Author: +9251

پاکستان اور بھارت باہم بات چیت کا آغاز کریں، میر واعظ عمر فاروق کا مطالبہ

حریت کانفرنس (ع) کے چیئرمین میر واعظ عمر فاروق نے کہا ہے کہ پاکستان اور بھارت شنگھائی تعاون تنظیم کے آئندہ اجلاس میں تعطل کو دور کرتے ہوئے ایک دوسرے کے ساتھ بات چیت کا آغازکریں۔

باغی ٹی وی کی رپورٹ کے مطابق میر واعظ عمر فاروق کی زیر صدارت جمعرات کے دن حریت (ع) فورم کا اجلاس ہوا جس میں حالیہ دنوں میں نام نہاد سرچ آپریشن کے دوران کشمیریوں کی شہادتوں پر گہری تشویش کا اظہار کیا گیا۔ اجلاس کے شرکاءنے مطالبہ کیا کہ مقبوضہ کشمیر میں نہتے کشمیریوں پر جاری مظالم اور قتل عام کا سلسلہ ختم کرنے کیلئے سیاسی مذاکرات آگے بڑھنے کاموثر راستہ ہیں۔ میر واعظ کی زیر صدارت اجلاس کے شرکاء نے بھارت اور پاکستان کی قیادت پر زوردیا کہ وہ باہم مذاکرات کے سلسلہ میں قدم آگے بڑھائیں۔

اجلاس کے شرکاء نے اس امر پر افسوس کا اظہار کیاکہ کشمیری عوام کودہائیوں سے جاری تنازعے کے سنگین نتائج سامنا ہے اور ہر روز کشمیر میں نام نہاد سرچ آپریشن کے نام پر نہتے کشمیریوں‌ کو شہید کیا جارہا ہے. یاد رہے کہ پچھلے چھتیس گھنٹے میں بھی تین کشمیریوں‌ کو شہید اور متعدد کو زخمی کیا گیا ہے.

جون 13, 2019
عارف حمید بھٹی نے اے آر وائی نیوز کو خیر باد کہہ دیا، بڑے ٹی وی نیٹ ورک میں‌ چیف آپریٹنگ آفیسر تعیناتی

پاکستان کے سینئر صحافی ، تجزیہ کار اور اینکر عارف حمید بھٹی نے اے آر وائی نیوز کو خیر باد کہہ دیا ہے. گورمے کے چینل جی این این نے خبر نشر کی ہے کہ وہ ان کے چینل کا حصہ بن گئے ہیں.

باغی ٹی وی کی رپورٹ‌ کے مطابق عارف حمید بھٹی اپنے منفرد تجزیوں‌ اور تبصروں‌ کی بدولت معروف ہیں اور ان کے پروگرام کو دلچسپی سے دیکھا اور پسند کیا جاتا ہے. سینئر صحافی عارف حمید بھٹی نے جمعرات کے دن صابر شاکر کے ہمراہ اے آر وائی نیوز پر اپنا الوداعی پروگرام کرتے ہوئے اپنی ٹیم کے بارے میں نیک خواہشات کا اظہار کیا. اس دوران انہیں پھولوں کا گلدستہ بھی پیش کیا گیا۔ آج ان کا اے آر وائی نیوز پر آخری پروگرام تھا جس کے بعد جی این این چینل نے بھی خبر نشر کردی کہ عارف حمید بھٹی ان کے ٹی وی چینل کا حصہ بن گئے ہیں۔

سینئر صحافی اور اینکر عارف حمید بھٹی پچھلے کئی برسوں سے اے آر وائی نیوز لاہور کے بیورو چیف تھے تاہم اب انہوں‌ نے جی این این چینل میں بطور چیف آپریٹنگ آفیسر ( سی او او) ذمہ داریاں سنبھالی ہیں، بتایا گیا ہے کہ وہ وہ نئے چینل پر حالات حاضرہ کا پروگرام بھی کریں گے۔

عارف حمید بھٹی صحافی برادری میں بہت معروف ہیں اور پی یو جے کے مرکزی عہدیدار بھی رہے ہیں.

