Author: ڈاکٹرغلام مصطفی بڈانی

سرگودھا،باغی ٹی وی ( ادریس نواز چدھڑ سے ) شہید محسن عباس فٹنس کلب کا افتتاح کر دیا گیا

پولیس افسران و جوانوں کی جسمانی فٹنس کو برقرار رکھنے کیلئے فٹنس کلب کا افتتاح کر دیا گیا ہے۔ پولیس لائنز سرگودھا میں تعمیر ہونے والا یہ کلب شہید کنسٹیبل محسن عباس کے نام سے منسوب کیا گیا ہے ۔شہید کے والد اور آر پی او شارق کمال صدیقی نے افتتاح کیا ۔

اس موقع پر ڈی پی او محمد فیصل کامران، ایڈیشنل ایس پی اور ایس پی انوسٹی گیشن بھی موجود تھے۔ ڈی پی او محمد فیصل کامران نے بتایا کہ فٹنس کلب کو جدید سہولیات سے آراستہ کیا گیا ہے اور جسمانی ورزش کے جدید آلات نصب کیئے گئے ہیں جبکہ تربیت یافتہ اسٹاف ملازمین کو ضروری تربیت فراہم کرے گا ۔

اس میں ملازمین کی ڈیوٹی کے اوقات کا خاص خیال رکھا گیا ہے ۔ اس موقع پر آر پی او شارق کمال صدیقی نے کہا کہ پولیس ملازمین کی جسمانی صحت کا خیال رکھنے کیلئے خصوصی اقدامات کیئے گئے ہیں۔

جبکہ شہداء کو خراجِ تحسین پیش کرنے کیلئے اس کو شہید کنسٹیبل محسن عباس کے نام سے منسوب کیا گیا ہے

سرگودھا ،باغی ٹی وی( ادریس نواز چدھڑ سے ) وزیراعلیٰ پنجاب کی جانب سے سرگودھا کی تین شاہراہوں کو سالانہ ترقیاتی پروگرام میں شامل کر لیا گیا،جھال چکیاں سے لک موڑ روڈ بھی شامل

تفصیلات کے مطابقسرگودھا کی تحصیل بھلوال اور تحصیل بھیرہ کی تین شاہراہوں کو سالانہ ترقیاتی پروگرام میں شامل کر لیا گیاہے ۔ صوبائی وزیر مواصلات صہیب احمد بھرتھ کے مطابق للہ سے کندوال شاہ پور براستہ جھال چکیاں ، لک موڑ بھلوال روڈ ، بھیرہ ملکوال شاہ پور روڈ تا ساہیوال کی شاہراہوں پر تعمیراتی کام کو شروع کیا جائے گا ۔

وزیراعلیٰ پنجاب مریم نواز شریف اور صوبائی وزیر مواصلات پنجاب ملک صہیب احمد بھرتھ کی ہدایت کے بعد محکمہ سی اینڈ ڈی ڈبلیو پنجاب نے تحصیل بھلوال اور تحصیل بھیرہ کی تین شاہراہوں کو بحالی و مرمت کیلئے سالانہ ترقیاتی پروگرام میں شامل کر لیا ہے . ان شاہراہوں کی تعمیر سے تحصیل بھلوال اور تحصیل بھیرہ کے شہریوں کو بہترین سفری سہولیات فراہم ہوں گی اور ان کا سفر آرام دہ ہو گا ۔

صوبائی وزیر ملک صہیب احمد بھرتھ نے کہا کہ للہ سے کندوال شاہ پور براستہ جھال چکیاں ، لک موڑ بھلوال روڑ ، بھیرہ ملکوال شاہ پور روڑ تا ساہیوال کی شاہراوں پر تعمیراتی کام کو شروع کیا جائے گا .

انہوں نے کہا کہ وزیراعلیٰ پنجاب نے ان شاہراہوں کو سالانہ ترقیاتی پروگرام میں شامل کرکے تحصیل بھلوال اور تحصیل بھیرہ کی عوام کے دیرینہ مطالبہ کو پورا کیا ہے ۔

انہوں نے مزید کہا کہ ان شاہراہوں کی تعمیر سے لوگوں کا معیار زندگی بہتر ہو گا . وزیراعلیٰ پنجاب کی قیادت میں این اے 82 اور پی پی 71 میں سڑکوں کا جال بچھے گا اور خراب سڑکوں کی بحالی ہو گی

سرگودھا،باغی ٹی وی ( ادریس نواز چدھڑ سے ) طارق آباد بستی کی صورت حال مرد و خواتین بچے پریشان ، نہ غریبوں کو آٹا نہ نگہبان رمضان پیکج ، غریب دھکے کھانے پر مجبور ہو گئے ۔

تفصیلات کے مطابق سرگودھا میں وزیراعلیٰ پنجاب مریم نواز شریف کا رمضان نگہبان پروگرام بری طرح ناکام رہا ۔ طارق آباد بستی کی غریب مرد و خواتین بچوں کے ہمراہ روزہ کی حالت میں نگہبان رمضان پیکج اور دس کلو آٹے کیلئے دربدر ہو گئے ۔

ذرائع کے مطابق نگہبان پروگرام کے نتائج انتظامیہ سمیت سرکاری محکموں کی مبینہ نااہلی ، غلطیوں اور بدعنوانی کے باعث وہ برآمد نہیں ہو سکے ، جس کی امید کی جا رہی تھی ،مستحقین کو گھر تک راشن کی فراہمی کا ایک مقصد ان کی عزت نفس کو برقرار رکھنا اور حکومت کی غریب عوام کیلئے گھر کی دہلیز پر خدمت کے جذبہ کو بھی اجاگر کرنا تھا ۔ تمام تر کوششوں کے باوجود مستحقین پروگرام سے اس طرح مستفید نہیں ہو سکے اور لائنوں میں دھکے کھا رھے ہیں ۔

پروگرام میں صرف بے نظیر انکم سپورٹ پروگرام میں شامل مستحقین کو شامل کیا گیا ، حالانکہ اس بے نظیر پروگرام میں شامل مستحقین کی شفافیت پر سوال اٹھ رہے ہیں ۔ اور بڑی تعداد میں غیر مستحق خواتین بھی اس پروگرام میں شامل ہیں ۔ پروگرام کو وسیع بنانے کیلئے زکوٰۃ ، بیت المال سے امداد اور براہ راست درخواست دینے والوں کو بھی رمضان نگہبان پروگرام میں شامل کرنا ضروری تھا ۔

اب وہ خاندان جنہیں امداد نہیں ملی وہ مایوس اور حکومت کی نااہلی پر بددعائیں دے رہے ہیں ۔ بلاشبہ حکومت نے مستحقین کو گھر گھر راشن پہنچانے کی بھرپور کوشش کی مگر سامان کو مختلف علاقوں میں لے جا کر بااثر سیاسی شخصیات کے ڈیروں پر رکھا گیا اور وہاں مستحقین کو بلا کر نہ صرف سیاسی مجمع لگایا گیا بلکہ ان کا تماشہ بھی بنایا گیا ۔

جس سے مستحقین کاوقار اور عزت نفس مجروح ہوئی ۔ بہت سے ایسے مستحقین ہیں جو سامان کی فراہمی کے وقت گھروں پر موجود نہیں تھے یا ان سے موبائل پر رابطہ نہیں ہو سکا ایسے افراد کو ابھی تک امداد نہیں ملی اور وہ دربدر ہیں ۔