Tag: now

پاکستان کیلیے موجود خطرات ہمارے لیئے بھی خطرہ ہیں. امريکی محکمہ خارجہ

جو پاکستان کےلیے موجود خطرات ہیں وہ ہمارے ليے بھی خطرہ ہیں. امريکی محکمہ خارجہ

ترجمان امريکی محکمہ خارجہ نيڈپرائس کا کہنا ہے کہ پاکستان امريکا کا قابل قدرشراکت دار ہے۔ جمہوری اور خوشحال پاکستان ہمارے مفادات کیلئے اہم ہے۔ نیوزبریفنگ کے دوران ترجمان امريکی محکمہ خارجہ نیڈ پرائس کا کہنا تھا کہ پاکستان کےلیے موجود خطرات ہمارے ليے بھی خطرہ ہیں۔

نیڈ پرائس نے عمران خان کے الزامات سے متعلق تبصرے سے گریز کیا کہا الزامات ميں کوئی حقيقت نہيں تھی۔ پروپيگنڈا اورغلط معلومات کو دوطرفہ تعلقات ميں حائل نہيں ہونےديں گے۔ پاکستان ميں کسی سياسی رہنما يا سياسی جماعت کو کسی پرفوقيت نہيں ديتے۔ خیال رہے کہ اس سے قبل امریکا نے سابق وزیراعظم عمران خان کے الزامات کو مسترد کرتے ہوئے کہا تھا کہ پہلے بھی کہہ چکے کہ ان کے الزامات میں کوئی صداقت نہیں۔
مزید یہ بھی پڑھیں
اگرعوام کو پی ایس ایل کا ترانہ اچھا نہیں لگا تو بھائی حاضر ہے:علی ظفر
ڈی آئی خان:کوئٹہ سے پشاور جانے والی مسافر بس کو حادثہ۔،2 خواتین جاں بحق،25 افراد زخمی
یاد رہے کہ امريکی محکمہ خارجہ نے اس سے قبل کہا تھا کہ پاکستان امريکا کا اسٹریٹجک پارٹنر ہے پاکستان اور چين کے قريبی تعلقات سے امريکا کو کوئی پريشانی نہيں۔ترجمان اسٹيٹ ڈپارٹمنٹ نيڈ پرائس کا کہنا ہے کہ پاکستان امريکا کا اسٹریٹجک پارٹنر ہے دوطرفہ تعلقات بہت اہم ہيں اور واشنگٹن انتظاميہ پاک امريکا تعلقات کو اہميت ديتی ہے۔

انہوں نے کہا تھا کہ کسی ملک کيلئے يہ ضروری نہيں کہ وہ امريکا يا چين ميں سے کسی ايک کا انتخاب کرے۔اسٹيٹ ڈپارٹمنٹ کی جانب سے يہ وضاحت اُس وقت سامنے آئی جب پريس بريفنگ کے دوران ترجمان نيڈ پرائس سے سوال ہوا کہ کيا پاکستان کی جانب سے چين کيساتھ ملکر کام کرنے کی وجہ يہ ہے کہ اسلام آباد سمجھتا ہے امريکا نے اُسے تنہا چھوڑ ديا ہے۔

فروری 16, 2023
عمران خان کو گرفتاری سے بچانے کیلئے کارکنان کو ہائی الرٹ کردیا گیا

لاہور:عمران خان کو گرفتاری سے بچانے کیلئے کارکنان کو ہائی الرٹ کردیا گیا پاکستان تحریک انصاف (پی ٹی آئی) کے چئیرمین عمران خان کی ایک حفاظتی ضمانت کی درخواست مسترد ہونے کے بعد ان کی ممکنہ گرفتاری کے خدشے کے پیش نظر قیادت نے تین راتوں کے لیے تمام پارٹی کارکنان کو ہائی الرٹ کر دیا۔ قریبی اضلاع اور لاہور کے ٹاؤنز سے تمام کارکنان کی ڈیوٹیز لگا دی گئی ہیںپی ٹی آئی قیادت نے ہدایت کی ہے کہ کارکنان تین راتوں کیلئے ہائی الرٹ پر رہیں۔ ورکرز مختلف شفٹوں میں زمان پارک کی حفاظت کریں گے۔

یاد رہے کہ دوسری طرف ہائی کورٹ نے حفاظتی ضمانت کی دوسری درخواست پر پاکستان تحریک انصاف کے چیئرمین عمران خان کو پیر کے روز طلب کرلیا اور آئی جی پنجاب کو سیکیورٹی معاملات فائنل کرنے کی ہدایت کردی۔عمران خان کی حفاظتی ضمانت پر جسٹس طارق سلیم شیخ کی عدالت میں دوبارہ سماعت ہوئی، عمران خان مقررہ وقت تک کمرہ عدالت میں پیش نہ ہوسکے جبکہ درخواست گزار کی جانب سے خواجہ طارق رحیم بطور وکیل عدالت میں پیش ہوئے۔

خواجہ طارق رحیم نے کہا کہ عمران خان عدالتوں کی عزت کرتے ہیں، عدالت عمران خان کی سیکیورٹی کا بندوبست کرے تو وہ کل پیش ہو جائیں گے، عمران خان کے دستخط کے معاملے پر جو قصوروار ہو عدالت اس وکیل کو سزا دے سکتی ہے۔خواجہ طارق رحیم نے کہا کہ سیکیورٹی اور حالات دیکھ کے عمران خان کی پیشی کا فیصلہ کرنا ہے ہم ہائیکورٹ کی سیکیورٹی کے ساتھ بیٹھ کے فائنل کر لیتے ہیں۔

