سپاہی محمد داؤد، سپاہی فضل قیوم شامل ہیں۔ شہید اہلکاروں نے یرغمال بنائے گئے شہریوں کو چھڑانے کی کوشش میں جان کا نذرانہ دیا۔

    آئی ایس پی آر کی جانب سے جاری بیان میں کہا گیا ہے کہ شہدا نے بہادری سے لڑتے ہوئے بے گناہ شہریوں کی جانیں بچائیں۔ خفیہ رپورٹس میں اس بات کی تصدیق ہوئی ہے کہ دہشتگردوں میں افغان باشندے شامل تھے،پاکستان نے عبوری افغان حکومت سے توقع ظاہر کی ہے کہ وہ اپنی زمین کو دہشتگردی کے لیے استعمال ہونے سے روکے گی اور اپنی ذمہ داریاں پوری کرےگی۔

    آئی ایس پی آر کے مطابق،علاقے میں کسی بھی دوسرے دہشتگرد کو ہلاک کرنے کے لیے فورسز کا کلیئرنس آپریشن جاری ہے اور سیکیورٹی فورسز نے عزم ظاہر کیا ہے کہ وہ ملک سے بھارتی پشت پناہی والے دہشتگردی کے ناگفتہ بہ اثرات کو ہمیشہ کے لیے مٹائیں گے بہادر جوانوں کی قربانیاں اس عزم کو مزید مضبوط کرتی ہیں۔

    واضح رہے کہ اس سے قبل سیکیورٹی فورسز نے خیبرپختونخوا کے مختلف علاقوں میں کارروائیاں کرتے ہوئے 35 دہشتگردوں کو ہلاک کردیا تھا، جبکہ دہشتگردوں کے ساتھ لڑتے ہوئے 12 جوان شہید ہوگئے تھے۔

  • سپریم کورٹ کی ریٹائرڈ ججز کی سیکیورٹی سے متعلق مراسلے پر وضاحت جاری

    سپریم کورٹ کی ریٹائرڈ ججز کی سیکیورٹی سے متعلق مراسلے پر وضاحت جاری

    سپریم کورٹ نے ریٹائرڈ ججز کی سیکیورٹی سے متعلق جاری مراسلے پر وضاحتی بیان دیاہے-

    ترجمان سپریم کورٹ کے مطابق چیف جسٹس پاکستان سمیت تمام ججز کی سیکیورٹی کو ریگولیٹ کیا گیا ہے، جبکہ چیف جسٹس کے پروٹوکول میں سرکاری گاڑیوں کی تعداد 8 سے کم کرکے 2 کر دی گئی ہے،دیگر ججوں کے لیے حفاظتی نظام کو بھی مناسب انداز میں منظم کیا گیا ہے ریٹائرڈ ججز کی سیکیورٹی بھی مروجہ قوانین، سیکیورٹی پروٹوکولز اور ان کے استحقاق کے مطابق ریگولیٹ کی گئی ہے۔

    ترجمان نے واضح کیاکہ صدارتی حکم کے مطابق ریٹائرڈ ججز کو تاحیات سیکیورٹی فراہم کی جاتی ہے کیونکہ وہ ماضی میں حساس ڈیوٹی انجام دے چکے ہوتے ہیں اور انہیں مسلسل سیکیورٹی خدشات لاحق رہتے ہیں انہی خدشات کے پیش نظر سرکلر جاری کیا گیا تاکہ سیکیورٹی پروٹوکولز کو عملی شکل دی جا سکے، یہ سیکیورٹی کسی غیر معمولی فائدے، اضافی رعایت یا مراعات کا حصہ نہیں ہے، سرکلر اس لیے جاری کیا گیا تاکہ ضرورت سے زیادہ فورس تعینات نہ ہو اور سپریم کورٹ، وزارت داخلہ اور صوبائی حکام کے درمیان بہتر ہم آہنگی یقینی بنائی جا سکے۔

    سپریم کورٹ کے جج کے اسکواڈ کی گاڑی جلانے کے کیس کا فیصلہ جاری

    نیٹوممالک روس سے تیل خریدنا بند کر دیں، امریکی صدر

    سونے کی قیمت میں معمولی کمی

  • سپریم کورٹ کے جج کے اسکواڈ کی گاڑی جلانے کے کیس کا فیصلہ جاری

    سپریم کورٹ کے جج کے اسکواڈ کی گاڑی جلانے کے کیس کا فیصلہ جاری

    لاہور کی انسداد دہشت گردی عدالت نے 9 مئی 2023 کو سپریم کورٹ کے جج کے اسکواڈ کی گاڑی جلانے کے کیس کا فیصلہ جاری کردیا۔