جون 13, 2019
ابھی نندن سے متعلق مزاحیہ اشتہار، انتہاپسند بھارتیوں‌ کا پاکستان کو ورلڈ کپ سے باہر نکالنے کا مطالبہ

پاکستان میں‌ موبائل کمپنی کی جانب سے ہندوستانی پائلٹ ابھی نندن سے مشابہہ اداکار کا اشتہار چلانے پر بھارتی سخت سیخ‌ پا ہیں‌ اور بعض انتہاپسند بھارتیوں‌ نے پاکستان کو ورلڈ کپ سے باہر نکالنے کا مطالبہ کیا ہے.

باغی ٹی وی کی رپورٹ کے مطابق پاکستان اور بھارت کے درمیان میچ سے قبل موبائل کمپنی کی طرف سے یہ مزاحیہ ایڈ نشر کرنے پر انتہاپسند بھارتی سخت شور شرابا کر رہے ہیں‌ اور کہا جارہا ہے کہ ہمارے فوجی ہمارا فخر ہیں اور اس اشتہار میں ہمارے فوجیوں کی عزت پر حملہ کیا گیا ہے. موبائل کمپنی کے اس مزاحیہ اشتہار کے بعد بھارتیوں‌کو آگ لگی ہوئی ہے اور میچ سے قبل ماحول سخت گرم ہو گیا ہے. بھارتی انتہاپسندوں‌ کا کہنا ہے کہ ہندوستانی ٹیم کو ہر صورت پاکستان سے میچ جیتنا چاہیے.

رپورٹ کے مطابق موبائل کمپنی کے اشتہار میں پاکستان کی جانب سے گرائے جانے والے بھارتی جنگی طیارے کے پائلٹ ابھی نندن کے حلیے والے شخص کو پیش کیا گیا ہے۔ مذکورہ اشتہار میں اداکار جس کی مونچھیں ابھی نندن جیسی ہیں اور وہ بھارتی کرکٹ سے مشابہ جرسی پہنے تفتیشی ویڈیو میں دکھایا گیا ہے ۔ ابھی نندن سے مشابہہ اداکار ہر سوال کا جواب دینے سے انکار کرتے دکھائی دیتا ہے اور ورلڈ کپ میں بھارتی ٹیم سے متعلق ہر سوال کے جواب میں یہی کہتا ہے کہ ’یہ میں آپ کو نہیں بتا سکتا. اسی دوران جب اس سے چائے کے متعلق سوال ہوتا ہے تو وہ آخر میں وہ چائے کو عمدہ قرار دیتا ہے اور کپ سمیت روانہ ہونے لگتا ہے تو سوال کرنے والا اس سے کہتا ہے کہ ’کپ یہیں‌ چھوڑ کر جاؤ۔

موبائل کمپنی کی طرف سے جاری کردہ اس ویڈ یو ایڈ پر بھارتی انتہاپسندوں‌ نے سخت ناراضگی کا اظہار کیا ہے اور سوشل میڈیا پر یہ مطالبہ کیا جارہا ہے کہ پاکستان کو ورلڈ کپ سے باہر نکالاجائے.

جون 13, 2019
پتوکی سے منشیات فروش گرفتار , تھانہ صدر میں مقدمہ درج

پتو کی ، قصور:-
ڈی پی او قصور عبدالغفار قیصرانی کی ہدایت پر تھانہ صدر پتوکی کے ایس ایچ او محمود الحسن کی زبردست کاروائی کاروائی۔

