Tag: baaghi

قصور
وفاقی حکومت نے پیٹرولیم مصنوعات کی قیمتوں میں معمولی کمی کرکے عوام کیساتھ مذاق کیا،عوامی رائے

تفصیلات کے مطابق جاری نوٹیفکیشن کے مطابق پیٹرول اور ہائی اسپیڈ ڈیزل کی قیمت میں 5 روپے 50 پیسے فی لیٹر کمی کی گئی ہے
نئی قیمتوں کا اطلاق فوری طور پر کر دیا گیا ہے

عوامی حلقوں نے حکومت کے اس اقدام کو ناکافی قرار دیتے ہوئے شدید ردعمل کا اظہار کیا ہے شہریوں کا کہنا ہے کہ حکومت کا یہ ہم عوام سے مذاق ہے کیونکہ جب عالمی مارکیٹ میں قیمتیں بڑھتی ہیں تو حکومت فوری طور پر پیٹرولیم مصنوعات کی قیمتوں میں بھاری اضافہ کر دیتی ہے، تاہم کمی کے وقت صرف چند روپے کم کر کے عوام کو ریلیف دینے کا دعویٰ کیا جاتا ہے۔

شہریوں اور مختلف سماجی حلقوں نے حکومت کی پالیسی کو عوام کے ساتھ مذاق قرار دیتے ہوئے کہا ہے کہ مہنگائی کے ستائے ہوئے عوام کو حقیقی ریلیف فراہم کیا جائے ان کا کہنا ہے کہ ٹرانسپورٹ، اشیائے خورونوش اور روزمرہ استعمال کی دیگر اشیا کی قیمتیں مسلسل بلند ہیں، ایسے میں معمولی کمی عوامی مشکلات کم کرنے کے لیے ناکافی ہے۔

ماہرین کے مطابق پیٹرولیم مصنوعات کی قیمتوں میں کمی کا براہِ راست اثر مہنگائی پر پڑتا ہے، تاہم اس کے ثمرات اسی وقت عوام تک پہنچ سکتے ہیں جب حکومت مکمل طور پر اس ریلیف کو منتقل کرنے کے لیے مؤثر اقدامات کرے

ڈی سی قصور اور اسسٹنٹ کمشنر چونیاں نوٹس لیں

تحصیل ہیڈکوارٹر ہسپتال چونیاں کے مین گیٹ کے باہر غیر قانونی موٹر سائیکل اسٹینڈ قائم ہونے سے مریضوں اور ان کے لواحقین کو شدید مشکلات کا سامنا ہے۔ ہسپتال آنے والے شہریوں کا کہنا ہے کہ مین داخلی راستے کے باہر موٹر سائیکلوں کی بھرمار کے باعث آمدورفت متاثر ہو رہی ہے جبکہ ایمبولینس اور ایمرجنسی گاڑیوں کو بھی گزرنے میں دشواری پیش آتی ہے۔

شہریوں نے الزام عائد کیا ہے کہ موٹر سائیکل اسٹینڈ کی وجہ سے ہسپتال کے باہر ٹریفک جام معمول بن چکا ہے، جس سے مریضوں کو بروقت طبی سہولیات تک رسائی میں رکاوٹ کا سامنا کرنا پڑ رہا ہے۔ خواتین، بزرگ شہریوں اور بچوں کو خاص طور پر پریشانی اٹھانا پڑ رہی ہے۔

عوامی حلقوں نے ڈپٹی کمشنر قصور اور اسسٹنٹ کمشنر چونیاں سے فوری نوٹس لینے کا مطالبہ کرتے ہوئے کہا ہے کہ ہسپتال کے مرکزی دروازے کے باہر قائم موٹر سائیکل اسٹینڈ کو فوری طور پر ہٹایا جائے تاکہ مریضوں اور ان کے اہل خانہ کو درپیش مشکلات کا خاتمہ ممکن بنایا جا سکے۔

