Tag: baaghi

قصور میں محکمہ سوشل سکیورٹی کی مبینہ کرپشن اور بے ضابطگیوں پر سوالات، سرکاری خزانے کو کروڑوں روپے ماہانہ نقصان پہنچنے کا انکشاف
ضلع قصور میں پنجاب ایمپلائز سوشل سکیورٹی ادارے کے بعض افسران اور اہلکاروں کی مبینہ کرپشن، بے ضابطگیوں اور اختیارات کے ناجائز استعمال کے حوالے سے سنگین سوالات اٹھنے لگے ہیں۔ ذرائع کے مطابق محکمہ سوشل سکیورٹی میں مبینہ طور پر بڑے صنعتی یونٹس، فیکٹریوں اور کاروباری اداروں کے مالکان سے ملی بھگت کے ذریعے ورکرز کی اصل تعداد کو کم ظاہر کیا جا رہا ہے جس کے نتیجے میں سرکاری خزانے کو ماہانہ کروڑوں روپے کا نقصان پہنچنے کا خدشہ پیدا ہو گیا ہے۔
اطلاعات کے مطابق قانون کے تحت رجسٹرڈ ہونے والے متعدد صنعتی اداروں میں سینکڑوں ورکرز کام کر رہے ہیں لیکن ریکارڈ میں ان کی تعداد کم درج کی جاتی ہے۔ مبینہ طور پر اس عمل کے ذریعے فیکٹری مالکان کو سوشل سکیورٹی کنٹریبیوشن کی مد میں مالی فائدہ پہنچایا جاتا ہے جبکہ بعض متعلقہ اہلکار اپنی جیبیں بھرنے میں مصروف ہیں۔ ذرائع کا دعویٰ ہے کہ اگر تمام یونٹس کا غیر جانبدارانہ آڈٹ اور فزیکل انسپیکشن کروائی جائے تو بڑے پیمانے پر بے ضابطگیاں سامنے آسکتی ہیں۔
شہری، مزدور تنظیمیں اور سماجی حلقے اس صورتحال پر شدید تشویش کا اظہار کرتے ہوئے کہتے ہیں کہ سوشل سکیورٹی فنڈ دراصل مزدوروں کی فلاح و بہبود، علاج معالجہ، مالی معاونت اور دیگر سہولیات کے لیے مختص ہے، لیکن اگر کنٹریبیوشن کی وصولی میں ہی مبینہ خردبرد اور بے قاعدگیاں ہوں تو محنت کش طبقہ اپنے بنیادی حقوق سے محروم ہو جاتا ہے۔
متاثرہ حلقوں کا کہنا ہے کہ ورکرز کی اصل تعداد چھپانے کے باعث نہ صرف ادارے کی آمدن متاثر ہو رہی ہے بلکہ ہزاروں مزدور سوشل سکیورٹی کی رجسٹریشن، علاج معالجہ اور دیگر سرکاری سہولیات سے بھی محروم رہ جاتے ہیں۔ انہوں نے الزام عائد کیا کہ بعض عناصر کی مبینہ ملی بھگت کے باعث قانون کی کھلی خلاف ورزی جاری ہے جس کی فوری تحقیقات ناگزیر ہیں۔
شہریوں اور مزدور نمائندوں نے وزیراعلیٰ پنجاب مریم نواز شریف، سیکرٹری لیبر پنجاب اور کمشنر پنجاب ایمپلائز سوشل سکیورٹی سے مطالبہ کیا ہے کہ قصور میں محکمہ سوشل سکیورٹی کے معاملات کا اعلیٰ سطحی اور شفاف انکوائری کے ذریعے جائزہ لیا جائے، تمام رجسٹرڈ صنعتی یونٹس کا خصوصی آڈٹ کروایا جائے اور اگر کسی افسر یا اہلکار کے خلاف بے ضابطگی یا کرپشن ثابت ہو تو اس کے خلاف سخت قانونی کارروائی عمل میں لائی جائے۔
عوامی حلقوں کا کہنا ہے کہ مزدوروں کے حقوق اور سرکاری خزانے کے تحفظ کے لیے ضروری ہے کہ اس معاملے کی غیر جانبدارانہ تحقیقات کر کے حقائق عوام کے سامنے لائے جائیں تاکہ ذمہ دار عناصر کا احتساب ممکن ہو سکے اور سوشل سکیورٹی نظام پر عوام کا اعتماد بحال ہو

قصور
شدید گرمی اور لوڈ شیڈنگ نے قصور کے دیہی علاقوں میں عوام کی زندگی اجیرن بنا دی

قصور میں شدید گرمی کی حالیہ لہر اور طویل دورانیے کی غیر اعلانیہ لوڈ شیڈنگ نے ضلع قصور کے بیشتر علاقوں، خصوصاً دیہی علاقوں کے مکینوں کی زندگی کو شدید مشکلات سے دوچار کر دیا ہے۔ شہریوں کا کہنا ہے کہ درجہ حرارت میں مسلسل اضافے کے باوجود کئی کئی گھنٹے بجلی کی بندش معمول بن چکی ہے، جس کے باعث گھروں، کاروبار اور زرعی سرگرمیوں پر منفی اثرات مرتب ہو رہے ہیں۔