جسٹس طارق سلیم شیخ نے عمران خان کے وکیل سے استفسار کیا کہ ’آپ کب عمران خان کو پیش کر کر سکتے ہیں، ہم آپ کی آئی جی سے ملاقات کرا دیتے ہیں اور کیس کو پیر کے لیے رکھ لیتے ہیں۔ لاہور ہائیکورٹ نے آئی جی پنجاب کو عمران خان کی لیگل ٹیم کے ساتھ بیٹھ کر سیکیورٹی معاملات فائنل کرنے کی ہدایت کر دی۔لاہور ہائیکورٹ نے پیر کے روز دوپہر دو بجے عمران خان کو پیش کرنے کا حکم دے دیا۔

فروری 16, 2023
حکومت مخالفین کوجیلوں میں ڈالناچاہتی ہے:چوہدری پرویز الٰہی کا مبینہ آڈیو لیک پرردعمل

لاہور:سابق وزیراعلیٰ پنجاب چوہدری پرویز الٰہی نے وکیل کے ساتھ گفتگو کی مبینہ آڈیو لیک پر اپنا ردعمل دیدیا۔ کہتے ہیں کہ محمد خان بھٹی کے کیس کیلئے ایک وکیل کے ساتھ گفتگو کو ٹیپ کرکے غلط رنگ دیا گیا، حکومت انتقام میں اندھی ہوچکی، مخالفین کو جیلوں میں ڈالنا چاہتی ہیں۔

چوہدری پرویز الٰہی کی اپنے وکیل سے گفتگو کی ایک مبینہ آڈیو ٹیپ منظر عام پر آئی ہے جس میں وہ کسی کیس سے متعلق گفتگو کررہے ہیں۔

وزیر داخلہ رانا ثناء اللہ کا کہنا ہے کہ سابق وزیراعلیٰ دیدہ دلیری سے کیسز مینج کررہے ہیں، ایف آئی اے مقدمہ درج کرکے انہیں گرفتار کرے۔

سابق وزیراعلیٰ چوہدری پرویز الٰہی نے مبینہ آڈیو پر تبصرہ کرتے ہوئے کہا ہے کہ آڈیو میں کوئی غلط بات نہیں کی گئی، محمد خان بھٹی کے کیس کیلئے ایک وکیل کے ساتھ گفتگو کو ٹیپ کرکے غلط رنگ دیا گیا، محمد خان بھٹی 10 دن سے لاپتہ ہے، ان کی اہلیہ نے سپریم کورٹ میں اپیل کی ہے آخر وہ کیس بھی سامنے آنا ہے۔

ان کا کہنا ہے کہ اگر کوئی بندہ انصاف کیلئے اپنے وکلاء کے ذریعے عدالتوں سے رجوع کرتا ہے تو اسے یہ گناہ بنانا چاہ رہے ہیں، ن لیگ کی قیادت عدلیہ کے ادارے کے خلاف منظم مہم چلا رہی ہے، ہم نے ہمیشہ عدلیہ کا احترام کیا، عدلیہ اس وقت عوام کی امیدوں کا مرکز ہے۔

چوہدری پرویز الٰہی نے کہا کہ حکومت انتقام میں اندھی ہوچکی ہے، تمام مخالفین کو جھوٹے کیسز میں جیلوں میں بند کرنا چاہتی ہے، ماڈل ٹاؤن سانحہ کے سرغنہ رانا ثناء اللہ بوکھلائے ہوئے ہیں اور بولنا شروع کر دیا، یہ انشاء اللہ سانحہ ماڈل ٹاؤن کے کیس میں ہی کیفر کردار تک پہنچیں گے۔

سابق وزیراعلیٰ پنجاب کا کہنا ہے کہ اس نااہل حکومت کی تمام غلط کاریوں کی چیزیں انشاء اللہ سامنے آکر رہیں گی، اللہ کی مدد سے رانا ثناء اللہ کے سارے کرتوت باری باری سامنے آرہے ہیں۔

فروری 16, 2023
بحالی اور تعمیر نو کے مراحل میں ترکیہ، شام کے ساتھ کام ہیں. ترجمان دفتر خارجہ

اکستان شدید زلزلہ کے بعد بحالی اور تعمیر نو کے مراحل میں ترکیہ اور شام کے ساتھ کام جاری رکھے گا ، ترجمان دفتر خارجہ ممتاز زہرا بلوچ

پاکستان نے کہا ہے کہ وہ شدید زلزلہ کے بعد بحالی اور تعمیر نو کے مراحل میں ترکیہ اور شام کے ساتھ کام جاری رکھے گا، وزیر اعظم محمد شہباز شریف 6 فروری کے شدید زلزلے کے تناظر میں ترک عوام کے ساتھ یکجہتی اور حمایت کے اظہار کے لئے ترکیہ کا 2 روزہ دورہ کررہے ہیں، وزیر اعظم ترکیہ کے دورہ کے دوران انقرہ میں ترک صدر رجب طیب اردوان سے ملاقات کریں گے اور زلزلے سے قیمتی جانوں کے ضیاع اور بڑے پیمانے پر ہونے والے نقصان پر پوری پاکستانی قوم کی جانب سے ذاتی طور پر دلی تعزیت کا اظہار کریں گے۔

