Author: +9251

وزیر اعظم پاکستان عمران خان جو اس وقت شنکھائی تعاون تنظیم اجلاس میں شرکت کیلئے کرغزستان میں‌ ہیں‌، نے روس سے ہتھیاروں کی خریداری میں دلچسپی ظاہر کی اور کہا ہے کہ پاکستان اور روس کی عسکری قیادت اس سلسلہ میں‌ پہلے سے باہم رابطے میں‌ہے.

باغی ٹی وی کی رپورٹ‌ کے مطابق وزیر اعظم عمران خان نے یہ بات روس کے سرکاری ٹی وی کو دیے جانے والے ایک انٹرویو میں‌ کی ہے. ان کا کہنا تھاکہ روس کے صدر ولادی میر پیوٹن سے بشکیک میں ہونے والے شنگھائی تعاون تنظیم کے سربراہ اجلاس میں ملاقات ہوگی جس میں اہم امور زیر بحث آئیں‌ گے اور باہم دلچسپی کے امور پر تبادلہ خیال کیا جائے گا. انٹرویو کے دوران وزیر اعظم عمران خان سے پاکستان اور روس کی فوجوں‌کے مابین مشترکہ جنگی مشقوں‌ سے متعلق بھی سوال کیا گیا تو اس کے جواب میں‌ ان کا کہنا تھا کہ پچھلے کچھ عرصہ میں‌ دونوں ممالک کے دفاعی تعلقات میں بہت بہتری آئی ہے اور میں‌ سمجھتا ہوں‌کہ ان میں مزید بہتری کی امید ہے۔

عمران خان کا کہنا تھا کہ 50، 60 اور 70 کی دہائی کا عرصہ سرد جنگ کی نذر ہوا، اس عرصہ میں انڈیا سوویت یونین کے قریب تھا اور پاکستان امریکی کیمپ میں تھا لیکن اب یہ صورتحال نہیں ہے. اس وقت پاکستان اور بھارت دونوں کے ہی امریکہ کے ساتھ دوستانہ تعلقات ہیں، اس وقت اس دور کی سرد جنگ جیسی صورتحال نہیں ہے، ہم نے اس عرصہ میں‌ روس کے ساتھ اپنے رابطوں میں بہتری پیدا کرنے کی کوشش کی ہے۔

واضح رہے کہ وزیر اعظم عمران خان شنگھائی تعاون تنظیم اجلاس میں شرکت کیلئے کرغزستان ہیں جہاں‌ ان کی روسی صدر سمیت دیگر ممالک کے سربراہان سے بھی ملاقاتیں‌ متوقع ہیں.

برطانوی وزیراعظم تھریسامے کی جانب سے استعفیٰ کے اعلان کے بعد نئے وزیر اعظم کی دوڑ میں‌ سابق وزیر خارجہ بورس جانسن 114 ووٹ لے کر سر فہرست رہے ہیں‌ جبکہ دوسری جانب پاکستانی نژاد وزیر داخلہ ساجد جاوید نے 23 ووٹ حاصل کرکے پانچویں پوزیشن حاصل کی ہے.

باغی ٹی وی کی رپورٹ‌ کے مطابق برطانیہ کے موجودہ وزیر خارجہ جیریمی ہنٹ حکمران جماعت کی سربراہی اور وزارت عظمیٰ کی کرسی کیلئے ہونے والی ووٹنگ میں 43 ووٹ حاصل کر کے دوسرے نمبر پر رہے ہیں۔ برطانیہ کی حکمران جماعت کنزرویٹو پارٹی کے سربراہ اور ملک کے نئے وزیر اعظم کے انتخاب کیلئے جمعرات کو ہونے والی ووٹنگ میں سابق وزیر خارجہ بورس جانسن سب سے مضبوط امیدوار بن کر سامنے آئے ہیں‌ اور انہوں نے وزارت عظمیٰ کیلئے پہلے بیلٹ میں سب سے زیادہ 114 ووٹ حاصل کیے ہیں۔

