Author: +9251

این سی اے میں پیٹریسیا یاسمین کے آرٹ ورک پر مشتمل ”سرکلز آف لو“ کے عنوان سے نمائش کا انعقادکیا گیا۔پیٹریشیا یاسمین نے آرٹسٹ ان ریزیڈنس پروگرام کے تحت اس سال مارچ سے جون 2022 نیشنل کالج آف آرٹس میں بطور آرٹسٹ کام کیا۔ انہوں نے پروڈکٹ ڈیزائن اور ٹیکسٹائل ڈیزائن ڈیپارٹمنٹ کے طلباء کے لیے مختلف ”ڈیزائن تھنکنگ” اور ”اپ سائیکلنگ” ورکشاپس منعقد کیں۔ ان ورکشاپس میں کمپنی کریسنٹ بہمن کی طرف سے فراہم کردہ علاقائی ڈینم کی پیداوار سے بچ جانے والے مواد کو نئی قیمت دینے پر توجہ مرکوز کی گئی۔

اپنے ڈیزائن کردہ کاموں میں، وہ خود کو ماحولیاتی مسائل اور موسمیاتی تبدیلیوں سے نمٹنے کی ذمہ دار سمجھتیں ہیں تاکہ ان چیلنجوں کے لیے پائیدار طریقے اور حل تلاش کیے جا سکیں۔ وہ اس بات کو بھی یقینی بناتی ہے کہ وہ جو پروڈکٹس ڈیزائن کرتی ہیں وہ انتہائی ذمہ دارانہ طریقوں سے تیار کی جاتی ہیں۔

NCA میں اپنے قیام کے دوران، پیٹریشیا نے ایک وژن کے ساتھ کام کیا تاکہ پروڈکٹ ڈیزائن کے طالب علموں کو دیے گئے مواد کے ساتھ نمٹنے اور اس کی خصوصیات کو جاننے کے لیے تخلیقی مواد کی تحقیق کرنے کی ترغیب دی گئی۔ اسی طرح، ٹیکسٹائل ڈیزائن ڈپارٹمنٹ میں ہر طالب علم کو x12 12 انچ کا ایک خاص سائز فراہم کیا گیا تھا تاکہ ان سب کو جوڑ کر ایک بہت بڑا انفرادی ٹکڑا بنایا جا سکے۔

ان سو ڈینم بیگز کی مدد سے ‘سرکلز آف لو’ نامی ایک بڑا آرٹ پیس تیار کیا گیا۔ جو اب ٹولنٹن بلاک NCA میں نمائش کے لئے پیش کیا گیا ہے۔ وائس چانسلر این سی اے پروفیسر ڈاکٹر مرتضیٰ جعفری نے مہمان آرٹسٹ پیٹریشیا یاسمین کے تخلیق کردہ آرٹ ورکس کی تعریف کی اور اس قابل قدر پراجیکٹ میں حصہ لینے والے نوجوان طلبا و طالبات کی حوصلہ افزائی کی۔

انہوں نے کہا کہ یہ منصوبہ درحقیقت ماحولیاتی مسائل کے حوالے سے بیداری پیدا کرنے کے لیے بہت اہم ہے۔ اس نمائش میں زندگی کے ہر شعبے سے تعلق رکھنے والے افراد نے شرکت کی۔

سی سی پی او لاہور ڈی آئی جی بلال صدیق کمیانہ نے ارفع کریم آئی ٹی ٹاور کے قریب جولائی 2017 میں ہونے والے خودکش دھماکہ کے شہدا پولیس کے اہل خانہ سے اپنے دفتر سے ملاقات کی۔خودکش دھماکہ میں شہید دو سگے کانسٹیبلز بھائی عابد علی اور معظم علی،شہید کانسٹیبلز غلام مرتضیٰ،علی رضا نذیر اور عمیر غنی کی فیملیز ملاقات کرنے والوں میں شامل تھیں۔

سی سی پی او بلال صدیق کمیانہ نے لاہور پولیس کے شہید سب انسپکٹر منظور احمد،ہیڈ کانسٹیبل آصف اقبال،کانسٹیبلز محسن علی،محمد صدام حسین اورساجد علی کی فیملیز سے بھی ملاقات کی۔ڈی ایس پیز ریحان جمال،کاشف ڈوگر اور دیگر متعلقہ پولیس افسران اس موقع پر موجود تھے۔