قصور
لیسکو قصور کی بلھے شاہ سب ڈویژن میں بجلی چوروں کے خلاف کارروائی کے دوران واپڈا اہلکاروں پر مبینہ جان لیوا حملے کا واقعہ پیش آیا

ذرائع کے مطابق کوٹ غلام محمد خان، گلی دربار والی بالمقابل عابدہ تاثیر ہسپتال میں بلھے شاہ سب ڈویژن کے اہلکار بجلی چوری کی روک تھام کے لیے چیکنگ کر رہے تھے کہ اس دوران متعدد مقامات پر ڈائریکٹ سپلائی اور غیر قانونی کنڈے پکڑے گئے
چیکنگ کے دوران بجلی چوری پکڑے جانے پر مشتعل افراد نے واپڈا ملازمین پر حملہ کر دیا اور ڈنڈوں، سوٹوں اور مکوں سے تشدد کا نشانہ بنایا
حملے میں ایل ایس حافظ عثمان، لائن مین صابر، لائن مین امتیاز اور اسسٹنٹ لائن مین ذوالفقار زخمی ہو گئے واقعہ کے دوران صورتحال کشیدہ ہونے پر اہلکاروں نے فوری طور پر 15 پر کال کی جس پر پولیس نفری موقع پر پہنچ گئی
بعد ازاں ایس ڈی او امیر علی اور احمد رضا LS اپنے عملے کے ہمراہ موقع پر پہنچے اور پولیس کی نگرانی میں آپریشن جاری رکھا گیا کارروائی کے دوران تمام غیر قانونی کیبلز اور ڈائریکٹ سپلائیز کو منقطع کرکے ریموو کر دیا گیا
پولیس نے موقع پر پہنچ کر حالات کو قابو میں لیا جبکہ واقعہ میں ملوث افراد کے خلاف مقدمہ درج کر لیا گیا ہے۔ پولیس کے مطابق ملزمان کی تلاش جاری ہے اور انہیں جلد گرفتار کر لیا جائے گا واپڈا حکام نے کہا ہے کہ بجلی چوروں اور سرکاری اہلکاروں پر حملہ کرنے والوں کے خلاف بلا امتیاز کارروائی عمل میں لائی جائے گی

قصور
بابا بلھے شاہ ڈسٹرکٹ ہسپتال میں سہولیات کے دعوے سوالیہ نشان بن گئے

قصور ضلعی انتظامیہ کی جانب سے بابا بلھے شاہ ڈسٹرکٹ ہسپتال میں بہترین طبی سہولیات فراہم کرنے کے دعوے کیے جا رہے ہیں، تاہم سوشل میڈیا پر وائرل ہونے والی ایک ویڈیو نے ان دعوؤں پر سوالات اٹھا دیے ہیں۔

وائرل ویڈیو میں دیکھا جا سکتا ہے کہ ایک مریض کو شدید گرمی کے دوران مصروف ٹریفک کے درمیان سٹریچر پر ہسپتال کے اندر منتقل کیا جا رہا ہے، جبکہ موقع پر ایمبولینس گاڑیاں موجود ہونے کے باوجود انہیں استعمال نہیں کیا گیا۔

شہریوں اور سوشل میڈیا صارفین نے واقعے پر شدید تشویش کا اظہار کرتے ہوئے اسے انتظامی غفلت قرار دیا ہے۔ عوامی حلقوں کا کہنا ہے کہ اگر ہسپتال میں بنیادی مریض سہولیات اور ایمرجنسی رسپانس کا یہ حال ہے تو عام مریضوں کو کس قدر مشکلات کا سامنا کرنا پڑتا ہوگا۔

شہریوں نے وزیراعلیٰ پنجاب اور محکمہ صحت سے واقعے کا نوٹس لینے اور ذمہ داروں کے خلاف کارروائی کا مطالبہ کیا ہے

دوسری جانب ہسپتال انتظامیہ کی جانب سے تاحال اس معاملے پر کوئی باضابطہ مؤقف سامنے نہیں آیا

