Author: ڈاکٹرغلام مصطفی بڈانی

سیالکوٹ،باغی ٹی وی( بیوروچیف شاہد ریاض) خواتین اساتذہ کے لیے پہلی بار کھیلوں کا انعقاد، گورنمنٹ علامہ اقبال گریجویٹ کالج کی نمایاں کامیابی

تفصیل کے مطابق سیالکوٹ میں ہائیر ایجوکیشن ڈیپارٹمنٹ کے زیر اہتمام "سپورٹس ایونٹ فار ٹیچرز 2025ء” کا کامیاب انعقاد ہوا، جس میں خواتین اساتذہ نے بھرپور جوش و خروش کے ساتھ شرکت کی۔ وزیر اعلیٰ پنجاب مریم نواز شریف کی ہدایت پر پہلی مرتبہ اساتذہ کے لیے کھیلوں کا انعقاد کیا گیا، جس میں بیڈمنٹن، ٹیبل ٹینس، کرکٹ، ٹگ آف وار اور شطرنج جیسے کھیل شامل تھے۔

گورنمنٹ علامہ اقبال گریجویٹ کالج برائے خواتین کی اساتذہ نے تمام مقابلوں میں کامیابی حاصل کرتے ہوئے نمایاں کارکردگی دکھائی۔ شطرنج کے مقابلے میں مس عدیلہ فاروق، بیڈمنٹن میں مس حمیرا اور مس سمرا محسن، جبکہ کرکٹ، ٹیگ آف وار اور ٹیبل ٹینس میں بھی کالج کی ٹیم نے کامیابی کے جھنڈے گاڑے۔

اساتذہ اور پرنسپلز نے ان مقابلوں کو خوش آئند قرار دیتے ہوئے کہا کہ یہ ایکٹویٹی نہ صرف اساتذہ کے ٹیلنٹ کو ابھارنے کا موقع فراہم کرتی ہے بلکہ تعلیمی معیار میں بھی بہتری کا سبب بنے گی۔

پرنسپل گورنمنٹ ایسوسی ایٹ کالج آف کامرس پروفیسر طاہرہ فتح محمد، پرنسپل گورنمنٹ گریجویٹ کالج برائے خواتین حاجی پورہ پروفیسر ریحانہ کامران، اور پرنسپل گورنمنٹ نواز شریف کالج پسرور روڈ پروفیسر گلزیب وقاص اعوان نے گورنمنٹ علامہ اقبال گریجویٹ کالج کی پرنسپل پروفیسر زیبا ظہور کو اس شاندار کامیابی پر مبارکباد پیش کی۔

سیالکوٹ ،باغی ٹی وی(سٹی رپورٹ مدثر رتو) رکن صوبائی اسمبلی محمد منشاء اللہ بٹ نے کہا ہے کہ وزیر اعلیٰ پنجاب کی انتھک محنت سے صوبے بھر میں ترقیاتی کاموں کا آغاز ہوچکا ہے۔ مسلم لیگ ن نے ترقیاتی سفر وہیں سے شروع کیا ہے جہاں پچھلی حکومت کے دوران چھوڑا گیا تھا۔ یہ بات انہوں نے یونین کونسل بونکن میں جاری ترقیاتی منصوبوں کے افتتاح کے موقع پر کہی۔

اس موقع پر موجود شخصیات میں چودھری عمر ایوب، سابق یوسی چیئرمین میاں شاہد پرویز، میاں منیر احمد، میاں جمیل، میاں شہباز محمد، مہر عارف، ڈاکٹر اسد، راجہ شاہد (دی راج ہوٹل)، عبدالحمید قاسم اور سب انجینئر حافظ اقبال شامل تھے۔

محمد منشاء اللہ بٹ نے جاری ترقیاتی اسکیموں کے معیار کا معائنہ کیا اور میونسپل کارپوریشن کے انجینئرنگ ونگ کو ہدایت کی کہ گلیوں اور سڑکوں کے لیول کو مدنظر رکھا جائے تاکہ سیوریج کے مسائل کو حل کیا جاسکے۔

انہوں نے کہا کہ وزیر اعلیٰ پنجاب نے 11 ماہ کی مختصر مدت میں ترقیاتی منصوبوں کے انبار لگا دیے ہیں، جن میں ہونہار اسکالرشپ، ستھرا پنجاب، اور چیف منسٹر ڈسٹرکٹ سسٹین ایبل ڈویلپمنٹ گولز پروگرام 2024-25 شامل ہیں۔ ان منصوبوں کا دائرہ کار عوام کی دہلیز تک پہنچا دیا گیا ہے۔

منشاء اللہ بٹ نے مزید کہا کہ مسلم لیگ ن نے ہمیشہ ترقی اور خوشحالی کے نئے دور کا آغاز کیا ہے، اور موجودہ حکومت معاشی چیلنجز پر قابو پاتے ہوئے مہنگائی کو بتدریج کم کرنے کی کوشش کر رہی ہے۔

سیالکوٹ ،باغی ٹی وی(سٹی مدثر رتو) انٹر تحصیل انڈر 16 فٹبال چیمپئن شپ کا فائنل سیالکوٹ نے سنسنی خیز مقابلے کے بعد سمبڑیال کو 1 کے مقابلے میں 3 گولز سے شکست دے کر جیت لیا۔ فائنل کنٹونمنٹ فٹبال گراؤنڈ میں کھیلا گیا، جہاں سیالکوٹ کے وہاج، ہیزل لیو اور رونی عمران نے شاندار گولز کرکے ٹیم کو فتح دلائی۔

ڈپٹی کمشنر محمد ذوالقرنین لنگڑیال نے فاتح ٹیم کو 2 لاکھ روپے نقد انعام اور ونر ٹرافی، جبکہ رنر اپ ٹیم سمبڑیال کو 1 لاکھ روپے اور ٹرافی دی۔

چیمپئن شپ کے دوران ضلع سیالکوٹ کی چاروں تحصیلوں کی ٹیموں نے بھرپور شرکت کی۔ سیالکوٹ نے ڈسکہ کو شکست دے کر فائنل میں جگہ بنائی، جبکہ سمبڑیال نے پسرور کو زیر کیا۔ فائنل میچ کے پہلے ہاف میں سمبڑیال کے عبداللہ نے پہلا گول کیا، لیکن دوسرے ہاف میں سیالکوٹ کی ٹیم نے شاندار واپسی کرتے ہوئے تین گولز سے بازی پلٹ دی۔

ڈپٹی کمشنر نے ڈسٹرکٹ سپورٹس آفیسر افتخار گوندل کو ہدایت کی کہ میرٹ پر کھلاڑی منتخب کرکے انڈر 16 ٹیم تیار کی جائے تاکہ یہ ٹیم ڈویژن، صوبائی اور قومی سطح پر سیالکوٹ کی نمائندگی کرتے ہوئے کامیابیاں سمیٹے۔