متاثرہ علاقوں کے رہائشیوں کے مطابق بجلی کی غیر اعلانیہ بندش کے باعث پنکھے اور ٹیوب ویل بند رہنے سے نہ صرف پینے کے پانی کی فراہمی متاثر ہو رہی ہے بلکہ بچوں، بزرگوں اور مریضوں کو شدید پریشانی کا سامنا بھی کرنا پڑ رہا ہے۔ دیہی علاقوں میں رات کے اوقات میں بھی بجلی کی طویل بندش سے شہریوں کی نیندیں حرام ہو گئی ہیں۔

مقامی افراد کا کہنا ہے کہ شدید حبس اور گرمی میں بار بار بجلی کی بندش ناقابل برداشت ہو چکی ہے جبکہ کاروباری سرگرمیاں بھی متاثر ہو رہی ہیں۔ کسانوں نے شکایت کی ہے کہ بجلی نہ ہونے کے باعث زرعی ٹیوب ویل اور دیگر آلات کی بندش سے فصلوں کو پانی کی فراہمی میں مشکلات پیش آ رہی ہیں۔

شہریوں نے متعلقہ حکام اور بجلی تقسیم کار کمپنی سے مطالبہ کیا ہے کہ غیر اعلانیہ لوڈ شیڈنگ کا فوری نوٹس لیا جائے اور شدید گرمی کے پیش نظر بجلی کی فراہمی کو یقینی بنایا جائے تاکہ عوام کو مذید مشکلات سے بچایا جا سکے

قصور
خطرناک ڈکیت گینگ گرفتار، موٹر سائیکلیں، نقدی اور اسلحہ برآمد

ڈی پی او قصور آفتاب احمد پھلروان اور ڈی ایس پی سرکل چونیاں کی خصوصی ہدایات پر تھانہ چونیاں کے ایس ایچ او افتخار جوئیہ اور ان کی ٹیم نے کامیاب کارروائی کرتے ہوئے خطرناک ڈکیت مدثر عرف مدثری اور اس کے گینگ کو گرفتار کر لیا

پولیس کے مطابق ملزم سے دورانِ تفتیش دو موٹر سائیکلیں، ہزاروں روپے نقدی اور ایک پسٹل برآمد کر لیا گیا ہے
ابتدائی تحقیقات میں ملزم کے مختلف وارداتوں میں ملوث ہونے کے شواہد بھی سامنے آئے ہیں

پولیس حکام کا کہنا ہے کہ گرفتار ملزم سے مذید تفتیش جاری ہے جبکہ اس کے دیگر ساتھیوں اور ممکنہ سہولت کاروں کے بارے میں بھی معلومات حاصل کی جا رہی ہیں
مذید انکشافات کی توقع ہے

ڈی پی او قصور نے کامیاب کارروائی پر تھانہ چونیاں پولیس ٹیم کی کارکردگی کو سراہتے ہوئے جرائم پیشہ عناصر کے خلاف کارروائیاں مذید تیز کرنے کی ہدایت کی ہے

قصور
شہر و گردونواح میں میں ایل پی جی گیس کی قیمت میں بڑا اضافہ، دکاندار سرکاری نرخ نظر انداز کرنے لگے

تفصیلات کے مطابق قصور و گردونواح میں مہنگائی کے ستائے شہریوں پر ایک اور بوجھ ڈال دیا گیا
ضلع بھر میں ایل پی جی گیس کی قیمتوں میں من مانا اضافہ کر دیا گیا ہے جبکہ متعدد دکاندار گیس 500 روپے فی کلو تک فروخت کر رہے ہیں جس پر شہریوں نے شدید تشویش کا اظہار کیا ہے

دوسری جانب آئل اینڈ گیس ریگولیٹری اتھارٹی (اوگرا) کے جون 2026 کے نوٹیفکیشن کے مطابق ایل پی جی کی سرکاری قیمت 308.76 روپے فی کلوگرام مقرر کی گئی ہے جبکہ گھریلو 11.8 کلوگرام سلنڈر کی قیمت 3643.40 روپے بنتی ہے

شہریوں کا کہنا ہے کہ سرکاری نرخ اور مارکیٹ قیمت میں تقریباً 190 روپے فی کلو کا فرق ناقابل برداشت ہے جبکہ انتظامیہ کی عدم توجہی کے باعث دکاندار کھلے عام منافع خوری کر رہے ہیں

عوامی حلقوں نے ڈپٹی کمشنر قصور اور متعلقہ اداروں سے مطالبہ کیا ہے کہ ایل پی جی کی سرکاری قیمتوں پر عملدرآمد یقینی بنایا جائے اور زائد نرخ وصول کرنے والوں کے خلاف فوری کارروائی کی جائے تاکہ پہلے سے مہنگائی کی چکی میں پسنے والے عوام کو مزید ریلیف مل سکے

