Author: Ayesha Rehmani

میدانی علاقوں میں شدید دھند کے پیش نظر موٹروے پولیس اور پی ڈی ایم اے پنجاب نے الرٹ جاری کر دیا ہے۔

ترجمان موٹروے پولیس کے مطابق موٹروے ایم 4 خانیوال سے ملتان تک جبکہ موٹروے ایم 5 ملتان سے روہڑی تک دھند کی وجہ سے بند کردی گئی ہے انہوں نے خبردار کیا ہے کہ دھند کے دوران لین کی خلاف ورزی خطرناک حادثات کا سبب بن سکتی ہے شہری دن کے اوقات میں سفر کو ترجیح دیں جبکہ دھند کے دوران صبح 10 بجے سے شام 6 بجے تک کے اوقات نسبتاً محفوظ ہیں۔

پی ڈی ایم اے پنجاب کے مطابق صوبے کے میدانی علاقوں میں شدید دھند چھائے رہنے کا امکان ہے جس کے باعث رات اور صبح کے اوقات میں حدِ نگاہ شدید متاثر ہو سکتی ہے۔،ڈی جی پی ڈی ایم اے نے شہریوں کو ہدایت کی ہے کہ وہ رات 12 بجے سے صبح 9 بجے تک غیر ضروری سفر سے گریز کریں۔

ترجمان پی ڈی ایم اے کے مطابق ڈرائیور حضرات فوگ لائٹس کا استعمال کریں، رفتار کم رکھیں اور گاڑیوں کے درمیان محفوظ فاصلہ برقرار رکھیں تاکہ کسی بھی ناخوشگوار حادثے سے بچا جا سکے-

پاکستان ریلوے نے لاہور اور فیصل آباد سے روانہ ہونے والی کئی اہم ٹرینوں کے شیڈول میں شدید دھند کے باعث تبدیلی کا اعلان کیا ہے، یہ تبدیلیاں کراچی، کوئٹہ، راولپنڈی اور دیگر شہروں کیلئے چلنے والی اہم ٹرینوں کو متاثر کرتی ہیں۔

نئے شیڈول کے مطابق،کروکرم ایکسپریس (42-ڈاؤن) اب لاہور سے شام 4:00 بجے روانہ ہوگی، جو پہلے شام 3:00 بجے روانہ ہوتی تھی،پاک بزنس ایکسپریس (34-ڈاؤن) لاہور سے 6:15 بجے روانہ ہوگی، جو پہلے شام 4:30 بجے روانہ ہونے والی تھی،کراچی ایکسپریس (16-ڈاؤن) کا روانگی وقت شام 7:30 بجے مقرر کیا گیا ہے، جو پہلے شام 6:00 بجے روانہ ہوتی تھی، ملت ایکسپریس (18-ڈاؤن) لالہ موسیٰ سے کراچی کے لیے فیصل آباد سے شام 6:50 بجے روانہ ہوگی، جو پہلے شام 5:50 بجے روانہ ہوتی تھی۔

پاکستان ریلوے نے مسافروں کو ہدایت کی ہے کہ وہ 117-042 پر رابطہ کرکے تازہ ترین معلومات حاصل کریں، لاہورڈویژنل سپرنٹنڈنٹ انعام اللہ نے تصدیق کی کہ اسٹیشنوں پرمسافروں کی سہولت کیلئے عملہ موجود رہے گا تاکہ روانگی اوردیگر معلومات فراہم کی جا سکیں،یہ شیڈول تبدیلی مسافروں کی حفاظت کے لیے کی گئی ہے کیونکہ دھند کی وجہ سے دیکھنے کی حد کم ہو گئی ہے۔

لاہور: وزیراعلیٰ پنجاب مریم نواز کا کہنا ہے کہ رصحت کے شعبے میں مزید اصلاحات کے ذریعے عوام کو بہترسہولیات فراہم کی جائیں گی۔

وزیراعلیٰ پنجاب مریم نواز نے سوشل میڈیا پر جاری پیغام میں بتایا کہ جب انہوں نے وزیراعلیٰ پنجاب کا منصب سنبھالا تو ایک انتہائی تکلیف دہ حقیقت سامنے آئی کہ پنجاب میں دل کے عارضے میں مبتلا بچوں کے آپریشن کے لیے برسوں پرانی ویٹنگ لسٹ موجود تھی، جس کے باعث کئی بچے تشویشناک حالت میں تھے اور تاخیر کے نتیجے میں قیمتی جانیں ضائع ہو رہی تھیں۔

وزیراعلیٰ نے کہا کہ اس سنگین صورتحال کے پیش نظر چیف منسٹر چلڈرن ہارٹ سرجری پروگرام کا آغاز کیا گیا تاکہ بچوں کو بروقت اور معیاری علاج کی سہولت فراہم کی جا سکے اس پروگرام کے تحت صرف چند ماہ کے دوران 9 ہزار سے زائد بچوں کے دل کے کامیاب آپریشن کیے جا چکے ہیں، یہ آپریشنز پنجاب کے سرکاری اور نجی اسپتالوں میں کیے گئے، جس سے علاج کی استعداد میں نمایاں اضافہ ہوا۔

انہوں نے بتایا کہ اس پروگرام کے نتیجے میں پنجاب میں اب دل کے عارضے میں مبتلا بچوں کے لئے کوئی ویٹنگ لسٹ موجود نہیں رہی جو ایک بڑی کامیابی ہے بچوں کی جانیں بچانا حکومت کی اولین ترجیح ہے اورصحت کے شعبے میں مزید اصلاحات کے ذریعے عوام کو بہترسہولیات فراہم کی جائیں گی۔

مریم نوازنے اس عزم کا اظہارکیا کہ صوبائی حکومت آئندہ بھی عوامی فلاح کے منصوبوں کوترجیح دے گی تاکہ ہر شہری کو بروقت اورمعیاری علاج میسرآ سکے۔