    125 صفحات پر مشتمل تفصیلی فیصلہ جج منظر علی گل نے تحریر کیا،عدالت نے صنم جاوید، محمد صدیق، طیب علی، سید فیصل اختر اور ظریف خان کے دائمی وارنٹ گرفتاری جاری کرتے ہوئے خدیجہ شاہ سمیت 14 مجرموں کی گرفتاری کا بھی حکم دے دیا جو سزا کے دن عدالت میں پیش نہ ہوئے تھے۔

    فیصلے میں پی ٹی آئی کے رہنماؤں عمر سرفراز چیمہ، ڈاکٹر یاسمین راشد، میاں محمود الرشید اور اعجاز چوہدری کو مجموعی طور پر 48 برس قید کی سزائیں سنائی گئیں۔ عدالت کے مطابق تمام سزائیں بیک وقت کاٹی جائیں گی، جبکہ مجرموں کو ڈیڑھ، ڈیڑھ لاکھ روپے جرمانہ بھی ادا کرنا ہوگا۔

    سونے کی قیمت میں معمولی کمی

    تحریری فیصلے میں شاہ محمود قریشی کی بریت کی وجوہات بیان کرتے ہوئے کہا گیا کہ ان کا کیس دیگر ملزمان سے مختلف ہے انہوں نے عدالت میں شواہد پیش کیے کہ وہ واقعے کے وقت ملتان سے کراچی جا رہے تھے اور موقع پر موجود نہیں تھے، بانی پی ٹی آئی کی گرفتاری کے بعد کارکنوں کو سوشل میڈیا کے ذریعے احتجاج پر اکسایا گیا۔ڈاکٹر یاسمین راشد سمیت دیگر ملزمان نے ہدف کے حصول کے لیے بھرپور کوشش کی، کوئی شک نہیں کہ پی ٹی آئی کارکنان بانی عمران خان کی ہدایت کو مقدس تصور کرتے ہیں اور انہیں ایک ریڈ لائن اور روحانی شخصیت سمجھتے ہیں۔

    سونے کی قیمت میں معمولی کمی

    واضح رہے کہ حالیہ دنوں اسی کیس میں عدالت نے شاہ محمود قریشی سمیت 21 ملزمان کو بری جبکہ ڈاکٹر یاسمین راشد اور عمر سرفراز چیمہ سمیت 18 ملزمان کو سزا سنائی تھی

  • نیٹوممالک روس سے تیل خریدنا بند کر دیں، امریکی صدر

    نیٹوممالک روس سے تیل خریدنا بند کر دیں، امریکی صدر

    امریکی صدر ڈونلڈ ٹرمپ نے نارتھ اٹلانٹک ٹریٹی آرگنائزیشن (نیٹو) کے ممبر ممالک پر زور دیا ہے کہ وہ روسی تیل خریدنا بند کریں اور یوکرین میں جنگ بندی کے لیے ماسکو پر بڑے پیمانے پر پابندیاں عائد کریں۔

    صدر ڈونلڈ ٹرمپ نے کہا ہے کہ روس پر مزید پابندیاں لگانے کا انحصار نیٹو ممالک کے فیصلوں پر ہے،انہوں نے ایک خط میں نیٹو اتحادیوں کو مخاطب کرتے ہوئے کہا کہ روس سے تیل خریدنا نہایت افسوسناک اور حیران کن ہے کیونکہ اس سے مغربی ممالک کی مذاکراتی پوزیشن کمزور ہوتی ہے۔

    ٹرمپ نے مطالبہ کیا کہ تمام نیٹو ممالک روسی تیل کی خریداری فوری طور پر بند کریں تاکہ ماسکو پر حقیقی دباؤ ڈالا جا سکے،اس کے ساتھ چین پر 50 سے 100 فیصد تک ٹیرف عائد کرنے کی تجویز بھی دی،یہ اقدام روس اور چین کے درمیان تعلقات کو کمزورکرے گا اورماسکو کو یوکرین میں جنگ جاری رکھنے کی صلاحیت سے محروم کرے گا۔

