Author: +9251

راجھستان :جنونی ہندوؤں نے عید گاہ پر دھاوا بول دیا:علاقے میں کرفیو،اطلاعات کے مطابق بھارتی ریاست راجھستان کے شہر جودھ پور میں جاری ہندو مسلم فسادات عید کے دن بھی تھم نہ سکے، جنونی ہندوؤں نے عید گاہ سے لاؤڈ اسپیکر اتار دیا۔اس سے قبل جنونی ہندؤوں نے مسلم اکثریتی علاقے میں ہندو جماعت کا جھنڈا لگا کر شرپسندی کو ہوا دی۔

انتہا پسند ہندوؤں نے اسی پر اکتفا نہیں کیا بلکہ آج عید کے دن عید گاہ پر لگے جھنڈے کا اتار کر اپنا جھنڈا لگا دیا اور لاؤڈ اسپیکر اتار کر اپنے ساتھ لے گئے۔

جنونی ہندوؤں کی اشتعال انگیز حرکت پر عید کی نماز پڑھنے کے لئے آنے والے مسلمانوں میں اشتعال پھیل گیا، مسلمانوں نے عید کی نماز کے بعد اس واقعے پر احتجاج کیا۔مظاہرین نے بھارتیہ جنتا پارٹی کے مقامی ایم ایل اے کے گھر پر کھڑی موٹر سائیکل کو آگ لگا دی۔

پولیس نے احتجاج کرنے والے نہتے مسلمانوں پر لاٹھیوں کی بارش کر دی اور آنسو گیس کی شیلنگ کی، پولیس کا دعویٰ ہے کہ مظاہرین کی جانب سے پتھراؤ کیا گیا تھا، پولیس نے 10 افراد کو حراست میں لے لیا۔اس واقعہ کے بعد علاقے میں سخت کشیدگی برقرار ہے ، انتظامیہ نے علاقے میں کرفیو نافذ کر دیا ہے اور انٹرنیٹ سروس معطل کر دی ہے۔

اس افسوسناک واقعہ کے بعد ابھی تک حکمراں جماعت بی جے پی کا موقف سامنے آیا ہے اور نہ ہی بھارتی وزیر اعظم نریندر مودی نے مسلمانوں کے خلاف ہونے والے اس ظلم پر کوئی بیان دیا ہے۔

کیف :تیسری عالمی جنگ کے امکانات بڑھ گئے ہیں :اطلاعات کے مطابق روس اور یوکرین کے درمیان جاری جنگ کے حوالے سے یوکرین کے صدر ولودومیر زیلنیسکی نے دنیا کو تیسری جنگ عظیم کے امکان سے خبردار کیا ہے۔

عرب ٹی وی کو انٹرویو دیتے ہوئے یوکرین کے صدر ولودومیر زیلینسکی کا کہنا تھا کہ جنگ فی الحال یوکرین تک محدود ہے اور روس منتقل نہیں ہوئی۔ان کا کہنا تھا کہ یوکرین کی فوج نے اب تک روس کے خلاف فوجی کارروائیوں کا آغاز نہیں کیا ہے، یوکرینی فوج روس پر قبضہ کرنے کی کوئی خواہش نہیں رکھتی، ہماری افواج اپنی سرزمین کا دفاع کر رہی ہیں۔

ولودومیر زیلینسکی نے کہا کہ ہم روسی فوجیوں کی موجودگی اور مولدووا میں علیحدگی پسندوں سے خوفزدہ نہیں ہیں کیونکہ مولدووا میں علیحدگی پسند غیر تربیت یافتہ اور یوکرینی فوج سے لڑنے سے خوفزدہ ہیں۔

یوکرین کے صدر نے روسی وزیر خارجہ سرگئی لاؤروف کی جانب سے ہٹلر کے یہودیوں سے تعلق ہونے پر کہنا تھا کہ ان کے بیان سے لگتا ہے کہ روس نے جنگ عظیم دوئم سے سبق نہیں سیکھا۔

یوکرین کے صدر زیلنسکی کا کہنا ہے کہ یوکرینی فوج نے روس کے خلاف کوئی فوجی کارروائی نہیں کی۔عرب ٹی وی کو انٹرویو دیتے ہوئے یوکرین کے صدر زیلنسکی کا کہنا تھا کہ جنگ فی الحال یوکرین تک محدود ہے، روس منتقل نہیں ہوئی۔