باغی ٹی وی کی رپورٹ کے مطابق بدنام زمانہ منشیات فروش سہیل انجم کو پولیس ناکے پر چیکنگ کے دوران حراست میں لیا گیا ہے۔ چار کلو چرس برآمد تفصیلات کے مطابق ڈی پی او قصور کی ہدایت پر چلائی گئی خصوصی مہم کے دوران تھانہ صدر پتوکی کے ایس ایچ او محمود الحسن نے کاروائی کرتے ہوئے پھولنگر کے رہائشی بدنام زمانہ منشیات فروش سہیل انجم کو موٹر سائیکل سمیت گرفتار کرکے ان کے قبضہ سے چار کلوچرس برآمد کر لی ۔پولیس کو اطلاع ملی کہ بدنام زمانہ منشیات فروش اپنی موٹر سائیکل نمبریLEX/7702پر سوار ہوکر چرس لیکر فروخت کیلئے آرہا ہے جس پر پولیس نے بھونیکے موڑ کے قریب ناکہ بندی کر لی ۔پولیس نے منشیات فروش کو گرفتار کرکے اس کے قبضہ سے چارکلوچرس برآمد کر کے موٹر سائیکل قبضہ میں لے لی ملزم کے خلاف تھانہ صدر پولیس پتوکی نے مقدمہ درج کرکے اسے ڈسٹرکٹ جیل قصور بھجوا دیا ہے ۔

جون 13, 2019
پی سی بی احسان مانی کا پی ایس ایل 5 کے متعلق اہم اعلان، شائقین کرکٹ کے لۓ خوشخبری

احسان مانی نے پی ایس ایل 5 کے تمام میچز پاکستان میں کرانے کا اعلان کر دیا.
باغی ٹی وی کی رپورٹ کے مطابق احسان مانی نے کہا ہے کہ پی ایس ایس ایل 5 کے میچز لاہور اور کراچی کے ساتھ ملتان اور راولپنڈی میں بھی ہوں گے.

جون 13, 2019
صدر مملکت کی منظوری، وفاقی ٹیکس محتسب مشتاق سکھیرا کو عہدے سے ہٹا دیا گیا

وفاقی حکومت نے صدر پاکستان ڈاکٹر عارف علوی کی طرف سے منظوری دیے جانے کے بعد مشتاق احمد سکھیرا کو وفاقی ٹیکس محتسب کے عہدے سے ہٹا دیا ہے۔

باغی ٹی وی کی رپورٹ‌ کے مطابق صدر مملکت کی منظوری کے بعد وزارت قانون و انصاف نے وفاقی ٹیکس محتسب کی برطرفی کا نوٹی فکیشن جاری کردیا ہے۔ مشتاق احمد سکھیرا 2017 سے وفاقی ٹیکس محتسب تعینات تھے جبکہ وہ اس سے پہلے آئی جی پنجاب بھی رہ چکے ہیں۔ سینئر پولیس آفیسر مشتاق احمد سکھیرا 3 عشرے تک پنجاب پولیس میں اپنی خدمات انجام دیتے رہے ہیں‌ اور اس کے بعد اپریل 2017 میں ریٹائرڈ ہوگئے تھے۔ ان کی ریٹائرمنٹ کے بعد اسی سال مسلم لیگ (ن) کی حکومت نے انہیں وفاقی ٹیکس محتسب مقرر کیا تھا۔

وزارت قانون و انصاف کی جانب سے مشتاق سکھیرا کا 31 اگست 2017 کو بطور وفاقی ٹیکس محتسب تعیناتی کا نوٹی فکیشن واپس لے لیا ہے۔ یاد رہے کہ گزشتہ برس سابق آئی جی پنجاب مشتاق سکھیرا پر سانحہ ماڈل ٹاؤن کی بھی فرد جرم عائد کی گئی تھی. جب سانحہ ماڈل ٹاؤن ہوا تھا تو اس وقت مشتاق سکھیرا پنجاب پولیس کے سربراہ تھے.