بلال صدیق کمیانہ نے ملاقات میں شہدا پولیس کی شاندار خدمات کو خراج تحسین پیش کیا۔سی سی پی او لاہور نے شہدا پولیس کے ورثا سے مسائل دریافت کئے اور حل کے لئے موقع پر احکامات جاری کئے۔سی سی پی او بلال صدیق کمیانہ نے کہا کہ لاہور پولیس کے شہدا نے ملک و قوم کی خاطر قیمتی جانوں کا نذرانہ پیش کیا۔انہوں نے کہا کہ شہدا پولیس کے بچوں کی تعلیم،صحت،روزگار اور دیگر معاملات کی دیکھ بھال ہماری ذمہ داری ہے۔

سی سی پی او لاہور نے مزید کہا کہ شہدا کی فیملیز کو سافٹ ویئر کے ذریعے رجسٹر کرکے مسائل ترجیحی بنیادوں پر حل کر رہے ہیں۔ بلال صدیق کمیانہ نے شہدا کے اہل خانہ سے گفتگو کرتے ہوئے کہا کہ اگرچہ ہم شہدا کو واپس تو نہیں لا سکتے تاہم ہر خوشی غمی میں اپ کے ساتھ ہیں۔انہوں نے کہا کہ شہدا کے بچوں کی اعلی تعلیمی اداروں میں تعلیم کے لئے سکالر شپ جبکہ بچیوں کی شادی بیاہ کے لئے فنانشل گرانٹس بھی دے رہے ہیں۔

بلال صدیق کمیانہ نے کہا کہ ایسا کوئی دوسرا محکمہ نہیں جس کی ملک و قوم کی خاطر اتنی زیادہ قربانیاں ہوں،شہداء پولیس نے اپنا آج قربان کرکے قوم کا کل محفوظ کر دیا ہے ۔انہوں نے متعلقہ پولیس افسران کو ہدایت کی کہ شہدا پولیس کے ورثا کے مسائل ترجیحی بنیادوں پر حل کئے جائیں۔

بلال صدیق کمیانہ نے شہدا پولیس کے بچوں سے اظہار شفقت کیا،ان کے ساتھ گھل مل گئے اور ان میں تحائف بھی تقسیم کئے۔سی سی پی او بلال صدیق کمیانہ نے اس عزم کا اظہار کیا کہ شہداء پولیس کے ورثاء کی فلاح و بہبود اور دیکھ بھال کے لئے تمام وسائل بروئے کار لائے جائیں گے۔

اینٹی کرپشن پنجاب کاایکشن، ملتان، مظفر گڑھ اور پاک پتن سے رشوت خور سرکاری ملازمین سمیت 3 افراد کو گرفتار کر لیا.اینٹی کرپشن پنجاب نے گریڈ 16 کے اسسٹنٹ کو پاک پتن سے رنگے ہاتھوں گرفتار کیا۔

ملزم محمد اکرم ایڈیشنل ڈپٹی کمشنر پاک پتن کے ریڈر کے طور پر تعینات تھا۔ محمد اکرم کو شہری سے 20 ہزار روپے بطور رشوت وصول کرتے ہوئے گرفتار کیا گیا۔ ملزم سے رشوت کے پیسوں کے نشان ذدہ نوٹ بھی بر آمد کر لئے گئے ہیں۔

ملزم کے خلاف تعزیرات پاکستان اور انسداد بد عنوانی قانون کی مختلف دفعات کے تحت مقدمہ درج کیا گیا ہے جبکہ ملتان سے پٹواری محمد کلیم کامران کو گرفتار کیا گیا ہے ،ملزم محمد کلیم کو عدالت سے ضمانت قبل از گرفتاری خارج ہونے پر گرفتار کیا گیا۔ پٹواری محمد کلیم نے مقدمہ میں نامزد دیگر ملزمان محمد قاسم، محمد عمر، محمد حسین اور جندوڈہ کے نام پر سرکاری زمین منتقل کی۔ ملزمان نے پرت پٹوار اور سرکار میں دروبدل کرکے زمین کو جعلسازی سے فروخت کیا۔

اینٹی کرپشن پنجاب نے مظفر گڑھ سے ملزم نذیر احمد کوبھی حراست میں لے لیا۔ ملزم نے مدعی مقدمہ کے والد کی 13 کنال زمین جعلی انگوٹھے کا نشان لگا کر اپنے نام منتقل کروائی۔
نزیر احمد نے پٹواری کے منشی عبدالرزاق کی مدد سے ملکیت کے انتقال کا پرت سرکار تبدیل کروایا جبکہ مقدمہ میں نامزد منشی عبدالرزاق کو بھی گرفتار کیا جا چکا ہے۔