Tag: پاکستان

اسلام آباد :وزیر خارجہ شاہ محمود قریشی نے کہا ہے کہ پاکستان اقتصادی تعاون تنظیم (ای سی او )کو اولین ترجیح دیتا ہے جو ہمارے دس اہم علاقائی شراکتداروں کا گروپ ہے ،وسائل ، تجارت ، جغرافیائی محل وقوع ، یورو ایشیا کے مرکز میں تذویراتی مقام ہونے کے ناطے ای سی او ایک طاقتور علاقائی ادارے کے طور پر ابھرنے کی بھرپور صلاحیت رکھتی ہے ،وہ ہفتہ کو یہاں ای سی او کی وزراء کونسل کے 25ویں اجلاس سے خطاب کررہے تھے ۔

شاہ محمود قریشی نے کہا کہ اس سربراہی اجلاس میں شرکت ان کے لئے ایک اعزاز ہے ، ترکمانستان کی حکومت اور تنظیم کے سیکرٹری جنرل کو اس اجلاس کے انعقاد پر مبارکباد پیش کرتے ہیں ۔ انہوں نے کہاکہ ای سی او ممالک نے اپنے ویژن 2025کے فیصلوں میں پر جوش مقاصد کا تعین کیا ہے ، اس سلسلے میں سیکرٹریٹ کی طرف سے کی جانے والی پیشرفت رپورٹ کو سراہتے ہیں ۔

انہوں نے کہاکہ کووڈ 19نے ای سی او رکن ممالک کی معیشتوں پر منفی اثرڈالا ہے ، اس مرض سے صحت یاب ہونے کے لئے ویکسینیشن اور دیگر احتیاتی تدابیر اختیار کی جانی چاہئیں ، ویکسین کی پیداوار ، تقسیم اور دستیابی میں مساوات پر اصرار کرنا چاہئے ۔ انہوں نے کہا کہ ہمیں ای سی اوویژن 2025کے مقاصد کی تکمیل کو بھی تیز کرنا چاہئے جو کہ اقوام متحدہ کے پائیدار ترقی کے اہداف کے ساتھ مکمل طور پر اہم آہنگ ہیں ۔ انہوں نے کہا کہ ای سی او ٹرانسپورٹ راہداری کا آغاز سب سے اہم مقصد ہے ،استنبول ، تہران ، اسلام آباد راہداری کے فعال ہونے کا خیر مقدم کرتے ہیں ۔

انہوں نے کہاکہ افغانستان کے ذریعے ٹرانزٹ راہداری کی مکمل فعالیت ای سی او کے تمام ممالک کے لئے اہم ہو گا ، اس مقصد کے لئے ا فغانستان میں امن و آمان ناگزیر ہے ، ہم سب کو افغانستان اور اس کے عوام کو انسانی اور معاشی امداد فراہم کرنی چاہئے تاکہ بڑے پیمانے پرانسانی بحران اور معاشی تباہی کو روکا جاسکے ۔ انہوں نے کہاکہ ہمیں کابل میں نئی حکومت کی حوصلہ افزائی کرنی چاہئے کہ وہ افغانستان کو مستحکم کرنے کے لئے جامع طرز حکمرانی ، انسانی حقوق بشمول خواتین کے حقوق اور دہشتگردی کے خلاف کارروائی کو فروغ دیں ،6پڑوسی ممالک کا فارمیٹ افغانستان میں استحکام کو فروغ دینے کے لئے اہم ہے ،

اس کے ساتھ مل کے ہمیں افغانستان سے متعلق متفقہ منصوبوں کے جلد نفاذ میں مدد کرنی چاہئے ،تاپی گیس پائپ لائن ، کاسا 1000، بجلی کا گریڈ اور ترمزمزار شریف ، کابل کو ملانے والی ٹرانس افغان ریلوے اہم منصوبے ہیں ۔ انہوں نے کہاکہ امید ہے کہ چین پاکستان اقتصادی راہداری سے بھی خطہ مستفید ہو گا ، ہمیں ای سی او ممالک کے درمیان مزید منصوبوں کی نشاندہی ، تیاری اور ان پر عملدرآمد بھی کرنا چاہئے ۔ انہوں نے کہاکہ ای سی او علاقائی فری ٹریڈ زون بنا کر آسیان اور افریقی یونین کی تقلید کرنے کا وقت آگیا ہے ،