دفتر خارجہ کی ترجمان ممتاز زہرا بلوچ نے جمعرات کو یہاں دفتر خارجہ میں پریس بریفنگ میں کہا کہ وزیر اعظم ترکیہ کے دورہ کے دوران اس مشکل وقت میں اپنے ترک بھائیوں اور بہنوں کے ساتھ پاکستان کے تعاون اور جاری امدادی سرگرمیوں میں ہر ممکن تعاون جاری رکھنے کا بھی اعادہ کریں گے۔ ترجمان نے کہا کہ وزیراعظم جنوبی ترکیہ میں زلزلہ سے متاثرہ علاقوں کا دورہ بھی کریں گے اور علاقے میں تعینات پاکستانی سرچ اینڈ ریسکیو ٹیموں کے ساتھ ساتھ زلزلے میں بچ جانے والوں سے بھی بات چیت کریں گے۔ انہوں نے کہا کہ پاکستان نے مہلک زلزلے کے بعد ترکیہ اور شام کے لیے امداد کی فراہمی کے کام کو متحرک کیا ہے، 15 فروری تک ترکیہ کے لیے پاکستان کی جانب سے انسانی ہمدردی کے تحت 12 پروازیں بھیجی جاچکی ہیں جبکہ این ایل سی کے 21 ٹرک سڑک کے ذریعے امدادی سامان لیکر ترکیہ کے لیے روانہ کئے گئے ہیں۔

ترجمان نے کہا کہ شام کے لیے امدادی سامان لیکر 2 پروازیں اور 12 ٹرکوں پر مشتمل امدادی سامان بذریعہ سڑک روانہ کیا گیا ہے، 85 رکنی اربن سرچ اینڈ ریسکیو ٹیم اس وقت ترکیہ میں کام کر رہی ہے جبکہ 10 رکنی سرچ اینڈ ریسکیو ٹیم اور 10 رکنی میڈیکل ٹیم شام میں امدادی سرگرمیوں میں مدد کے لیے کام کر رہی ہے۔ انہوں نے کہا کہ ٹرین اور سمندر کے ذریعے اضافی امداد بھیجی جارہی ہے۔ دفتر خارجہ کی ترجمان نے کہا کہ پاکستان کی کئی نجی اور خیراتی تنظیموں اور افراد ترکیہ اور شام کے برادر لوگوں کے لیے امدادی سرگرمیوں میں حصہ ڈال رہے ہیں۔ ترجمان نے کہا کہ ہم خاص طور پر اس گمنام پاکستانی کے مشکور ہیں جس نے ترکیہ میں متاثرین کی امداد کے لیے 30 ملین امریکی ڈالر کا تعاون کیا۔ انہوں نے کہا کہ پاکستان آفات کے بعد کی بحالی اور تعمیر نو کے مراحل میں ترکیہ اور شام کے ساتھ کام جاری رکھے گا۔

ترجمان نے کہا کہ وزیر خارجہ بلاول بھٹو زرداری 16 سے 20 فروری تک میونخ سکیورٹی کانفرنس میں شرکت کے لیے جرمنی کے دورے پر ہیں، وزیر خارجہ سکیورٹی کانفرنس میں گول میز مباحثوں سمیت متعدد پروگراموں میں شرکت کریں گے۔ انہوں نے کہا کہ بلاول بھٹو زرداری اپنے ہم منصبوں اور کانفرنس میں شریک رہنمائوں سے دو طرفہ ملاقاتیں کریں گے، وزیر خارجہ جرمنی کے دورہ کے بعد لتھوانیا کے وزیر خارجہ کی دعوت پر سرکاری دورے پر لتھوانیا جائیں گے۔
مزید یہ بھی پڑھیں
اگرعوام کو پی ایس ایل کا ترانہ اچھا نہیں لگا تو بھائی حاضر ہے:علی ظفر
ڈی آئی خان:کوئٹہ سے پشاور جانے والی مسافر بس کو حادثہ۔،2 خواتین جاں بحق،25 افراد زخمی
وزیر خارجہ بلاول بھٹو زرداری 20 سے 21 فروری تک ولنیئس میں وزیر خارجہ گیبریلیس لینڈسبرگس کے ساتھ وسیع امور پر بات چیت کریں گے اور لتھوانیا کی پارلیمنٹ کے اسپیکر سے ملاقات کریں گے، فریقین دوطرفہ سیاسی مشاورت کے قیام سے متعلق مفاہمتی یادداشت پر بھی دستخط کریں گے، دورے کے آخری مرحلے میں وزیر خارجہ بلاول بھٹو زرداری 21 سے 22 فروری تک ہنگری کا دورہ کریں گے اور ہنگری کے ہم منصب پیٹر سیجارٹو سے بات چیت کریں گے، بات چیت میں فریقین دو طرفہ تعلقات کے تمام پہلوئوں پر غور و خوض کریں گے اور علاقائی اور بین الاقوامی امور پر تبادلہ خیال کریں گے۔ وزراء خارجہ دوطرفہ تعاون سے متعلق دو مفاہمتی یادداشتوں پر بھی دستخط کریں گے جن میں سے ایک سفارتی اکیڈمیوں کے درمیان تعاون اور دوسرا دونوں ممالک کے درمیان کھیل اور تعلیم سے متعلق ہوگا۔

