Author: Ayesha Rehmani

اسلام آباد: گورننس کی بہتری کے لیے نئے تعینات شدہ ماہرین نے وزیراعظم سے ملاقات کی۔

باغی ٹی وی : وزیرِاعظم محمد شہباز شریف کے ادارہ جاتی اصلاحات کے ایجنڈے پر عملدرآمد شروع کر دیا گیا ہے،گورننس کی بہتری کے لیے نئے تعینات شدہ ماہرین نے وزیراعظم سے ملاقات کی،اسلام آباد میں ہونے والی اس ملاقات میں وفاقی وزیرِ اقتصادی امور احد خان چیمہ، رانا احسان افضل اور متعلقہ اعلی حکام نے شرکت کی ملاقات میں نئے تعینات شدہ افسران کے تعارف کے ساتھ ساتھ ان کو ان کی ذمہ داریوں سے بھی آگاہ کیا گیا،وزیر اعظم کو بتایا گیا کہ یہ ماہرین اپنے شعبہ جات میں حکومت کو ماہرانہ و تنقیدی رائے اور جائزہ دیں گے جس سے مختلف سیکٹرز میں بہتر فیصلے کرنے میں مدد ملے گی۔

اس موقع پر وزیرِاعظم محمد شہباز شریف نے شرکا سے گفتگو کرتے ہوئے کہا کہ گورننس کی بہتری کے لیے ماہرین کی تعیناتی سے فیصلہ سازی کے عمل میں بہتری آئے گی اور عوامی مفاد کے اہم فیصلوں کی ماہرین کی رائے اور تنقیدی جائزے کے بعد منظوری سے دور رس مثبت نتائج مرتب ہوں گے میرے لیے یہ انتہائی قابل مسرت امر ہے کہ ہم باصلاحیت اور اپنے شعبوں میں گراں قدر خدمات سر انجام دینے والے لوگوں کی خدمات سے مستفید ہوں گے اور آپ سب پر ملکی امور کی فیصلہ سازی میں ماہرانہ رائے اور تعمیری سوچ شامل کرنے کی اہم ذمہ داری ہے–

وزیرِ اعظم کا کہنا تھا کہ حکومت ملک کے ہر شعبے میں بہتری کے لیے اصلاحات کا ایجنڈا نافذ کر رہی ہے دور جدید میں ڈیجیٹائزیشن، خودکار نظام اور فیصلہ سازی میں بہتری ہی ترقی و خوشحالی کے ضامن ہیں، انہوں نے کہا کہ پر امید ہوں کہ آپ اپنی ذمہ داریاں انتہائی احسن طریقے سے سر انجام دیں گے۔

اسلام آباد: نائب وزیراعظم اور وزیر خارجہ سینیٹر اسحاق ڈار نے کہا ہے کہ ملکی بہتری کے لئے اقدامات اٹھانا ہوں گے-

باغی ٹی وی : نائب وزیراعظم نے پارلیمنٹ اجلاس سے خطاب میں کہا کہ احتجاج کے باعث ملک کا روزانہ 190ارب روپے کا نقصان ہوتا ہے، احتجاج کے نام پر توڑ پھوڑ ریاست کا نقصان ہے، کیا وہ نقصان ہمارا تھا یا پاکستان کا تھا؟ ہمیں ماضی سے سبق سیکھنے کی ضرورت ہے، یلغار کرنے سے مسائل حل نہیں ہوتے ۔

وزیر خارجہ نے کہا کہ پی ٹی آئی نے اپنے دور میں مخالفین پر سیاسی کیسز بنوائے تھے، چیئرمین نیب کو بلا کرکیسز بنانے کا کہا جاتا تھا، کیا 2018 میں چیئرمین نیب کو ہدایت نہیں دی جاتی تھیں؟ ن لیگ کی حکومت آنے کے بعد ہم نے میثاق معیشت پرکام کیا، مجھے پہلے میثاق معیشت کی بات کرنے پر حمایت نہیں ملی تھی۔