اس سے باہمی سرمایہ کاری ، بہتر پیداواری صلاحیت اور معیشتوں کی مسابقت کی حوصلہ افزائی ہو گی ۔ انہوں نے کہا کہ اس کے علاوہ ای سی او بینک کے کردار کو مضبوط بنانے اور ای سی او ری انشورنس کمپنی کو فعال بنانا ہماری تجارت ، سرمایہ کاری اور انضمام کے مقاصد میں مثبت تجارتی اور ترقیاتی کردار ادا کر سکتا ہے ، مقاصد کے حصول کے لئے کثیر الجہتی ، علاقائی اور قومی ترقیاتی بینکوں ، نجی منڈیوں کے ذریعے مالی اعانیت کو بھی متحرک کیا جانا چاہئے ۔ انہوں نے کہاکہ ویژن 2025میں اعتراف کیا گیا کہ ای سی او کی معیشتیں صرف اسی صورت متحرک ہوں گی جب وہ علم پر مبنی اور ڈیجیٹلائز ہوں گی ،

اس تناظر میں آذربائیجان میں تحقیق و ترقی کے مرکز کے قیام کا خیر مقدم کرتے ہیں ، یہ مرکز سائنس اور ٹیکنالوجی کی معلومات کے تبادلے کے ساتھ ساتھ تحقیق و ترقی اور ٹیکنالوجی ایپلی کیشنز میں تعاون کے لئے ایک طریقہ کار کے طور پر بھی کام کر سکتا ہے ۔انہوں نے کہاکہ ابھرتی ہوئی عالمی ڈیجیٹل معیشت میں ای سی او اراکین کا انضمام اس بات کا تعین کرے گا کہ آیا وہ متحرک ترقی کو برقرار رکھ سکتے ہیں ،

ہمیں براڈ بینڈ اور دیگر آئی ٹی ہارڈویئر اور سافٹ ویئر کی تنصیب اور ڈیجیٹل ورک فورس کی تربیت کے لئے منصوبے تیار کرنا اور ان پر عملدرآمد کرنا چاہئے ، اپنے جغرافیائی محل وقوع سے مکمل فائدہ اٹھانے کے لئے ای سی او کو چین کے بلٹ اینڈ روڈ انیشٹیو اور یوریشیئن اکنامک یونین کے ساتھ مفادات اور تعاون کے سنگم کو فروغ دینا چاہئے ،

ای سی او سیکرٹریٹ ایک سٹڈی تیار کر سکتا ہے کہ اس طرح کے تعاون کو کس طرح بہتر بنانا ہے ۔انہوں نے کہاکہ ای سی او کو چین ، روس ، یورپ ، آسیان ، خلیج تعاون کونسل اور افریقی یونین سے ملحق تمام مارکیٹوں کے ساتھ تجارت اور باہمی تعاون کے امکانات کا بھی جائزہ لینا چاہئے ۔انہوں نے کہاکہ ای سی او کے تمام رکن ممالک ترقی پذیر ممالک کے لئے کام کریں تاکہ خوشحالی اور ترقی کے اپنے مشترکہ اہداف کو حاصل کیا جاسکے۔

انہوں نے کہاکہ اگلے سال پاکستان ای سی او کی صدارت سنبھالے گا ہم اپنے مشترکہ مقاصد کو آگے بڑھانے کے لئے ای سی او کے اراکین کی حمایت کے منتظر ہیں ۔ انہوں نے کہاکہ ای سی او کے رکن کے طور پر امید کرتے ہیں کہ ہم اسلاموفوبیا کا مقابلہ کرنے اور تمام مسلم عوام کے جائز حقوق خاص طور پر فلسطین اور جموں کشمیر کے عوام کے حق خود ارادیت اور آزادی کے لئے ان کا ساتھ دیں گے ۔

