Author: ڈاکٹرغلام مصطفی بڈانی

شانِ پاکستان
تحریر۔بنتِ حوا
ایک عقیدت بھرا سلام، اس پاک سرزمین کے نام!
پاکستان، صرف ایک ملک نہیں…
یہ ایک دعاؤں کی قبولیت ہے، ایک شہادتوں کی روشنی ہے، ایک عزمِ فولادی، ایک وعدہ ربانی ہے۔
یہ وہ سرزمین ہے جس کے خمیر میں کلمہ توحید شامل ہے۔
یہ وہ خطہ ہے جسے خدا نے نہریں، پہاڑ، دریا، کھیت، معدنیات، غیرت مند قوم، اور ایٹمی طاقت سے نوازا۔

یہ چمن یونہی رہے گا قائم و دائم، ان شاءاللہ
خونِ دل دے کے نکھاریں گے رخِ برگِ گلاب
(حفیظ جالندھری)

یہ ملک کسی سازشی میز پر بیٹھ کر نہیں بنا،یہ کربلا کی یاد تازہ کرتے ہوئے، ہجرت کی تکلیفیں جھیل کر، ماؤں، بہنوں، بچوں اور بزرگوں کی قربانیوں کے بدلے میں ملا۔یہ وہ وطن ہے جس کے لیے قائداعظم محمد علی جناح نے بیماری میں بھی آرام نہ کیااور علامہ اقبال نے جو تصور خواب میں دیکھا، اسے فکر، فلسفہ اور اشعار سے جلا بخشی۔

ستاروں سے آگے جہاں اور بھی ہیں
ابھی عشق کے امتحان اور بھی ہیں
(اقبال)

پاکستان کی مسلح افواج ہماری غیرت کی دیوار، امن کی ضمانت اور خوفِ دشمن کی بنیاد ہیں۔کارگل ہو یا سوات، سیلاب ہو یا زلزلہ، یہ بیٹے ہمیشہ سب سے آگے رہے۔جب پاک فوج چلتی ہے، تو پہاڑ جھکتے ہیں، دشمن کانپتے ہیں،اور پوری قوم کا دل فخر سے بھر جاتا ہے۔

خون اپنا ہو یا پرایا ہو
نسلِ آدم کا خون ہے آخر
(فیض احمد فیض)

پاکستان کی سرزمین اتنی زرخیز ہے کہ اگر سچائی سے کاشت کی جائے، تو سونا اگلے۔پنجاب کے کھیت، سندھ کی نہریں، بلوچستان کے خزانے، خیبر پختونخواہ کی پہاڑیاں اور گلگت کی وادیاں سب مل کر پاکستان کا حسن ہیں۔

خدا کے فضل سے یہ سرزمین ہے بڑی پیاری
یہی ہے میری جنت، یہی میری عطا ساری

پاکستان کا ادب، شاعری، موسیقی، مصوری ، سب کچھ ایک ایسی روح ہے جو نسل در نسل منتقل ہوتی ہے۔
فیض، جالب، پروین شاکر، بانو قدسیہ، نصرت فتح علی خان، مہدی حسن . ان سب کا فن، پاکستان کی پہچان ہے۔

دل دل پاکستان، جان جان پاکستان
میرے ہوش و خرد کی پہچان پاکستان

پاکستان کی اصل "شان” اُس کے نوجوان ہیں، وہ نوجوان جو سافٹ ویئر انجینئر بھی ہیں، فوجی کیڈٹ بھی، ڈاکٹر بھی، کھلاڑی بھی اور شاعر بھی۔
یہی وہ نسل ہے جو سائنس، ٹیکنالوجی، فنون اور ادب میں پاکستان کا جھنڈا دنیا بھر میں بلند کر رہی ہے۔

نہیں ہے نا اُمیدی، کفر ہے نا اُمیدی
نہیں اپنی فطرت میں، کمزوری و زاری
(اقبال)