    سونے کی قیمت میں معمولی کمی

    انہوں نے دو ٹوک الفاظ میں کہا کہ اگر نیٹوممالک ان فیصلوں پرعمل کریں تو یوکرین جنگ جلد ختم ہو جائے گی، اگر آپ وہی کریں جو میں کہتا ہوں تو امن قریب ہے، بصورت دیگرآپ میرا اورامریکا کا وقت ضائع کر رہے ہیں، ٹرمپ نے مزید کہا کہ وہ آگے بڑھنے کے لئے تیار ہیں، اب فیصلہ نیٹو ممالک کو کرنا ہے کہ کیا وہ اس چیلنج کے لیے تیار ہیں یا نہیں۔

    سامعہ حجاب اور حسن زاہد میں صلح، عدالت کے فریقین کونوٹس

    واضح رہے کہ یہ پیش رفت حالیہ دنوں میں ٹرمپ کی جانب سے ماسکو پر پابندیوں کی دھمکیوں اور ان ممالک پر پابندیوں کے بعد سامنے آئی ہے، جو روسی تیل خرید رہے ہیں، جن میں بڑے خریدار چین اور بھارت شامل ہیں،امریکی صدر روسی تیل کی خریداری پر بھارتی مصنوعات کی درآمدات پر 25 فیصد اضافی ٹیرف عائد کر رکھا ہے، لیکن چین کے خلاف ایسا کوئی اقدام نہیں کیا گیا۔

    غیر قانونی طور پر پاکستان میں مقیم افغان باشندوں کا جلد انخلا انتہائی اہم ہے،وزیر اعظم شہباز شریف

  • سونے کی قیمت میں معمولی کمی

    سونے کی قیمت میں معمولی کمی

    ملک بھر میں سونے کی قیمت میں آج کمی ریکارڈ کی گئی ہے۔

    آل پاکستان صرافہ جیمز اینڈ جیولرز ایسوسی ایشن نے رپورٹ کیا کہ 24 قیراط کے حامل فی تولہ خالص سونے کی قیمت 200 روپے کمی سے 3 لاکھ 86 ہزار 300 روپے ہو گئی،اسی طرح 24 قیراط 10 گرام سونے کے نرخ بھی 172 روپے گر کر 3 لاکھ 31 ہزار 189 روپے ریکارڈ کیے گئے، جبکہ 22 قیراط سونے کے 10 گرام کی قیمت 158 روپے کمی کے بعد 3 لاکھ 3 ہزار 600 روپے ہو گئی،ادھربین الاقوامی مارکیٹ میں بھی سونے کی قیمت 2 ڈالر تنزلی سے 3,643 ڈالر فی اونس پر آ گئی۔

    غیر قانونی طور پر پاکستان میں مقیم افغان باشندوں کا جلد انخلا انتہائی اہم ہے،وزیر اعظم شہباز شریف

    ایسوسی ایشن کے مطابق چاندی 13 روپے سستی ہو کر 4 ہزار 443 روپے میں فروخت ہوئی جبکہ 10 گرام چاندی کی قیمت 11 روپے کمی کے بعد 3,809 روپے ہو گئی،عالمی مارکیٹ میں چاندی کی قیمت 0.13 ڈالر کمی کے بعد 42.15 ڈالر پر آ گئی۔

    چناب، سندھ، ستلج اور راوی میں پانی کی سطح مسلسل بلند

  • غیر قانونی طور پر پاکستان میں مقیم افغان باشندوں کا جلد انخلا انتہائی اہم ہے،وزیر اعظم شہباز شریف

    غیر قانونی طور پر پاکستان میں مقیم افغان باشندوں کا جلد انخلا انتہائی اہم ہے،وزیر اعظم شہباز شریف

    وزیر اعظم شہباز شریف نےکہا ہےکہ دہشت گردی کے خلاف مزید مؤثر جواب دینے کے لیے جو ضروری انتظامی اور قانونی اقدامات کرنے پڑے وہ فوراً کریں گے-

    وزیر اعظم شہباز شریف اور فیلڈ مارشل عاصم منیر نے بنوں کا دورہ کیا اور دہشت گردی سے متعلق اہم اور اعلیٰ سطح کے اجلاس میں شرکت کی،کمبائنڈ ملٹر ی ہسپتال (سی ایم ایچ) بنوں میں زخمی جوانوں کی عیادت کے بعد وزیراعظم شہباز شریف نےگفتگو کرتے ہوئے کہا کہ افغانستان کو آج واضح طور پر پیغام دینا چاہتا ہوں، 2 چیزوں میں سے کسی ایک کا انتخاب کر لیں۔