نئی دہلی :بڑے افسوس کا مقام ہے کہ بھارتی میڈیا بھی بھارتی سرکار کی طرح جھوٹا اور فراڈی ہے:اطلاعات کے مطابق سکاٹ لینڈ یارڈ پولیس نے بڑے افسوس کا اظہار کرتے ہوئے کہا ہےکہ انہیں بڑا دُکھ پہنچا کہ بھارتی میڈیا بھی بھارتی حکومت کی طرح جھوٹا اور فراڈی ہے ، اسکاٹ لینڈ یارڈ کا کہنا ہے کہ سکھس فار جسٹس کے دفتر پر چھاپہ نہیں مارا گیا۔

تفصیلات کے مطابق سکاٹ لینڈ پولیس کا کہنا ہے کہ بھارت خالصتان تحریک کے پیچھے پاکستان کا ہاتھ ثابت کرنے کی کوشش کر رہا ہے۔
پولیس کا کہنا ہے کہ ہمیں لگتا ہے کہ بھارتی ایجنسیوں نے آزاد پنجاب تحریک اور ریفرنڈم پر بات کی ہے۔ جھوٹی خبریں پھیلا کر ان کی نیوز ایجنسیاں بھارتی حکومت کی پالیسی پر عمل پیرا ہیں۔

سکھوں کے آزاد وطن خالصتان پر ریفرنڈم سے پریشان بھارتی حکومت نے چالاک ہتھکنڈوں کا سہارا لیا ہے۔بھارتی میڈیا نے جعلی خبریں چلائیں کہ برطانوی پولیس نے سکھ فار جسٹس کے دفتر پر چھاپہ مارا ہے۔ان خیالات کا اظہار سکھ فار جسٹس کے رہنماؤں نے لندن میں پریس کانفرنس سے خطاب کرتے ہوئے کیا۔

انہوں نے کہا کہ برطانوی پولیس نے بھارتی میڈیا کی جعلی خبروں کی تردید کی ہے۔پرمجیت سنگھ پوما نے کہا، ’’ہمارے وکلاء نے میٹروپولیٹن پولیس سے رابطہ کیا اور ہندوستانی میڈیا کی جعلی خبروں کے بارے میں دریافت کیا، لیکن پولیس نے ان خبروں کی مکمل تردید کی۔‘‘انہوں نے کہا کہ بھارت ان اچھے اور برے ہتھکنڈوں سے ریفرنڈم کو نہیں روک سکتا۔

واضح رہے کہ یہ خبر بھارتی گروپ اے این آئی نے بھی چلائی تھی جو بھارت کا ایک بڑا گروپ ہے۔سکھ رہنماؤں کا کہنا ہے کہ وہ برطانیہ میں جعلی خبریں چلانے والے چینلز کے خلاف قانونی کارروائی کریں گے۔

اسلام آباد:ائیر پورٹ سے جعلی دستاویزات پر بیرون ملک سفر کرنے والے افغانی باشندے گرفتار۔،اطلاعات کے مطابق اسلام ائیر پورٹ پر دوران امیگریشن کلیئرنس جعلی سفری دستاویزات کی بنا پہ آف لوڈ کئے جانے والے افراد کے خلاف ایف آئی اے اسلام آباد زون کے انسداد انسانی اسمگلنگ سیل اسلام آباد کی جانب سے قانونی کاروائی عمل میں لاتے ہوئے مقدمات کا اندراج کیا گیا۔

آف لوڈ کیے جانے والے تمام افغانی باشندوں (مشرف ولد عبدالستار، شاہ زیب ولد کلیم اللہ، عقیل احمد ولد احمد دین اور اشرف علی) نے جعلی پاکستانی شناختی کارڈ اور پاسپورٹ کی بناء پہ امیگریشن کروانے کی کوشش کی۔ ان میں سے ایک ملزم اشرف علی کو پہلے ہی سے جعلی کوائف کی بناء پہ پاکستانی پاسپورٹ کے لیےاپلائی کرنے کی وجہ سے بلیک لسٹ کیٹگری میں ڈالا گیا تھا۔

