سیالکوٹ(بیوروچیف شاہدریاض) ڈپٹی کمشنر محمد ذوالقرنین لنگڑیال نے کہا ہے کہ اس وقت وطن عزیز تاریخ کے نازک ترین دور سے گزر رہا ہے اور کئی چیلنجز درپیش ہیں جن کا مقابلہ کرنے کے لیے قوم کو اتحاد بین المذاہب، اخوت، بھائی چارے اور اتفاق کا مظاہرہ کرنا ہوگا۔ انہوں نے کہا کہ امن کے دشمنوں پر کڑی نظر رکھنی ہوگی تاکہ کوئی شرپسند ہماری امن کی خوشگوار فضا کو مکدر نہ کر سکے۔
ان خیالات کا اظہار انہوں نے آج یوم علی کرم اللہ وجہہ کی شہادت، یوم القدس اور جمعۃ الوداع کے اجتماعات کے سلسلے میں ضلعی امن کمیٹی سیالکوٹ کے ممبران کے اجلاس سے خطاب کرتے ہوئے کیا۔ اجلاس میں ایڈیشنل ڈپٹی کمشنر جنرل ایوب بخاری، ڈی ایس پی لیگل شعیب مختار اور دیگر متعلقہ افسران بھی موجود تھے۔
ڈپٹی کمشنر محمد ذوالقرنین لنگڑیال نے علماء کرام اور مذہبی عمائدین سے اپیل کی کہ وہ عوام الناس کو صبر، برداشت اور رواداری کی جانب راغب کریں تاکہ معاشرہ امن، سکون اور شانتی کا گہوارہ بن سکے۔ انہوں نے کہا کہ ضلعی انتظامیہ اور پولیس حسب روایت یوم علی رضی اللہ تعالیٰ کے سلسلے میں فول پروف سیکیورٹی اور امور انجام دے گی اور اس سلسلے میں تمام متعلقہ کو احکامات صادر کر دیئے گئے ہیں۔ اجلاس کے آخر میں ملک و قوم کی سلامتی اور استحکام کے لیے دعا کی گئی۔
