افغان طالبان کے ترجمان سہیل شاہین کا کہنا ہے کہ اشرف غنی نے اچانک حکومت چھوڑ کر بڑی غلطی کی ہے-
باغی ٹی وی :غیر ملکی خبر رساں ادارے دوحہ نیوز کو دیئے گئے انٹرویو میں افغان طالبان کے ترجمان سہیل شاہین نے 15 اگست کے بعد پھیلنے والی افراتفری کا ذمہ دار سابق صدر اشرف غنی کو ٹھہراتے ہوئے کہا ہے کہ انہوں نے اچانک حکومت چھوڑ کر بڑی غلطی کی۔
سہیل شاہین نے کہا کہ 15 ا گست کو طالبان پرامن انتقال اقتدار کی خواہش کے ساتھ آئے تھے اور جنگجو کابل سے باہر انتظار کر رہے تھے، اس وقت اچانک اشرف غنی بھاگ گئے۔
سہیل شاہین نے کہا کہ حکومت کو ایسے چھوڑ کر بھاگ گئے اور اسی وجہ سے اچانک خلا پیدا ہوا، لوٹ مار ہوئی اور فائرنگ کے واقعات پیش آئے۔
اشرف غنی کے بھاری رقوم لے کر بھاگنے کے سوال پر سہیل شاہین نے کہا کہ اگر وہ ایسا کچھ لے کر فرار ہوئے ہیں جو ان کی ملکیت نہیں ہے تو انہیں یہ سب لوٹانا چاہئے لیکن فی الحال اس کے پیچھے جانا ہماری ترجیح نہیں کیونکہ ہماری توجہ اس وقت نئی حکومت کے قیام پر ہے-
دوسری جانب ذبیح اللہ مجاہد نے کہا ہے کہ ذمہ دار ادارے خواتین اور شہریوں کے حقوق کے تحفظ کیلئے ضابطہ اخلاق بنانے میں مصروف ہیں۔
ذبیح اللہ مجاہد نے کہا کہ بہنوں اور بیٹیوں کیلئے قابل قبول اور باوقار پالیسی دیں گے، اس حوالے سے تمام فیصلے حکومت کے قیام کے بعد کئے جائیں گے
ترجمان ذبیح اللہ مجاہد نے کہا ہے کہ امیر المومنین کی وفات کی خبر جھوٹی ہے وہ زندہ ہیں اور اس وقت قندھار کے مقام پر سیاسی و عسکری معاملات پر مشاورت جاری رکھے ہوئے ہیں ان شاء اللہ چند دن بعد منظر عام پر آئیں گے
”لڑکیاں اور لڑکے اب یونیورسٹیوں میں اکٹھے تعلیم حاصل نہیں کر سکیں گے اور علیحدہ کلاسز میں اسلامی قانون کے مطابق پڑھائی جاری رکھ سکیں گے۔”
جبکہ ترجمان ڈاکٹر محمد نعیم نے کہا کہ طالبان جلد ہی افغانستان میں حکومت بنائیں گے۔
ڈاکٹر محمد نعیم نے کہا کہ افغانستان میں خواتین کے کام کرنے پر کوئی پابندی نہیں ہے لیکن خواتین کو اسلام کے دائرے میں رہتے ہوئے ان کے تمام حقوق دیے جائیں گے۔
انہوں نے کہا کہ حکومت بنانے کے لیے مشاورت اور کام جاری ہے اور جلد ہی افغانستان میں ایک حکومت بن جائے گی اور اس حکومت کا اعلان کیا جائے گا۔ انہوں نے یہ بھی کہا کہ وہ کسی دوسرے ملک کے اندرونی معاملات میں کام نہیں کریں گے اور کسی دوسرے ملک کو افغانستان کے اندرونی معاملات میں کام کرنے کی اجازت نہیں دیں گے۔