مذکورہ ملزمان سے دوران امیگریشن کلیئرنس ایف آئی اے کے شفٹ انچارج نے فیملی ٹری کے بارے میں معلومات حاصل کیں جو نادرا کے فراہم کردہ ریکارڈ کے مطابق غلط پائی گئیں اور اس بنا پر تمام مسافروں کو آف لوڈ کر دیا گیا۔

آف لوڈ کیے جانے والے تمام افراد پہ مقدمات درج کیے جانے کے بعد جسمانی ریمانڈ حاصل کر کے مزید تفتیش شروع کر دی گئ ہے۔ جبکہ گرفتارملزمان کی طرف سے نامزد کئے گئے ایجنٹ کی گرفتاری کے لیے ٹیم متحرک کر دی گئی ہے ۔

ڈائریکٹر ایف آئی اے اسلام آباد زون وقار احمد چوہان کی جانب سے اس موقع پر مذکورہ مقدموں میں ایجنٹ کی گرفتاری اور گرفتار ملزمان کو قانون کے مطابق قرار واقعی سزا دلوانے کی ہدایات جاری کیں۔

لاڑکانہ:ڈر ہے کہ عمران خان دھاندلی سے جیت جائے گا،اس لیے الیکٹرانک ووٹنگ کے مخالف ہیں:,اطلاعات کے مطابق آج لاڑکانہ میں حکومت مخالف اتحاد پاکستان ڈیمو کریٹک موومنٹ (پی ڈی ایم) کے سربراہ مولانا فضل الرحمان نے کہا ہے کہ چیلنج یہ نہیں عمران خان نے معیشت تباہ کی ہے بلکہ چیلنج یہ ہے بہتری کون لائے گا۔

مولانا فضل الرحمن نے کہا کہ ڈر ہےکہ عمران خان دھاندلی سے جیت جائےگا اس لیے الیکٹرانک ووٹنگ کے خلاف ہوں

لاڑکانہ میں شہید اسلام کانفرنس سے خطاب کرتے ہوئے امیر جمعیت علمائے اسلام (ف) کا کہنا تھا کہ یہ نیب میرا احتساب کرے گا، نیب کے ذریعے سزا دینا بھی پاکستان کی سیاست کا حصہ تھا، اسی لیے توہم نے کہا تھا ایک ہم ہیں جسے نیب نہیں چھیڑسکتا ورنہ منہ کی کھانی پڑے گی۔

انہوں نے کہا کہ پاکستان کے ہر صوبے کے لوگ اپنے وسائل کے مالک ہیں، کوئی مائی کا لال کسی دوسرے کے حق پر ڈاکا نہیں ڈال سکتا، آج پاکستان کی آزادی چھینی جارہی ہے، ملک کا سٹیٹ بینک جعلی حکومت نے براہ راست آئی ایم ایف کے حوالے کرنے کا منصوبہ بنایا ہے، اگر ایسا ہوا تو وہ ملک کے بجائے ڈائریکٹ عالمی مالیاتی ادارے کو جوابدہ ہوگا جو انتہائی غلط ہے،

مولانا فضل الرحمن نے کہا کہ یہ غلطی سلطنت عثمانیہ نے کی جس کے باعث وہ تباہ ہوا، اس وقت پاکستان کے بقاء کو داو پر لگایا جارہا ہے۔ ہم 22 کروڑعوام کوکسی بین الاقوامی قوت کا غلام نہیں بننے دیں گے، ہمارے مالیاتی ادارے آزاد ہونے چاہئیں، جس سمت میں جارہے ہیں اس سمت کوتبدیل کرنا ہے۔ ملک تب رہ سکتا ہے جب سب آئین کے دائرے میں رہتے ہوئے زندگی گزاریں، ہمارے حقوق کا فیصلہ آئین کی روح سے ہو گا۔

