Author: +9251

لگتا ہے عمران خان کے کان میں اداروں کیخلاف کوئی زہر اگل رہا ہے۔

عمران خان اسٹیبلشمنٹ کا نام لیے بغیر مسٹر ایکس اور مسٹر وائی پر پی ٹی آئی کی حمایت یافتہ پنجاب حکومت کیخلاف سازش کا الزام عائد کرتے ہیں لیکن وزیراعلیٰ پنجاب پرویز الٰہی اور ق لیگ کے دیگر سینئر کو ایسی کسی سازش کے شواہد نظر نہیں آرہے ہیں، سینئر صحافی انصار عباسی نے دعوی کیا ہے کہ ق لیگ کے کچھ لوگوں نے ان سے بات چیت کرتے ہوئے بتایا کہ” ہمارے پاس ایسی کوئی معلومات نہیں، لگتا ہے عمران خان کے کان اداروں کیخلاف کوئی زہر اگل رہا ہے۔

انصار عباسی کے مطابق: انہوں نے کہا کہ ہم ق لیگ والوں کے پاس ایسی کوئی معلومات نہیں۔ انہوں نے واضح کیا کہ اگر کوئی ایسی بات ہوتی تو وزیراعلیٰ پنجاب کو اس کا علم ہوتا۔ اور ہاں وزیراعلیٰ پرویز الٰہی اور ان کے بیٹے مونس الٰہی نے عمران خان سے بات کی تھی اور انہیں مشورہ دیا تھا کہ اسٹیبلشمنٹ کے ساتھ کشیدگی نہ کریں۔

کہا جاتا ہے کہ عمران خان اس مشورے سے متفق ہیں لیکن بعد میں وہ رائے تبدیل کر دیتے ہیں اور نیا بیان داغ دیتے ہیں جس سے نیا تنازع پیدا ہو جاتا ہے۔ ق لیگ کے لیڈر کے ایک لیڈر مطابق: پی ٹی آئی میں کوئی شخص ہے جو عمران خان کے کانوں میں اداروں کیخلاف زہر گھول رہا ہے۔ اور یہ سراسر ملک دشمنی کے مترادف ہے.

دلچسپ بات یہ ہے کہ اسی طرح کی رائے پی ٹی آئی کے لیڈر فیصل واوڈا بھی رکھتے ہیں۔ پی ٹی آئی ذرائع کہتے ہیں کہ واوڈا سمجھتے ہیں کہ پارٹی میں چار افراد کا ایک ٹولہ ہے جنہیں دیگر کی حمایت بھی حاصل ہے جو پارٹی چیئرمین عمران خان کو غلط معلومات دیکر اسٹیبلشمنٹ اور عمران خان کیخلاف عدم اعتماد پیدا کرنے کا کام کر رہے ہیں۔

ان ذرائع کا کہنا ہے کہ یہ چار لوگوں کا ٹولہ ایسے آزرو مند لوگوں کا گروپ ہے جو عدالتی معاملات پر عمران خان کو گمراہ کر رہے ہیں تاکہ یہ لوگ اپنا فائدہ حاصل کر سکیں۔ حال ہی میں عمران خان کی زیر صدارت ہونے والے اعلیٰ سطح کے ایک اجلاس میں واوڈا نے عمران خان کو خبردار کیا تھا کہ ان کی آستین میں سانپ بیٹھے ہیں جو اپنے مذموم مقاصد کیلئے چاہتے ہیں کہ عمران خان کو نااہل قرار دلوایا جائے۔

ان ذرائع کا کہنا ہے کہ فیصل واوڈا کا اصرار ہے کہ پارٹی میں جو لوگ یہ دعویٰ کر رہے ہیں کہ انہیں وزارت عظمیٰ کی پیشکش ہوئی ہے وہ جھوٹے ہیں۔ فیصل واوڈا پارٹی میں کھل کر بولنے والے شخص ہیں جو عمران خان کی اسٹیبلشمنٹ کو ٹکر دینے کی پالیسی کے مخالف ہیں۔

پی ٹی آئی کے ذرائع کے مطابق، کچھ ایسے لوگ بھی ہیں جو اسلام آباد ہائی کورٹ میں جاری توہین کے کیس میں سمجھتے ہیں کہ عمران خان کو غلط مشورے دیے جا رہے ہیں اور انہیں اس نہج کی طرف دھکیلا جا رہا ہے جہاں ان کا سیاسی کیریئر سخت مشکلات کا شکار ہو جائے گا۔

عمران خان کے حال ہی میں دیے گئے ’’محب وطن‘‘ اور ’’تگڑے‘‘ آرمی چیف کے بیان کے بعد وزیراعلیٰ پنجاب پرویز الٰہی نے فوج کی حمایت میں بیان دیا جسے کچھ لوگوں نے عمران خان کے بیان کا جواب الجواب قرار دیا ہے. پرویز الٰہی نے موجودہ آرمی چیف کی تعریف کی اور کہا تھا کہ جو لوگ فوج مخالف بیان بازی میں ملوث ہیں وہ پاکستان اور اسلام کے دشمن ہیں۔ پرویز الٰہی نے کہا تھا کہ پاکستان اور اسلام کیلئے آرمی چیف جنرل قمر جاوید باجوہ کا کردار قابل تعریف ہے۔

خاتون رکن اسمبلی ڈاکٹر سمیرا شمس نے دنیا کے بہترین نوجوان پارلیمنٹیرین کا ایوارڈ حاصل کرلیا ہے.