ترجمان نے کہا کہ انٹرنیشنل اٹامک انرجی ایجنسی کے ڈائریکٹر جنرل رافیل ماریانو گروسی دو روزہ دورے پر پاکستان میں ہیں۔ انہوں نے وزیر اعظم اور وزیر خارجہ سے ملاقاتیں کی ہیں، ان ملاقاتوں کے دوران آئی اے ای اے اور پاکستان کے درمیان صحت، زراعت، صنعت، جوہری ادویات اور بجلی کی پیداوار کے شعبوں میں تعاون پر تبادلہ خیال کیا گیا۔ ترجمان نے کہا کہ پاکستان نے ایجنسی کے مختلف منصوبوں اور پروگراموں کے لیے مکمل حمایت کا اظہار کیا اور ایجنسی کے کام کے لیے تعاون اور تعاون کو بڑھانے کی ہماری خواہش کا اظہار کیا۔ انہوں نے کہا کہ ڈی جی آئی اے ای اے نے پاکستان نیوکلیئر میڈیسن آنکولوجی اینڈ ریڈیو تھراپی انسٹی ٹیوشن (نوری) اور چشمہ نیوکلیئر پاور پلانٹ کا دورہ کیا جہاں انہوں نے استعمال شدہ ایندھن کو محفوظ طریقے سے سنبھالنے کی اہمیت کو اجاگر کرتے ہوئے اس کے استعمال فیول ڈرائی سٹوریج کی سہولت کا افتتاح کیا۔

انہوں نے پاکستان سینٹر آف ایکسی لینس ان نیوکلیئر سکیورٹی کا بھی دورہ کیا۔ ترجمان نے کہا کہ پاکستان اور آئی اے ای اے فصلوں کی نئی زیادہ پیداوار اور خشک سالی کے خلاف مزاحمت کرنے والی اقسام پر تحقیق کے سلسلے میں تعاون میں اضافہ کریں گے۔ پاکستان آئی اے ای اے کے ”رے آف ہوپ“ پروگرام میں علاقائی مرکز کے طور پر پڑوسی ممالک کی مدد کرے گا۔ ترجمان نے کہا کہ پاکستان اور امریکہ کے درمیان دفاعی مذاکرات کا دوسرا دور اس وقت واشنگٹن ڈی سی میں جاری ہے، پاکستان کے وفد کی قیادت چیف آف جنرل سٹاف لیفٹیننٹ جنرل محمد سعید کر رہے ہیں جبکہ امریکی وفد کی قیادت امریکی قائم مقام اسسٹنٹ سیکرٹری برائے دفاع برائے انڈو پیسیفک سکیورٹی امور ڈاکٹر ایلی رتنیو کر رہے ہیں۔

مذاکرات کے ایجنڈے میں دفاعی اور سیکورٹی تعاون اور وسیع تر علاقائی اور عالمی مسائل پر بات چیت سمیت متعدد امور شامل ہیں۔ انہوں نے کہا کہ امریکی محکمہ خارجہ کے قونصلر ڈیرک چولیٹ 16 سے 18 فروری تک ایک انٹر ایجنسی وفد کے ساتھ پاکستان کا دورہ کر رہے ہیں، وہ اسلام آباد میں سیکرٹری خارجہ اور دیگر اعلیٰ حکام سے ملاقات کریں گے، بات چیت میں دو طرفہ روابط کے عمل پر توجہ مرکوز کی جائے گی جسے تجارت اور سرمایہ کاری، موسمیاتی تبدیلی، صاف توانائی، صحت، سلامتی، تعلیم اور دیگر مشترکہ ترجیحات میں ادارہ جاتی شکل دی گئی ہے۔ ترجمان دفتر خارجہ نے کہا کہ پاکستان میں سیلاب کے بعد بحالی پر امریکہ کے ساتھ طویل المدتی تعاون پر بھی تبادلہ خیال کیا جائے گا۔

فروری 16, 2023
کراچی کنگز کو ہوم گراؤنڈ پر مسلسل دوسری شکست، اسلام آباد 4 وکٹوں سے کامیاب

کراچی:کراچی: پاکستان سپر لیگ (پی ایس ایل) 8 میں ہوم گراؤنڈ پر کراچی کنگز کو مسلسل دوسری شکست کا مزہ چھکنا پڑا، اسلام آباد یونائیٹڈ نے میچ 4 وکٹوں سے جیت لیا۔

پی ایس ایل 8 کے چوتھے میچ میں کراچی کنگز نے اسلام آباد یونائیٹڈ کو جیت کیلئے 174 رنز کا ہدف دیا، اسلام آباد نے ہدف 6 وکٹوں کے نقصان پر حاصل کرلیا۔

اسلام آباد نے ٹاس جیت کر پہلے فیلڈنگ کا فیصلہ کیا، کراچی نے مقررہ 20 اوورز میں 7 وکٹوں کے نقصان پر 173 رنز بنائے۔

کراچی کی جانب سے حیدر علی 59 اور شرجیل خان 34 رنز بناکر نمایاں رہے۔ اسلام آباد کے رومان رئیس، محمد وسیم جونیئر اور ٹام کرن نے دو دو وکٹیں حاصل کی۔

ایچ بی ایل پی ایس ایل میں کراچی کنگز کا یہ دوسرا میچ ہے، پہلے میچ میں اسے پشاور زلمی سے شکست ہوئی تھی۔

کراچی کنگز کی جانب سے ٹیم میں چار تبدیلیاں کی گئیں ہیں۔ میر حمزہ، بین کٹنگ، عمران طاہر، اور قاسم. اکرم کی جگہ محمد موسیٰ، جیمز ونس، جیمز فلر، اور محمد عرفان خان کو شامل کیا گیا ہے۔

جیمز فلر، محمد عرفان خان، اور محمد موسیٰ نے کراچی کنگز کے لیے ڈیبیو کیا،ایمرجنگ کیٹیگری سے محمد عرفان خان کو ٹیم میں شامل کیا گیا۔

اسکواڈ:

کراچی کنگز: جیمز ونس، شرجیل خان، حیدر علی، شعیب ملک، میتھیو ویڈ(وکٹ کیپر)، عماد وسیم (کپتان)، عرفان نیازی، جیمز فلر، اینڈریو ٹائی، موسیٰ خان، محمد عامر

اسلام آباد یونائیٹڈ: حسن نواز، پال اسٹرلنگ، کولن منرو، ریسی وین ڈر ڈوسین، شاداب خان(کپتان)، اعظم خان(وکٹ کیپر)، عاصف علی، فہیم اشرف، ٹام کرن، محمد وسیم جونیئر، رمان رئیس

فروری 16, 2023
چیئرمین قومی احتساب بیورو آفتاب سلطان کا مستعفی ہونے پر غور

اسلام آباد:چیئرمین قومی احتساب بیورو (نیب) آفتاب سلطان نے مستعفی ہونے پر غور شروع کردیا۔ذرائع کے مطابق چیئرمین نیب بعض امور میں مداخلت سے خوش نہیں،آفتاب سلطان قانون کے مطابق انکوائریاں چلانا چاہتے ہیں۔ آفتاب سلطان وزیراعظم شہبازشریف کو جلد استعفی پیش کرسکتے ہیں۔

ذرائع کا کہنا ہے کہ چئیرمین نیب آفتاب سلطان کا کہنا ہے کہ اپنے کام میں مداخلت نہیں ہونے دوں گا، جب تک منصب پر ہوں اپنا کام بخوبی نبھاؤں گا۔

خیال رہے کہ جولائی 2022 کو وزیر اعظم شہباز شریف کی کابینہ نے انٹیلیجنس بیورو (آئی بی) کے سابق سربراہ اور ریٹائرڈ پولیس افسر آفتاب سلطان کو 3 سال کے لیے قومی احتساب بیورو (نیب) کا نیا چیئرمین مقرر کیا تھا۔

آفتاب سلطان کون ہیں؟

آفتاب سلطان سنہ 1954 میں پنجاب کے شہر فیصل آباد میں ایک سیاسی اور صنعتی گھرانے میں پیدا ہوئے۔ پنجاب یونیورسٹی سے قانون میں گریجوئیشن کے بعد آفتاب سلطان نے سنہ 1977 میں مقابلے کا امتحان پاس کیا اور پولیس سروس میں شمولیت اختیار کر لی۔

آفتاب سلطان اپنے کیریئر کے دوران مختلف تنازعات کا شکار بھی رہے۔ جب پرویز مشرف نے ملک میں مارشل لا نافذ کرنے کے بعد سنہ 2002 میں ریفرنڈم کرانے کا فیصلہ کیا گیا تو اس وقت آفتاب سلطان سرگودھا میں ڈی آئی جی کے عہدے پر تعینات تھے۔

صحافی اعزاز سید کے مطابق آفتاب سلطان کو ’اعلیٰ حکام‘ سے یہ پیغام موصول ہوا کہ زیادہ سے زیادہ لوگوں کو ریفرنڈم میں ووٹ کرنے کو کہیں مگر انھوں نے ان احکامات پر عمل کرنے سے صاف انکار کر دیا۔ اعزاز کے مطابق جب ریفرنڈم کا نتیجہ آیا تو سرگودھا ان چند شہروں میں سے ایک تھا جہاں ٹرن آؤٹ دیگر شہروں کے مقابلے میں انتہائی کم رہا۔ اس کے کچھ ہی عرصے بعدآفتاب سلطان کو معطل کر دیا گیا تھا۔

اعزاز کے مطابق پولیس میں آفتاب سلطان کو ایک ’نیک نام اور دیانتدار افسر‘ کے طور پر پہچانا جاتا ہے۔

جب عام انتخابات کے بعد سنہ 2008 میں پاکستان پیپلز پارٹی اقتدار میں آئی تو نئے وزیراعظم یوسف رضا گیلانی نے آفتاب سلطان کو ڈائریکٹر جنرل انٹیلیجنس بیورو (ڈی جی آئی بی) کے عہدے پر تعینات کیا۔ تاہم جب سپریم کورٹ نے یوسف رضا گیلانی کو آصف زرداری سے متعلق مقدمات میں سوئس حکام کو خط نہ لکھنے پر توہین عدالت کی پاداش میں نااہل قرار دیا تو ان کے بعد راجہ پرویز اشرف نے آفتاب سلطان کو ڈی جی آئی بی کے عہدے سے ہٹا دیا۔

فروری 16, 2023
لاہور قلندر کا ہاکی کے مستقبل کا بیڑہ اٹھانے کا اعلان

لاہور قلندر نے ہاکی کے مستقبل کا بیڑہ اٹھانے کا اعلان کردیا-

باغی ٹی وی: کراچی کے عبدالستار ہاکی اسٹیڈیم میں نیوز کانفرنس کے دوران لاہور قلندر نے ہاکی کی بحالی کا پلان پیش کردیا، پریس کانفرنس میں وزیراعلی سندھ کے معاون خصوصی برائے کھیل ارباب لطف، پاکستان ہاکی فیڈریشن کے سیکریٹری جنرل حیدر حسین، لاہور قلندر کے کپتان شاہین شاہ افریدی، ڈائریکٹر ہائی پرفارمنس سینٹر لاہور قلندر سابق ٹیسٹ کرکٹر عاقب جاوید، سیکریٹری اسپورٹس اینڈ یوتھ افیئرز حافظ عبدالہادی بلو، پی ایچ ایف کے چیئرمین سلیکشن کمیٹی اولمپیئن کلیم اللہ، ارکان سلیکشن کمیٹی اولمپیئن ناصر علی، اولمپیئن شکیل عباسی سمیت دیگر ارکان، اولمپیئن حنیف خان، پی ایچ ایف کے چیف کوآرڈینیٹر پاکستان ہاکی فیڈریشن کراچی کیمپ میجر ریٹائرڈ شاہنواز علی پنجاب ہاکی ایسوسی ایشن کے سیکریٹری رائے عثمان اکبر کھرل، سندھ ہاکی ایسوسی ایشن کے سیکریٹری اکبر قائم خانی، کراچی ہاکی ایسوسی ایشن کے چیئرمین گلفراز احمد خان سمیت دیگر عہدیداران بھی موجود تھے۔

