Author: Ayesha Rehmani

اسلام آباد: ایشیائی ترقیاتی بینک کی ڈائریکٹر جنرل برائے وسطی و مغربی ایشیا لیہ گٹیریز نے وفاقی وزیر اقتصادی امور احد چیمہ سے ملاقات کی-

اقتصادی امور کے ترجمان کی جانب سے جاری بیان کے مطابق ایشیائی ترقیاتی بینک کی ڈائریکٹر جنرل برائے وسطی و مغربی ایشیا لیہ گٹیریز نے وفاقی وزیر اقتصادی امور احد چیمہ سے ملاقات کی جہاں وفاقی وزیر نے ایم ایل ون ریلوے منصوبے میں اے ڈی بی کی جانب سے مسلسل معاونت کو سراہا، وفاقی حکومت صوبائی حکومتوں کے ساتھ ہم آہنگی میں ترقیاتی وسائل کو مؤثر طریقے سے استعمال کرنے کے لیے پرعزم ہے، ترقیاتی منصوبوں کے بروقت نفاذ میں اے ڈی بی اور عالمی بینک کی معاونت قابل ستائش ہے،ڈی جی لیہ گٹیریز نے حکومتی اصلاحاتی ایجنڈے، میکرو اکنامک بحالی اور مالی استحکام کے لیے کی جانے والی کاوشوں کو قابل تحسین قرار دیا۔

ڈجی جی اے ڈی بی لیہ گٹیریز نے کہا کہ ایم ایل ون جیسے منصوبوں کو خصوصی اہمیت دینا حکومت کی جانب سے ایک اچھا قدم ہےحکومت کی جانب سے ایم ایل ون جیسے منصوبوں کو خصوصی اہمیت دینا قابل تحسین ہے۔

وفاقی وزیر سے ملاقات کے دوران اے ڈی بی کی کنٹری ڈائریکٹر ایما فین، اقتصادی امور ڈویژن اور اے ڈی بی کے سینئر حکام بھی موجود تھے۔

اسلام آباد:پاکستان تحریک انصاف نے اسلام آباد بلدیاتی الیکشن میں بھرپور انداز سے حصہ لینے کا اعلان کر دیا۔

پاکستان تحریک انصاف اسلام آباد کے تمام اسٹیک ہولڈرز کا اجلاس ہوا، میٹنگ کی صدارت صدر اسلام آباد ریجن عامر مسعود مغل نے کی،ریجنل سیکرٹری اور چیئرمین بلدیات کمیٹی ملک عامر علی اعوان سمیت سینیئر قیادت نے شرکت کی سینیٹر فوزیہ ارشد، شعیب شاہین، سید فرزند شاہ اور علی بخاری بھی میٹنگ میں شریک ہوئے،پی ٹی آئی کے مطابق حکومت کی جانب سے بلدیاتی ایکٹ میں متنازع ترامیم کے باوجود الیکشن میں حصہ لیں گے، تحریک انصاف بلدیاتی الیکشن میں ضلع بھر میں کلین سویپ کرے گی۔

واضح رہے کہ اسلام آباد بلدیاتی انتخابات کیلئے پولنگ 15فروری 2026 کو ہوگی،الیکشن کمیشن نے اسلام آباد میں بلدیاتی انتخابات کا شیڈول جاری کردیا، نوٹیفیکیشن میں کہا گیا کہ نامزدگی فارم جمع کرانے کا مرحلہ 22 سے 27 دسمبر تک جاری رہے گا امیدواروں کے نام 29 دسمبر کو شائع کیے جائیں گے جب کہ کاغذاتِ نامزدگی کی سکروٹنی 30 دسمبر سے 3 جنوری تک ہوگی، ریٹرننگ افسران کے فیصلوں کے خلاف اپیلیں 5 سے 8 جنوری تک دائر کی جاسکیں گی اور درخواستوں پر فیصلے 9 سے 13 جنوری کے درمیان سنائے جائیں گے،نظرثانی شدہ فہرست 14 جنوری کو جاری ہوگی، کاغذاتِ نامزدگی 15 جنوری تک واپس لیے جاسکیں گے اور انتخابی نشانات کی الاٹمنٹ 16 جنوری کو کی جائے گی۔

