Author: Aqsa Younas Rana


یوٹیوب کی جانب سے مسلسل کوشش کی جا رہی ہے کہ مفت سروس استعمال کرنے والے صارفین کو پریمیئم پلان کی طرف منتقل کیا جائے، جس کے تحت اب ایک مقبول فیچر تک مفت صارفین کی رسائی محدود کرنے کا فیصلہ کیا گیا ہے۔
رپورٹس کے مطابق یوٹیوب موبائل براؤزرز پر بیک گراؤنڈ پلے بیک فیچر کو مفت صارفین کے لیے بند کرنے کے اقدامات کر رہا ہے۔ یہ فیچر صارفین کو اس وقت بھی ویڈیو یا آڈیو چلانے کی سہولت دیتا ہے جب ایپ یا براؤزر بیک گراؤنڈ میں ہو۔
‎کافی عرصے سے مفت صارفین گوگل کروم کے علاوہ دیگر موبائل براؤزرز جیسے مائیکرو سافٹ ایج، بریو اور سام سنگ انٹرنیٹ کے ذریعے اس فیچر سے فائدہ اٹھا رہے تھے، حالانکہ کروم پر یہ سہولت صرف یوٹیوب پریمیئم صارفین کو حاصل ہے۔
‎تاہم حالیہ دنوں میں متعدد صارفین نے شکایت کی ہے کہ اب یہ فیچر ان کے موبائل براؤزرز پر کام نہیں کر رہا۔ گوگل نے اس حوالے سے تصدیق کی ہے کہ موبائل براؤزرز پر بیک گراؤنڈ پلے بیک کے استعمال کے خلاف اقدامات کیے جا رہے ہیں۔
‎گوگل کے مطابق یہ فیچر خاص طور پر یوٹیوب پریمیئم صارفین کے لیے ڈیزائن کیا گیا ہے، جبکہ کچھ مفت صارفین موبائل براؤزرز کے ذریعے اس تک رسائی حاصل کر رہے تھے، جسے روکنے کے لیے بتدریج کریک ڈاؤن کیا جا رہا ہے۔ کمپنی کا کہنا ہے کہ مستقبل میں تمام مفت صارفین کے لیے یہ فیچر مکمل طور پر بند کر دیا جائے گا۔


ایران میں خواتین کو باضابطہ طور پر موٹر سائیکل چلانے کی اجازت دے دی گئی ہے، جس کے بعد اب خواتین موٹر سائیکل چلانے کا لائسنس بھی حاصل کر سکیں گی۔
غیر ملکی خبررساں ایجنسی کے مطابق مقامی میڈیا کا کہنا ہے کہ اس فیصلے سے موٹر سائیکل چلانے کے حوالے سے برسوں سے موجود قانونی ابہام ختم ہو گیا ہے۔ اس سے قبل قانون میں خواتین کے موٹر سائیکل یا اسکوٹر چلانے پر واضح پابندی موجود نہیں تھی، تاہم عملی طور پر حکام خواتین کو لائسنس جاری کرنے سے انکار کرتے رہے تھے۔
‎اس قانونی خلا کے باعث ٹریفک حادثات کی صورت میں خواتین کو قانونی طور پر ذمہ دار بھی ٹھہرایا جاتا رہا، حالانکہ انہیں باقاعدہ لائسنس حاصل کرنے کی اجازت نہیں دی جاتی تھی۔
‎ایران کے نائب صدر محمد رضا عارف نے ایک نئی قرارداد پر دستخط کیے ہیں، جس کا مقصد ٹریفک قوانین کو واضح بنانا ہے۔ یہ قرارداد گزشتہ ماہ کے آخر میں ایرانی کابینہ سے منظور کی گئی تھی۔
‎قرارداد کے تحت ٹریفک پولیس کو پابند کیا گیا ہے کہ وہ خواتین درخواست گزاروں کو عملی تربیت فراہم کرے، پولیس کی نگرانی میں ڈرائیونگ ٹیسٹ لے اور کامیاب امیدواروں کو موٹر سائیکل چلانے کا باقاعدہ لائسنس جاری کرے۔

