Author: ڈاکٹرغلام مصطفی بڈانی

اوچ شریف ،باغی ٹی وی(نامہ نگارحبیب خان) کروڑوں روپے کی لاگت سے تعمیر ہونے والا ٹینکی گراؤنڈ پارک تکمیل کے فوراً بعد ہی مسائل کا شکار ہو گیا ہے۔ جوگنگ ٹریک جگہ جگہ سے ٹوٹ چکا ہے، فوارہ چالو نہیں کیا گیا، اور پارک کے مختلف حصوں میں گندگی کے انبار لگے ہوئے ہیں۔

شہریوں کا کہنا ہے کہ میونسپل کمیٹی کی عدم دلچسپی کی وجہ سے پارک کے حالات دگرگوں ہو چکے ہیں۔ گراسی پلاٹ میں گھاس کے جھنڈ بن گئے ہیں اور سانپ بچھو جیسے موذی حشرات کی بھرمار ہو گئی ہے۔ اس کے علاوہ، پارک سے ملحقہ رہائشی کوارٹرز میں مکینوں نے گدھے باندھ دیے ہیں جس سے گندگی کے ڈھیر اور تعفن نے پارک کے ماحول کو مزید خراب کر دیا ہے۔

شہریوں کا یہ بھی کہنا ہے کہ شام ہوتے ہی پارک میں نشئی افراد جمع ہو جاتے ہیں اور سرعام منشیات استعمال کرتے ہیں، جس سے پارک کا ماحول مزید بگڑ گیا ہے۔ پارک میں لگایا گیا فلٹریشن پلانٹ آلودہ ہو چکا ہے، ٹونٹیاں ناکارہ ہیں، اور بلب بھی غائب ہیں۔

شہریوں نے ڈپٹی کمشنر بہاول پور سے مطالبہ کیا ہے کہ وہ فوری طور پر اس پارک کی حالت درست کرائیں تاکہ شہریوں کو ایک محفوظ اور خوشگوار ماحول میں تفریح کا موقع مل سکے۔

اوچ شریف،باغی ٹی وی(نامہ نگارحبیب خان) مخدوم سید علی حسن گیلانی شہید چوک پر فلائی اوور کی تعمیر نہ ہونے کے باعث ٹریفک حادثات میں شدت آ چکی ہے، جس میں درجنوں افراد جان کی بازی ہار چکے ہیں، سینکڑوں زخمی ہو چکے ہیں اور کئی مستقل طور پر معذور ہو گئے ہیں۔
شہریوں کا کہنا ہے کہ اوچ شریف کے علاقے میں روزانہ لاکھوں افراد کی آمد و رفت ہوتی ہے، تاہم یہاں سڑک پار کرنے کے لیے کوئی پل نہ ہونے کے باعث حادثات کا سلسلہ بڑھتا جا رہا ہے۔

تفصیلات کے مطابق گزشتہ پانچ سالوں میں بیس سے زائد افراد ان حادثات کا شکار ہوئے، جن میں سے درجنوں مستقل معذور ہو چکے ہیں۔ حالیہ واقعہ میں اوچ شریف کے رہائشی ملک رفیق احمد ڈوڈی فلائی اوور نہ ہونے کی وجہ سے ایک تیز رفتار گاڑی کی زد میں آ گئے اور جان کی بازی ہار گئے۔

شہریوں نے منتخب نمائندگان سے مطالبہ کیا ہے کہ وہ اس سنگین مسئلے پر فوری توجہ دیں اور کم از کم دو فلائی اوور پل تعمیر کریں تاکہ شہریوں کو سڑک عبور کرنے کے لیے محفوظ سہولت میسر آ سکے اور مزید قیمتی جانیں ضائع ہونے سے بچ سکیں۔