    اگر افغان حکومت پاکستان کے ساتھ تعلقات قائم کرنا چاہتی ہے تو ایمانداری اور سچائی کے ساتھ تعلقات قائم کرے، جس کے لیے ہم پہلے سے تیار ہیں، تاہم اگر افغانستان کی حکومت کو دہشت گردوں کا ساتھ دینا ہے اور اُن کی پشت پناہی کرنی ہےتو پھر ہمیں بھی افغانستان کی قائم مقام حکومت سے کوئی سروکار نہیں، افواج پاکستان فیلڈ مارشل کی سربراہی میں ہر صورت ان دہشت گردوں کا خاتمہ کریں گی۔

    سامعہ حجاب اور حسن زاہد میں صلح، عدالت کے فریقین کونوٹس

    شہباز شریف نے مزید کہا کہ ملک میں امن ہو گا تو ترقی اور خوشحالی ہوگی، اگر خدانخواستہ امن تباہ ہوگیا تو نہ ملک میں ترقی ہو گی اور نہ ہی خوشحالی،دورہِ بنوں کے دوران فیلڈ مارشل اور کور کمانڈر پشاور سے دیگر اعلیٰ فوجی قیادت سے گفتگو کی ہے، پاکستان کے بہترین مفاد میں فیصلےکریں گے، جلد کابینہ کے پاس ان فیصلوں کو لے کر جاؤں گا، جس پر بحث کے بعد حتمی فیصلہ کر کے فوری عمل درآمد کیا جائے گا۔

    وزیراعظم نے اس موقع پرمزید کہا کہ دہشت گردی کا بھرپور جواب دیا جائے گا، اس میں کسی قسم کا کوئی ابہام برداشت نہیں کریں گے، غیر قانونی طور پر پاکستان میں مقیم افغان باشندوں کا جلد انخلا انتہائی اہم ہے، پاکستانی قوم دہشت گردی کے معاملے پر سیاست اور گمراہ کن بیانیے کو مکمل طور پر رد کرتی ہے، جو بھی خارجیوں اور بھارت کی دہشت گرد پراکسیوں کی سہولت کاری اور معاملہ فہمی کی بات کرتا ہے وہ انہی کا اعلیٰ کار ہے اور اُسے بھی اسی زبان میں جواب دیا جائے گا جس کا وہ حق دار ہے۔

    چناب، سندھ، ستلج اور راوی میں پانی کی سطح مسلسل بلند

    شہباز شریف نے مزید کہا کہ پاکستان اور بالخصوص خیبر پختونخوا کے غیور عوام، ریاست اور افواج پاکستان کے ساتھ مل کر بھارت کی ان پراکسیوں کے خلاف آپریشن بنیان مرصوص کی طرح متحد ہیں، دہشت گردی کے خلاف مزید مؤثر جواب دینے کے لیے جو ضروری انتظامی اور قانونی اقدامات کرنے پڑے وہ فوراً کریں گے-

    قبل ازیں، وزیر اعظم شہبا زشریف کے بنوں پہنچنے پر فیلڈ مارشل نے بنوں کنٹونمنٹ میں اُن کا استقبال کیا، شہباز شریف اور آرمی چیف عاصم منیر نے جنوبی وزیرستان آپریشن میں شہید ہونے والے 12 جوانوں کی نماز جنازہ میں بھی شرکت کی۔

    پیٹرولیم مصنوعات کی قیمتوں میں اضافے کا امکان

  • سامعہ حجاب اور حسن زاہد میں صلح، عدالت کے فریقین کونوٹس

    سامعہ حجاب اور حسن زاہد میں صلح، عدالت کے فریقین کونوٹس

    ٹک ٹاکرسامعہ حجاب کیس میں ایک اہم پیش رفت سامنے آئی ہے-

    سامعہ حجاب اور ملزم حسن زاہد کے درمیان صلح ہوچکی ہے تاہم ڈسٹرکٹ اینڈ سیشن کورٹ اسلام آباد میں آج ملزم کی ضمانت کی درخواستوں پر باقاعدہ سماعت نہ ہوسکی،جوڈیشل مجسٹریٹ یاسرمحمود کی عدالت میں حسن زاہد کی جانب سے دونوں مقدمات میں ضمانت کی درخواست دائر کی گئی تھی،عدالت نے ان درخواستوں پر فریقین کو نوٹس جاری کرتے ہوئے سماعت 15 ستمبرتک ملتوی کردی ہے۔