پاکستان ایٹمی طاقت، خودمختار اور باوقار ملک ہے۔28 مئی 1998 کو چاغی کے پہاڑ گرجے، اور دنیا نے دیکھا کہ پاکستان صرف محبت کا علمبردار ہی نہیں، بلکہ اپنے دفاع کا ضامن بھی ہے۔ہم امن چاہتے ہیں، لیکن غلامی ہرگز قبول نہیں۔

ہم زندہ قوم ہیں، پائندہ قوم ہیں
ہم سب کی ہے پہچان، پاکستان

یہ ملک صرف مسلمانوں کا نہیں، اقلیتوں کا پاکستان بھی ہے۔پاکستان صرف مسلمانوں کا وطن نہیں، بلکہ یہ ہندو، سکھ، عیسائی، پارسی، سب کے لیے برابر کا گھر ہے۔یہاں مندر بھی ہیں، گرجا بھی، گردوارے بھی اور مسجدیں بھی .سب ساتھ سانس لیتے ہیں۔

یہ وطن تمہارا ہے، تم ہو پاسباں اس کے
(حبیب جالب)

آج اگرچہ مسائل ہیں، مہنگائی ہے، بدعنوانی ہے، لیکن یہ سب عارضی ہے۔جس قوم نے صفر سے ملک بنایا، جو قوم سروں پر کفن باندھ کر جنگیں لڑی، وہ قوم ان چیلنجز سے بھی نکلے گی۔

اے ارضِ وطن، ہم تجھے سنواریں گے
دھو لیں گے تیرے داغ، تجھے چمکائیں گے

پاکستان… ہمارا فخر، ہماری جان ہے
شانِ پاکستان صرف فوج، ثقافت، یا ایٹم بم نہیں … بلکہ ہر پاکستانی کا کردار، سچائی سے کمائی گئی روٹی، نماز میں اُٹھنے والے ہاتھوں کی دعا اور قربانیوں کی خوشبو ہے۔

آئیے آج تجدیدِ عہد کریں:

ہم پاکستان کو صرف وطن نہیں، امانت سمجھیں گے۔ہم نفرت نہیں، محبت بانٹیں گے۔ہم زبان، نسل، فرقے کے بجائے، قوم اور انسانیت کو ترجیح دیں گے۔اور سب سے بڑھ کر، ہم پاکستان کو فخر کا مقام دلائیں گے۔

چاند میری زمیں، پھول میرا وطن
میرے خوابوں کا گلشن، یہی ہے وطن
میرے نغموں کی چاہت، یہی سرزمین
میری جنت، میرا عشق، میرا پاکستان!

پاکستان زندہ باد، پائندہ باد!

شانِ پاکستان
تحریر: عامر عباس ناصر اعوان

وطن…
ایک لفظ نہیں، ایک دھڑکن ہے،ایک سایہ ہے جو تپتے سورج میں چھاؤں بن کر برستا ہے،ایک آنگن ہے جس میں نسلیں پلتی ہیں،ایک مٹی ہے جسے بوسہ دینے سے ماتھے کا نصیب جاگتا ہے۔

پاکستان…
کوئی نقشہ نہیں، کوئی نشان نہیں،بلکہ وہ خواب ہے جو ایک شاعر کی پلکوں سے ٹپکا،ایک قائد کے حوصلے سے ابھرا،اور ایک قوم کے لہو سے رنگین ہوا۔

یہ وطن ہمیں صدیوں کے انتظار، لاکھوں کی قربانی اور کلمۂ توحید کی گونج کے ساتھ ملا۔یہ وہ تحفہ ہے جو تاریخ نے ہمیں کانٹوں سے چن کر دیا۔
مگر سوال یہ ہے کہ…”ہم نے اس تحفے کی حفاظت کیسے کی؟”

وہ دن، وہ منظر، وہ قربانی
چودہ اگست 1947 کا سورج فقط طلوع نہ ہوا،وہ اپنے ساتھ قافلوں کی آہیں، بچوں کی چیخیں اور ماؤں کی سسکیاں لے کر طلوع ہوا۔

راستوں پر خون تھا، مگر زبانوں پر "پاکستان زندہ باد” کا نعرہ تھا۔بکھری لاشوں کے درمیان جھنڈا بلند تھا۔ریلوے اسٹیشنوں پر آنکھوں کے سامنے خاندان مٹ رہے تھے،مگر دل میں امید کی شمعیں روشن تھیں۔

