Author: غنی محمود قصوری

قصور
بابا بلھے شاہ اسپتال میں دوائیوں کی چوری کا مبینہ سکینڈل، 2 اہلکار نوکری سے فارغ

قصور میں بابا بلھے شاہ اسپتال میں دوائیوں کی مبینہ چوری کا بھانڈا پھوٹ گیا
انکوائری کمیٹی کی رپورٹ پر دو جونئیر ٹیکنیشنز کو نوکری سے نکال دیا گیا ہے

ذرائع کے مطابق شکیل احمد اور ندیم اسلم نامی اہلکار اسپتال میں دوائیوں کی خرد برد سمیت دیگر سنگین بے ضابطگیوں میں ملوث پائے گئے۔ انکوائری کے دوران الزامات ثابت ہونے پر سی ای او ہیلتھ نے دونوں کو ملازمت سے برطرف کر دیا

محکمہ صحت قصور نے اہلکاروں کے خلاف باضابطہ حکم نامہ جاری کر کے نوکری سے نکالنے کی کارروائی مکمل کر لی ہے۔ ذرائع کا کہنا ہے کہ یہ کارروائی اندرونی نگرانی اور رپورٹنگ کے نتیجے میں ممکن ہوئی

مذید تحقیقات جاری ہیں اور امکان ظاہر کیا جا رہا ہے کہ مذید اہلکاروں کے گرد بھی گھیرا تنگ ہو سکتا ہے

قصور
جھوٹا عشق، دو بچوں کی ماں قتل: فیکٹری مزدور نے دوستوں کی مدد سے پہلی بیوی کو نہر میں دفن کردیا
کھڈیاں خاص (محلہ اسلام پورہ) کی رہائشی، دو بچوں کی ماں کائنات دختر سلمہ بی بی کو اس کے ہی شوہر نے بے دردی سے قتل کر دیا۔ قاتل فیکٹری مزدور ذیشان ولد حسن میو، ساکن دادے والا کنواں (ڈھنگ شاہ) نے دوستوں کی مدد سے واردات انجام دی اور لاش خشک نہر میں دبا دی
تفصیلات کے مطابق کائنات، جن کے پہلے شوہر کا انتقال ہو چکا تھا، نے فیکٹری میں کام کرنے والے ذیشان سے خفیہ طور پر محبت کی شادی کر رکھی تھی۔ یہ شادی ذیشان نے اپنے گھر والوں سے چھپا کر کی، جس کا علم صرف فیکٹری کے چند ساتھیوں کو تھا۔ افسوسناک امر یہ ہے کہ ذیشان نے چند روز قبل والدین کے دباؤ پر جگیاں کی ایک لڑکی سے دوسری شادی بھی کر لی۔
9/12/25 کو ذیشان نے کائنات کو فون کر کے بلایا، جس کے بعد کائنات لاپتہ ہو گئی اور اس کا موبائل فون بند رہا۔ والدہ سلمہ بی بی اور اہل خانہ کی مسلسل کوششوں کے بعد معاملہ پولیس تک پہنچا۔ شہری اشرف سانول کی پیروی پر ایس پی انویسٹیگیشن قصور ضیاء اللہ خان سے ملاقات کی گئی، جنہوں نے ایس ایچ او تھانہ کھڈیاں شیخ عامر اور اے ایس آئی لیاقت کو فوری اور سخت کارروائی کی ہدایات دیں۔
پولیس نے ذیشان کو اس کے نئے سسرال جگیاں سے گرفتار کر کے تفتیش شروع کی تو ملزم نے ابتدائی پوچھ گچھ میں خفیہ بیوی کائنات کے قتل کا اعتراف کر لیا۔ ملزم کی نشاندہی پر اے ایس آئی لیاقت نے رمضان خان چیئرمین کے بھٹے کے سامنے، دادے والا کنواں کی سمت مشرق واقع خشک نہر سے مقتولہ کی لاش برآمد کر لی، جسے قتل کے بعد دفنایا گیا تھا۔
پولیس نے لاش تحویل میں لے کر ضابطے کی کارروائی شروع کر دی ہے جبکہ ملزم اور اس کے ساتھیوں کے خلاف قانونی کارروائی جاری ہے۔
افسوسناک حقیقت یہ ہے کہ کائنات اپنے دو معصوم بچوں کو یتیم چھوڑ کر جھوٹے عشق اور بے وفا رشتے کی بھینٹ چڑھ گئی

قصور
گوشت کی قیمتیں کم ہونے کے باوجود ہوٹل مالکان کی من مانیاں جاری،ضلعی انتظامیہ خاموش
تفصیلات کے مطابق قصور ضلع بھر میں مرغی کے گوشت کی قیمت میں نمایاں کمی کے باوجود ہوٹل مافیا کے من مانے ریٹس برقرار ہیں جس سے عوام پریشان ہے
اس وقت مرغی کے گوشت کی قیمت کم ہو کر 500 روپیہ فی کلو تک آ گئی ہے جبکہ پچھلے چند دنوں کے دوران یہ ریٹ 400 سے 500 روپیہ کے درمیان بھی رہا مگر اس کے باوجود ہوٹلوں اور فوڈ پوائنٹس پر کڑاھی گوشت وغیرہ بدستور 1200 سے 1800 روپے فی کلو کے حساب سے فروخت کیا جا رہا ہے