عاطف رانا نے کہا کہ پہلے مرحلے میں پیلئر ڈویلپمنٹ پروگرام کے تحت کراچی لاہور سیریز سے قبل کراچی کی ٹیم کے لئے 17 فروری کو اوپن ٹرائلز کا انعقاد کے ایچ اے اسپورٹس کمپلیکس میں کیا جائے گا، جس کے بعد لاہور میں ٹرائلز ہونگے، قومی کھیل کو نیا خون دینے کے لئےشہرشہر ٹیلنٹ ہنٹ کا انعقاد کریں گے، کرکٹ کی طرح ہاکی کے لئے پورے پاکستان سےنوجوان منتخب کرنےکےبعد ہائی پرفارمنس سینٹر میں انہیں تربیت فراہم کریں گے، کوشش ہے کہ 22 سے 25 کھلاڑیوں پر مشتمل ٹیمیں بنائیں، منتخب کھلاڑیوں کو تربیت کے لئے بیرون ملک بھیجا جائے گا۔ پاکستان میں ٹیلنٹ کی کمی نہیں تاہم ٹیلنٹ غریب آدمی کے پاس ہے-

عاطف رانا نے کہا کہ حیدر حسین اور حکومت سندھ کے ساتھ مل کر ہاکی کی بحالی کے پروگرام کا مقصد قومی کھیل کی خدمت ہے، شاہین شاہ آفریدی ہاکی کے لئے لاہور قلندر کے برانڈ ایمبیسڈر کے طور پر کام کریں گے، سندھ حکومت کی جانب راغب کرنے میں حیدر حسین کے ساتھ صوبائی وزیر سعید غنی کا کردار بہت اہم ہے-

اس موقع پر وزیراعلی سندھ کے معاون خصوصی ارباب لطف اللہ نے کہا لاہور قلندر اور حیدر حسین کا پلان جاننے کے بعد نفع نقصان کا سوچے بغیر قومی کھیل کو سپورٹ کرنے کا فیصلہ کیا، سندھ حکومت ہاکی کی بحالی کے لئے حیدر حسین کے ساتھ کھڑی ہے، ہاکی ہمارا قومی کھیل ہے تاہم اب اسے سب بھول چکے ہیں، جس کھیل کو سب نے بھلا دیا اسے سندھ حکومت نے یاد رکھا ہے، ضرورت پڑی تو ہاکی کے لئے حکومت پنجاب سے بھی بات کریں گے، عبدالستار ہاکی اسٹیڈیم کی تعمیر نو کے لئے پہلے مرحلے میں چالیس کروڑ روپے جاری کرنے کے لئے محکمہ فنانس کو خط لکھ دیا ہے-

لاہور قلندر کے کپتان شاہین شاہ آفریدی نے کہا کہ ہاکی ہمارا قومی کھیل ہے، لاہور قلندر کا پلان بہت زبردست ہے، ہاکی لیجنڈ کے ساتھ مل کر قومی کھیل کی بحالی کے لئے کام کرنے کا خواہشمند ہوں-

لاہور قلندر کے ڈائریکٹر ہائی پرفارمنس سینٹر سابق ٹیسٹ کرکٹر عاقب جاوید نے کہا کہ ٹیمیں غیر ملکی کوچز سے نہیں سسٹم سے بنتی ہیں، ہاکی کے لئے بہترین کوچز کا انتخاب کریں گے، کوچنگ مختلف مراحل سے گزرنے کا نام ہے، کھلاڑیوں کو فوکس، بہترین فوڈ اور پریکٹس کی سہولت مل جائے تو وہ خود بخود اسٹار بن جاتا ہے۔

فروری 16, 2023
پنجاب میں الیکشن کی تاریخ کا معاملہ:گورنر پنجاب نے لاہور ہائیکورٹ میں چیلنج کر دیا

لاہور: گورنر پنجاب بلیغ الرحمان نے الیکشن کی تاریخ کے اعلان سے متعلق سنگل بینچ کے فیصلے کو لاہور ہائیکورٹ میں چیلنج کر دیا۔

باغی ٹی وی : گورنر پنجاب بلیغ الرحمان کی جانب سے ایڈوکیٹ شہزاد شوکت نے سنگل بینچ کے فیصلے کی تشریح کے لیے درخواست دائر کی۔

درخواست گزار کے مطابق سنگل بینچ نے الیکشن کمیشن کو تاریخ سے متعلق گورنر سے مشاورت کا حکم دیا ہے لیکن گورنر کے پاس ایسا کوئی آئینی اختیار نہیں جبکہ گورنر نے اسمبلی تحلیل پر دستخط ہی نہیں کیے۔

واضح رہے کہ دو روز قبل گورنر پنجاب نے صوبے میں الیکشن کے حکم کی وضاحت کے لیے لاہور ہائیکورٹ جانے کا فیصلہ کیا تھا۔

