وزیر اعظم پاکستان کی معاون خصوصی برائے اطلاعات فردوس عاشق اعوان نے کہا ہے کہ پاکستانی قوم پاک فوج کے ساتھ سیسہ پلائی دیوار کی طرح کھڑی ہے ،
باغی ٹی وی کی رپورٹ کے مطابق انہوں نے کہاکہ وزیراعظم کا امریکی صدرکو ثالثی کے لیے آمادہ کرنا پاکستان کی جیت ہے، وزیراعظم کی قیادت میں کشمیریوں کےزخموں پرمرہم رکھیں گے، پاکستانی قوم کا کشمیر پر دو ٹوک موقف ہے،
فردوس عاشق اعوان نے کہاکہ بھارت نے یہ ثابت کر دیا کہ وہ خطے میں امن کیلیے رکاوٹ ہے،
واضح رہے کہ بھارتی فوج کی طرف سے حالیہ دنوں میں آزاد کشمیر میں شہری آبادی پر کلسٹر بموں کا استعمال کیا گیا ہے جس پر پاکستانی عوام، تاجروں، سماجی تنظیموں اور دیگر تمام شعبہ ہائے زندگی سے تعلق رکھنے والے افراد کی جانب سے حکومت سے مطالبہ کیا جارہا ہے کہ انڈیا کی دہشت گردی کا بھرپور جواب دیا جائے، یہ مطالبہ بھی کیا جارہا ہے کہ فوری طور پر پاکستان کی فضائی حدود بند کر دی جائیں تاکہ ان کی ایئر لائنز کو شدید نقصان سے دوچار کیا جاسکے اور یہ بھی کہا جارہا ہے کہ اگر انڈیا کی طرف سے کسی قسم کی فضائی حدود کی خلاف ورزی کی جائے تو 27 فروری جیسا بھرپور جواب دیا جائے.عوام کی طرف سے بھارتی دہشت گردی کا بھرپور جواب دینے کیلئے حکومتی عہدیداران نے بھی سر جوڑ لئے ہیں اور بھارتی دہشت گردی کا بھرپور جواب دینے کا اعلان کیا گیا ہے، حکومت کی طرف سے آئندہ چند دنوں میں اہم فیصلوں کی توقع ہے،
سوشل میڈیا پر بھی بھارتی جارحیت کی شدید مذمت کی جارہی ہے اور گزشتہ چوبیس گھنٹوں سے بیشتر ٹرینڈ کشمیر اور بھارتی جارحیت کے خلاف چل رہے ہیں. عوامی سطحپر کہا جارہا ہے کہ پاکستان نے انڈیا سے دوستی نبھانے کی ہر ممکن کوشش کی اور اس کے مطالبات تسلیم کئے جاتے رہے ہیں تاہم اس نے ہمیشہ مذاکرات کے نام پر کشمیر پر فوجی قبضہ مستحکم کیا، ریاستی دہشت گردی کو فروغ دیا اور نہتے کشمیریوں کا قتل کیا ہے، اب صورتحال یہاںتک پہنچ چکی ہے کہ بھارتی فوج جنیوا کنونشن کی خلاف ورزی کرتے ہوئے شہریوں پر کلسٹر بم استعمال کر رہی ہے اس لئے انڈیا سے تعلقات ختم کر کے بھارتی دہشت گردی کو تمام بین الاقوامی فورمز پر بے نقاب کیا جائے.