‎آسٹریلیا کے شہر ملبورن میں آسٹریلین انڈین کمیونٹی سینٹر کے باہر نصب مہاتما گاندھی کا 426 کلوگرام وزنی کانسی کا مجسمہ چوری ہو گیا ہے۔ یہ مجسمہ 2021 میں انڈین کونسل فار کلچرل ریلیشنز (ICCR) کی جانب سے تحفے میں دیا گیا تھا۔ حکام کے مطابق یہ چوری جنوری 2026 کے اوائل میں ہوئی، تاہم اس کی اطلاع فروری کے شروع میں منظر عام پر آئی۔
‎سی سی ٹی وی فوٹیج کے مطابق چوروں نے اینگل گرائنڈر کا استعمال کرتے ہوئے مجسمے کو ٹخنوں کے مقام سے کاٹا اور اسے اپنے ساتھ لے گئے، جبکہ باقی پاؤں کو پائے راستے پر چھوڑ دیا۔ اس واقعے کی تحقیقات وکٹوریہ پولیس کر رہی ہے اور اسے ایک سنگین "نفرت انگیز جرم” کے طور پر دیکھا جا رہا ہے۔ بھارت نے واقعے کی سخت مذمت کرتے ہوئے آسٹریلوی حکام سے مجسمے کی فوری بازیابی اور مجرموں کی گرفتاری کا مطالبہ کیا ہے۔


ازبکستان کے صدر شوکت مرزائیوف پاکستان کے دو روزہ دورے پر اسلام آباد پہنچ گئے۔ نور خان ائیر بیس پر صدر مملکت آصف علی زرداری اور وزیراعظم شہباز شریف نے ازبک صدر کا پرتپاک استقبال کیا۔ اس موقع پر وفاقی وزیر اطلاعات و نشریات عطاء اللہ تارڑ اور معاون خصوصی ہارون اختر خان بھی موجود تھے۔
صدر مرزائیوف کے خصوصی طیارے سے باہر اترنے پر صدر مملکت اور وزیراعظم نے ان سے پرجوش مصافحہ اور معانقہ کیا۔ وزیر اعظم سے ان کا خوشگوار جملوں کا تبادلہ بھی ہوا۔ معزز مہمان کو اکیس توپوں کی سلامی دی گئی جبکہ روایتی اور ثقافتی لباس میں ملبوس بچوں نے گلدستے پیش کیے اور دونوں ملکوں کے قومی پرچم تھامے ہوئے ان کا خیرمقدم کیا۔ وزیر اعظم نے کابینہ ارکان کو بھی معزز مہمان کا تعارف کرایا۔

امریکا نے سعودی عرب کو ایف۔15 لڑاکا طیاروں کے پرزہ جات فروخت کرنے کی منظوری دے دی ہے، جس کی مجموعی مالیت تقریباً 3 ارب ڈالر ہے۔ امریکی محکمہ دفاع کے مطابق اس ممکنہ معاہدے کے تحت سعودی عرب میں محدود تعداد میں امریکی شہری کنٹریکٹرز یا فوجی عملہ طویل مدت کے لیے تعینات کیا جا سکتا ہے تاکہ پرزہ جات کی تنصیب، مرمت اور تربیت کے عمل کو یقینی بنایا جا سکے۔

یہ منظوری ایسے وقت میں دی گئی ہے جب امریکا تین روز قبل سعودی عرب کو تقریباً 9 ارب ڈالر مالیت کے پیٹریاٹ میزائل سسٹم کی فروخت کی اجازت بھی دے چکا ہے، جو اس بات کی نشاندہی کرتی ہے کہ امریکا خلیجی اتحادیوں کی دفاعی صلاحیت بڑھانے کے لیے سنجیدہ ہے۔

العربیہ کے مطابق سعودی عرب نے اس ڈیل کے تحت ایف۔15 طیاروں کے اسپیئر پارٹس اور مرمتی پرزہ جات، قابل استعمال سامان اور اضافی لوازمات، مرمت اور واپسی کی معاونت، زمینی اور عملے سے متعلق آلات، خفیہ اور غیر خفیہ سافٹ ویئر اور اس کی معاونت، تکنیکی دستاویزات، تربیتی سہولیات، اور امریکی حکومت و کنٹریکٹرز کی جانب سے انجینئرنگ، تکنیکی اور لاجسٹک خدمات کی فراہمی کی درخواست کی تھی۔

پینٹاگون کے مطابق یہ فروخت امریکا کی خارجہ پالیسی اور قومی سلامتی کے اہداف کے لیے اہم ہے کیونکہ اس سے خلیجی خطے میں ایک بڑے غیر نیٹو اتحادی کی دفاعی صلاحیت میں اضافہ ہوگا، جو خطے میں سیاسی استحکام اور معاشی ترقی کے لیے مؤثر کردار ادا کرتا ہے۔

امریکی محکمہ دفاع کا کہنا ہے کہ ایف۔15 جنگی طیاروں سے متعلق یہ فروخت سعودی عرب کی موجودہ اور مستقبل کی ممکنہ خطرات سے نمٹنے کی صلاحیت کو مضبوط بنائے گی، زمینی افواج کے تحفظ میں مدد دے گی اور سینٹ کام کے خطے میں سعودی عرب کے مربوط فضائی اور میزائل دفاعی نظام میں اس کے کردار کو نمایاں طور پر مستحکم کرے گی۔