رپورٹ کے مطابق پہلے مرحلے میں 10 میں سے وہ تین امیدوار ناک آﺅٹ ہوگئے ہیں جنہوں نے 17 سے کم ووٹ حاصل کئے. ان میں اینڈریا لیڈسم، مارک ہارپر اور ایستھر میک وے شامل ہیں۔ تھریسا مے کے استعفے کے بعد ملک کے نئے وزیر اعظم کی دوڑ میں شامل امیدواروں کی تعداد 10 سے کم ہو کر 7 رہ گئی ہے۔ بورس جانسن جنہوں‌ نے سب سے زیادہ ووٹ حاصل کئے ہیں‌ وہ بریگزٹ‌ کے حامی ہیں. آج سابق وزیر خارجہ بورس جانسن نے برطانوی دارالعوام کے ایوان زیریں میں کنزرویٹو پارٹی کے قانون سازوں کی خفیہ ووٹنگ میں ڈالے جانے والے 313 میں سے 114 ووٹ حاصل کر کے بڑی کامیابی حاصل کی ہے۔

برطانیہ کے وزیر اعظم کے لیے 2016 میں ہونے والی ووٹنگ میں دوسرے نمبر پر رہنے والی اینڈریا لیڈسَم، مارک ہائیپر اور ایستھر مِک وے مطلوبہ 17 ووٹ حاصل کرنے میں ناکام رہے اور وزارت عظمیٰ کی دوڑ سے باہر ہوگئے ہیں‌۔ واضح رہے کہ کنزر ویٹو پارٹی کی سربراہی اور وزارت عظمیٰ کی کرسی کیلئے پارٹی کے ارکان اسمبلی ووٹ کرتے ہیں. پہلا مرحلہ مکمل ہونے کے بعد اب یہ ارکان دوسرے مرحلے کیلئے ووٹنگ کریں گے آئندہ ووٹنگ اب اٹھارہ، انیس اور بیس جون کو ہوگی۔ برطانوی وزیر اعظم کے انتخاب کیلئے حتمی مرحلے میں ووٹنگ 22 جون کو ہوگی جس کے نتائج کا اعلان 4 ہفتے بعد کیا جائے گا.

یاد رہے کہ 30 جولائی کو نئے برطانوی وزیر اعظم اپنے عہدے کا حلف اٹھائیں‌ گے۔

وزیر اعظم پاکستانی عمران خان شنگھائی تعاون تنظیم اجلاس میں شرکت کیلئے کرغزستان پہنچ گئے ہیں‌. اس موقع پر انہوں نے غیر ملکی میڈیا کو دیے گئے اپنے تازہ انٹرویو میں‌ کہا ہے کہ ہم ہندوستان سے بہتر تعلقات کیلئے بھارتی مارکیٹ تک رسائی حاصل کر رہے ہیں. حقیقت ہے کہ جب ہمارے اپنے پڑوسی ممالک کے ساتھ تعلقات خراب ہوتے ہیں تو اس وقت لازمی طور پر ہمیں مشکل کا سامنا کرنا پڑتا ہے۔

باغی ٹی وی کی رپورٹ کے مطابق وزیر اعظم عمران خان نے کہاکہ شنگھائی تعاون تنظیم کے ممالک نے ہمیں نئی آوٹ لٹس تک رسائی فراہم کی ہے اور یقیناً اب اس میں بھارت بھی شامل ہے جس سے ہم ہمارے دو طرفہ تعلقات انتہائی کمزور ہیں۔ پاکستان کا ہمیشہ مغرب سے بہتر تعلقات استوار کرنے پر زور رہا ہے تاہم اب ہم نئی مارکیٹوں تک رسائی حاصل کرنے کی کوشش کر رہے ہیں اور اس کے لیے ہم شنگھائی تعاون تنظیموں کے ممالک سے تعلقات مزید بہتر کرنے کی کوشش کریں گے۔ ان کا کہنا تھاکہ ہم خطے میں امن چاہتے ہیں جنگ سے کسی کو بھی فائدہ نہیں ہو گا۔

واضح رہے کہ وزیراعظم عمران خان شنگھائی تعاون تنظیم کے اجلاس میں شرکت کےلیے کرغزستان پہنچ گئے ہیں. اس موقع پر ان کے ہمراہ وزیر خارجہ مخدوم شاہ محمود قریشی اور معاون خصوصی عثمان ڈار بھی ہیں۔ کرغزستان کے دارالحکومت بشکک روانگی سے قبل میڈیا سے گفتگو کرتے ہوئے شاہ محمود قریشی نے کہا کہ ایس سی او اجلاس کا مقصد خطے کی اقتصادی حالت کے اقدامات کا جائزہ لینا ہے، چند روز قبل او آئی سی کی وزرائے خارجہ کونسل کا اجلاس ہوا تھا۔