لاہور ہائیکورٹ کے حکم پر پنجاب میں انتخابات کی تاریخ کے حوالے سے الیکشن کمیشن وفد نے گورنر پنجاب بلیغ الرحمن سے گورنر ہاؤس پنجاب میں ملاقات بھی کی تھی اس موقع پر چیف سیکریٹری اور آئی جی پنجاب بھی موجود تھے، جنہوں نے صوبے میں انتظامی اور امن و امان کی صورتحال پر بریفنگ دی تھی۔

اجلاس میں فیصلے کی تشریح اور وضاحت کے لیے لاہور ہائیکورٹ سے رجوع کرنے کا فیصلہ کیا گیا تھا کہ گورنر پنجاب لاہور ہائی کورٹ میں درخواست دائر کریں گے اور سنگل بنچ کے فیصلے کے قانونی دائرہ کار کو چیلنج کریں گے۔

فیصلے میں کہا گیا تھا کہ گورنر لاہور ہائی کورٹ سے فیصلے کی تشریح کی درخواست کرتے ہوئے پوچھیں گے کہ الیکشن تاریخ سے متعلق فیصلہ کیسے گورنر پنجاب پر لاگو ہوتاہے۔

واضح رہے کہ لاہور ہائی کورٹ نے الیکشن کمیشن کو پنجاب میں الیکشن کی تاریخ کا اعلان کرنے اور گورنر سے مشاورت کے بعد نوٹیفکیشن جاری کرنے کا حکم دیا ہے۔

فروری 16, 2023
معروف صحافی رانا مبشر نے نجی خبررساں ادارے کو خیرباد کہہ دیا

معروف صحافی اور اینکر رانا مبشر نے حال ہی میں شروع ہونے والے سنو ٹی وی کو خیرباد کہہ دیا ہے-

باغی ٹی وی : معروف صحافی اور اینکر پرسن نے نجی خبررساں ادارے سنو ٹی وی کو خیرباد کہہ دیا جس کے بعد وہ سنو ٹی وی کو چھوڑنے والے پہلے اسٹاف ممبر بن گئے ہیں۔

شیخ رشید کی درخواست ضمانت پر فیصلہ محفوظ

انہوں نے گزشتہ سال اکتوبر میں آج نیوز سے ساؤتھ ہیڈ کے طور پر نئے چینل میں شمولیت اختیار کی سنو میں انہوں نے جوائنٹ سیشن اور بارکاس کے پروگراموں کی میزبانی کی۔

اینکر پرسن رانا مبشر کے چینل چھوڑنے کی وجہ فوری طور پر معلوم نہیں ہو سکی۔

سی سی پی او لاہور تبادلہ کیس: چیف الیکشن کمشنر کو عدالت نے طلب کر لیا

فروری 16, 2023
سرائیکی کے ممتاز ادیب، شاعر، دانشور، محقق اور استاد دلشاد کلانچوی

سرائیکی کے ممتاز ادیب، شاعر، دانشور، محقق اور استاد

یوم وفات: 16 فروری 1997 بہاولپور

دلشاد کلانچوی کے والد وادیٔ سون کے گاؤں سبھرال کے اعوان تھے۔ حصولِ تعلیم کیلئے ریاست بہاول پور آئے اور پھر یہیں کے ہوگئے۔ دلشاد کلانچوی کا اصل نام عطا محمد تھا، وہ 24 مئی 1915ء کو بستی کلانچ والا میں پیدا ہوئے پروفیسر دلشاد کلانچوی نےطویل عرصہ سرائیکی علاقے کے کالجوں اور یونیورسٹی میں پڑھایا ۔ ایک زمانے میں اس خطے کا ہر دوسرا تیسرا گریجویٹ ان کا شاگرد ہوتا تھا ایس ای کالج بہاولپور میں طالب علمی کے دوران ان کی ایک نظم اس وقت کے اہم ادبی جریدے مولانا صلاح الدین احمد کے’’ ادبی دنیا ‘‘میں میراجی نے تعریفی نوٹ کے ساتھہ شائع کی تھی۔

ملازمت کے دوران تین چار اردو ، انگریزی کتابیں لکھیں۔ ریٹائرمنٹ کے بعد تصنیف و تالیف اور تحقیق میں مصروف ہوگئے۔ سرائیکی اردو اور اردو سرائیکی لغت اور قرآن کے سرائیکی ترجمے سمیت ستر کے قریب کتابیں شائع ہوئیں۔ دو کتابوں پر اکادمی ادبیات سے اور ایک کتاب پر حکومت پنجاب سے سال کی بہترین کتاب کے انعامات ملے۔

تصنیف و تالیف کا شوق ان کی اولاد میں بھی منتقل ہوا۔ ایک بیٹی مسرت کلانچوی کی 10 کتابیں شائع ہوچکی ہیں۔ دوسری بیٹی اختر صباح اور بیٹے جمشید اقبال اعوان کلانچوی تین تین اور پوتے عون محمد اور نواسے امروز اسلم بھی ایک ایک کتاب کے مصنف ہیں۔

