سیالکوٹ (باغی ٹی وی،بیوروچیف شاہدریاض): شہر اور گردونواح میں ڈکیتی اور رہزنی کے واقعات میں اضافے سے شہریوں میں خوف و ہراس پھیل گیا ہے۔ تازہ ترین واقعہ تھانہ رنگپورہ کے علاقے مرے کالج کے قریب پیش آیا جہاں دو مسلح ڈاکوؤں نے ایک بہن بھائی سے ان کی موٹرسائیکل چھین لی۔
باغی ٹی وی کو موصول ہونے والی سی سی ٹی وی فوٹیج میں دیکھا جا سکتا ہے کہ ڈاکوؤں نے اسلحے کے زور پر موٹرسائیکل چھیننے کے علاوہ متاثرین کے ساتھ تشدد بھی کیا۔ یہ واقعہ دن کے اوقات میں پیش آیا جس نے شہریوں میں تشویش پیدا کردی ہے۔
پولیس ترجمان کا کہنا ہے کہ ملزمان کی گرفتاری کے لیے کوششیں جاری ہیں اور جلد ہی انہیں قانون کے شکنجے میں لے لیا جائے گا۔ انہوں نے شہریوں سے اپنی سلامتی کا خود خیال رکھنے اور کسی مشکوک سرگرمی پر پولیس کو فوری طور پر اطلاع دینے کی اپیل کی ہے۔