مولانا فضل الرحمن نے کہا کہ سندھ میں تیس سال پہلے یہ شعورنہیں تھا، جمعیت علما کی مسلسل محنتوں نے ایک نیا شعوردیا ہے، اسی ہمت اورعزم کے ساتھ آگے بڑھیں گے۔ ہم نے ڈاکٹر خالد سومرو کا راستہ چھوڑا نہیں، یہ سندھ ڈاکٹر خالد کے قاتلوں کا نہیں، اس کے بھائیوں کا ہے، وطن عزیز کے لیے ہم نے پہلے بھی قربانیاں دیں اور اب بھی عزم کرنا ہے کہ کسی بین الاقوامی قوت کا ہمیں ساتھی نہیں بننا، پاکستان کو حریت اور آزادی کی شناخت دینی ہے، مسلط افراد کو شکست دے چکے آپ فاتح اور حکمران شکست خوردہ ہیں۔

لاہور: شہبازشریف نے اگلے مہینے قیامت اور ترجمان وزارت خزانہ نے اگلے مہینے کی اچھی خبردے دی ،اطلاعات کے مطابق ن لیگ کے صدر اور قومی اسمبلی میں اپوزیشن لیڈر شہباز شریف نے ڈالر کی تاریخی بلندی کو معاشی تباہی کے طوفان کی علامت قرار دیتے ہوئے دعویٰ کیا کہ یکم دسمبر سے مزید قیامت خیز مہنگائی آنے والی ہے۔

اپنے ایک بیان میں شہباز شریف نے کہا کہ جب وزارت خزانہ اپنے مشیر خزانہ کے بیان کی تردید کرے، جھوٹے اعدادوشمار دئیے جائیں تو پھر معیشت کا ایسے ہی دھڑن تختہ ہوتا ہے۔ ریکارڈ تجارتی خسارہ ملکی معاشی تباہی کے خطرناک اشارے ہیں، کرنٹ اکاﺅنٹ خسارہ کی بلند ترین سطح معاشی غلط سمت کی بین دلیل ہے۔

انہوں نے کہاکہ قرض، مہنگائی، خسارے، ڈالر ہر چیز ریکارڈ توڑ چکی، ملک میں اگر عوام کی منتخب حکومت ہوتی تو آج یہ صورتحال نہ ہوتی۔ ملک کو جس معاشی کھائی میں دھکیل دیاگیا ہے، جلد کچھ نہ کیا گیا تو واپسی بھی ناممکنات میں سے ایک مسئلہ بن جائے گی۔

شہباز شریف نے دعوی کیا کہ یکم دسمبر سے مزید قیامت خیز مہنگائی آنے والی ہے، حکومت پٹرول مہنگا کردے گی جس سے عوام الناس اورپریشان ہوجائیں گے

دوسری طرف ترجمان وزارت خزانہ نے خوشخبری سناتےہوئے کہا ہے کہ ترجمان وزارت خزانہ مزمل اسلم نے عوام کو اگلے ماہ پٹرولیم مصنوعات کی قیمتوں کے حوالے سے بڑا ریلیف ملنے کی نوید سنادی ہے۔

واضح رہے کہ گذشتہ روز عالمی مارکیٹ میں خام تیل کی قیمت میں بڑی کمی دیکھی گئی جو کل قیمت کا 11.5فیصد بنتی ہے جس کے بعد فی بیرل قیمت 72 اعشاریہ91ڈالرز تک گرگئی۔

قیمت میں یہ کمی اپریل 2020ء کے مقابلے میں سب سے بڑی کمی ہے جوکہ ڈیڑھ سال بعد ہوئی ہے، ماہرین نے تیل کی زائد پیداوار بھی اس کمی کی ایک اہم وجہ قرار دیا ہے۔

ٹویٹر پر شیئر کیے گئے کلپ کے کیپشن میں مزمل اسلم نے لکھا کہ عالمی مارکیٹ میں خام تیل کی قیمت کم ہو کر 72.91ڈالرفی بیرل کی سطح پر آگئی