یوکرینی صدر نے کہا کہ یوکرین کی فوج نے روس کے خلاف فوجی کارروائی نہیں کی، یوکرینی فوج صرف اپنی سرزمین کادفاع کر رہی ہے۔انہوں نے مزید کہا کہ یوکرینی فوج روس پر قبضے کی خواہش نہیں رکھتی۔

صدر زیلنسکی نے کہا کہ وہ روس کے ساتھ بات چیت کے لیے بھی تیار ہیں، لیکن یہ اسی وقت ممکن ہوگا جب روسی صدر ہم سے ملنے کے لیے تیار ہوں گے۔

واضح رہے کہ روسی افواج 24 فروری کو یوکرین میں داخل ہوئیں تھیں جسے ایک خصوصی فوجی آپریشن کا نام دیا گیا تھا۔تاہم صدر زیلنسکی کا کہنا ہے کہ یہ جنگ 8 سال پہلے اس وقت شروع ہوئی تھی جب 2014 میں روس نے کریمیا سے الحاق کیا تھا۔

ریاض :جدہ ائیرپورٹ پر بے تحاشا رش:پی آئی اے سمیت تمام ایئر لائنز کی پروازیں تاخیرکا شکار،اطلاعات کے مطابق جدہ سے روانہ ہونے والی تمام ائیرلائنز کی پروازیں طویل تاخیر کا شکارہیں اوراس میں پاکستان کی قومی ایئرلائنزبھی شامل ہیں

جدہ سے ذرائع کے مطابق رش ائیرپورٹ حکام کی جانب سے پروازیں شمالی ٹرمینل پر منتقل کرنے کی وجہ سے پیدا ہوا،رش کی صورتحال کے باعث تمام بین القوامی ائیرلائنز کو مسافروں کی چیک ان میں مشکلات درپیش ہیں، شمالی ٹرمینل پر صرف 4 بورڈنگ گیٹ دستیاب ہیں اور پروازوں کی تعداد بہت زیادہ ہے،اسی مناسبت سے آج شب کی پروازوں میں ممکنہ تاخیر متوقع ہے

ادھر پی آئی اے انتظامیہ نے ہدایات جاری کردی ہیں کہ مہمانوں کو تمام ممکنہ سہولیات فراہم کی جائیں،یہ بھی معلوم ہوا ہے کہ پی آئی اے کے جدہ میں موجود عہدیداران کا سعودی حکام سے مسلسل رابطہ ہے ،پی آئی اے کے مقامی ٹیمیں ائیرپورٹ حکام کا تعاون حاصل کرکے پروازوں کی تاخیر کو کم از کم کرنے کے انتظامات کررہی ہیں

ترجمان پی آئی اے کے مطابق سی ای او پی آئی اے صورتحال کی ذاتی حیثیت میں مانیٹرنگ کررہے ہیں ،وزیر ہوابازی خواجہ سعد رفیق بھی صورتحال کا لمحہ بہ لمحہ جائزہ لے رہے ہیں تاکہ پاکستانی مسافروں کو کم از کم زحمت ہو ترجمان پی آئی اے کا کہنا ہے کہ مہمانوں کو پیش آنے والی تاخیر کیلئے پیشگی معذرت خواہ ہیں تاہم ان کے تعاون کی بھی طلبگار ہیں

یہ بھی معلوم ہواہے کہ سی ای او پی آئی اے کا جدہ ائیرپورٹ حکام سے ٹیلی فونک رابطہ ہے اور وہ مسافروں کو سہولت فراہم کرنے کیلئے معاونت کی درخواست کرچکے ہیں ،وفاقی وزیر ہوابازی کی جانب سے پی آئی اے کو تاخیر سےمتاثرہ مسافروں کو ہوٹل فراہم کرنے کی ہدایات کردی گئی ہیں‌