پاکستان ایک انقلابی دعا کا قبول ہونا تھا۔یہ مٹی محض سرحدوں میں قید ایک ملک نہیں،یہ ہماری شناخت ہے، ہماری زبان، ہماری ثقافت، ہمارا وقار۔

شانِ پاکستان کیا ہے؟
شانِ پاکستان وہ مینار نہیں جو صرف تصویر میں ہے،بلکہ وہ اذان ہے جو مسجد کے مینار سے ہر صبح ہمیں جگاتی ہے۔وہ مزار نہیں جو ہری جالیوں میں چھپا ہے،بلکہ وہ بازار ہے جہاں ایک باحجاب بیٹی رزقِ حلال کے لیے کام کرتی ہے۔

شانِ پاکستان وہ سپاہی ہےجو برف کی چادر میں لپٹا، پہرہ دے رہا ہے۔شانِ پاکستان وہ اُستاد ہےجو چاک کے گرد اپنی زندگی کا دائرہ بنا کر نسلیں بناتا ہے۔شانِ پاکستان وہ کسان ہے،جو سورج کے ساتھ بیدار ہوتا ہے اور مٹی کو سونا بنا دیتا ہے۔

مگر آج…!ہم نے وطن کی محبت کو صرف نعروں تک محدود کر دیا۔ہم نے پرچم کو دیوار پر چڑھا دیا، مگر دل سے اتار دیا۔قانون کا مزاق، انصاف کی بولی،اخلاق کی موت، سچ کا گلا گھونٹا جا رہا ہے۔جس ریاست کو "مدینہ کی جھلک” بننا تھا،وہاں نعرے تو بہت ہیں، لیکن کردار مفقود ہے۔

مزاحمت: شان کا اثاثہ
تاریخ شاہد ہے کہ قومیں جنگوں سے نہیں، ضمیر کے بیدار ہونے سے بنتی ہیں۔پاکستان کی اصل شان وہ ہےجو اپنے اندر سچ، غیرت، اور قربانی کو زندہ رکھے۔وہ شان ضمیر کے بیدار لمحے میں ہے،جب ایک طالبعلم کمرہ امتحان میں نقل سے انکار کرتا ہے۔وہ مزاحمت ہے،جب ایک دیہاڑی دار مزدور حرام کی روٹی ٹھکرا دیتا ہے۔وہ روشنی ہے،جب ایک شاعر ظلم کے خلاف نظم لکھتا ہے، چاہے پابند سلاسل ہو جائے۔وہ غیرت ہے،جب ایک بچی گاؤں میں اسکول نہ ہونے پر چھت پر بیٹھ کر پڑھتی ہے،اور کہتی ہےکہ”ایک دن میں استاد بنوں گی، اس پاکستان کے لیے!”

امید کا چراغ
اگرچہ اندھیرے بہت ہیں،لیکن روشنی مر نہیں گئی۔آج بھی کوئی استاد بچوں کے ہاتھوں میں قلم دے رہا ہے۔آج بھی کوئی ماں بچے کو سچ بولنا سکھا رہی ہے۔آج بھی کوئی نعت خواں وطن سے محبت کو ترنم میں سجا رہا ہے۔اور آج بھی کوئی نوجوان فیس بک پر نہیں، میدانِ عمل میں پاکستان کے لیے جیت رہا ہے۔

اب کیا کرنا ہے؟
اب وقت ہے کہ ہم صرف تقریریں نہ کریں، کردار دکھائیں۔وطن سے محبت صرف نعرہ نہ ہو، وعدہ ہو۔جشنِ آزادی صرف رنگوں کی بہار نہ ہو، عمل کا چمن ہو۔ہر فرد ایک چراغ بنے، ہر دل ایک منار بنے۔اور ہر زبان، "پاکستان زندہ باد” سے پہلے "میں زندہ باد کیسے بنوں؟” کا جواب دے۔

حلفِ وفاداری
آئیے، آج چودہ اگست کے دن،نئے کپڑے پہننے سے پہلے نیا عہد کریں۔ہم سچ بولیں گے۔ہم ایماندار رہیں گے۔ہم وطن کے وفادار ہوں گے۔ہم اپنے قلم، اپنی سوچ، اپنے قدم اور اپنے خواب پاکستان کے نام کریں گے۔کیونکہ…”شانِ پاکستان وہ نہیں جو دکھائی دے،بلکہ وہ ہے جو جِھلکے، جو جلے، جو روشنی بنے!”