امریکہ میں ون ینگ ورلڈ 2022 مانچسٹر کی جانب سے ایورڈ تحریک انصاف کی خاتون رکن اسمبلی ڈاکٹر سمیرا شمس نے دنیا کے بہترین نوجوان پارلیمنٹیرین کا ایوارڈدیا گیا۔ ون ینگ ورلڈ 2022 میں 190ممالک میں سے 15 نوجوان سیاستدانوں کوشارٹ لسٹ کیا گیا تھا جس میں سے پاکستانی خاتون کو بھی منتخب کیا گیا۔

ایوارڈ وصول کرنے والی سمیرا شمس کا کہنا ہے کہ ایوارڈ ملنے سے پسماندہ علاقوں میں تعلیم حاصل کرنے والی خواتین کی حوصلہ افزائی ہوگی۔ سمیرا شمس نے خواتین کے مسائل پر توجہ دی اور ان کی نمائندگی کرتے ہوئے قانون سازی بھی کرائی۔

خیال رہے کہ تحریک انصاف کی رکن اسمبلی ڈاکٹر سمیرا شمس کو خیبرپختونخوا کی کم عمر ترین ایم پی اے کا اعزاز حاصل ہے۔ 26 سالہ سمیرا شمس خواتین کے مسائل حل کرنے کیلئے پرعزم ہیں۔ خیبرپختونخوا کے دورافتادہ اور پسماند ضلع لوئر دیر سے تعلق رکھنے والی ڈاکٹر سمیرا شمس تحریک انصاف سے تعلق رکھنے والی حالیہ ممبران میں سب سے کم عمر قرار پائی تھی.

ڈاکٹر سمیرا شمس کا اس حوالے سے کہنا تھا کہ ان کی زندگی کا ایک ہی مقصد ہے اور وہ یہ ہے کہ صوبے کے پسماندہ اضلاع میں خواتین کیلئے یونیورسٹیاں قائم کی جائیں۔

یاد رہے کہ ڈاکٹر سمیرا شمس کی اپنے والد کے برعکس تمام تر وفاداریاں پاکستان تحریک انصاف سے ہیں اور ان کی وفات کے بعد 9 سال قبل انصاف یوتھ ونگ سے وابستہ ہوگئی تھیں۔ دلچسپ بات یہ ہے کہ سمیر شمس کا تعلق اگرچہ شعبہ طب سے ہے لیکن وہ امور نوجوانان میں زیادہ تجربہ اور لگاؤ رکھتی ہیں۔ اور ان کا زندگی کا ایک ہی مقصد ہے کہ انکے صوبے میں خواتین کی تعلیم پر زور دیا جائے اور خواتین کو تعلیم کے مواقع فراہم کیئے جائیں.

اسلام آباد پولیس مظاہرین کو منتشر کرنے کے لئے ڈرون استعمال کرے گی۔

اسلام آباد پولیس کی جانب سے ٹوئٹر پرجاری بیان کے مطابق کیپیٹل پولیس نے امن و امان کے قیام کے لئے عوامی اجتماعات کو محدود اورمنظم رکھنے کے لئے جدید تکنیکی صلاحیت حاصل کرلی ہے.

امن و امان کے قیام میں اہم پیش رفت

اسلام آباد کیپیٹل پولیس نے رائٹ کنٹرول کرنے کی جدید تکنیکی صلاحیت حاصل کرلی۔

مستقبل میں عوامی اجتماع کو محدود اور منظم کرنے کےلیے غیر مہلک شیل پھینکنے والے ڈرون استعمال کیے جائیں گے۔#ICTP #OPS

— Islamabad Police (@ICT_Police) September 10, 2022

اسلام آباد پولیس کے مطابق: مستقبل میں مظاہرین کو منتشر کرنے کے لئے غیر مہلک شیل پھینکنے والے ڈرون استعمال کئے جائیں گے۔ ڈرون کے استعمال سے مظاہرین کو محدود اور منظم کرنے میں مدد ملے گی۔

اسلام آباد پولیس میں جدید ٹیکنالوجی کا استعمال
خیال رہے کہ چیئرمین سی ڈی اے و چیف کمشنر اسلام آباد کی زیر صدارت گزشتہ جولائی میں سی ڈی اے ہیڈ کوارٹرز میں ایک اہم اجلاس منعقد ہوا تھا۔ جس میں میٹرو کوریڈور کی نگرانی کے لئے سیکیورٹی کیمروں اور جدید ٹیکنالوجی کے استعمال کے منصوبوں پر غور کیا گیا تھا.

واضح رہے کہ اس اجلاس میں اسلام آباد پولیس کے انسپکٹر جنرل سمیت دیگر متعلقہ فارمیشنز کے افسران نے بھی شرکت کی تھی. اجلاس میں سیکیورٹی کیمروں کی تنصیب اور میٹرو کوریڈور کی نگرانی کے لئے ٹیکنالوجی کے استعمال کے منصوبے پر غور کیا گیا تھا. اجلاس کے دوران یہ بھی فیصلہ کیا گیا تھا کہ اسلام آباد ہائی وے پر سمارٹ ٹریفک مینجمنٹ سسٹم کو آئی سی ٹی پولیس کے حوالے کیا جائے گا.

جبکہ سی ڈی اے مزید کیمروں کی تنصیب میں آئی سی ٹی پولیس کی مدد کرے گا۔ مزید فیصلہ کیا گیا تھا کہ مارگلہ ہائی وے پر سمارٹ ٹریفک سسٹم اسلام آباد پولیس کے ذریعے نافذ کیا جائے گا۔اجلاس میں مزید یہ فیصلہ بھی کیا گیا تھا کہ آئی سی ٹی انتظامیہ اسلام آباد پولیس اور سی ڈی اے کے باہمی تعاون سے جدید ٹیکنالوجی کے استعمال سے اسلام آباد کو محفوظ دارلحکومت میں تبدیل کیا جائے گا۔