ترجمان پی آئی اے کا کہنا ہے کہ پروازوں سے متعلق بروقت معلومات کیلئے پی آئی اے کے سٹیشن منیجر طارق مجید 3203438 54 +966 یا نائب سٹیشن منیجر خضر 4553342 55 +966سے رابطہ قائم کیا جاسکتا ہے ،پروازوں سے متعلق معلومات پی آئی اے کے کال سینٹر 786 786 111 سے بھی حاصل کی جاسکتی ہیں

واشنگٹن: مغربی حکام نے ایران کے جوہری معاہدے کی تجدید کے حوالے سے مایوسی کا شکار ہو چکے ہیں اور اس معاملے سے باخبر ذرائع نے کہا کہ وہ یہ سوچنے پر مجبور ہیں کہ ایران کے جوہری پروگرام کو کیسے محدود کیا جائے۔

ذرائع کے مطابق بظاہر مغربی طاقتیں اس معاہدے سے مکمل طور پر دستبردار نہیں ہوئیں، جہاں ایران نے اقتصادی پابندیوں ہٹائے جانے کے عوض اپنے جوہری پروگرام کو روک دیا تھا لیکن یہ خیال وقت گزرنے کے ساتھ ساتھ بڑھتا جا رہا ہے کہ شاید اس کے باوجود بھی معاہدے کی دوبارہ تجدید نہ ہو سکے۔چار مغربی سفارت کاروں نے کہا کہ ایران کا 2015 میں برطانیہ، چین، فرانس، جرمنی، روس اور امریکا ہونے والا معاہدہ ختم ہو رہا ہے

یہ معاہدہ مارچ کے اوائل میں طے پاتا ہوا نظر آ رہا تھا بات چیت آخری لمحات میں روس کے مطالبات اور اس بات پر تعطل کا شکار ہو گئے کہ آیا امریکا ایران کے پاسداران انقلاب کو غیرملکی دہشت گرد تنظیم کی فہرست سے نکالے گا۔پاسداران انقلاب ایران کی اعلیٰ مسلح اور انٹیلی جنس فورسز کو کنٹرول کرتا ہے جس پر واشنگٹن عالمی دہشت گردی کی مہم کا الزام لگاتا رہا ہے۔

پاسداران انقلاب کو اس فہرست سے نکالنے کے امریکی مطالبے کی بہت سے امریکی قانون سازوں نے مخالفت کی ہے کیونکہ وہ ایرانی تردید کے باوجود اسے ایک دہشت گرد ادارے کے طور پر دیکھتے ہیں۔بظاہر روسی مطالبات تو مان لیے گئے ہیں لیکن پاسداران انقلاب کے حوالے سے ایران کے مطالبے کا پورا مشکل نظر آتا ہے۔

بائیڈن کے معاونین نے واضح کیا ہے کہ ان کا پاسداران انقلاب کو فہرست سے نکالنے کا کوئی منصوبہ نہیں ہے تاہم اس کو خارج از امکان قرار نہیں دیا اور ان کا کہنا ہے کہ اگر ایران چاہتا ہے کہ واشنگٹن اس معاہدے کی بحالی کے علاوہ ایسا کوئی قدم اٹھائے تو ایران کو معاہدے کے علاوہ امریکی خدشات کو دور کرنا ہوگا۔

امریکی عہدیدار نے کہا کہ کیا یہ معاہدہ دم توڑ گیا ہے ہے؟ ہم ابھی تک نہیں جانتے اور ہمیں نہیں لگتا کہ ایران بھی اس بارے میں جانتا ہے۔
ایک ایرانی سیکیورٹی اہلکار نے کہا کہ یہ ہماری ریڈ لائن ہے اور ہم اس پر راضی نہیں ہوں گے۔متعدد ذرائع نے بتایا کہ کوئی بھی فریق یہ تسلیم نہیں کرنا چاہتا کہ تقریباً ایک سال تک بالواسطہ چلنے والی بات چیت ناکام ہو چکی ہیں۔

ایک مغربی سفارت کار نے کہا کہ مجھے نہیں لگتا کہ کوئی بھی یہ کہنا چاہتا ہے کہ بس بہت ہو گیا، ہو سکتا ہے کہ یہ غیر معینہ مدت تک جاری رہے اور کوئی فریق یہ تسلیم نہ کرے کہ معاہدہ ختم ہو گیا ہے؟۔