جھوٹی اور بے بنیاد ایف آئی آر کے خلاف صحافی برادری کا احتجاج

قصور
صحافی برادری نے قصور کے سینئر صحافی افضل حسین بھٹی، سی ای او آپ پلس نیوز اور مرکزی جنرل سیکرٹری ایمرا ویب میڈیا جرنلسٹس گروپ ضلع قصور، کے خلاف درج کی جانے والی من گھڑت، جھوٹی اور بے بنیاد ایف آئی آر کی شدید الفاظ میں مذمت کی ہے

صحافیوں اور سول سوسائٹی کے نمائندگان کا کہنا ہے کہ افضل حسین بھٹی ایک ذمہ دار اور پیشہ ور صحافی ہیں جنہوں نے ہمیشہ حق اور سچ کی آواز بلند کی
ان کے خلاف درج کیا جانے والا مقدمہ آزادی صحافت پر حملے کے مترادف ہے

صحافی برادری نے ڈی پی او قصور سے مطالبہ کیا ہے کہ مذکورہ جھوٹی ایف آئی آر کو فوری طور پر خارج کیا جائے اور معاملے کی شفاف اور غیر جانبدارانہ انکوائری کروائی جائے تاکہ حقائق سامنے آ سکیں اور بے گناہ افراد کو ہراساں کرنے کا سلسلہ بند ہو

صحافیوں کا کہنا تھا کہ اگر صحافیوں کو اس طرح جھوٹے مقدمات میں الجھایا جاتا رہا تو اس سے آزادی اظہار رائے اور صحافتی فرائض کی انجام دہی متاثر ہوگی
ضلع بھر کے صحافیوں نے اعلیٰ حکام سے نوٹس لینے اور انصاف فراہم کرنے کا مطالبہ بھی کیا

قصور: غریبوں کی ریڑھیوں پر فوری ایکشن، مگر بااثر افراد کے تجاوزات برقرار

قصور میں تجاوزات کے خلاف کارروائی ایک بار پھر سوالیہ نشان بن گئی۔ شہریوں کا کہنا ہے کہ پیرا فورس اور متعلقہ ادارے بازاروں میں غریب ریڑھی بانوں اور چھوٹے کاروبار کرنے والوں کے خلاف تو فوری کارروائی کرتے ہیں، مگر بااثر افراد کے غیر قانونی تھڑے اور تجاوزات بدستور قائم ہیں۔

شہریوں کے مطابق منیر شہید کالونی میں کئی گھروں کے باہر بڑے بڑے تھڑے تعمیر کیے گئے ہیں، جبکہ بعض مقامات پر گھروں کے مالکان نے سڑک کا آدھا حصہ بھی اپنے استعمال میں لے رکھا ہے، جس کے باعث آمدورفت میں شدید مشکلات کا سامنا ہے۔

مقامی افراد کا کہنا ہے کہ اگر تجاوزات کے خلاف مہم چلائی جا رہی ہے تو قانون کا اطلاق سب پر یکساں ہونا چاہیے۔ غریب ریڑھی بانوں کے روزگار ختم کرنے کے بجائے بااثر افراد کے خلاف بھی کارروائی کی جائے تاکہ شہریوں کو حقیقی ریلیف مل سکے۔

شہری حلقوں نے ڈپٹی کمشنر قصور اور متعلقہ حکام سے مطالبہ کیا ہے کہ منیر شہید کالونی سمیت شہر کے مختلف علاقوں میں قائم مستقل تجاوزات کے خلاف بلاامتیاز آپریشن کیا جائے اور سڑکوں پر قبضہ ختم کرا کے عوام کے لیے راستے بحال کیے جائیں۔