پاکستان زندہ باد…….شانِ پاکستان پائندہ باد!

شانِ پاکستان
از قلم .قراۃلعین کاظمی ،مانسہرہ شنکیاری
جب زمین پر ظلمتوں کے سائے چھا گئے، جب غلامی کی زنجیروں نے قوموں کی روحیں جکڑ لیں، تب ایک آواز اٹھی، ایک خواب جاگا ، پاکستان کا خواب۔ یہ خواب محض ایک ریاست کا نہیں تھا، یہ ایک نظریے، ایک عقیدے اور ایک جدوجہد کا نام تھا۔ پاکستان، جسے لاکھوں قربانیوں، خون سے بھیگے کفنوں اور ماؤں کی سسکیوں کے عوض حاصل کیا گیا، وہ صرف زمین کا ٹکڑا نہیں، بلکہ ہمارے بزرگوں کی امیدوں اور دعاؤں کا حاصل ہے۔
پاکستان، میری پہچان، میری جان!
شانِ پاکستان اُن سپاہیوں میں ہے جو برفیلے مورچوں پر جاگتے ہیں تاکہ ہم سکون سے سو سکیں۔ شانِ پاکستان ان ماؤں کی آنکھوں میں ہے جو اپنے بیٹے کو کفن میں لپٹے دیکھ کر بھی فخر سے کہتی ہیں: "میرا بیٹا وطن پر قربان ہو گیا۔”
شانِ پاکستان ان طلبہ میں ہے جو لائبریریوں کی گرد آلود میزوں پر بیٹھ کر دن رات محنت کرتے ہیں، تاکہ اس ملک کا مستقبل روشن ہو۔ شانِ پاکستان ان کسانوں کی ہتھیلیوں میں ہے جو سورج کی تپش میں پسینہ بہا کر ہماری روٹی اگاتے ہیں۔
شانِ پاکستان تم ہو، میں ہوں، ہم سب ہیں!

ہماری سرزمین کے ہر ذرے میں وہ طاقت ہے جو دنیا کی بڑی سے بڑی طاقت کو بھی جھکا سکتی ہے۔ ہماری زبان، ہماری تہذیب، ہمارا لباس، ہمارے رسم و رواج ، سب "پاکستان” کا عکس ہیں۔ ہمیں فخر ہے کہ ہم اُس قوم سے ہیں جس نے ایٹمی طاقت بن کر دنیا کو دکھا دیا کہ اگر ہم پر امن ہیں تو کمزور ہرگز نہیں۔
لیکن!
آج ضرورت اس امر کی ہے کہ ہم فقط پاکستان سے محبت کا دعویٰ نہ کریں بلکہ اسے عمل سے ثابت کریں۔ جھوٹ، دھوکہ، بدعنوانی، نفرت .یہ سب پاکستان کی شان کے دشمن ہیں۔ اگر واقعی ہمیں اس ملک سے محبت ہے، تو ہمیں اپنے عمل سے یہ ثابت کرنا ہوگا کہ ہم اس کی عزت، ترقی اور عظمت کے محافظ ہیں۔

اے پاکستان! تو صرف ایک وطن نہیں، تو میرا فخر ہے، میری غیرت ہے، میری پہچان ہے۔ میں تجھ پر جان بھی قربان کر دوں، مگر تیری عزت پر آنچ نہ آنے دوں۔ تو سلامت رہے، تو ترقی کرے، تو دنیا کی نظروں میں ایک مثال بنے — یہی میری دعا ہے، یہی میری خواہش، یہی میرا خواب ہے۔
تو ہے شانِ پاکستان، اور میں تیرا سپاہی۔