Author: باغی بلاگز

ملک میں سیاسی جماعتیں و مذہبی جماعتیں جمہوریت، آئین، قانون کی حکمرانی، پارلیمنٹ کی بالادستی کا نعرہ بلند کرتی ہیں تاہم جمہوریت کا قتل سالوں پہلے ہوا اور اس قتل کو رات کے اندھیرے میں دفن کر دیا گیا جس کا خمیازہ ملک عوام اور خود سیاسی جماعتیں تادم تحریر بھگت رہی ہیں۔ میری مراد بھٹو کی ہے۔ پھر بھی ہماری سیاسی اور مذہبی جماعتوں نے سبق حاصل نہیں کیا اور جمہوریت کے قاتلوں کے ساتھ مل کر اقتدار کے مزے لوٹتے رہے۔ آج اگر تحریک انصاف سینہ کوبی کر رہی ہے اور جمہوریت کا نعرہ بلند کر رہی ہے تو تحریک انصاف بھی نوازشریف کی حکومت کے خاتمے پر جشن اور بھنگڑے ڈال رہی تھی آج چوہدری ظہور الٰہی مرحوم کا خاندان بکھر گیا ہے تو اس خاندان نے بھی آمریت کا ساتھ دے کر نوازشریف کے ساتھ بے وفاقی کی تاریخ رقم کی تھی۔ ملکی تاریخ گواہ ہے کہ سیاسی جماعتوں اور مذہبی جماعتوں نے جمہوریت کو مستحکم کرنے میں کوئی کردار ادا نہیں کیا اقتدار کی رسہ کشی میں آمریت کا ساتھ دیا۔ سیاسی جماعتیں و جماعتوں نے گرینڈ الائنس تو بنائے مگر وہ سب ذاتی مفادات اور اقتدار حاصل کرنے کے لئے بنائے گئے۔ آج ملک میں ایک طرف اگر سیاسی انتشار ہے تو دوسری طرف معاشی زوال جس کا خمیازہ ملک اور عوام دونوں بھگت رہے ہیں۔ جمہوریت کا نعرہ لگانے والی سیاسی و مذہبی جماعتوں نے پرویز مشرف کے جمہوری عمل میں بڑھ چڑھ کر حصہ لیا

مسلم لیگ (ن) بھی 2002ء کے انتخابات کے نتیجے میں قائم ہونیوالی اس پارلیمنٹ کا حصہ تھی جس نے مشرف سے حلف لیا۔ آج آئین کے تقدس کا درس دینے والی سیاسی اور مذہبی جماعتوں نے آئین کی پامالی پر جشن منائے ایک نہیں کئی بار آئین کی پامالی پر نہ صرف جشن منائے بلکہ آئین کی پامالی کرنیوالوں کا ساتھ بھی دیا اور قصیدے لکھنے والوں نے قصیدے لکھے۔ آج بھی وقت ہے ملک کی سیاسی و مذہبی جماعتیں جمہوریت اور پارلیمنٹ کو بچا لیں ملک میں جمہوریت کی نفی تخلیق پاکستان کی نفی ہے ایک دوسرے کے خلاف سازشیں کرنا بند کر دیں ملک میں غیر جانبدار الیکشن کے ذریعے ہی تبدیلی ہو سکتی ہے عوام کو ہی اس کا اختیار دیا جائے کہ وہ ووٹ کے ذریعے حکومتیں بنائیں۔ ملک میں جمہوریت کو مستحکم کرنے آئین اور قانون کی حکمرانی کا واحد راستہ انتخابات ہیں ۔ایک دوسرے کی حکومت کو سازش کے ذریعے گرانے سے باز رہیں عوام کی منتخب حکومتوں کو گرانا بھی آمریت کے زمرے میں ہی آتا ہے۔ اس سلسلے میں پارلیمنٹ ہائوس میں تحریک انصاف سمیت بھٹو اور نوازشریف کی منتخب حکومت گرانے میں کردار ادا کرنے والے معافی مانگیں۔

امریکی صدر جوبائیڈن ان دنوں مشرق وسطیٰ کے دورے پر ہیں۔ مگر بہت دیر کی مہرباں آتے آتے کے مصداق ہے۔ روس یوکرین جنگ، امریکی معیشت پر اس کے اثرات۔ امریکہ میں اس وقت مہنگائی 40 سال کی ریکارڈ بلند ترین سطح پر ہے۔ خارجہ محاذ پر یکسر ناکام جوبائیڈن داخلی محاذ پر بھی ناکام ہو چکے ہیں۔ امریکہ میں جو بائیڈن کا گراف تیزی سے گر رہا ہے نومبر کے وسط مدتی انتخابات میں بائیڈن کی ڈیموکریٹک پارٹی کو شکست یقینی نظر آرہی ہے جو ڈیموکریٹک کے لئے انتہائی شرمندگی کا باعث بن سکتی ہے۔