قصور
93 خواتین اساتذہ کی ترقی کے آرڈرز جاری، تعلیمی حلقوں میں خوشی کی لہر

ضلع قصور میں عرصہ دراز سے زیرِ التوا خواتین اساتذہ کی ترقیوں کا عمل مکمل ہونے پر تعلیمی حلقوں میں خوشی کی لہر دوڑ گئی۔ ایلیمنٹری ونگ کے زیرِ اہتمام منعقدہ ایک پروقار تقریب میں 93 خواتین اساتذہ کو پی ایس ٹی (PST) سے ای ایس ٹی (EST) کے عہدوں پر ترقی کے آرڈرز تقسیم کیے گئے۔

تقریب میں سی ای او ایجوکیشن قصور شوکت علی خاں اور ڈی ای او ایلیمنٹری محترمہ ناصرہ بشیر نے بطور مہمانِ خصوصی شرکت کی، جبکہ ڈپٹی ڈی ای او پتوکی محترمہ صباء خالد اور ڈپٹی ڈی ای او کوٹ رادھا کشن محترمہ طلعت رانا بھی موجود تھیں۔

اس موقع پر عربی، جنرل اور سائنس میتھ کے بی ایس آنرز حامل وہ اساتذہ جو کئی برسوں سے ترقی کے منتظر تھے، آرڈرز وصول کرتے ہوئے جذباتی دکھائی دیں۔ ترقی پانے والی اساتذہ نے خوشی کا اظہار کرتے ہوئے وزیرِ تعلیم پنجاب رانا سکندر حیات خان کا شکریہ ادا کیا اور کہا کہ ان کی ذاتی دلچسپی اور اساتذہ دوست پالیسیوں کے باعث برسوں سے رکا ہوا ترقیوں کا عمل شفاف انداز میں مکمل ہوا۔

تقریب کے اختتام پر خوشی کے اظہار کے طور پر کیک بھی کاٹا گیا اور اس یادگار موقع کو اساتذہ نے اپنے لیے ایک تاریخی دن قرار دیا

قصور
ڈی آئی جی ٹریفک پنجاب وقاص نذیر صاحب کی ہدایات کی روشنی میں ٹریفک پولیس قصور کی ایم ایس DHQ اور اسٹاف کے ساتھ مشترکہ ٹریفک آگاہی واک کا اہتمام کیا گیا
ڈی پی او قصور آفتاب احمد پھلروان کی ہدایات پر ڈسٹرکٹ ٹریفک آفیسر قصور طاہر سندھو نے انچارج ایجوکیشن اور ٹریفک و میڈیکل اسٹاف کے ساتھ اسٹیل باغ چوک میں ٹریفک آگاہی واک کا اہتمام کیا جس میں ٹریفک و میڈیکل اسٹاف سمیت سماجی شخصیات اور شہریوں کی بڑی تعداد اور رکشہ ڈرائیوروں نے شرکت کی واک کا مقصد شہریوں کو لین لائن ڈسپلن سمیت ہیلمٹ اور روڈ سیفٹی اور سیٹ بیلٹ کی پابندی اور رانگ وے کی سخت ممانعت پر بریفنگ دی گئی ٹریفک پولیس قصور نے شہریوں سے التماس ہے ٹریفک قوانین کی پاسداری کریں لین لائن ڈسپلن کا خاص خیال رکھتے ہوئے محفوظ سفر کریں

قصور
تیز آندھی سے متعدد فیڈرز ٹرپ، بجلی کی فراہمی تاحال متاثر

تفصیلات کے مطابق قصور میں گزشتہ شام آنے والی شدید آندھی کے باعث بجلی کا نظام بری طرح متاثر ہو گیا جس کے نتیجے میں متعدد فیڈرز ٹرپ کر گئے اور شہر کے مختلف علاقوں میں بجلی کی فراہمی معطل ہو گئی

تیز ہواؤں کے باعث بجلی کی ترسیلی لائنوں اور سسٹم کو نقصان پہنچا، جس سے اچانک کئی فیڈرز بند ہو گئے
بجلی کی بندش کے باعث شہریوں کو شدید مشکلات کا سامنا کرنا پڑ رہا ہے جبکہ گرمی کے باعث صورتحال مذید سنگین ہو گئی ہے