اسی طرح برگر، شوارما، پیزا اور دیگر فاسٹ فوڈ اشیاء کے نرخوں میں بھی کوئی کمی نہیں کی گئی حالانکہ خام مال سستا ہو چکا ہے
شہریوں کا کہنا ہے کہ جب مرغی کے گوشت کی قیمت میں محض 10 روپیہ فی کلو اضافہ ہوتا ہے تو فوراً تمام اشیاء مہنگی کر دی جاتی ہیں لیکن جب قیمتیں کم ہوتی ہیں تو ریلیف عوام تک منتقل نہیں کیا جاتا
عوامی حلقوں نے اس صورتحال کو کھلی ناانصافی قرار دیتے ہوئے کہا ہے کہ ہوٹل مالکان منافع خوری میں مصروف ہیں جبکہ ضلعی انتظامیہ خاموش تماشائی بنی ہوئی ہے
شہریوں نے ڈپٹی کمشنر قصور اور پرائس کنٹرول مجسٹریٹس سے مطالبہ کیا ہے کہ فوری نوٹس لے کر سرکاری نرخ ناموں پر عملدرآمد یقینی بنایا جائے اور عوام کو مہنگائی کے اس غیر منصفانہ بوجھ سے نجات دلائی جائے

قصور
شدید سردی،دھند مہنگائی اور بے روزگاری سے شہری پریشان

تفصیلات کے مطابق قصور میں سردی کی شدت، دھند، مہنگائی اور بے روزگاری نے غریب کی زندگی اجیرن بنا دی ہیں

شہر اور مضافاتی علاقوں میں شدید سردی کے ساتھ دھند میں اضافے نے معمولاتِ زندگی مفلوج کر دیے ہیں
کھانے پینے کی اشیاء کی بڑھتی ہوئی قیمتیں اور دیہاڑی نہ ملنے کی وجہ سے محنت کش طبقہ دوہری آزمائش میں مبتلا ہو گیا ہے
دیہاڑی دار مزدوروں کا کہنا ہے کہ دھند اور سرد موسم کے باعث کام کے مواقع مذید کم ہو گئے ہیں، صبح سے شام تک انتظار کے باوجود مزدوری نہیں مل رہی، جبکہ آٹا، سبزیاں، دالیں اور دیگر بنیادی اشیاء عام آدمی کی قوتِ خرید سے باہر ہو چکی ہیں
کئی گھروں میں سردی کے باعث چولہے بجھنے کا خدشہ بڑھ گیا ہے
شہریوں نے حکومت سے مطالبہ کیا ہے کہ مہنگائی پر قابو پایا جائے اور دیہاڑی دار طبقے کے لیے ہنگامی ریلیف فراہم کیا جائے اور سستے بازاروں کو فوری طور پر فعال کیا جائے ورنہ حالات مذید سنگین صورت اختیار کر سکتے ہیں

قصور
واپڈا قصور نے عوام کو پتھر کے دور اور بلیک آؤٹ کا عملی سبق دینا شروع کر دیا

تفصیلات کے مطابق قصور میں واپڈا نے عوام کو بلیک آؤٹ کا اور پتھر کے دور کا عملی سبق دینا شروع کر دیا ہے

شہر کے مختلف علاقوں میں روزانہ 4 سے 10 گھنٹے تک غیر اعلانیہ طور پر بجلی بند رکھی جا رہی ہے، جس سے شہری شدید ذہنی اذیت میں مبتلا ہیں۔ سب ڈویژن راجہ جنگ، بہادر پورہ، بلھے شاہ اور دیگر ملحقہ علاقوں میں گزشتہ چند دنوں سے گھنٹوں پر محیط لوڈ شیڈنگ معمول بن چکی ہے

غیر اعلانیہ بجلی بندش کے باعث گھریلو صارفین کے ساتھ ساتھ تاجر، مزدور، طلبہ اور مریض سب ہی متاثر ہو رہے ہیں۔ شدید سردی میں بجلی کی طویل بندش نے معمولاتِ زندگی مفلوج کر دیے ہیں جبکہ واپڈا حکام کی جانب سے نہ کوئی پیشگی اطلاع دی جا رہی ہے اور نہ ہی واضح شیڈول فراہم کیا جا رہا ہے

شہریوں کا کہنا ہے کہ اگر یہی صورتحال رہی تو احتجاج کے سوا کوئی راستہ نہیں بچے گا۔ عوام نے اعلیٰ حکام سے مطالبہ کیا ہے کہ قصور میں غیر اعلانیہ لوڈ شیڈنگ کا فوری نوٹس لیا جائے اور بجلی کی بلا تعطل فراہمی کو یقینی بنایا جائے