جون 13, 2019
گجرات پولیس کا ضلع بھر میں آپریشن جاری، 4 رکنی خطرناک ڈکیت گینگ گرفتار

گجرات (نمائندہ باغی ٹی وی) ڈی پی اوگجرات سید علی محسن کی زیر قیادت گجرات پولیس کا ضلع بھرمیں جرائم پیشہ عناصر کے خلاف آپریشن جاری، کھاریاں کے علاقہ میں اسلحہ کے زور پرڈکیتاں کرنے والا 4چار رکنی خطرناک ڈکیت گینگ اسلحہ سمیت گرفتار،مال مسروقہ برآمد
تفصیلات کے مطابق ڈی پی او گجرات سید علی محسن کی زیر قیادت گجرات پولیس کی کامیابیوں کا سلسلہ جاری۔SHO تھانہ صدر کھاریاں SIسرفراز انجم نے اپنی ٹیم کے ہمراہ کاروائی کرتے ہوئے کھاریاں میں اسلحہ کے زور پر دیہاتیوں سے مال مویشی چھیننے والے چار رکنی خطرناک ڈکیت گینگ کو اسلحہ سمیت گرفتار کر لیا۔گرفتار ہونے والے ملزمان میں 1۔اصغر علی ولد مختار شاہ سکنہ کوٹ قطب دین 2۔عثمان ولد محمد صادق سکنہ کوٹ قطب دین 3۔غفور حسین ولد ذاکر حسین سکنہ ضلع فیصل آباد 4۔حسن ظہیر ولد محمد علی سکنہ ضلع فیصل آباد شامل ہیں۔ملزمان کے قبضہ سے مال مسروقہ 3لاکھ 75ہزار روپے نقدی،موبائل فون اور وارداتوں میں استعمال ہونے والا اسلحہ 2عدد پسٹل 30بور بھی برآمد کر لیے گئے۔ملزمان سے تفتیش جاری ہے جس میں مزید انکشافات متوقع ہیں۔ ڈسٹرکٹ پولیس آفیسر سید علی محسن نے ڈکیت گینگ کو گرفتار کر کے مال مسروقہ برآمد کرنے والی ٹیم کو خصوصی شاباش دی اور تعریفیسرٹیفکیٹ سے نوازا۔

جون 13, 2019
شیو سینا نے مقبوضہ کشمیر میں ہندو وزیر اعلیٰ‌ لانے کا مطالبہ کر دیا

جموں‌ کشمیر میں‌ ہندو انتہاپسند تنظیم شیو سینا کے مقامی عہدیدار منیش ساہنی نے مقبوضہ کشمیر میں‌ ہندو وزیر اعلیٰ لانے کا مطالبہ کیا ہے.

باغی ٹی وی کی رپورٹ‌ کےمطابق منیش ساہنی کا کہنا تھا کہ اس مرتبہ وزیر اعلیٰ جموں‌ سے ہونا چاہیے. اب وہ دن دور نہیں ہے جب جموں کو اپنا پورا حق ملے گا۔ یہ بات انہوں نے ایک تقریب کے دوران کی جس میں‌ یش پال کھجوریہ ،وکاس، راجو چودھری، اشوک کمار،پنکج ساہنی،بلونت سنگھ ،سکندر سنگھ ،دلجیت سنگھ ودیگر ہندوانتہاپسند بھی موجود تھے۔

رپورٹ کے مطابق ہندوانتہاپسندوں‌کی جانب سے جموں‌ کے ہندوؤں‌ کو خاص طور پر یہ کہہ کر بھڑکایا جارہا ہے کہ جموں‌ کشمیر کا وزیر اعلیٰ اب ہندو ہونا چاہیے.

جون 13, 2019
قصور رائیونڈ روڈ حادثات کا گڑھ بن گیا

قصور:-
قصور رائیونڈ روڈ ٹوٹ پھوٹ کا شکار ہونے کی وجہ سے روز بروز حادثات میں اظافہ ہو رہا ہے۔
باغی ٹی وی کی رپورٹ کے مطابق قصور شہر سمیت کئی دیگر قصبوں اور دیہاتوں کو رائیونڈ شہر سے ملانے والی 25 کلومیٹر سڑک گزشتہ 6 سال ٹوٹ پھوٹ کا شکار ہے۔ 25 کلومیٹر طویل یہ 2 رویہ سڑک 50 سے زائد دیہاتوں کو آپس میں ملاتی ہے۔