قصور
لاپتہ ہونے والی تین سالہ بچی کھیتوں سے بحفاظت مل گئی

قصور کے تھانہ صدر قصور کے علاقے موضع کیسر گڑھ میں لاپتہ ہونے والی تین سالہ بچی فاطمہ کو پولیس نے تین گھنٹوں کی مسلسل تلاش کے بعد بحفاظت ڈھونڈ لیا

پولیس کے مطابق کوٹ حلیم خان کے رہائشی رفاقت کی بیٹی فاطمہ اپنے ننھیال آئی ہوئی تھی جہاں کھیلتے ہوئے اچانک لاپتہ ہوگئی
اطلاع ملتے ہی ڈی پی او قصور آفتاب احمد پھلروان کی ہدایت پر ایس ایچ او صدر ذوالفقار بھٹی پولیس ٹیم کے ہمراہ موقع پر پہنچ گئے اور بچی کی تلاش شروع کر دی

پولیس نے گھر گھر تلاشی، زیر تعمیر عمارتوں کی چیکنگ، مساجد میں اعلانات، فصلوں میں سرچ آپریشن اور سوشل میڈیا پر بچی کی تصویر شیئر کرنے سمیت تمام ممکنہ اقدامات کیے۔ بعد ازاں ایس ایچ او ذوالفقار بھٹی نے پیشہ وارانہ مہارت کا مظاہرہ کرتے ہوئے کھیتوں میں دوبارہ سرچ کی تو بچی وہاں سوئی ہوئی حالت میں مل گئی۔

بچی کے بحفاظت ملنے پر اہل خانہ نے پولیس کا شکریہ ادا کیا اور دعا دی۔ ڈی پی او قصور آفتاب احمد پھلروان نے ایس ایچ او ذوالفقار بھٹی اور ان کی ٹیم کی کارکردگی کو سراہتے ہوئے شاباش دی

پولیس نے والدین کو ہدایت کی ہے کہ کھیل کود کے دوران اپنے بچوں پر خصوصی نظر رکھیں اور انہیں اکیلا نہ چھوڑیں

قصور میں پنجاب ایمپلائز سوشل سیکیورٹی ادارے کی انتظامی بحران کی صورتحال، مستقل ڈائریکٹر کی تعیناتی نہ ہونے سے معاملات متاثر
ضلع قصور میں گزشتہ سات ماہ سے ڈائریکٹر پنجاب ایمپلائز سوشل سیکیورٹی ادارے کی مستقل تعیناتی نہ ہونے کے باعث انتظامی امور شدید متاثر ہونے کی اطلاعات سامنے آئی ہیں
ذرائع کے مطابق اہم آسامی پر مستقل افسر کی عدم تعیناتی کے باعث سیاسی اثر و رسوخ کے ذریعے اسٹنٹ ڈائریکٹر کو بیک وقت ڈپٹی ڈائریکٹر اور ڈائریکٹر کا اضافی چارج دیا گیا ہے، جس کے باعث ادارے کی مجموعی کارکردگی پر منفی اثرات مرتب ہو رہے ہیں۔
ذرائع کا کہنا ہے کہ مستقل سربراہ کی عدم موجودگی کے باعث پالیسی فیصلوں، فیلڈ آپریشنز اور انتظامی منظوریوں میں تاخیر معمول بن چکی ہے، جس سے نہ صرف ادارہ جاتی کارکردگی متاثر ہوئی ہے بلکہ ملازمین اور متعلقہ سٹیک ہولڈرز کو بھی شدید مشکلات کا سامنا ہے۔
مقامی حلقوں کے مطابق ایک ہی افسر کو متعدد اہم ذمہ داریاں سونپنے سے انتظامی توازن بگڑ گیا ہے اور فائل ورک سمیت اہم امور تعطل کا شکار ہیں۔ اس صورتحال کو بعض حلقے ادارے کی “زبو حالی” کی بڑی وجہ قرار دے رہے ہیں۔
شہری و سماجی حلقوں نے صورتحال پر شدید تشویش کا اظہار کرتے ہوئے وزیراعلیٰ پنجاب مریم نواز شریف سے فوری نوٹس لینے، اعلیٰ سطحی انکوائری کروانے اور ذمہ داران کا احتساب یقینی بنانے کا مطالبہ کیا ہے۔ شہریوں کا کہنا ہے کہ اس مسلسل غفلت اور انتظامی خلا کے باعث ادارے کی ساکھ متاثر ہو رہی ہے۔
شہریوں نے مزید کہا کہ اگر بروقت اصلاحی اقدامات نہ کیے گئے تو صورتحال مزید بگڑ سکتی ہے، لہٰذا فوری طور پر مستقل ڈائریکٹر کی تعیناتی عمل میں لائی جائے تاکہ ادارے کی کارکردگی بہتر ہو سکے اور عوامی و ملازمتی مسائل کا ازالہ ممکن ہو۔
دوسری جانب سرکاری سطح پر تاحال اس صورتحال پر کوئی باضابطہ موقف سامنے نہیں آیا، تاہم توقع ظاہر کی جا رہی ہے کہ اعلیٰ حکام جلد اس معاملے کا نوٹس لیں گے