    ذرائع کے مطابق سامعہ حجاب اورحسن زاہد کے درمیان صلح ہوچکی ہے اور ٹک ٹاکر سامعہ حجاب جلد ہی عدالت میں بیان حلفی اوراپنا بیان ریکارڈ کرائیں گی تاہم آج سماعت ملتوی ہونے کے باعث صلح نامہ عدالت میں جمع نہ ہوسکا۔

    واضح رہے کہ حسن زاہد کے خلاف تھانہ شالیمار میں اغوا، دھمکیوں اوردیگرسنگین دفعات کے تحت مقدمات درج ہیں، گزشتہ دنوں ٹک ٹاکر سامعہ حجاب نے ایک ویڈیو بیان میں دعویٰ کیا تھا کہ انہیں اغوا کرنے کی کوشش کی گئی اس حوالے سے سی سی ٹی وی فوٹیج بھی انہوں نے اپنے انسٹاگرام اکاؤنٹ پرشیئرکی تھی۔

    سامعہ حجاب نے یہ بھی کہا تھا کہ ملزم انہیں کئی دنوں سے ہراساں کر رہا ہے اورشادی کی پیشکش کررہا ہے، انہوں نے خدشہ ظاہرکیا تھا کہ ان کی زندگی کو خطرہ ہے اورحکام و پولیس سے مدد کی اپیل کی تھی’میری دوست ثنا یوسف بھی ایک نہ کے سبب اپنی جان گنوا بیٹھی ہے، اس لیے میری حفاظت کو یقینی بنایا جائے-

  • چناب، سندھ، ستلج اور راوی میں پانی کی سطح مسلسل بلند

    چناب، سندھ، ستلج اور راوی میں پانی کی سطح مسلسل بلند

    فلڈ فورکاسٹنگ ڈویژن کے مطابق ملک کے بڑے دریاؤں میں سیلابی صورتحال برقرار ہے اور پانی کی سطح مسلسل بلند ہو رہی ہے۔

    دریائے چناب میں ہیڈ پنجند کے مقام پرانتہائی اونچے درجے کا سیلاب ریکارڈ کیا گیا، جہاں پانی کا اخراج 4 لاکھ 94 ہزار147 کیوسک تک پہنچ گیا ہےاسی طرح دریائے سندھ میں گڈوبیراج پراونچے درجے کا سیلاب ہے اورپانی کا اخراج 5 لاکھ 32 ہزار 72 کیوسک ریکارڈ کیا گیا جبکہ سکھربیراج پردرمیانے درجے کا سیلاب جاری ہے، جہاں سے 4 لاکھ 22 ہزار 400 کیوسک پانی کا گزرہورہا ہے۔

    فلڈ فورکاسٹنگ ڈویژن کے مطابق دریائے ستلج میں گنڈا سنگھ والا کے مقام پردرمیانے درجے کا سیلاب جاری ہے، اورپانی کا اخراج 89 ہزار60 کیوسک ہے،سلیمانکی کے مقام پرنچلے درجے کا سیلاب ریکارڈ کیا گیا ہے جہاں اخراج 69 ہزار19 کیوسک ہے، ہیڈ اسلام پر بھی درمیانے درجے کا سیلاب برقرار ہے اورپانی کا اخراج 82 ہزار 155 کیوسک تک پہنچ گیا ہےاسی طرح دریائے راوی میں سدھنائی کے مقام پرنچلے درجے کا سیلاب ہے اور پانی کا اخراج 41 ہزار 335 کیوسک ریکارڈ کیا گیا۔

    پیٹرولیم مصنوعات کی قیمتوں میں اضافے کا امکان

    ماہرین کے مطابق مسلسل بارشوں اورپانی کے بہاؤ میں اضافے کے باعث دریاؤں کے اطراف نشیبی علاقوں میں سیلابی خطرات میں مزید اضافہ ہو گیا ہے اورمتعلقہ حکام کوہائی الرٹ کردیا گیا ہے۔

    وزیر خارجہ سے مصری ہم منصب کا ٹیلیفونک رابطہ