پاکستان کے 76 ویں یوم آزادی کے موقع پر پاکستان ملٹری اکیڈمی کاکول میں شاندار آزادی پریڈ کا آغاز ہوگیا ہے۔ جبکہ رپورٹ کے مطابق پاکستان کے 76 ویں یوم آزادی کے موقع پر پاکستان ملٹری اکیڈمی کاکول میں شاندار آزادی پریڈ کا آغاز ہوگیا ہے اور چیف آف آرمی سٹاف جنرل سید عاصم منیر آزادی پریڈ کے بطور مہمان خصوصی شریک ہوئے ہیں.
چیف آف آرمی اسٹاف نے 76 ویں یوم آزادی کے موقع پر آزادی پریڈ کے شرکاء کو مبارکباد دی، آرمی چیف نے شاندار پریڈ کے انعقاد پر کیڈٹس کو خراج تحسین پیش کیا، تقریب سے خطاب کرتے ہوئے آرمی چیف جنرل سید عاصم منیر کا کہنا تھا کہ یہ دن ہمارے قائدین اور اسلاف کی بصیرت اور قربانیوں سے حاصل کی گئی آزادی کی تکریم کا دن ہے۔ آج کا دن ہمیں پاکستان کا مطلب کیا لا الااللہ کے پیغام کی روح کو سمجھنے پر زور دیتا ہے۔ یہ پیغام دو قومی نظرئیے کی اساس اور برصغیر کے مسلمانوں کی منزل ہے۔ ہم 76 برس سے آزادی کا دن منانے کی روایت قائم رکھے ہوئے ہیں۔ پاکستان بیشمار وسائل اور ان گِنت نعمتوں کی سرزمین ہے۔ ہماری ترقی ہمارے اسلاف اور عوام کے خوابوں کی تعبیر ہو گی ہماری ترقی ہماری آئندہ نسلوں کے بہتر مستقبل کی ضامن ہوگی
آرمی چیف جنرل سید عاصم منیر کا کہنا تھا کہ ہم ایک اہم اور کٹھن دور سے گزر رہے ہیں۔ ہمیں جغرافیائی اور سیاسی تنازعات، طاقت کے حصول کی کشمکش، تسلط پسندی اور جنگی جنون جیسے چیلنجز کا سامنا ہے۔ ہمیں پاکستان کو کمزور کرنے کی خواہش رکھنے والی ناکام قوتوں کا مسلسل سامنا ہے۔ ہم قائد اعظم کے قول کہ “دنیا کی کوئی طاقت پاکستان کو مٹانہیں سکتی” کے امین ہیں۔ قوم ان چیلنجز خواہ وہ بیرونی ہوں یا اندرونی، سے نبرد آزما ہونے کا حوصلہ ، صلاحیت اور قابلیت رکھتی ہے۔ میں اس موقع پر اپنی عظیم قوم کو امید کا پیغام دیتا ہوں۔ ملکی خودمختاری اور علاقائی سالمیت کی خاطر ہم کسی قربانی سے دریغ نہیں کریں گے۔ قومی فوج ہونے کے ناطے پاکستان آرمی عوام کی فلاح و بہبود کیلیئے پُر عزم ہے۔
قوم اور فوج میں دراڑ ڈالنے کی مذموم کوششیں ناکام ہونگی۔ افواج پاکستان اور عوام ایک ہیں۔ ہمیں خوف اور مایوسی پھیلانے والوں کا منفی پروپیگنڈا مسترد کرنا ہوگا۔ یہ عناصر معاشرے میں نا امیدی پھیلانے کی ناکام کوششوں میں سرگرم ہیں۔ کوئی ملک اور قوم ایسے چیلنجز سے نبرد آزما ہوئے بغیر ترقی نہیں کر سکتے۔ آرمی چیف نے اس ضمن میں مختلف قرآنی آیات کا بھی حوالہ دیا۔
آرمی چیف جنرل سید عاصم منیر کا کہنا تھا کہ کشمیری بھائی انشاء اللّٰہ ضرور ظالمانہ اور قابض قوتوں سے چھٹکارا پائیں گے۔ آپکی آزادی حق خود ارادیت کی خواہش اور لازوال قربانیوں کا ثمر ھوگی۔ عالمی ضمیر کیلیئے کشمیر میں ہندوستانی جبر و استبداد کا احساس ضروری ہے۔ تمام مذموم ہتھکنڈوں کے باوجود کوئی طاقت کشمیری عوام کے استقلال کو متزلزل نہیں کر سکتی۔ کوئی جغرافیائی اور سیاسی ضرورت کشمیریوں کے حق آزادی اور خود ارادیت کے راستے میں رکاوٹ نہیں ہو سکتی۔ میں کشمیری بھائیوں کو افواج پاکستان اور پاکستانی قوم کی طرف سے مکمل حمایت کا یقین دلاتا ہوں۔ خیبر پختونخوا اور بلوچستان کے عوام دو دہایوں سے دہشت گردی کی ظالمانہ کارروائیوں کا مقابلہ کر رہے ہیں میں آپکو یقین دلاتا ہوں کہ ہم دہشت گردی کی بزدلانہ کارروائیوں کے خلاف ضرور کامیاب ہونگے ہمارے پڑوسی ملک نے پاکستان کو آج تک دل سے تسلیم نہیں کیا یہ ملک ہمیشہ علاقائی امن اور سلامتی کیلیئے خطرہ رہا ہے ہم نے یہ آزادی بیشمار قربانیوں کے بعد حاصل کی ہے ہم اس آزادی کی حفاظت کرنا جانتے ہیں۔ ہمارا ازلی دشمن اپنی نام نہاد اسٹریٹجک اہمیت اور توسیع پسندانہ عزائم کے خواب رکھتا ہے یہ خواب جو ہندوتوا کے کٹّر نظریات کے تابع ہیں اقوام عالم کی توجہ کے متقاضی ہیں ہم کبھی بھی جارحانہ عزائم سے مرعوب نہیں ہونگے دو ایٹمی قوتوں پر مشتمل یہ خِطّہ ایسے جارحانہ عزائم کا متحمل نہیں ہو سکتا
بدقسمتی سے دشمن مسلسل اپنے ناپاک سیاسی عزائم کی تکمیل کیلیئے مصروف عمل ہے ماضی میں ان عزائم کی تکمیل کیلئے کی جانے والی مہم جوئی کی ناکامی کو ضرور یاد رکھنا چائیے افغان بھائیوں کو ادراک ہونا چائیے کہ ہم ایک مہمان نواز قوم ہیں ہماری خواہش ہے کہ ہماری مخلصانہ کوششوں کا اسی پیرائے میں جواب دیا جائے افغان سرزمین ہمارے خلاف استعمال نہیں ہونی چائیے ہم اپنے دیرینہ دوست چین کے ساتھ تعاون اور اشتراک کے نئے دور میں داخل ہو رہے ہیں سعودی عرب، متحدہ عرب امارات، ترکیۂ، قطر اور ایران کے ساتھ تاریخی مراسم میں مزید بہتری آرہی ہے پاکستان اقوام عالم میں اپنے اصل مقام کےحصول کےلیے پرعزم ہے ہماری خواہش ہے کہ ہم اپنے دوستوں اور شراکت داروں سے تعلقات مزید گہرے کریں ہمارے سامنے ایک تابناک مستقبل ہے بشرطیکہ ہم متحد ، ثابت قدم اور بے خوف رہیں آپ نے دفاع وطن کا مقدس پیشہ اپنایا ہے آپکے راستے میں اندرونی و بیرونی اور دیکھے ان دیکھے خطرات آئینگے اس ملک کی عزت و وقار کی خاطر ہر قربانی کیلئے تیار رہیں میرا امید کا پیغام سب کیلئے ہے ہم سب سے پہلے پاکستانی ہیں اور ہمیں اس عظیم قوم اور ملک پر فخر ہے یاد رکھیں! پاکستان ہماری پہچان اور ہماری بقا کا ضامن ہے پاکستان ہے تو ہم ہیں۔
پاکستان ملٹری اکیڈمی کے کیڈٹس اپنے مخصوص انداز میں ڈرل پریڈ کی مہارت کا شاندار مظاہرہ کر رہے ہیں۔ پاکستان ملٹری کے کمانڈنٹ میجر جنرل افتخار حسن بھی تقریب میں شریک ہیں۔
مزید یہ بھی پڑھیں؛
لاہور:سفاک شوہر نے اپنی امریکن نیشنل اہلیہ کو تشدد کرکے قتل کردیا
ون ویلرز اور ہلڑبازی کرنے والوں کےخلاف کریک ڈاؤن کا فیصلہ
76 ویں یوم آزادی: پاکستان ملٹری اکیڈمی کاکول میں آزادی پریڈ کا انعقاد
گریٹر پارک میں یوم آزادی کی تقریب ،آتشبازی اور میوزیکل پروگرام کا انعقاد
آزادی پریڈ کے دوران سرزمین پاکستان اور مادرِ وطن کے شہداء کو خصوصی خراج تحسین پیش کیا جا رہا ہے جبکہ یہ تقریب اس حقیقت کا بہترین اظہار ہے کہ پاکستانی عوام ایک زندہ دل قوم ہیں جو اپنی آزادی کا جشن بھرپور اور پُرجوش انداز میں مناتے ہیں۔