مہنگائی اور تیل کی قیمتوں کے اندرون ملک اور عالمی سطح پر کم کرنے کے لئے امریکہ کو سعودی عرب کی مدد ناگزیر ہے۔ امریکی صدر نے انتخابی مہم میں سعودی عرب کو ترک صحافی جمال خشوگی قتل کا ذمہ دار قرار دیتے ہوئے اچھوت ملک قرار دیا تھا لیکن روس یوکرین جنگ اور امریکی معیشت تیل کی قیمتوں کے اضافے نے امریکی صدر کو سعودی عرب کے دورے پر مجبور کر دیا۔

عالمی سیاسی ماہرین کا کہنا ہے کہ خطے اور عالمی صورتحال کے تناظر میں جو بائیڈن کا دورہ سعودی عرب دونوں ملکوں کے تعلقات میں بہتری لانے میں معاون ثابت ہوگا مگر یہ بھی سچ ہے کہ بائیڈن اپنے دیرینہ عرب حلقوں کو منانے میں بہت دیر کر دی ہے جواب امریکہ کی بہ نسبت روس اور چین پر اعتماد کرنے لگے ہیں۔

روس اور یوکرین کے تناظر میں اقوام متحدہ اور سلامتی کونسل میں روس کے خلاف ہر اقدام پر خلیجی ملکوں نے جو موقف اختیار کیا ہے وہ یہ بتانے کے لئے کافی ہے کہ اب خلیجی ملکوں کو امریکہ پر اعتبار نہیں رہا کیونکہ یوکرین جنگ کے بعد امریکی ساکھ میں گراوٹ اور روس کی ساکھ میں اضافہ ہوا ہے ایسے میں جوبائیڈن کا دورہ مشرق وسطیٰ انتہائی تاخیر سے کی گئی ایک سعی لاحاصل کے سوا کچھ نہیں ہے۔

مسائل اور معاملات کو حل کرنے کی ضرورت ہے ورنہ ؟؟؟ تجزیہ :شہزاد قریشی
سابق وزیراعظم عمران خان کا نعرہ ’’ہم کوئی غلام ہیں ‘‘پر غور و فکر کیا اور اس کے بعد اپنے اوپر اور قوم پر مسلط جاگیرداروں، وڈیروں، سرمایہ داروں، نام نہاد قومی رہنمائوں پر تو غور کرنے کے بعد یہ خیال آیا کہ ہم بحیثیت قوم آزاد کب تھے؟ جس قوم پر غیر ملکی آقائوں کی جگہ ان کے اپنے آقا مسلط ہو جائیں اس قوم کی آزادی ختم ہو جاتی ہے ۔سالوں سے اس ملک کے آقا اس ملک کو اپنی میراث اور اس قوم کو اپنی رعایا سمجھتے ہیں۔ کراچی جسے روشنیوں کا شہر کہا جاتا رہا وہاں پر مسلط پیپلزپارٹی اور ایم کیو ایم کی شاندار کارکردگی کا نظارہ نجی ٹی وی چینلز نے دکھایا کیا ہی منظر تھا ۔دل ہلا دینے والے واقعات ،پورا شہر پانی میں ڈوبا تھا اور رعایا پانی میں بہہ رہی تھی ۔عوام صبر کریں ،پیپلزپارٹی آمدہ قومی انتخابات میں وزارت عظمیٰ کی بھی امیدوار ہے۔ سچ تو یہ ہے کہ ناکام پاکستان بطور ریاست نہیں اور نہ ہی یہ قوم ہے ناکام ہمارے نام نہاد سیاسی رہنما ہیں جنہوں نے اس کامیاب ملک اور قوم دونوں کو ناکام بنا دیا۔

مہنگائی کا یہ عالم ہے کہ چوری اور ڈکیتی کی وارداتوں میں اضافہ ہو چکا ہے وزیر خزانہ کسی بھی ملک کے لئے بڑا اہم عہدہ ہوتا ہے پٹرول ڈیزل اور بجلی گیس وغیرہ کے نرخوں میں جو اضٗافہ ہوا ہے اس نے تو مہنگائی میں مزید اضافہ کر دیا ہے وزیر خزانہ نے پٹرول ڈیزل میں اضافہ کر کے عوام پر جو حملہ کیا ہے ایسا تو کوئی دشمن بھی نہیں کرتا انہوں نے مار کر دھوپ میں ڈال دیا ہے عمران خان کے دور حکومت میں مہنگائی تھی موجودہ وزیر خزانہ نے تو حد عبور کر دی ہے یہ عوام کے ساتھ ناانصافی ہے موجودہ وزیر خزانہ وزارت خزانہ کے منصب پر نہ ہوتے تو اچھا تھا۔

