مسلم لیگ ن کی پارلیمانی پارٹی کا اجلاس کل صبح ساڑھے 10 بجے طلب کر لیا گیا ہے، قومی اسمبلی اورسینیٹ کے ن لیگ کےاراکین کامشترکہ اجلاس ہوگا جس میں اہم فیصلے کئے جانے کی توقع ہے،
باغی ٹی وی کی رپورٹ کے مطابق اجلاس کی صدارت شہبازشریف اور چیئرمین راجہ ظفرالحق مشترکہ طورپرکریں گے، پارلیمانی پارٹی اجلاس میں پارلیمنٹ کےمشترکہ اجلاس بارےحکمت عملی تیارکی جائےگی،
مسلم لیگ ن کی اراکین پارلیمنٹ کو اپنی حاضری یقینی بنانے کی ہدایت کی گئی ہے، واضح رہے کہ مقبوضہ کشمیر کی موجودہ صورتحال پر منگل کو پارلیمنٹ کا مشترکہ اجلاس بلایا گیا ہے۔ مشترکہ اجلاس کے باعث وفاقی کابینہ کا اجلاس ملتوی کردیا گیا ہے جس کے بعد اب کابینہ میٹنگ بدھ کو ہوگی۔
یاد رہے کہ بھارت نے آئین کے آرٹیکل 370 کو ختم کر دیا ہے جس کے تحت مقبوضہ کشمیر اب ریاست نہیں کہلائے گی۔ بھارتی آئین کا آرٹیکل 370 مقبوضہ کشمیر میں خصوصی اختیارات سے متعلق ہے، آرٹیکل 370 ریاست مقبوضہ کشمیر کو اپنا آئین بنانے اور اسے برقرار رکھنے کی آزادی دیتا ہے۔