اسحاق ڈار نےکہا کہ ماضی میں 35 پنکچر کی بات کرنے والے 2018 کے عام انتخابات کی بات کیوں نہیں کرتے؟احتجاج کے دوران تشدد سے سیکیورٹی اہلکارشہید اور زخمی ہوئے ہیں، 9 مئی کو بھی احتجاج کے دوران حدود کراس کی گئیں۔

اسلام آباد: وفاقی کابینہ میں مزید 10 ارکان کو شامل کیے جانے کا امکان ہے۔

باغی ٹی وی :حکومتی ذرائع کے مطابق وفاقی کابینہ میں توسیع وفاقی کابینہ میں توسیع کا فیصلہ کر لیا گیا ہے اور رواں ماہ کے دوران وزیراعظم کی جانب سے کابینہ میں توسیع کا اعلان کئے جانے کا امکان ہے، صدر ن لیگ نواز شریف پرانے اور تجربہ کار افراد کو کابینہ میں لانے کے خواہاں کابینہ میں دس مزید ارکان شامل کئے جائیں گے

ذرائع کے مطابق سردار یوسف، طارق فضل چوہدری، بیرسٹر عقیل ملک کو وفاقی کابینہ میں شامل کیا جاسکتا ہے،حنیف عباسی، سعد وسیم، شیخ آفتاب کو بھی وفاقی کابینہ میں شامل کیے جانے کا امکان ہے ن لیگ کی قیادت کی 2 خواتین کو بھی وفاقی کا بینہ میں شامل کرنے پر مشاورت جاری ہے۔

اسلام آباد: پاکستان اور آذربائیجان کے درمیان تجارتی تعلقات کو مضبوط بنانے اور باہمی تجارت میں سہولیات فراہم کرنے کیلئے نئے ٹرانزٹ ٹریڈ معاہدے کا فیصلہ ہوا ہے-

باغی ٹی وی : فیڈرل بورڈ آف ریونیو(ایف بی آر )نے حکومت پاکستان اور آذربائیجان کے درمیان نئے ٹرانزٹ تجارت معاہدے میں ترامیم کامسودہ جاری کردیا ہے، معاہدے کا مقصد دونوں ممالک کے درمیان تجارتی تعلقات کو مضبو ط بنانا اور باہمی تجارت میں سہولیا ت فراہم کرنا ہےایف بی آر نے اس حوالے سے نئے قواعد و ضوابط پرمبنی مسودہ کا نوٹی فکیشن جاری کردیا ہے جس میں ٹرانزٹ تجار ت کے مختلف پہلوؤں کا احاطہ کیا گیا ہے۔

مسودے کے تحت پورٹ، قاسم اور گوادر کی بندرگاہ تجارتی سامان کی نقل و حمل کے لیے اہم مقامات قرار دئیے گئے ہیں مسودہ کے مطابق آذربائیجان کے کاروباری ادارے، حکومت، اور سفارتی مشنز کو پاکستان کسٹمز کے کمپیوٹرائزڈ سسٹم میں رجسٹریشن کرانا ہوگا تاکہ وہ تجار تی سہولیات کا فائدہ اٹھا سکیں۔

تجارتی سامان لے جانے والی گاڑیوں کو دونوں ممالک کے متعلقہ حکام سے اجازت نامہ حاصل کرنا ہوگا، ہر گاڑی کو ٹریکرز اور کسٹمز سے منسلک کیا جائے گا تاکہ سامان کی نگرانی ممکن ہو سامان کی نقل و حمل کے دوران کسی بھی نقصان کی صورت میں کارروائی کے قواعد بھی وضع کیے گئے ہیں۔

