Author: Aqsa Younas Rana


سری لنکن رکن پارلیمنٹ سجیت بریرا نے کہا ہے کہ پاک بھارت میچ دیکھنے کے خواہش مندوں کی بڑی تعداد کے باعث سری لنکا کو بھاری مالی نقصان ہو رہا ہے۔
جیو نیوز سے خصوصی گفتگو میں سجیت بریرا نے بھارت پر غیر منصفانہ رویہ اختیار کرنے کا الزام عائد کیا اور کہا کہ وہ نامعلوم شرائط عائد کر رہا ہے۔ انہوں نے 1996 کے کرکٹ ورلڈ کپ کی مثال دیتے ہوئے بتایا کہ اس وقت آسٹریلیا اور ویسٹ انڈیز نے سری لنکا آنے سے انکار کر دیا تھا، مگر پاکستانی ٹیم آئی اور میچ کھیلا، جس پر پاکستانی عوام نے فائنل میں سری لنکن ٹیم کی حمایت کی۔
‎بریرا نے زور دیا کہ سیاست کو کرکٹ سے دور رکھا جانا چاہیے اور بھارت سیاسی دباؤ کے تحت کھیل پر اثر انداز ہو رہا ہے۔
‎دوسری جانب سری لنکا کرکٹ نے پاکستان کرکٹ بورڈ سے بھارت کے خلاف میچ کے بائیکاٹ پر نظرثانی کی درخواست بھی کردی۔ میڈیا رپورٹس کے مطابق، سری لنکا کرکٹ نے کہا ہے کہ بائیکاٹ کے اعلان سے ملک کے ٹورازم سیکٹر پر منفی اثر پڑا اور بڑی تعداد میں فینز نے ہوٹل کی بکنگ منسوخ کر دی۔

نامور بھارتی گلوکار اریجیت سنگھ نے 27 جنوری کو پلے بیک سنگنگ سے ریٹائرمنٹ کا اعلان کیا تھا، جس کے بعد مداح کافی مایوس تھے۔ تاہم، خوشخبری یہ ہے کہ فلمی گانوں کو خیرباد کہنے سے پہلے اریجیت سنگھ کا نیا گانا سننے کو ملنے والا ہے۔
‎یہ گانا شارٹ فلم ‘ایکووز آف اس’ کے لیے تیار کیا گیا ہے اور اسے اریجیت سنگھ اور لولیا وینتر نے گایا ہے۔ لولیا وینتر کے بارے میں خیال کیا جاتا ہے کہ وہ بالی وڈ سپر اسٹار سلمان خان کی مبینہ گرل فرینڈ ہیں۔
‎یہ فلم لولیا وینتر کی اداکاری میں پہلی فلم ہے، جس میں دیپک تجوری اور ہسپانوی اداکارہ الیسینڈرا وہیلن میریڈیز بھی شامل ہیں۔ فلم کے ہدایت کار جو راجن ہیں اور گانے کا موسیقی لیبل سلمان خان فلم میوزک کے تحت ہے۔
‎لولیا وینتر کا موسیقی کا سفر گلوکار ہمیش ریشمیا کے گانے ‘ایوری نائٹ اینڈ ڈے’ سے شروع ہوا تھا اور بعد میں انہوں نے سلمان خان کی فلم ’سکندر‘ میں لتا منگیشکر کے شہرہ آفاق گانے ‘لگ جا گلے’ کے ورژن کے لیے اپنی آواز دی۔ انہوں نے سلمان خان کی حوصلہ افزائی کو اپنے کیریئر میں اہم قرار دیا اور کہا کہ ان کے اعتماد نے انہیں اپنے ٹیلنٹ پر یقین دلایا۔

ایران اور امریکا نے عمان میں مذاکرات کے بعد مذاکرات جاری رکھنے پر اتفاق کیا ہے اور کہا کہ آئندہ دنوں میں مشاورت کے بعد مذاکرات کے اگلے دور کی تاریخ مقرر کی جائے گی۔
‎ایرانی وزیر خارجہ عباس عراقچی نے میڈیا سے گفتگو میں کہا کہ امریکا کے ساتھ مذاکرات کا آغاز مثبت رہا اور بالواسطہ گفتگو کے دوران دونوں فریقین نے اپنے خیالات اور تحفظات ایک دوسرے تک پہنچائے۔ انہوں نے کہا کہ مذاکرات کار مشاورت کے لیے اپنے ملک واپس جائیں گے اور بات چیت جاری رہے گی، تاہم امریکا کے ساتھ "بے اعتمادی کی دیوار” کو عبور کرنا ہو گا۔
‎عباس عراقچی نے ایکس پر بیان میں کہا کہ ایران نیک نیتی کے ساتھ واشنگٹن سے مذاکرات میں شریک ہے اور اپنے حقوق کا بھرپور دفاع کرے گا، جبکہ وعدوں کا احترام ضروری ہے۔
‎امریکی وفد میں صدر ڈونلڈ ٹرمپ کے داماد جیرڈ کشنر اور نمائندہ خصوصی برائے مشرق وسطیٰ اسٹیو وٹکوف شامل ہیں۔ وائٹ ہاؤس کی ترجمان کیرولین لیویٹ نے کہا کہ صدر ٹرمپ مذاکرات پر گہری نظر رکھے ہوئے ہیں تاکہ یہ طے کیا جا سکے کہ ایران کے ساتھ کوئی معاہدہ ممکن ہے یا نہیں، اور اگر مذاکرات ناکام ہوئے تو صدر کے پاس دیگر آپشنز بھی موجود ہیں۔