پروفیسر دلشاد کلانچوی کی کتابیں
سرائیکی

سوکھے ترجمہ آلا قرآن مجید (قرآن مجید کا سرائیکی ترجمہ)
چنگا بال اقبال (اقبالیات)
کون فرید فقیر (اقبالیات)
ساڈا بخت اقبال (اقبالیات)
سارے سگن سُہا گڑے (ناول)
کلام کلانچوی(شاعری)
غالب دیاں غزلاں (غالب کی غزلیات کا سرائیکی ترجمہ)
ڈپٹی نذیر احمد کے ناول توبۃ النصوع کا سرائیکی ترجمہ)
توبہ زاری (ڈپٹی نذیر احمد کے ناول توبۃ النصوح کا سرائیکی ترجمہ)
سرائیکی گُل پُھل (مضامین)
ضلع بہاول پور (تاریخ)
کون فرید فقیر (فریدی شناسی)
فریدیات (کلام فرید کا تنقیدی مطالعہ)
سرائیکی زبان تے ادب (تنقید)
سرائیکی باغ و بہار (تنقید)
فرید کافیاں (منتخب کلام فرید کا ترجمہ و تشریح)
فریدی ڈوہڑے (فریدی شناسی)
چار سرائیکی صوفی شاعر (تنقید)
قدیم سرائیکی شاعر تے ادیب (تنقید)
بہاول پور دی تاریخ تے ثقافت (تاریخ و ثقافت)
چنگیر (بچوں کے نظمیں)
لغات دلشادیہ -اول (لسانیات)
لغات دلشادیہ -دوم (لسانیات)
سرائیکی لسانیات (لسانیات)
سرائیکی شاعری دے اوزان تے قوافی (فن شعر و شاعری)
سرائیکی ادب دی چنگیر (تنقید)
قرآن مجید آپڑیں متعلق کیا آہدے؟ (اسلام)
انارکلی تے اقتدار دی ہوس (امتیاز علی تاج کے ڈرامے انارکلی کا سرائیکی ترجمہ)
چالیھ حدیثاں (سرائیکی ترجمہ احادیث)
خواباں وچ خیال (محمد حسین آزاد کی کتاب نیرنگ خیال کا سرائیکی ترجمہ)
خیابانِ خرام (خرم بہاولپوری کے سرائیکی کلام کی ترتیب و تدوین)
رات دی کندھ (ڈرامے، افسانے)
قصے تے پِڑ قصہ (میر امن کی باغ و بہار کا سرائیکی ترجمہ)
مثنوی دلبہار (میر حسن کی مثنوی سحر البیان کا سرائیکی ترجمہ)
نور نامہ (ترتیب و تدوین)
معراج نامہ (ترتیب و تدوین)
نعتیہ سی حرفی (شاعری)
رسول کریم دے معجزے (مولانا سعید احمد دہلوی کی کتاب معجزات رسول کا سرائیکی ترجمہ)
سرائیکی مطالعہ دے سو سال (ڈاکٹر کرسٹوفر شیکل کی کتاب کا سرائیکی ترجمہ)

اردو

اقبال شناسی اور ایجرٹن کالج میگزین (اقبالیات)
اقبال اور اس کی اردو شاعری پر ایک نظر (اقبالیات)
آؤ مجھے پہچانو (بچوں کے لیے نظمیں)
نیا ستارا (بچوں کے لیے نظمیں)
مثنوی یوسف زلیخا (عبد الحکیم اُچوی کی مثنوی کا نثری اردو ترجمہ)
اصطلاحات معاشیات (درسی کتاب)
نظریات معاشیات (درسی کتاب)
انتخاب دیوان خواجہ غلام فرید (منتخب کافیوں کا اردو ترجمہ)
سرائیکی اور اس کی نثر (تحقیق)

انگریزی

Descriptive Economic of Bharat & Pakistan
Economic Terms
Intermediate Economics (Made Easy)

نمونۂ کلام

—نظم —
علامہ اقبال کی یاد میں
اے کہ ترا وجود ہے باعث فخر ادبیات اے کہ ترا دماغ ہے مایہ صد تخیلات
اے کہ ترے سخن میں ہے رنگ کلام سامری اے کہ ترے نفس سے ہے جاگی خدا کی کائنات
اے کہ تری نگاہ میں مصر و حجاز و جنیوا شام ہے یا ہے قرطبہ روم و فرنگ و سومنات
اے کہ تری خودی ہی ہے راز حیات جاوداں اے کہ تری شہنشہی رشک ملوک شش جہات
اے کہ ترا یہ فلسفہ درس و پیام و ذکر و فکر اے کہ یہ درد و سوز و غم مظہر راز قومیات
اے کہ رموز بے خودی تیرے قلم کی رازدار اے کہ طریق رند و شیخ تیرے رموز و نظریات
اے کہ ترا مقام ہے چاند ستاروں سے بھی دور اے کہ ترا قیام ہے جائے دل و تصورات
اے کہ غلام غیر کی تو نے نگاہیں پھیر دیں بندہ حُر کے سامنے رکھ دئیے سب مشاہدات
اے کہ ترے لیے اگر کارِ جہاں دراز تھا ہم سے کیوں جلد موڑ لی تونے نگاہِ التفات

اعزازات
کون فرید فقیر پر اکادمی ادبیات پاکستان کی جانب سے 1983ء میں خواجہ فرید ایوارڈ دیا گیا سرائیکی زبان تے ادب اکادمی ادبیات پاکستان کی جانب سے 1988ء میں خواجہ فرید ایوارڈ دیا گیا بہاولپور دی تاریخ تے ثقافت پر حکومت پاکستان کے محکمہ اطلاعات و ثقافت جانب سے 1989ء میں جام درک ایوارڈ دیا گیا 1998ء میں خواجہ غلام فرید کے صد سالہ جشن کے موقع پر اسلامیہ یونیورسٹی بہاولپور کی جانب سے خواجہ فرید اور ان کے کلام کی تشریح و ترجمہ پر خواجہ فرید میڈل بعد از مرگ دیا گیا۔

فروری 16, 2023