اس وقت قوم جن اداروں پر فخر کرتی ہے وہ عدلیہ، میڈیا، ملکی بقا اور سلامتی کے ادارے ہیں انتظامیہ کا حال تو یوں ہے جس کی لاٹھی اس کی بھینس۔ جانبداری میڈیا کے لئے زہر قاتل ہے میڈیا جب جانبدار ہوتا ہے تو وہ ختم ہو جاتا ہے پرنٹ میڈیا ہو یا الیکٹرانک میڈیا عوام الفاظ کو دیکھتے اور انہی الفاظ سے اس کی قدر و قیمت کا فیصلہ کرتے ہیں موجودہ حالات میں میڈیا کو قومی فریضہ ادا کرنا ہوگا۔ ہمارے سیاستدانوں نے ملک و قوم کو گوناگوں مسائل کے طوفان میں غرق کر دیا ہے اسے پانی اور سائے سے محروم کسی ریگستان میں پھینک دیا ہے عمران حکومت آج کے بڑھتے ہوئے مسائل کی بھی ذمہ دار ہے اور آج کے حکمران بھی ۔ سیاستدان عیش کر رہا ہے اور قوم سسک رہی ہے ۔ موجودہ مسائل اور معاملات کو حل کرنے کی ضرورت ہے ورنہ ؟؟؟

گزشتہ روز سابق وزیراعظم عمران خان نے پریس کانفرنس میں کہا ہے کہ مجھے پتہ ہے کس طرح یہ سازش ہوئی کون کون سازش میں ملوث ہے ۔ مجھے کچھ ہوا تو ویڈیو سب کو بے نقاب کر دے گی۔ دیوار سے لگایا تو سب بتا دوں گا۔ خان صاحب شاید کسی آنے والے انقلاب کی باتیں کر رہے ہیں تادم تحریر وہ ڈراتے ہیں لیکن وہ کس کو ڈرا رہے ہیں یہ پتہ نہیں چل سکا۔ ہر سمت پھیلی ہوئی اخلاقی تباہی کو دیکھ کر کوئی انقلابی دور دور تک نظر نہیں آتا خان صاحب کے ارد گرد بھی ایسے ہی لوگ دکھائی دے رہے ہیں جو انقلابی نہیں۔ عمران خان ملک کی سیاسی تاریخ کا مطالعہ کریں بھٹو کے عدالتی قتل سے لے کر نوازشریف کی وزارت عظمیٰ تک سفرنامے کا مطالعہ کریں ٹھنڈے دل و دماغ سے سوچیں غور و فکر کریں اپنی سیاسی جماعت کی سربراہی کریں۔ باقی سیاسی جماعتوں کی طرح پارلیمنٹ کی بالادستی، قانون کی حکمرانی کا نعرہ لگاتے رہیں۔ صاف و شفاف الیکشن کی صدائیں لگاتے رہیں۔ عوام کے دکھوں کا ذکر کرتے رہا کریں ہر الیکشن میں یہی عوام لائنوں میں کھڑے ہو کر ووٹ کا استعمال کرتی ہے۔ ملکی سیاست میں نظریات دفن ہو چکے نظریاتی سیاست کرنے والے سیاستدان فانی دنیا سے رخصت ہو گئے یقین نہیں آتا تو بھٹو کا عدالتی قتل جو ایک زخم، خلش اور درد بن کر عوام کے دلوں اور دماغوں میں اتر گیا تھا

پیپلزپارٹی کی رگوں میں طویل عرصے تک دوڑتا رہا آج بھٹو کی میراث پر قابض پارٹی کی قیادت اس سے کسی خاندانی رشتے کی دعویدار تو ہو سکتی ہے بھٹو کی تصویر چھاپ کر اور بھٹو خاندان کی قربانی کے مرثیے پڑھ کر مفادات دولت و طاقت کی اندھی ہوس کے بازار میں بھٹو کے نام کو نیلام کیا جا رہا ہے۔ بھٹو اور محترمہ بے نظیر بھٹو کے بدترین دشمنوں نے بھی کرپشن کا الزام لگانے کی کبھی جرات نہیں ہوئی۔ نوازشریف کو تین بار اقتدار سے الگ کر دیا گیا خاندان کو جلاوطن کر دیا گیا طیارہ اغوا اور نہ جانے کون کون سے مقدمات بنائے گئے۔ نوازشریف کی آنکھوں کے سامنے بیٹی کو پکڑ کر جیلوں میں بند کر دیا گیا۔ نوازشریف اور ان کی بیٹی کو نااہل کر دیا گیا آج بھی نوازشریف لندن میں اپنے بیٹوں کے پاس ہیں جس طرح بھٹو پر جب زوال آیا تو بڑے بڑے نامور سیاستدانوں نے پذیری ٹولے کی طرح آنکھیں پھیر لیں بھٹو کو اکیلا چھوڑ دیا اسی طرح نوازشریف کی جماعت میں بھی ایسے لوگوں کی کمی نہیں۔ عمران خان ملکی سیاسی تاریخ کا مطالعہ کریں پارلیمنٹ ہائوس کا رخ کریں اپوزیشن کریں اقتدار کے مزے وہ لوٹ چکے اب اپوزیشن کا کردار ادا کریں کے پی کے آزاد کشمیر کے دورے کریں۔ ملک میں معاشی بحران ہے قرضوں پر چل رہا ہے کبھی کبھی آئی ایم ایف کی پالیسیوں کے خلاف بیان دیا کریں۔