معاہدے کے تحت دونوں ممالک ضرورت پڑنے پر اضافی اجازت نامے جاری کر سکتے ہیں، تاہم ان پر مقررہ چارجز لاگو ہوں گے، تجارتی سامان کی نگرانی اور شفافیت کے لیے بیمہ گارنٹی فراہم کرنا لازمی ہوگا یہ معاہدہ دونوں ممالک کے درمیان اقتصادی تعلقات کو فروغ دینے کے ساتھ ساتھ خطے میں بین الاقوامی تجارت کی نئی راہیں کھولے گا اس سے نہ صرف پاکستان کی بندرگاہوں کی اہمیت میں اضافہ ہوگا بلکہ آذربائیجان کے لیے بھی عالمی منڈیوں تک رسائی میں آسانی ہوگی۔

نوٹیفیکیشن میں تمام متعلقہ فریقین سے درخواست کی گئی ہے کہ وہ 15 دن کے اندر ان قواعد پر اپنی آراء یا تجاویز پیش کریں تاکہ اس کی حتمی منظوری دی جا سکے۔

اسلام آباد: وزیر دفاع خواجہ آصف نے الزام عائد کیا ہے کہ 26 نومبر کے احتجاج میں علی امین کے گارڈز نے اپنے ورکرز پر فائرنگ کی۔

باغی ٹی وی : قومی اسمبلی میں خطاب کرتے ہوئے خواجہ آصف کا کہنا تھاکہ پی ٹی آئی نے 12 کارکنان کی شہادت کا ذکر کیا لیکن کسی کےورثا سامنے نہیں آئے، سیاسی تقریر میں سیاسی باتیں کریں پی ٹی آئی میں اختلافات ہیں کہ ہر شخص الگ بیان دیتا ہے، بغیر ثبوت کے اس قسم کی ہوائی باتیں کرنا اجتماعی شعور کی توہین ہے، تحریک انصاف کے رہنماؤں کے بیانات میں تضاد ہے، بشریٰ بی بی نے کہا کہ مجھے چھوڑ کر سارے لوگ بھاگ گئے۔

وزیردفاع نے الزام عائد کیا کہ جب علی امین بھاگ رہے تھے تو ان کے ورکرز نے ان کی گاڑی پر پتھراؤ کیا، یہ بھی آن ریکارڈ ہے علی امین کے گارڈز نے اپنے ورکرز پر فائرنگ کی، انہوں نے اب صوبائیت کا کارڈ کھیلنا شروع کردیا، پی ٹی آئی ابھی تک مرنے والوں کی تعداد نہیں بتا سکی، لطیف کھوسہ کچھ کہتے ہیں باقی سارے کچھ کہتے ہیں، اب یہ 12افراد کہہ رہے ہیں لیکن ان کا بھی ڈیٹا کسی کو نہیں دے سکے ہاؤس میں ان کے بھاگنے کی ویڈیوز چلائیں، جب دھرنے کا موقع آیا ، کھڑے رہنے کا موقع آیا تو یہ سارے بھاگ گئے۔

وزیر دفاع کا کہنا تھاکہ انہوں نے اب سول نافرمانی کی کال دی ہے، دس سال پہلے بھی انہوں نے سول نافرمانی کی کال دی تھی، کنٹینر پر کھڑے ہوکر بانی پی ٹی آئی نے یوٹیلٹی بلز جلائے تھے لیکن کسی نے ان کی کال پر لبیک نہیں کہا اور ان کی کال فیل ہوگئی۔

انہوں نے کہا کہ میرا چیلنج ہے کوئی پاکستانی یوٹیلٹی بل دینے سے انکار نہیں کرے گا، میں اصرار کرتاہوں کہ سول نافرمانی کی کال پر یہ اسٹینڈ لیں، لوگوں نے انہیں مسترد کردیا تھا آج بھی عوام ان کو مسترد کریں گے، بیرون ملک رہنے والے بھی ان کی بات نہیں مانیں گے، انہیں سول نافرمانی کی تحریک پر کھڑے رہنا چاہیے تاکہ انہیں معلوم ہوسکے کہ کتنے لوگ ان کے ساتھ ہیں۔