قصور رائیونڈ روڈ پر سفر کرنا موت کا باعث بن رہا ہے۔ آج شام بھی 4 موٹر سائیکل سواروں کا گڑھوں سے بچتے ہوئے تصادم ہو گیا تھا۔ جس کے نتیجے میں 4 افراد کی ٹانگیں ٹوٹ گئی ہیں اور 2 افراد زخمی بھی ہوئے ہیں۔

تفصیلات کے مطابق یہ واقعہ شام 6 بجے اٹھیل پور کے نزدیک واقع چٹی مسجد سٹاپ پر پیش آیا تھا۔
زخمیوں کو فوری طور پر ہسپتال منتقل کر دیا گیا ہے۔

جون 13, 2019
ضلع قصور کے بہترین اور واحد ٹی بی کلینک کی منتقلی کا فیصلہ

پتوکی ، قصور:-

باغی ٹی وی کی رپورٹ کے مطابق ضلع قصور کے واحد ٹی بی کلینک گورنمنٹ ٹی بی ہسپتال پتوکی کو دوسری جگہ منتقل کرنے کا فیصلہ کیا گیا ہے ۔ٹی بی کے مریضوں میں تشویش کی لہر دوڑ گئی ہے۔ عوامی سماجی حلقوں میں شدید غصہ پایا جارہا ہے۔
یاد رہے کہ ضلع قصور کے واحد ٹی بی کلینک جو کہ پتوکی میں گزشتہ کئی سالوں سے ہزاروں ٹی بی کے مریضوں کو مفت ادویات اور علاج معالجے کی سہولتیں فراہم کر رہا ہے اور اس ٹی بی ہسپتال سے اب تک ہزاروں مریض صحت یاب ہوکر خوشگوار زندگی گزار رہے ہیں مگر محکمہ صحت کے حکام نے گورنمنٹ ٹی بی ہسپتال پتوکی کو بلاوجہ ختم کرکے دوسری جگہ منتقل کرنے کیلئے صلاح مشورے شروع کر دیئے ہیں اس فیصلے کی وجہ سے گورنمنٹ ٹی بی کلینک پتوکی میں علاج معالجہ کیلئے آنے والے سینکڑوں مریضوں میں تشویش کی لہر دوڑ گئی ہے جو کہ انتہائی تشویشناک اور افسوسناک بات ہے ۔گورنمنٹ ٹی بی کلینک پتوکی میں ہزاروں مریض مفت علاج معالجے کی وجہ سے صحت یاب ہوچکے ہیں اور اس کلینک کی کارکردگی اپنی مثال آپ ہے ۔

پورے پنجاب میں یہ ٹی بی کلینک علاج معالجے او رسہولتوں کی وجہ سے دوسرے نمبر پر ہے جو اس کی کارکردگی کا منہ بولتا ثبوت ہے عوامی سماجی حلقوں اور مختلف تنظیموں کے نمائندوں اور پتوکی شہر بچاﺅ تحریک کے جنرل سیکرٹری ، سول سوسائٹی نیٹورک کے کوارڈنیٹر اور ہیومن رائٹس کمیٹی تحصیل پتوکی کے صدر ندیم رضا خا ں ایڈووکیٹ اور سٹی پریس کلب پتوکی کے میڈیا کوارڈنیٹر نے خبردار کیا ہے کہ اگر ٹی بی کلینک پتوکی کو دوسری جگہ منتقل کیا گیا تو شدید احتجاج کیا جائے گا۔

انہوں نے محکمہ صحت کے حکام سے مطالبہ کیا کہ گورنمنٹ ٹی بی کلینک پتوکی میں ایکسرے مشین اور دیگر سہولیات بھی فراہم کی جائیں۔ تاکہ علاقے کی عوام اچھی سہولیات سے مستفید ہو سکیں۔

جون 13, 2019