وزیر اعظم شہباز شریف کے ترجمان مشرف زیدی کا کہنا ہے کہ یہ خبر غلط ہے کہ 2 سال سے راولپنڈی کی اڈیالہ جیل میں قید سابق وزیر اعظم عمران خان کے اہل خانہ، وکلا اور تحریک انصاف کے رہنماؤں کو ملنے نہیں دیا جاتا یا انھیں ’قید تنہائی‘ میں رکھا گیا ہے۔

برطانوی نشریاتی ادارے اسکائی نیوز سے انٹرویو میں وزیر اعظم شہباز شریف کے ترجمان مشرف زیدی نے عمران خان کو ’قید تنہائی‘ میں رکھے جانے سے متعلق پی ٹی آئی رہنماؤں کے الزامات اور دعوؤں کو مسترد کردیا،انہوں نے بتایا کہ عمران خان قریب 860 روز سے جیل میں ہیں اور اصولاً انہیں ہر ہفتے ایک ملاقات کی اجازت ہونی چاہیے مگر انہوں نے ’112 ہفتوں کے دوران 870 ملاقاتیں کی ہیں، عمران خان نے اپنی بہنوں سے ’137 ملاقاتیں کی ہیں جن میں سے 45 علیمہ، 49 عظمیٰ اور 43 نورین کے ساتھ ہوئیں،عمران خان نے اپنی بہنوں سے لگ بھگ 140 ملاقاتیں کی ہیں جو کہ ’کہیں سے بھی قید تنہائی نہیں لگ رہا۔‘

انہوں نے کہا کہ عمران خان نے اپنے وکلا سے 451 ملاقاتیں کی ہیں جبکہ 30 سے زیادہ مرتبہ ڈاکٹروں نے ان کا طبی معائنہ کیا ہے،اس میں کوئی فوجی ڈاکٹر شامل نہیں تھے ان کے ذاتی معالج نے بھی کئی بار ان کا معائنہ کیا ہے،انہوں نے جیل مینوئل کا حوالہ دیتے ہوئے کہا کہ ملاقات کے دوران سیاسی امور پر بات چیت کی اجازت نہیں دی جائے گی، جیل میں جانے کے بعد سے عمران خان کے ایکس اکاؤنٹ سے 775 پیغامات جاری کیے گئے ہیں۔

واضح رہے کہ گذشتہ ہفتوں کے دوران عمران خان کی صحت کے بارے میں افواہیں گردش کرتی رہی ہیں لیکن ان کی بہن عظمیٰ خان ملاقات کے بعد صحافیوں سے مختصر بات کرتے ہوئے بتایا تھا کہ عمران خان کی صحت الحمد اللہ ٹھیک ہے ۔

وزیراعظم نے پاکستان ٹیلی وژن (پی ٹی وی) میں انتظامی امور کو یقینی بنانے کے لیے وفاقی سیکریٹری اطلاعات کو منیجنگ ڈائریکٹر پی ٹی وی کا اضافی چارج دے دیا ہے۔

ذرائع کے مطابق یہ ذمہ داری ریگولرایم ڈی کی تعیناتی تک دی گئی ہے، جس کے تحت سیکریٹری اطلاعات آئندہ تین ماہ تک اس عہدے پرفرائض انجام دیں گے،حکومتی فیصلے کے مطابق سیکریٹری اطلاعات کو اضافی چارج سونپنے کا مقصد پی ٹی وی میں انتظامی تسلسل برقرار رکھنا اور جاری امورکومتاثر ہونے سے بچانا ہے،مستقل ایم ڈی کی تعیناتی کے لیے متعلقہ حکام کی جانب سے مشاورت جاری ہے تاہم عبوری مدت کے دوران سیکریٹری اطلاعات ہی ادارے کے انتظامی معاملات دیکھیں گے۔

واضح رہے کہ اس سے قبل بھی وفاقی سیکریٹری اطلاعات پی ٹی وی کے منیجنگ ڈائریکٹر کا چارج سنبھال چکے ہیں۔