متاثرہ علاقوں کے مکینوں نے شکایت کی ہے کہ کئی گھنٹے گزرنے کے باوجود بجلی بحال نہیں ہو سکی جس سے معمولات زندگی بری طرح متاثر ہو رہے ہیں

قصور
ضلع بھر میں پولیس کا کریک ڈاؤن، خطرناک اشتہاری، چور گینگ اور جعلی اہلکار سمیت متعدد ملزمان گرفتار
قصورضلع بھر میں جرائم پیشہ عناصر کے خلاف جاری کریک ڈاؤن کے دوران پولیس نے مختلف کارروائیوں میں خطرناک مجرم اشتہاری، نقب زن چور گینگ اور جعلی پولیس اہلکار سمیت متعدد ملزمان کو گرفتار کر لیا، جبکہ لاکھوں روپے مالیت کا مال مسروقہ اور اسلحہ بھی برآمد کر لیا گیا۔
ڈسٹرکٹ پولیس آفیسر آفتاب احمد پھلروان کی ہدایت پر تھانہ راجہ جنگ پولیس نے کارروائی کرتے ہوئے ڈکیتی کے سنگین مقدمات میں مطلوب اے کیٹگری کے مجرم اشتہاری قاسم سمیت 08 ملزمان کو گرفتار کر لیا۔ پولیس کے مطابق ایک بی کیٹگری کا اشتہاری بھی پکڑا گیا، جبکہ ملزم صدام کو ناجائز اسلحہ سمیت حراست میں لے کر مقدمہ درج کر لیا گیا۔ مزید برآں اشتہاری کو فرار کروانے میں مدد دینے والے ملزم وقار اور ریکارڈ یافتہ عادی مجرم ساجد کو بھی گرفتار کیا گیا۔
دوسری جانب تھانہ الہ آباد پولیس نے ایس ایچ او محمد ارشاد کی سربراہی میں کارروائی کرتے ہوئے نقب زن چور گینگ کے سرغنہ امین عرف امینی سمیت 05 ارکان کو گرفتار کیا، جبکہ مجموعی طور پر 08 ملزمان کو حراست میں لیا گیا۔ پولیس کے مطابق ملزمان الہ آباد اور گردونواح میں گھروں میں نقب لگا کر چوری کی وارداتیں کرتے تھے۔ ملزمان کے قبضے سے تقریباً 45 لاکھ روپے مالیت کا مال مسروقہ برآمد کیا گیا، جس میں 09 تولہ طلائی زیورات، 03 لاکھ 85 ہزار روپے نقدی، ایل سی ڈی اور ایک اے سی شامل ہیں۔ اس کے علاوہ دوران ناکہ بندی ملزم عارف کے قبضے سے دو پسٹل بھی برآمد کر کے مقدمہ درج کیا گیا، جبکہ رابری کے مقدمات میں مطلوب دو اے کیٹگری اشتہاریوں کو بھی گرفتار کر لیا گیا۔
ادھر تھانہ سٹی چونیاں پولیس نے ایک اہم کارروائی کے دوران جعلی پولیس اہلکار کو گرفتار کر لیا۔ پولیس کے مطابق ملزم آصف، جو کینیڈا کالونی چونیاں کا رہائشی ہے، پولیس یونیفارم پہن کر خود کو اہلکار ظاہر کرتا اور سادہ لوح شہریوں کو دھمکا کر رقم بٹورتا تھا۔ ملزم کے قبضے سے لاہور پولیس کا جعلی کارڈ بھی برآمد ہوا جس پر 668/HC درج تھا۔ پولیس نے ملزم کے خلاف مقدمہ درج کر کے اسے حوالات میں بند کر دیا۔
ڈی پی او آفتاب احمد پھلروان کا کہنا ہے کہ ضلع بھر میں جرائم پیشہ عناصر کے خلاف بلا امتیاز کارروائیاں جاری رہیں گی اور شہریوں کے جان و مال کے تحفظ کو ہر صورت یقینی بنایا جائے گا