کوئٹہ: نگراں وزیراطلاعات بلوچستان نے مستونگ دھماکے کے شہدا کے لواحقین اور زخمیوں کی مالی امداد کا اعلان کیا ہے جس میں لواحقین کو فی کس 15 لاکھ روپے، شدید زخمی کو5 لاکھ اور معمولی زخمی کو 2 لاکھ روپے دینے کا اعلان کیا کہا کہ وفاقی حکومت سے رابطے میں ہیں تاکہ پیکج کو بڑھایا جا سکے۔
باغی ٹی وی: کوئٹہ میں پریس کانفرنس کرتے ہوئے نگراں وزیراطلاعات جان اچکزئی کا کہنا تھا کہ اسمگلنگ سے دہشتگردوں کو فائدہ ہوتا ہے، جس کی روک تھام کیلئےاقدامات کیےجائیں گے، ایرانی تیل کے حوالے سے اقدامات کو تیز کیا جائے گا بیرونی طاقتیں پاکستان کو کمزور کرنا چاہتی ہے، دہشت گردی کے پڑوسی ملک سے تانے بانے ملتے ہیں، پہلے بھی دہشت گردی کے تانے بانے بھارت سے ملتے رہے ہیں، دشمن منظم انداز میں پاکستان کو غیر مستحکم کرنے میں مصروف ہے مگر وہ کامیاب نہیں ہوگا، پاکستان کےعوام بالخصوص بلوچستان کے باسی دہشت گردوں کیخلاف کھڑے ہیں، تمام ریاستی طاقت سے دہشت گردی کو شکست دیں گے، ہم ملک کے ایک ایک انچ کا دفاع کریں گے۔
جان اچکزئی کا کہنا تھا کہ مستونگ میں 56 افراد شہید ہوئے، سانحے پر ہر پاکستانی نے دکھ کا اظہار کیا، ہم شہداء کے لواحقین کی جتنی ممکن ہوگی مدد کریں گے، جلسے جلوس ہر شہری کا حق ہے، ہمارا کام سیکیورٹی دینا ہے، آرمی چیف جنرل عاصم منیر نے اس وژن کا اظہار کیا کہ سانحہ مستونگ کا بدلہ لیا جائےگا، دہشت گردی کو روکنے کے لئے سیکورٹی فورسز نے بے پناہ قربانیاں دی ہیں، ہم اپنے شہداء کا بدلہ ضرور لیں گے اور دہشت گردوں کو ان کے بلوں سے نکالیں گے۔
جان اچکزئی کا کہنا تھا کہ بلوچستان سے دہشتگردوں کا صفایا ضرور ممکن بنایا جائے گا، یہاں کسی کو پر امن ماحول خراب کرنے کی اجازت نہیں دی جائے گی، صوبے کا مستقبل روشن و خوشحال دیکھ رہا ہوں، مستونگ واقعے میں ملوث عناصر کو کیفر کردار تک پہنچایا جائے گا، بلوچستان کو امن کا گہوارہ بنانے کا تہیہ کیا ہے، پاکستان کے عوام اور فورسز کے تعاون سے دہشتگردی کا خاتمہ یقینی بنایا جائے گا۔
دوسری جانب لوچستان کے ضلع مستونگ میں جمعے کے روز ہونے والے خودکش دھماکے کے نتیجے میں جاں بحق ہونے والوں کی تعداد 60 تک جاپہنچی12 ربیع الاول کو عید میلاد النبی ﷺ کے جلوس میں افسوسناک سانحے کے نتیجے میں جاں بحق افراد کی تعداد میں مسلسل اضافہ ہورہا ہے۔ ترجمان سول ہسپتال کوئٹہ کے مطابق جان کی بازی ہارنے والوں کی تعداد 55 سے 60 تک جاپہنچی ہے۔
ترجمان کا کہنا ہے کہ سانحہ مستونگ کے 18 زخمی سی ایم ایچ اور سول ہسپتال کوئٹہ میں زیر علاج ہیں، خودکش حملے کی تحقیقات جاری ہیں، حملہ آور کی شناخت کیلئے نادرا سے رابطہ کر لیا گیا ہے۔ حملہ آور کے اعضاء ڈی این اے کیلئے بھجوائے جا رہے ہیں۔ اب تک کوئی گرفتاری عمل میں نہیں لائی جاسکی سانحہ مستونگ کے پیشِ نظر آج کوئٹہ میں شٹر ڈاؤن ہڑتال کا اعلان کیا گیا ہے ہڑتال کے موقع پر تمام دکانیں اور کاروباری مراکز بند رہیں گے۔
